Кондак 1

Избранный Богом от агарянскаго рода царска, и вчиненный в недра Православныя Христовы Церкве, наученный святыми апостолы Петром и Павлом к созиданию во имя их святыя обители, приими от нас недостойных хвалебную песнь тебе приносимую:

Радуйся, преподобне царевиче Петре, Ростовский чудотворче.

Икос 1

Ангела тя земнаго видяще, о небесный гражданине, преподобне царевиче Петре, возревновахом мы недостойнии похвальная воспевати тебе сице:

Радуйся, терпением угодивый Господу.

Радуйся, яко Господь внят ти, и услыша молитву преподобнаго Своего.

Радуйся, яко удалился еси, бегая от дому и племене твоего.

Радуйся, яко жительствуя среди языка безбожнаго, желание возымел ко Христу обратитися.

Радуйся, яко бдел еси в молитве сердечней к Богу.

Радуйся, яко колена твоя изнемогоста от поста, но душа твоя бодрственна бысть в духовном делании.

Радуйся, яко плоть твоя изменися трудов и пощения ради, но дух твой возвысися в воздержании.

Радуйся, яко исповедятся Господеви о обращении твоем преподобнии Его.

Радуйся, яко с ними воспеваеши на небесех славу Божию.

Радуйся, яко с ними выну благословиши Его.

Радуйся, яко ублажаеши с ними величие Святыни Его.

Радуйся, преподобне царевиче Петре, Ростовский чудотворче.

Кондак 2

Видя святый Петр себе непорабощенна плотскому сладострастию, радовашеся духом, желая прилепитися Христу всем сердцем, и воспевати Богу: Аллилуия.

Икос 2

Разум недоразумеваемый о Триипостасном Божестве, и о безсеменном воплощении Бога Слова, разумети не искаху ослепленнии прелестию идолослужения древнии ханы Ордынстии: ты же, святый Петре, по благодати Божией озарившей тя, и в неверии еще ти сущу светильника Ростовския паствы епископа Кирилла в научение тя христианстей вере взыскал еси. Сего ради ублажаем тя сице:

Радуйся, подобне Корнилию сотнику, и в язычестве добродетельми сиявый.

Радуйся, подобне ему, вместо апостола Петра преемника апостольскаго, епископа Кирилла взыскавый.

Радуйся, яко на тебе сбыстся апостолькое слово: «Во всяком языце бояйся Бога и делаяй правду, приятен Ему есть».

Радуйся, яко всевидящее око Божие, узрев твое усердие, благодатию Святаго Духа озари тя.

Радуйся, яко неизреченный Божий Промысл потребы ради Церкве, тебе же во спасение епископа Кирилла во Орду приведе.

Радуйся, яко Ростовский иерарх царя Беркая, дядю твоего, беседою о чудесех в Церкви Христовой являемых услади.

Радуйся, яко ты, млад быв юноша, глаголами святителя Кирилла сердце свое умили.

Радуйся, яко размышлением о христианстей вере ум твой просвети.

Радуйся, яко в любовь Христову душею своею уловлен был еси.

Радуйся, яко от любве сердечныя к Богу слезы от очию источи.

Радуйся, яко мерзость идолослужения презре.

Радуйся, яко в христианстей вере утвердитися искренно вожделел еси.

Радуйся, преподобне царевиче Петре, Ростовский чудотворче.

Кондак 3

Сила Вышняго осени тя царевиче Петре, отвергши бесовское служение твари, прилепитися Христовой вере православней. Темже яко ревнитель святыя веры показался еси крепок всем тя воспевающым и радостно поющым Богу: Аллилуия.

Икос 3

Имый богоприятную мысль, святый Петре, познати истины христианския веры, при вторичном пришествии во Орду Ростовскаго святителя Кирилла, ради исцеления царева сына, и видев чудесное его оздравление благодатию Христовою и молитвами архиереа Божия совершившееся, ты крепчае прилепился еси ко Христу, и возжелал еси быти христианин. Темже радостно взываем ти таковая:

Радуйся, яко подобник был еси соименному ти верховному апостолу Петру.

Радуйся, подобно ему, оставившему мрежи и отца своего, и ты дом царский и сродство свое оставил еси.

Радуйся, яко славу наследия земнаго царства во Орде ты презрел еси.

Радуйся, яко вся красная мира сего во уметы Христа ради вменил еси.

Радуйся, яко во след Христа Бога радостно потекл еси.

Радуйся, яко женонеистовую страсть агарянскую отвергл еси.

Радуйся, яко теплою душею крещения святаго ты взыскал еси.

Радуйся, яко тем осияние Христово в сердце твоем приял еси.

Радуйся, яко Возлюбившаго нас прежде сложения мира приискренне возлюбил еси.

Радуйся, яко благое иго Христово прияти восхотел еси.

Радуйся, яко бремя Иисусово легкое понести потщался еси.

Радуйся, преподобне царевиче Петре, Ростовский чудотворче.

Кондак 4

Буря страстей юностнаго телесе и мирских прелестей и славы земныя не поколеба храма души твоея, преподобне Петре: основан бо бе на камени краеугольном исповедания Христа, Ему же яко Богу и Спасителю нашему воспеваем: Аллилуия.

Икос 4

Слыша князь и вси людие богоспасаемаго града Ростова, яко первосвятитель их Кирилл грядет из посольства с дары и честию от царя, имея при себе приобретенное его наставлении духовное сокровище, тебе блаженне Петре, хотящаго прияти православную веру во граде Ростове, возрадовашася радостию духовною. Темже и мы, аще и недостойнии, дерзаем в радости сердец взывати тебе сице:

Радуйся, от любве душевныя к Богу отечество твое оставивый.

Радуйся, желания ради ко христианстей вере обратитися, богатство и честь мирскую суету быти вменивый.

Радуйся, плотскую любовь матере твоея, царя дяди, и всех презревый.

Радуйся, единаго Христа возлюбивый.

Радуйся, с любовию сердечною наставление епископа Кирилла о вере христианской послушавый.

Радуйся, отшествия епископа Кирилла из Орды в Россию усердно назиравый.

Радуйся, в благочестивом твоем намерении, препятствия сродников не убоявыйся.

Радуйся, тайно из дому твоего удаливыйся.

Радуйся, епископа на пути достигнувый.

Радуйся, пояти тя с собою его умоливый.

Радуйся, от горящия веры слезами многими ланиты твоя оросивый.

Радуйся, яко незлобивое овча Христова стада со пастырем Церкве во ограду христоименитых людей вшедый.

Радуйся, преподобне царевиче Петре, Ростовский чудотворче.

Кондак 5

Боготечней звезде ты, преподобне царевиче Петре, подобен был еси, егда из нечестивыя Орды, к богоспасаемому граду Ростову путь шествия творил еси. Святитель же Божий Кирилл, радуяся душею о твоем благом произволении, с трепетом воспеваше Богу: Аллилуия.

Икос 5

Видеша людие Ростовстии, яко возсия в сердце твоем свет Христа Бога, и из неверия обрати тя в правоверие, возрадовашася сердцы своими, сего ради и мы удивившеся неизреченному смотрению Божию, вопием ти:

Радуйся, по пришествии в Ростов, благолепие храмов Божиих с любовию и благоговением созерцавый.

Радуйся, себе самаго во храм духовен устроивый.

Радуйся, и не быв еще просвещен святым крещением, в Церкви Божией пребывавый.

Радуйся, церковная чтения и пения сладце внимавый.

Радуйся, по умертвии царя Беркая во Орде возвратитися туда не восхотевый.

Радуйся, и взысканию о тебе бывшу, под кровом святителя себе укрывый.

Радуйся, мздовоздаяния в Царствии Небеснем возжелавый.

Радуйся, крещения святаго со усердием и верою испросивый.

Радуйся, таинство крещения рукою епископа приемый.

Радуйся, во имя апостола Петр нареченный.

Радуйся, грамоте и церковному чтению и пению прилежно научивыйся.

Радуйся, для утверждения в вере христианстей в доме архиерейстем вселивыйся.

Радуйся, преподобне царевиче Петре, Ростовский чудотворче.

Кондак 6

Проповедует созданная тобою во имя святых верховных апостол Петра и Павла святая обитель, яко ты, блаженне Петре, был еси всем благоприветлив и любезен, и якоже древний Иов, око слепым и нога хромым. Сего ради воспеваем Богу: Аллилуия.

Икос 6

Возсиявый во Египте просвещение истины, и отгнавый лжи тму, Христос Бог наш благоволи возсияти и во языческой Ордынской стране молитвами и крепкою верою святителя Кирилла, исцелившаго царева сына от болезни, и тебе святый Петре царевиче, светом познания веры христианския озарившаго. Того ради сице вопием ти:

Радуйся, от языческаго племене в веру Христову призванный.

Радуйся, от тины идолослужения, банею пакибытия обновленный.

Радуйся, от корене злорастленнаго благовонный цвет произрастший.

Радуйся, злостраднаго зловония страстей избегший.

Радуйся, яко пчела люботрудная сладкий сот добродетелей сотворивый.

Радуйся, сладкопитания плотская пренебрегший.

Радуйся, бдению и воздержанию себе с терпением изрядне научивый.

Радуйся, пост возлюбивый.

Радуйся, молитвы сердечныя к Богу возсылавый.

Радуйся, чистоту целомудрия опасно сохранивый.

Радуйся, всякими добродетельми себе украсивый.

Радуйся, преподобне царевиче Петре, Ростовский чудотворче.

Кондак 7

Егда приближися время епископу Кириллу отити ко Господу, он, яко наставник твой, царевиче Петре, в вере христианской не остави тя сира, но утверди на пребывании в доме архиерейстем до пришествия преемника своего. Святый же епископ Игнатий, по вступлении на престол Церкве града Ростова, зря тя преспевающа в возрасте духовном, зело возлюби тя и радуяся духом воспеваше Богу: Аллилуия.

Икос 7

Новое чудо и дивное, премудростию судеб Божиих, исполнися на тебе, блаженне царевиче Петре, егда помышляющу ти создати церковь и при ней монастырь устроити, довольнаго же на дело сие не имущу стяжания, и о сем болезнующу сердцем, случися ти уснути на брезе езера Неро, и видети во сне верховных апостол Петра и Павла грядущих и два мешца злата и сребра на созидание обители во имя их вдающих: возбнув же от сна во ужасе и яве оныя узрев, и в руцех твоих злато и сребро ощутив, возрадовался с трепетом. Того ради и мы воспевати тебе научихомся, глаголюще:

Радуйся, попечение о создании церкви от любве к Богу возъимевый.

Радуйся, об устроении обители неусыпно пекийся.

Радуйся, свое иноческое житие пророчески предзнаменовавый.

Радуйся, на создание оных довольно не имев сокровища, желания своего не оставивый.

Радуйся, несомненную на него надежду имевый.

Радуйся, в соннем видении и яве верховных апостол Петра и Павла узревый.

Радуйся, дарование их тебе злата и сребра в руце приемый.

Радуйся, заповедь их о приобретении триех икон на торжищи исполнивый.

Радуйся, иконы Богоматери с Предвечным Младенцем, святителя Николая и великомученика Димитрия у иконописца, сребром и златом апостольским приобретый.

Радуйся, преподобне царевиче Петре, Ростовский чудотворче.

Кондак 8

Странное чудо является и дивное, яко в туюжде нощь, егда тебе, святый Петре, явишася верховнии апостоли, и святителю Игнатию они же повелеваху, да храм во имя их устроит, епископ же тому видению ужасеся, и пригласив князя, поведа бывшее, и вкупе оба совет о сем сотвориша, и воспеваху Богу: Аллилуия.

Икос 8

Весь быв, блаженне царевиче Петре, погружен в размышление о Бозе по видении апостол и о созидании обители, при молитвенных же и постных трудех, смирению и послушанию и терпению научился еси, якоже повесть жития твоего являет, сего ради вопием ти:

Радуйся, к созиданию обители ревность велию имевый.

Радуйся, заповедь апостольскую тщательно исполнивый.

Радуйся, яко на совет князя со епископом о тебе пришедый.

Радуйся, намерение князя о сочетании тя браком без ропота послушавый.

Радуйся, взысканию тебе князем невесты из честна рода не прекословивый.

Радуйся, тем послушание ко князю и епископу показавый.

Радуйся, "Воля Господня и ваша да будет", — отвещавый.

Радуйся, по желанию князя и епископа, законному супружеству приобщивыйся.

Радуйся, самим епископом святым Игнатием браковенчанный.

Радуйся, апостольская словеса: "Брак честен и ложе нескверно" верно сохранивый.

Радуйся, и в супружеской жизни в делании добродетелей искусна себе явивый.

Радуйся, преподобне царевиче Петре, Ростовский чудотворче.

Кондак 9

Всяк возраст и весь народ града Ростова, вкупе с князем и святым епископом Игнатием, удивившеся приобретенным тобою, блаженне Петре, святым иконам, дивный свет испущающым, внесше их во храм соборный, со усердием воспеваху Богу: Аллилуия.

Икос 9

Вития суемудреннии еллинскаго нечестия последи же магометовым зловерием исполненнии, не могуще истинных догмат православныя веры познати, умолкоша. Мы же слышаще предивное твое из язычества в христианскую веру обращение, похвальная, блаженне Петре, приносим ти вопиюще:

Радуйся, по видении апостолов, сладость духовную в сердце твоем ощутивый.

Радуйся, тогда ум твой Горе вперивый.

Радуйся, помышления твоя в тайны смотрения Божия углубивый.

Радуйся, яко о пременении себе из язычества в христианина веселивыйся.

Радуйся, яко любовию ко Христу и верховным апостолом разжженный.

Радуйся, из врученных тебе от верховных апостол, девятию сребренники и единою златицею, чудныя три иконы приобретый.

Радуйся, яко в радости духа к епископу с теми иконами поспешивый.

Радуйся, святаго епископа в недоумении бывша о видении верховных апостол зревый.

Радуйся, и князя ко епископу пришедша совет благий о устроении храма радостно слышавый.

Радуйся, яко от икон тобою принесенных палата архиерейская дивным светом озарися.

Радуйся, яко чудеса в Церкви совершающаяся духом веры благоразумно уразумевый.

Радуйся, преподобне царевиче Петре, Ростовский чудотворче.

Кондак 10

Спасти хотя душу свою, блаженне царевиче Петре, всякими добрыми нравы себе украшал еси, по словеси апостола Павла: "Елика истинна, елика честна, елика прелюбезна, елика доброхвальна"; сия помышляя, научился в умилении духовнем воспевати Богу: Аллилуия.

Икос 10

Стена был еси ограждения, блаженне царевиче Петре, всем к тебе усердно притекающым. Темже и мы, аще и недостойнии, прибегающе и с любовию тя хваляще, вопием:

Радуйся, благословение архипастыря на устроение храма и обители приявый.

Радуйся, у князя Ростовскаго землю на созидание обители испросивый.

Радуйся, князя искушающа тя, да сребром и златом апостолы вданным, место искупиши, незлобиво послушавый.

Радуйся, назначение цены за уреченное место по девяти сребренник и единой златице послушливо исполнивый.

Радуйся, пророчество святителя Игнатия о неоскудении сребра и злата из мешцев разумевый.

Радуйся, в видении верховных апостол назначенное для обители место, узревый.

Радуйся, сребро и злато, яко дарование от апостол, с верою приемый.

Радуйся, дарованным от них сребром и златом на обитель землю приобретый.

Радуйся, на тоежде сребро и злато монастырь честен устроивый.

Радуйся, яко останки того сребра и злата на удивление и благоговение до позднейших времен оставивый.

Радуйся, яко духовная ограда, мощи твоя святыя во обители обретошася.

Радуйся, преподобне царевиче Петре, Ростовский чудотворче.

Кондак 11

Пение церковное во святей новосозданней тобою обители, во имя святых верховных Апостол совершашеся, ты же, блаженне царевиче Петре, яко строитель храма и обители святыя, радовашеся душею и веселяся сердцем вопиял еси Богу: Аллилуия.

Икос 11

Яко светозарную звезду во обители, и светоносную свещу на свещнице Церкви Христовой, зрим тя, преподобне царевиче Петре, и во умилении душ и сердец наших поюще, взываем ти сице:

Радуйся, и в супружестве быв, обители тобою созданней помогавый.

Радуйся, по скончании супружницы твоея отвергийся мира.

Радуйся, в созданную тобою обитель преселивыйся.

Радуйся, монашеское в ней житие восприявый.

Радуйся, в ангельский образ облеченный.

Радуйся, паки и во иноцех Петром нареченный.

Радуйся, образ добродетельнаго жития всей братии бывый.

Радуйся, смирение глубочайшее стяжавый.

Радуйся, пощению внимавый.

Радуйся, молитвы твоя к Богу яко благовонный фимиам, возносивый.

Радуйся, по трудех многих во обители твоей ко Господу в невечерний свет отшедый.

Радуйся, яко Преблагий Господь, за премногия твоя добродетели, святыя твоя мощи нетлением прослави.

Радуйся, преподобне царевиче Петре, Ростовский чудотворче.

Кондак 12

Велия благодати сподобился еси от Бога, преподобне царевиче Петре, яко из языческия прелести в веру христианскую тя Бог обрати, и из тьмы поклонения твари в познание Евангельския благодати призва: последи же из мирскаго мятежа исхитив, ангелоподобному житию в тишине святыя обители сподоби, по кончине же мощи твоя святыя нетлением прослави. Темже толико тя прославившему Богу со страхом и радостию вопием: Аллилуия.

Икос 12

Поюще память верховных апостол Петра и Павла и совершающе празднество дванадесяти апостолов, воспоминаем твоя подвиги с любовию, угодниче Божий преподобне царевиче Петре, и всечестную память, и взываем сицевая:

Радуйся, по пути Господню ходивый.

Радуйся, веру Христову до конца соблюдый.

Радуйся, Петру, каменю веры, последовавый.

Радуйся, Павлу, сосуду избранному, елико мощно уподобивыйся.

Радуйся, всем святым апостолом во благочестии ревновавый.

Радуйся, древних преподобных отцев подражателю.

Радуйся, ангельских чинов сопричастниче.

Радуйся, царей православных поможение.

Радуйся, святителей веселие.

Радуйся, лика преподобных красото.

Радуйся, немощных целителю и злобных бесов прогонителю.

Радуйся, телес и болезней наших врачу.

Радуйся, о душах наших теплый к Богу молитвенниче.

Радуйся, преподобне царевиче Петре, Ростовский чудотворче.

Кондак 13

О препетый и прехвальный чудотворче отче наш преподобне царевиче Петре, видимо в созданней тобою святей обители мощами твоими пребываяй, невидимо же от небесных чертог нас грешных чад своих, назираяй! Приими сие малое приношение, от любве душевныя тебе возсылаемое, и от всякия избави напасти всех: дерзновенным же твоим ко Христу Богу ходатайством будущия нас изми муки, да с тобою в безконечныя веки воспеваем Богу: Аллилуия.

Этот кондак читается трижды, затем икос 1-й и кондак 1-й

Молитва

О преблаженне и преподобне Петре царевиче, Ростовский чудотворче! Якоже из мрака языческаго во свет Евангельскаго учения Господь тя призва: тако умоли Его, да и нас по неизреченней Своей благости и человеколюбию измет всесильною Своею Десницею из тмы греховныя, и осияет сердца наша к деланию Его божественных заповедей. Якоже ты избег мятежа мирских волнений, во ангелоподобное безпечальное житие сподобился еси достигнути, тако сподоби и нам грешным моря сего, влаемаго страстьми, пучину безмятежно преплыти, имея тя, отче, кормчаго о Господе нашем, и достигнути чистым покаянием ко пристанищу спасения вечнаго. И якоже имел еси споспешников тебе верховных апостолов Петра и Павла в созидании обители, тако подвигни их умилосердитися и о нас недостойных, и даровати нам от сугубыя апостольския благости дерзновение ко Христу Богу. Веруем бо, яко аще мощи твоя святыя и сокровенны в земли, но ты царствуеши со избранными Божиими на небеси: исходатайствуй убо, да и нам грешным молитвами твоими, да отверзется дверь Царствия Небеснаго в безконечныя веки. Аминь.