Тропари и кондаки Господские
Всемилостивому Спасу (1/14 августа)
Тропарь, глас 8
С вы́шних призира́я, убо́гия прие́мля,/ посети́ нас, озлобле́нныя грехи́, Влады́ко Всеми́лостиве,/ моли́твами Богоро́дицы да́руй душа́м на́шим ве́лию ми́лость.
Ин тропарь, глас 4
Свети́льниче со́лнечный, Всеми́лостивый Спа́се,/ просвеще́нием сия́ния Твоего́ пода́й и нам сло́во, да восхва́лим чи́стою со́вестию/ Твое́ пребоже́ственное пра́зднество,/ Тебе́ же, Единоро́днаго Сы́на,/ единосу́щна с Ду́хом, сла́вяще,/ да́руеши бо нам мир и ве́лию ми́лость.
Кондак, глас 4
Вся́кия скве́рны, Всеми́лостиве Спа́се, аз бых де́латель,/ и во отча́яния ров впа́дся,/ но стеню́ от се́рдца и вопию́ к Тебе́, Сло́ве:/ уско́ри, Ще́дрый, и потщи́ся на по́мощь на́шу,/ я́ко Ми́лостив.
Благодарственный Спасителю
Тропарь, глас 4
Благода́рни су́ще недосто́йнии раби́ Твои́, Го́споди,/ о Твои́х вели́ких благодея́ниих на нас бы́вших,/ сла́вяще Тя хва́лим, благослови́м, благодари́м, пое́м и велича́ем Твое́ благоутро́бие/ и ра́бски любо́вию вопие́м Ти:/ Благоде́телю Спа́се наш, сла́ва Тебе́.
Кондак, глас 3
Твои́х благодея́ний и даро́в ту́не,/ я́ко раби́ непотре́бнии, сподо́бльшеся, Влады́ко,/ к Тебе́ усе́рдно притека́юще, благодаре́ние по си́ле прино́сим,/ и Тебе́ я́ко Благоде́теля и Творца́ сла́вяще, вопие́м:/ сла́ва Тебе́, Бо́же Преще́дрый.
Индикту (новолетию) (1/14 сентября)
Тропарь, глас 4
Благода́рни су́ще недосто́йнии раби́ Твои́, Го́споди,/ о Твои́х вели́ких благодея́ниих на нас бы́вших,/ сла́вяще Тя хва́лим, благослови́м, благодари́м, пое́м и велича́ем Твое́ благоутро́бие/ и ра́бски любо́вию вопие́м Ти:/ Благоде́телю Спа́се наш, сла́ва Тебе́.
Слава: глас 3:
Твои́х благодея́ний и даро́в ту́не,/ я́ко раби́ непотре́бнии, сподо́бльшеся, Влады́ко,/ к Тебе́ усе́рдно притека́юще, благодаре́ние по си́ле прино́сим,/ и Тебе́ я́ко благоде́теля и Творца́ сла́вяще, вопие́м:/ сла́ва Тебе́, Бо́же Преще́дрый.
И ныне: глас 2:
Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та бла́гости Твоея́, Го́споди,/ сохраня́я в ми́ре лю́ди и град Твой/ моли́твами Богоро́дицы и спаси́ ны.
Кондак, глас тойже:
В вы́шних живы́й, Христе́ Царю́,/ всех ви́димых и неви́димых Тво́рче и Зижди́телю,/ И́же дни и но́щи, времена́ и ле́та сотвори́вый,/ благослови́ ны́не вене́ц ле́та,/ соблюди́ и сохрани́ в ми́ре град и лю́ди Твоя́,/ Многоми́лостиве.
Нерукотворенному Образу (Убрусу) Господа Иисуса Христа (16/29 августа)
Тропарь, глас 2
Пречи́стому Твоему́ Образу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на крест,/ да изба́виши, я́же созда́л еси́, от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.
Кондак, глас тойже
Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во Отчее,/ и Образ непи́санный и Богопи́санный победи́телен,/ ве́дуще нело́жнаго Твоего́ воплоще́ния,/ почита́ем Того́ лобызы́юще.
Величание
Велича́ем Тя,/ Живода́вче Христе́/ и почита́ем вси Пречи́стаго Ли́ка Твоего́ пресла́вное изображе́ние.
Ино величание
Велича́ем Тя,/ Живода́вче Христе,/ и чтим Образ Твой святы́й,/ и́мже нас спасл еси́/ от рабо́ты вра́жия.
Положению ризы Господней (10/23 июля)
Тропарь, глас 4
Днесь притеце́м, ве́рнии,/ к Боже́ственней и цельбоно́сней ри́зе Спаси́теля на́шего Бо́га,/ благоизво́лившаго сию́ пло́тию носи́ти,/ и на Кресте́ Святу́ю Свою́ Кровь излия́ти,/ е́юже искупи́ нас от рабо́ты вра́жия./ Тем благодаря́ще вопие́м Ему́:/ спаси́ оте́чество на́ше,/ и архиере́ев, и град, и вся лю́ди/ честно́ю Твое́ю ри́зою защити́, и спаси́ ду́ши на́ша, я́ко Человеколю́бец.
Кондак, глас тойже
Одея́ние нетле́ния, спаси́тельнаго целе́ния/ всем челове́ком, Влады́ко, дарова́л еси́/ Твое́ Боже́ственное сокро́вище, честну́ю ри́зу,/ я́же есть хито́н,/ е́юже живоно́сную и святу́ю плоть вочелове́чения Твоего́ оде́яти благоволи́л еси́./ Сию́ жела́нием прие́млюще, све́тло пра́зднуем,/ стра́хом же и любо́вию, я́ко Благода́телю воспева́юще, зове́м Ти, Христе́:/ сохрани́ в ми́ре оте́чество на́ше и архиере́ев, и вся лю́ди,/ по вели́цей Твое́й ми́лости.
Величание
Велича́ем Тя,/ Живода́вче Христе́,/ и почита́ем вси Боже́ственныя ри́зы Твоея́ честно́е положе́ние.
Обновлению (освящению) храма Воскресения Христова в Иерусалиме (13/26 сентября)
Тропарь, глас 4
Я́коже вы́шния тве́рди благоле́пие,/ и ни́жнюю споказа́л еси́ красоту́ Свята́го селе́ния сла́вы Твоея́, Го́споди,/ утверди́ сие́ во век ве́ка/ и приими́ на́ша в нем непреста́нно приноси́мая Тебе́ моле́ния, Богоро́дицею,/ всех Животе́ и Воскресе́ние.
Кондак, глас тойже
Не́бо многосве́тлое Це́рковь показа́ся,/ вся просвеща́ющая ве́рныя,/ в не́йже стоя́ще зове́м:/ сей дом утверди́, Го́споди.
Ин кондак, глас 2
Обновле́ние ду́ха в сердца́х/ и просвеще́ние вну́тренним да́руй,/ ве́рою соверша́ющим свяще́нная обновле́ния хра́ма до́му Твоего́,/ ему́же благоволи́л еси́ созда́тися/ в Твое́ Боже́ственное и́мя,/ Еди́не во святы́х прославля́емый.
Воспоминание явления на небе Креста Господня в Иерусалиме (7/20 мая)
Тропарь Кресту, глас 8
Креста́ Твоего́ о́браз ны́не па́че со́лнца возсия́,/ его́же от горы́ святы́я да́же до Ло́бнаго ме́ста просте́рл еси́,/ и в нем Твою́, Спа́се, кре́пость уясни́л еси́,/ сим укрепля́я и ве́рныя лю́ди Своя́,/ я́же и спаса́й вя́шу в ми́ре,/ моли́твами Богоро́дицы, Христе́ Бо́же, и спаси́ нас.
Кондак, глас 4
Отве́рзый небеса́ заключе́нныя,/ на небеси́ пресве́тлыя лучи́,/ на земли́ возсия́ пречестны́й Крест,/ те́мже сия́ние его́ де́йства прие́мше,/ к незаходи́мому наставля́емся све́ту,/ и во бране́х и́мамы его́ ору́жие ми́ра/ непобеди́мую побе́ду.
Обре́занию Господню (1/14 января)
Тропарь Обре́занию, глас 1
На престо́ле огнезра́чнем/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ роди́тися на земли́/ от Отрокови́цы Неискусому́жныя, Твоея́ Ма́тере, Иису́се,/ сего́ ра́ди и обре́зан был еси́, я́ко челове́к осмодне́вный./ Сла́ва всеблаго́му Твоему́ сове́ту,/ сла́ва смотре́нию Твоему́,/ сла́ва снизхожде́нию Твоему́, Еди́не Человеколю́бче.
Кондак, глас 3
Всех Госпо́дь обре́зание те́рпит/ и челове́ческая прегреше́ния, я́ко Благ, обре́зует,/ дае́т спасе́ние днесь ми́ру,/ ра́дуется же в вы́шних и Созда́телев иера́рх,/ и светоно́сный, Боже́ственный таи́нник Христо́в Васи́лий.
Величание
Велича́ем Тя,/ Живода́вче Христе́,/ и почита́ем пречи́стыя пло́ти Твоея́/ зако́нное обре́зание.
Кресту Господню (1/14 августа)
Тропарь Кресту, глас 1
Спаси́, Го́споди, лю́ди Твоя́,/ и благослови́ достоя́ние Твое́,/ победы́ на сопроти́вныя да́руя,/ и Твое́ сохраняя Кресто́м Твои́м жи́тельство.
Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на супоста́ты,/ посо́бие иму́щим Твое́ ору́жие ми́ра,/ непобеди́мую побе́ду.
Величание
Велича́ем Тя, Живода́вче Христе́,/ и чтим Крест Твой святы́й,/ и́мже нас спасл еси́/ от рабо́ты вра́жия.
Ипостасной Премудрости Божией, Спасителю нашему Господу Иисусу Христу (16/29 августа)
Тропарь, глас 1
На престо́ле огнезра́чнем/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ яви́тися на земли́, я́ко челове́к,/ исполня́я предве́чный о нас Сове́т Святы́я Тро́ицы, Христе́ Иису́се;/ сего́ ра́ди и пострада́л еси́ пло́тию,/ да спасе́ши мир и вознесе́ши избра́нныя Твоя́,/ иде́же при́сно, я́ко Бог, во сла́ве ца́рствуеши./ Сла́ва всеблаго́му Твоему́ Сове́ту,/ сла́ва прему́дрому смотре́нию Твоему́,/ сла́ва неизрече́нному снизхожде́нию Твоему, Еди́не Человеколю́бче.
Ин тропарь, глас 8
Прему́дрость о́тчая,/ Сия́ние сла́вы и о́бразе Ипоста́си Его́,/ в нача́ле Небеса́ и зе́млю основа́вый,/ благослови́ достоя́ние Твое́,/ сохрани́ в ми́ре Це́рковь и град Твой и лю́ди Твоя́ спаси́.
Кондак, глас тойже
Избра́нному пре́жде век соде́лати спасе́ние ми́ра,/ Вели́каго Сове́та Ангелу, Сы́ну Бо́жию, Иису́су Христу́,/ прииди́те, ве́рнии, поклони́мся и препаде́м Ему́,/ сла́вяще неизрече́нное о нас Боже́ственное смотре́ние,/ и, я́ко изба́вленнии от ве́чныя сме́рти,/ вознесе́м Ему́, Спаси́телю на́шему и Бо́гу, благода́рственную песнь,/ душа́ми чи́стыми и нескве́рными устна́ми взыва́юще:/ сла́ва Тебе́, Го́споди, сла́ва Тебе́.
Величание
Велича́ем Тя,/ Единоро́дный Сы́не Бо́жий, Иису́се Христе́,/ вся прему́дростию Твое́ю в нача́ле сотво́ршаго,/ и челове́ческий па́дший род от ве́чныя сме́рти/ всеми́лостивно искупи́вшаго.