Пе́снь 1.

Ирмо́с: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Христо́с гряде́т ко креще́нию, Христо́с ко Иорда́ну прихо́дит, Христо́с на́ши в воде́ погреба́ет ны́не грехи́, я́ко Бла́г, с весе́лием воспои́м Ему́, я́ко просла́вися.

Да кропя́т, веселя́щеся, о́блацы весе́лие ве́чное: Христо́с Иису́с предгряде́т вода́ми Иорда́нскими пото́ки грехо́вныя потопи́ти, просвеще́ние все́м да́руя.

Се́ Све́т явля́ется, се́ Очище́ние показу́ется, се́ Спа́с предстои́т просия́ти су́щим во тме́ Боже́ственныя зари́. Сего́ помышле́ньми чи́стыми ра́достно поды́мем.

Пе́снь 3.

Ирмо́с: Не му́дростию и бога́тством да хва́лится сме́ртный свои́м, но ве́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́х за́поведей утверди́ мя́, Влады́ко.

Пре́жде веко́в седя́й со Отце́м и Ду́хом, ны́не в после́дняя из Де́вы вопло́щся, я́коже ве́сть, Христо́с гряде́т ко креще́нию, безсме́ртие Боже́ственною ба́нею все́м подая́.

Водо́ю погребсти́ на́ша грехи́ хотя́ во Иорда́нских струя́х за милосе́рдие ми́лости, Христо́с Бо́г предгряде́т и назида́ет истле́вшия ны́ креще́нием.

Обнаже́ние сту́дное покрыва́я Ада́ма пра́отца, обнажа́ешися во́льно и струя́ми Иорда́нскими Тебе́ Сама́го покрыва́еши, вода́ми превы́спренняя покрыва́я, Христе́, Еди́не Многоми́лостиве.

Седа́лен, гла́с 1.

Вели́кий До́ждь к ре́чным струя́м предгряде́т, пло́тию крести́тися восхоте́в. К Нему́же боже́ственный Предте́ча, ужаса́яся, глаго́лаше: ка́ко крещу́ Тя́, скве́рны не иму́ща весьма́? Ка́ко простру́ мою́ десни́цу на главу́, ея́же трепе́щут вся́ческая?

Пе́снь 4.

Ирмо́с: Слы́ша дре́вле Авваку́м, Христе́, чу́дный Тво́й слу́х и стра́хом взыва́ше: от ю́га Бо́г прии́дет и Святы́й от горы́ приосене́нныя ча́щи спасти́ пома́занныя. Сла́ва си́ле Твое́й, Го́споди.

Во́ду почерпи́те Жи́зни, се́ ны́не прии́де ми́ра Река́ и́стинно изсуши́ти му́тныя неве́рия во́ды и просвеще́ние источи́ти пою́щим Ему́: сла́ва си́ле Твое́й, Го́споди.

Весели́ся, пусты́ня, я́же пре́жде жа́ждущая, естество́ все́ челове́ческое: ны́не яви́ся Пото́к сла́дости, Иорда́нскими вода́ми реша́я зно́й греха́. Ему́же пое́м ве́рно: сла́ва си́ле Твое́й, Го́споди.

Вопию́щаго гла́с проро́чески пусты́м возшуме́ помышле́нием: угото́вайте пути́ пра́выя Христу́ гряду́щему, глаго́лющь, я́ко да креще́нием очи́стит обветша́вшия ны́, разреша́я пе́рвое осужде́ние.

Пе́снь 5.

Ирмо́с: Све́т Тво́й незаходи́мый возсия́й, Христе́, в сердца́ ве́рно пою́щих Тя́, ми́р подава́яй на́м па́че ума́; те́м, от но́щи неве́дения ко дню́ све́том Твои́м теку́ще, славосло́вим Тя́, Человеколю́бче.

Ми́ра, Христе́, сы́й Ца́рь, вражды́ средосте́ние разори́л еси́, пло́ти подо́бием яви́вся су́щим на земли́. Те́мже прише́ствие Твое́ ви́дев, Иоа́нн дивля́шеся со стра́хом, рукоположи́ти Тя́ повелева́емь.

Змие́в главы́ сокруши́ти Христо́с спеша́, ны́не гряде́т вода́ми и трепе́щущему вопие́т Крести́телю: простри́ твою́ ру́ку, и прикосни́ся верху́ Моему́, и у́жас оттряси́, соверша́я повеле́нное.

Сказа́ше проро́к благода́ть иногда́ креще́ния Боже́ственным Ду́хом, порази́в Иорда́нския струи́ ми́лотию, я́же раздели́шася, на́м путетворя́щия возрожде́ние Боже́ственное в ни́х я́вльшагося Христа́.

Пе́снь 6.

Ирмо́с: Ве́сь от страсте́й безме́рных содержу́ся и ки́том зо́л снизпадо́х, но возведи́ из истле́ния мя́, Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния и спасе́ния ду́хом пожру́ Ти́.

Милосе́рдие щедро́т Христо́с показу́я, в ра́бии зра́це Непреме́нный прихо́дит к рабу́, прося́ креще́ния, от рабо́ты восхища́я челове́чество, Его́же уди́влься прише́ствию, ужаса́ется и стра́хом одержи́мь быва́ет.

Ка́ко Тя́ ре́чныя струи́ прии́мут, нестерпи́маго Огня́, ны́не иду́ща? Ка́ко обнаже́ние небе́снии ви́дят а́нгели? Ка́ко ру́ку Иоа́нн простре́т на Тя́, Сло́ве Бо́жий Пребезнача́льне, того́ от земли́ созда́вшаго?

Мо́ре разделя́ется, бежа́ще, показа́ но́вым лю́дем Боже́ственное прехожде́ние, е́же соде́ла в реце́, пло́тию прише́д, И́же из ка́мене пресла́вно источи́в во́ду. Сего́ я́ко Бо́га просла́вим, на́ше сокруше́ние назда́вшаго.

Конда́к, гла́с 2.

Все́х, Христе́, благоутро́бне отъе́мляй прегреше́ний мно́жество ми́лости ра́ди безме́рныя, Иорда́нскими вода́ми крести́тися гряде́ши, я́ко Челове́к, оде́ждею мя́ одева́я, сла́вы дре́вния обнаже́нна лю́те.

И́кос:

Не истязу́ю тя́, Крести́телю, преде́лы преходи́ти, не глаго́лю тебе́: рцы́ Ми́, я́же глаго́леши беззако́нным и учи́ши гре́шники. То́чию крести́ Мя́ молча́ и ча́я, я́же от креще́ния: прии́меши бо сего́ ра́ди досто́инство, е́же не бы́сть а́нгелом, и́бо все́х проро́ков бо́льша тя́ сотворю́. От о́ных у́бо ни еди́н я́ве Мя́ ви́де, но во о́бразех, и се́нех, и гада́ниих, ты́ же пред тобо́ю стоя́ща ви́дел еси́, спасти́ бо приидо́х Ада́ма первозда́ннаго.

Пе́снь 7.

Ирмо́с: Проидо́ша, я́ко черто́г, пе́щный пла́мень нестерпи́мый и́же за благоче́стие иногда́ о́троцы святи́и, показа́вшеся я́ве, и, согла́сно воспева́юще, пе́снь поя́ху: отце́в Бо́же, благослове́н еси́.

Христо́с спасе́ние яви́ся, просвеще́ние да́руя. Да ра́дуется не́бо, о́блацы же да кропя́т и́стинно пра́вду, взыва́ющим: отце́в Бо́же, благослове́н еси́.

Руно́, е́же прови́де Гедео́н, полна́ ча́ша воды́ иска́павшия я́ве Твое́ креще́ние ска́зоваше, Христе́, е́же подае́ши, крести́вся, воспева́ющим: отце́в Бо́же, благослове́н еси́.

Сла́ныя безча́дствующия Елиссе́й исцеля́я во́ды, благоча́дие честны́я купе́ли прообрази́, хотя́щее бы́ти та́инственно, воспева́ющим: отце́в Бо́же, благослове́н еси́.

Пе́снь 8.

Ирмо́с: Чу́да преесте́ственнаго показа́ о́браз огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки.

Хвалу́ велегла́сно Влады́це возсле́м: прии́де, яви́ся, восхо́дит на во́ды, и обнажа́ется, не́бо о́блаки одева́яй, и креща́ется, очища́я ны́ воспева́ющия: да благослови́т тва́рь вся́ Го́спода и превозно́сит во вся́ ве́ки.

Прииди́те мы́сленно, ко Иорда́ну и́дем, виде́ние ве́лие в не́м у́зрим: Иису́с бо, просвеще́ние, прихо́дит и раба́ преклоня́ется дла́ни, с тре́петом вопию́ща: да благослови́т тва́рь вся́ Го́спода и превозно́сит во вся́ ве́ки.

У́гль, Его́же прови́де Иса́ия, в вода́х Иорда́нских разгоре́вся, попали́ ве́щь всю́ грехо́в и подаде́ сокруше́нным назда́ние. Те́мже, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Пе́снь 9.

Ирмо́с: Неизглаго́ланное Де́вы та́инство: не́бо бо Сия́, и престо́л херуви́мский, и светоно́сный черто́г показа́ся Христа́ Бо́га Вседержи́теля, Сию́ благоче́стно я́ко Богоро́дицу велича́ем.

Та́инство стра́нное зрю́ и пресла́вное: Иису́с гряде́т во́лею к реце́ Иорда́ну, вопия́ Иоа́нну: твою́ десни́цу Ми́, дру́же, взаи́мствуй, стра́шная соверша́ющему лю́дем Мои́м в снабде́ние.

Пусты́нная Иорда́нская да процвету́т, и́же во тме́ лежа́щии, вели́к яви́ся ва́м Све́т. Ви́девше, взыгра́йте: Христо́с от Галиле́и приходя́й, пло́тию крести́тися от раба́ хо́щет.

Возвесели́ся ны́не, Иорда́не, и лику́й, Иоа́нне, взыгра́й, вся́ вселе́нная ра́дуйся: се́ яви́ся Христо́с, и обнажа́ется и креща́ется, во оде́жду облача́я нетле́ния челове́чество.

Свети́лен.

Я́ко ви́де Тя́ обнаже́на Иорда́н, с тре́петом к су́щему от непло́дове рече́: оста́ви, о Иоа́нне, крести́тися Го́спода, огне́м и Ду́хом очища́ющаго всю́ тва́рь, на сие́ бо прии́де, освяти́ти земны́я и водно́е естество́.