Конда́к 1.

Избра́нный уго́дниче Христо́в и чудотво́рче, преподо́бне о́тче на́ш Леони́де, свя́тостию жития́ твоего́ я́ко звезда́ богосве́тлая возсия́вый в стране́ се́верней. Похва́льная воспису́ем ти́, любо́вию творя́ще па́мять твою́: ты́ же я́ко име́яй дерзнове́ние ко Го́споду, моли́твами твои́ми от вся́ких бе́д свободи́ зову́щих ти́:

Ра́дуйся, преподо́бне о́тче на́ш Леони́де, пусты́нный жи́телю.

И́кос 1.

А́нгела о́бразом, земна́го су́ща естество́м зря́ще тя́, о́тче преподо́бне, прославля́ем просла́вльшаго тя́ Го́спода, тебе́ уго́днику Его́ пресла́вному уми́льно вопие́м:

Ра́дуйся, в ми́ре живы́й, Небе́снаго Оте́чества взыска́вый; ра́дуйся, пу́ть широ́кий, веду́щий в па́губу презре́вый.

Ра́дуйся, терни́стым путе́м в Ца́рствие Небе́сное ше́ствовавый; ра́дуйся, наде́ждею ве́чных бла́г се́рдце свое́ увесели́вый.

Ра́дуйся, до́м и сро́дники ра́ди Христа́ оста́вивый; ра́дуйся, и́ноческое житие́ возлюби́вый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 2.

Ви́дев се́рдце твое́ Госпо́дь, любо́вию к Нему́ пламене́ющее, призва́ тя́ на пу́ть мона́шескаго жития́: ты́ же Пошехо́нский кра́й сво́й оста́вив, стопы́ твоя́ в Кожеезе́рскую оби́тель напра́вил еси́, поя́ Го́сподеви: Аллилу́иа.

И́кос 2.

Ра́зум чи́ст и свобо́ден от страсте́й испроси́ на́м уго́дниче Бо́жий, да су́етная в ми́ре се́м попра́вше, вопие́м ти́, предста́телю на́шему пред Бо́гом сицева́я:

Ра́дуйся, смире́нный подви́жниче; ра́дуйся, по́стриг прие́м ми́ру умертви́выйся.

Ра́дуйся, пло́ть свою́ возненави́девый; ра́дуйся, моли́твой и посто́м ея́ ду́ху покори́вый.

Ра́дуйся, сле́з тече́нием Бо́га уми́лостивый; ра́дуйся, вся́ ко́зни вра́жия победи́вый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 3.

Си́лою Бо́жиею укрепля́емь, в оби́тель Солове́цкую пу́ть сво́й упра́вил еси́ и та́мо во́лю отсека́я, послуша́нию мона́шескому вда́лся еси́, во смире́нии поя́ Бо́гу: Аллилу́иа.

И́кос 3.

Име́я по́мысл чи́ст и ду́шу непоро́чную Бо́жию и Ма́тери Бо́жией послу́шник привлеки́йся, в пу́стынь Морже́вскую всели́лся еси́ и труды́ ко трудо́м прилага́я, Бо́жий избра́нник яви́лся еси́. Услы́ши на́с пою́щих тебе́ такова́я:

Ра́дуйся, с ме́ста на ме́сто преходи́л еси́, да доброде́тели приобря́щеши; ра́дуйся, Пречи́стою Де́вою направля́емь, издале́ча ме́сто ве́рою облобыза́л еси́.

Ра́дуйся, с ико́ною Одиги́трия на реку́ Лу́за прише́л и ту́ водвори́лся еси́; ра́дуйся, ма́лую часо́вню, последи́ хра́м в че́сть Введе́ния Пресвяты́я Богоро́дицы созда́л еси́.

Ра́дуйся, кра́й се́й глухи́й и бла́тный освяти́л еси́; ра́дуйся, ди́ких пе́рмцев просвети́телю.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 4.

Бу́рю искуше́ний и бе́д от челове́к зло́бных с кро́тостию претерпева́я, вели́кия труды́ подъя́л еси́: копа́яй зе́млю, ужа́лен зми́ем, безвре́ден пребы́л еси́, моли́твою твое́ю укрепля́емь, Бо́гу вопия́л еси́: Аллилу́иа.

И́кос 4.

Слы́шавше христоимени́тии лю́дие, я́ко пусты́нныя ле́сы и́х ангелоподо́бным житие́м твои́м облагоуха́л еси́, притека́ху к тебе́, и не отри́нул еси́ и́х, му́дре па́ствил еси́, собра́в во и́мя Госпо́дне. Сего́ ра́ди сицеву́ю похвалу́ прино́сим тебе́:

Ра́дуйся, Богоро́дицы заступле́нию оби́тель твою́ вда́вый; ра́дуйся, во́лю Госпо́дню сотвори́вый и и́ны твори́ти научи́вый.

Ра́дуйся, ли́ка и́ноческаго предстоя́телю богому́дрый; ра́дуйся, бра́тии твоея́ оте́ц чадолюби́вый.

Ра́дуйся, вся́ким злострада́нием пло́ть свою́ изнури́вый; ра́дуйся, умертви́вый твои́ми по́двиги теле́сныя мудрова́ния.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 5.

Боготе́чною звездо́ю прете́кл еси́ в ми́ре, свя́те, из Устьнеду́мския оби́тели Се́верному кра́ю, блаже́нне о́тче Леони́де, се́мена сло́ва Бо́жия в сердца́ людска́я посева́я и Бо́гови поя́: Аллилу́иа.

И́кос 5.

Ви́дев вра́г спасе́ния челове́ческаго житие́ небе́сное твое́ на земли́, стре́лы разжже́нныя искуше́ний мета́ше в тя́, о Леони́де, ты́ же побежда́ше я́, Бо́жиею благода́тию укрепля́емь, услы́ши от на́с сицева́я:

Ра́дуйся, власяни́цею же́сткою те́ло твое́ изнуря́яй; ра́дуйся, иско́ннаго врага́ зми́я дре́вняго побежда́яяй.

Ра́дуйся, и змие́в веще́ственных дале́че от себе́ отгоня́яй; ра́дуйся, всено́щными стоя́нии Бо́га уми́лостивый.

Ра́дуйся, я́ко фимиа́м благово́нный моли́твы твоя́ пред Го́спода восхожда́ху; ра́дуйся, а́нгели небе́снии от Престо́ла Небе́снаго к престо́лу хра́ма твоего́ снисхожда́ху.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 6.

Пропове́дует Прилу́зский кра́й по́двиги и труды́ твоя́, преподо́бне о́тче, и све́тло красу́ется, стяжа́в тя́ помо́щника и покрови́теля себе́. Осо́бне к твоему́ бо заступле́нию в ско́рбех на́ших прибега́ем и просла́вльшему тя́ Го́споду со умиле́нием зове́м: Аллилу́ия.

И́кос 6.

Возсия́л еси́, преподо́бне Леони́де, свя́тостию жития́ твоего́: прише́д Прилу́зскому кра́ю, вои́стинну свети́льник на све́щнице поста́влен еси́, горя́ и светя́. Те́мже свеще́нием твои́м и любо́вию согре́тая духо́вная ча́да взыва́ют к тебе́:

Ра́дуйся, от се́рдца твоего́ вся́ искуше́ния ю́ности отгна́вый; ра́дуйся, Го́спода ра́ди пу́ть те́сный и ско́рбный избра́вый.

Ра́дуйся, а́лчбою, жа́ждею, мра́зом и зно́ем те́ло свое́ изнури́вый; ра́дуйся, терпе́нием твои́м зло́бу ми́ра сего́ победи́вый.

Ра́дуйся, огне́м моли́твы твоея́ вся́ стре́лы лука́ваго попали́вый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 7.

Хоте́ние еди́но име́л еси́, преподо́бне, е́же ми́ру умертвите́ся и ду́хом пожи́ти, бежа́л еси́ суеты́ и в пусты́ни водвори́лся еси́, поя́ Бо́гу: Аллилу́иа.

И́кос 7.

Ди́вно бы́сть, уго́дниче Бо́жий, зре́ти, ка́ко тебе́, зми́ем угрызе́на, Госпо́дь сохрани́ здра́ва и невреди́ма, и свое́ю благода́тию наступа́ти на всю́ си́лу вра́жию сотвори́. Сего́ ра́ди прославля́ем тя́ о́тче:

Ра́дуйся, невеще́ственне в ми́ре пожи́вый; ра́дуйся, безпло́тным а́нгелом собесе́дник яви́выйся.

Ра́дуйся, го́рдость сатани́нскую низложи́вый; ра́дуйся, смире́ние Христо́во возлюби́вый.

Ра́дуйся, на высоту́ безстра́стия возше́дый; ра́дуйся, на земли́ сы́й, небе́сная созерца́вый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 8.

Стра́нствие земно́е скончава́я, пло́тию изнемо́гл еси́, ду́хом же созре́л в ра́йская селе́ния пресели́тися и тле́нная на нетле́нная премени́в, пое́ши ра́достно Бо́гу: Аллилу́иа.

И́кос 8.

Вся́ бра́тия твоя́ со слеза́ми и пе́сньми надгро́бными провожда́ху тя́: и изнесо́ша мо́щи твоя́ и положи́ша во хра́ме, его́же созда́л еси́, иде́же и по ны́не под спу́дом пребыва́ют посеща́емыя ве́рными, принося́щими ти́ сицева́я хвале́ния:

Ра́дуйся, во благоуха́нии святы́ни сно́м сме́рти опочи́вый; ра́дуйся, в ри́зу нетле́ния облече́нный.

Ра́дуйся, ликовству́яй в черто́зе Домовлады́ки; ра́дуйся, граждани́не Иерусали́ма Го́рняго.

Ра́дуйся, свя́тче Бо́жий, все́ми святы́ми прославля́емый; ра́дуйся, от го́рних высо́т к на́м ми́лостивно приница́яй.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 9.

А́нгели небе́снии ра́достно прия́ша ду́шу твою́, преподо́бне, во оби́тели ра́йския, иде́же Госпо́дь Сла́вы Христо́с венча́ тя́ и земны́м на́м засту́пника дарова́, пою́щым Ему́: Аллилу́иа.

И́кос 9.

Вити́и многовеща́ннии не возмо́гут по достоя́нию изобрази́ти сла́ву угото́ванную святы́м Его́, ея́же причасти́лся еси́ о́тче Леони́де. Сподо́би и на́с дости́гнути моли́твами твои́ми о́ныя небе́сныя сла́вы, вопию́щым ти́:

Ра́дуйся, зерца́лом разре́щшимся непосре́дственне зри́ши Святу́ю Тро́ицу; ра́дуйся, я́ко мо́лишися Е́й о соверша́ющих па́мять твою́.

Ра́дуйся, вне́мляй моли́твам ча́д твои́х; ра́дуйся, я́ко посеща́еши и́х в ско́рбных обстоя́ниих.

Ра́дуйся, я́ко дерзнове́нно предстои́ши о на́с пред лице́м Бо́жиим; ра́дуйся, я́ко преклоня́еши к на́м гре́шным милосе́рдие Его́.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 10.

Спасти́ся хотя́щым на́м бу́ди помо́щник, избавля́яй на́с заступле́нием твои́м от грехо́в на́ших и вся́ких бе́д, низводя́й на притека́ющих к тебе́ Бо́жие благослове́ние, пою́щих Бо́гу: Аллилу́иа.

И́кос 10.

Стена́ ве́рующым явля́ешися кре́пка от лица́ вра́жия, защища́я и́х от стре́л де́монских и боле́зни исцеля́я. Те́мже сподо́бльшиися заступле́ния твоего́ с любо́вию зову́т ти́:

Ра́дуйся, о́тче на́ш кро́ткий и ми́лостивый; ра́дуйся, любо́вию к Бо́гу и бли́жним пламене́яй.

Ра́дуйся, уедине́ния поиска́вый и его́ в пусты́ни обреты́й; ра́дуйся, я́ко та́мо многоле́тне подвиза́лся еси́ в труде́х мно́зех и слеза́х.

Ра́дуйся, упокое́ние небе́сное унасле́довавый; ра́дуйся, я́ко со а́нгелы пе́снь Бо́гу немо́лчно вопие́ши.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 11.

Пе́ние всеумиле́нное прино́сим ти́, преподо́бне о́тче Леони́де, на ме́сте трудо́в и упокое́ния твоего́, от тебе́ ча́юще ми́лости получи́ти, ты́ же посети́ на́с и да́нною ти́ от Бо́га благода́тию исцели́ вопию́щих: Аллилу́иа.

И́кос 11.

Светопода́тельна свети́льника пред Престо́лом Бо́жиим предстоя́ща и мра́к страсте́й на́ших луча́ми моли́тв твои́х разгоня́юща, ви́дим тя́, преподо́бне о́тче Леони́де: озари́ у́бо и на́ша сердца́, всеблаже́нне, да досто́йно вопие́м ти́ си́це:

Ра́дуйся, лучу́ пресве́тлый, от Со́лнца Христа́ возсия́вый; ра́дуйся, и по преставле́нии твое́м с на́ми пребыва́еши.

Ра́дуйся, хра́м Пресвяты́я Богоро́дицы Ея́ Введе́ния постро́ивый; ра́дуйся, зело́ его́ возлюби́вый.

Ра́дуйся, освяти́вый его́ и́ноческим песнопе́нием; ра́дуйся, хра́м се́й, мо́щи твоя́ и Неду́му реку́ зало́г любве́ своея́ на́м оста́вивый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 12.

Благода́ти тезоимени́тый и то́ю обогати́выйся, победи́л еси́ враги́ и вся́кую зло́бу и в небе́сныя дворы́ пресели́выйся, испроси́ на́м от Христа́ Бо́га ве́лию ми́лость, да благода́рно пое́м Ему́: Аллилу́иа.

И́кос 12.

Пою́ще по́двиги преди́внаго жития́ твоего́, коле́на преклоня́юще пред честны́ми моща́ми, под спу́дом почива́ющими, со слеза́ми умиле́ния вопие́м ти́:

Ра́дуйся, почи́вый от все́х трудо́в твои́х; ра́дуйся, а́ще земля́ и покрыва́ет честны́я мо́щи твоя́, ду́х же пребыва́ет на небеси́ у Христа́ твоего́.

Ра́дуйся, со все́ми преподо́бными ожида́еши втора́го прише́ствия и коне́чнаго прославле́ния; ра́дуйся, моля́йся о все́х, почита́ющих па́мять твою́.

Ра́дуйся, прося́й ве́чнаго спасе́ния ревну́ющих свято́му житию́ твоему́; ра́дуйся, любо́вию свое́ю утеша́яй прибега́ющих к моли́твенному заступле́нию твоему́.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 13

Опресла́вный уго́дниче Бо́жий, преподо́бне о́тче Леони́де, почита́юще святу́ю па́мять твою́, воспису́ем ти́ похва́льная: ты́ же я́ко предстоя́й Престо́лу Царя́ Сла́вы, от вся́кия напа́сти и ско́рби и ве́чнаго муче́ния изба́ви ны́, да возмо́жем ве́чно с тобо́ю воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела о́бразом, земна́го су́ща естество́м зря́ще тя́, о́тче преподо́бне, прославля́ем просла́вльшаго тя́ Го́спода, тебе́ уго́днику Его́ пресла́вному уми́льно вопие́м:

Ра́дуйся, в ми́ре живы́й, Небе́снаго Оте́чества взыска́вый; ра́дуйся, пу́ть широ́кий, веду́щий в па́губу презре́вый.

Ра́дуйся, терни́стым путе́м в Ца́рствие Небе́сное ше́ствовавый; ра́дуйся, наде́ждею ве́чных бла́г се́рдце свое́ увесели́вый.

Ра́дуйся, до́м и сро́дники ра́ди Христа́ оста́вивый; ра́дуйся, и́ноческое житие́ возлюби́вый.

Ра́дуйся, преподо́бне о́тче на́ш Леони́де, пусты́нный жи́телю.

Конда́к 1.

Избра́нный уго́дниче Христо́в и чудотво́рче, преподо́бне о́тче на́ш Леони́де, свя́тостию жития́ твоего́ я́ко звезда́ богосве́тлая возсия́вый в стране́ се́верней. Похва́льная воспису́ем ти́, любо́вию творя́ще па́мять твою́: ты́ же я́ко име́яй дерзнове́ние ко Го́споду, моли́твами твои́ми от вся́ких бе́д свободи́ зову́щих ти́:

Ра́дуйся, преподо́бне о́тче на́ш Леони́де, пусты́нный жи́телю.

Моли́тва.

Освяще́нная главо́, преподо́бне о́тче Леони́де! Земны́й а́нгеле и небе́сный челове́че, свети́льниче пресве́тлый, кра́й на́ш Прилу́зский озаря́яй! Тебе́ уго́дниче Бо́жий, неистощи́мое от Всеблага́го Влады́ки благода́ти и даро́в даде́ся сокро́вище: с ве́рою к тебе́ приходя́щих утеша́ти, теле́сныя и душе́вныя неду́ги отгоня́ти. К тебе́ у́бо прибега́ем, припа́дающе мо́лимся: не пре́зри на́с моля́щихся и твоея́ прося́щих по́мощи, испроси́ на́м у Христа́, да сотвори́т с на́ми зна́мение во бла́го и прообрази́т на́ше мра́чное житие́, се́рдце на́ше прокаже́нное очи́стит, и оби́тель сотвори́т для Своего́ вселе́ния, я́ко без Него́ не мо́жем твори́ти ничесо́же. Да вся́кое на́ше во бла́го жела́ние испо́лнит. Да та́ко угожда́юще Бо́гу победи́м борю́щаго на́с диа́вола и да вни́дем в селе́ния ра́йская, иде́же вси́ святи́и пребыва́ют и прославля́ют Отца́, и Сы́на, и Свята́го Ду́ха во ве́ки. Ами́нь.