Конда́к 1.

Избра́ннаго Бо́гом на служе́ние Це́ркви Росси́йстей и прее́мника святи́телей Моско́вских, я́ко архипа́стыря Христо́ва, побо́рника и́стины и ревни́теля благоче́стия, досто́йно чту́ще тя́, Филаре́те, благода́рственное пе́ние воспису́ем о тебе́ Го́споду. Ты́ же, хода́тайственно предстоя́й Престо́лу Бо́жию, о на́с при́сно моли́ся, да с любо́вию зове́м ти́:

Ра́дуйся, святи́телю Филаре́те, ве́ры Правосла́вныя богому́дрый учи́телю.

И́кос 1.

А́нгел па́ствы Росси́йския яви́лся еси́ в житии́ твое́м, святи́телю Филаре́те, охраня́я и защища́я ю́ и боле́знуя се́рдцем о Оте́честве твое́м. Ны́не же, с ли́ки Небе́сными совокупле́н, наипа́че мо́лишися за ны́, усе́рдно прославля́ющих тя́ и зову́щих:

Ра́дуйся, святи́телей Моско́вских прее́мниче и в благода́ти и́м насле́дниче; ра́дуйся, я́ко Пе́тр гра́д Москву́ возлюби́вый.

Ра́дуйся, я́ко Алекси́й о не́м усе́рдно моли́выйся; ра́дуйся, я́ко Ио́на бо́дрственне гра́д стреги́й.

Ра́дуйся, я́ко Мака́рий, ру́сских святы́х ре́вностно почита́вый; ра́дуйся, Фили́пповым по́двигом утвержда́выйся.

Ра́дуйся, И́овлеву благоче́стию подража́вый; ра́дуйся, Ермоге́новою любо́вию ко Оте́честву распала́емый.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 2.

Ви́дяще Бо́жия благода́ти оби́льное излия́ние, разуме́ем тя́, святи́телю, я́ко сосу́д, испо́лненный прему́дрости и ра́зума, стра́ха Бо́жия и благоче́стия. Те́мже благода́рственно вопие́м Пода́телю все́х бла́г: Аллилу́иа.

И́кос 2.

Разуме́я промышле́ние Бо́жие о тебе́, святи́телю Филаре́те, во вся́ дни́ живота́ твоего́ тща́лся еси́ при́сно во́ли Бо́жией покаря́тися и на Го́спода Еди́наго все́ упова́ние возлага́ти. Те́мже мы́ прославля́ем тя́ си́це:

Ра́дуйся, от утро́бы ма́терни Го́сподем избра́нный; ра́дуйся, от пеле́н твои́х Его́ возлюби́вый.

Ра́дуйся, от ю́ности твоея́ Бо́га взыска́вый; ра́дуйся, до конца́ Ему́ ве́рен бы́вый.

Ра́дуйся, во вся́ дни́ Бо́гу неле́ностно труди́выйся; ра́дуйся, и в нощи́ Ему́ бо́дренно моли́выйся.

Ра́дуйся, вы́ну пред Го́сподем ходи́вый; ра́дуйся, в се́рдце твое́м при́сно Его́ носи́вый.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 3.

Си́ла Вы́шняго умно́жи ре́вность твою́ ко благоче́стию, святи́телю Филаре́те, егда́ восприя́л еси́ мона́шеский чи́н и основа́ние кре́пкое ле́ствицы доброде́телей поста́вил еси́. Сего́ ра́ди, прославля́юще по́двиги твоя́, вопие́м хвале́бную пе́снь Бо́гу: Аллилу́иа.

И́кос 3

Име́я ра́зум богоприя́тный, восте́кл еси́, святи́телю, к позна́нию и́стины Христо́вы. Мы́ же, словесы́ твои́ми в ве́ре утверди́вшеся, похвалы́, я́ко кади́ло у́мное и благово́нное, прино́сим ти́, взыва́юще си́це:

Ра́дуйся, Бо́гом Сло́вом науче́нный; ра́дуйся, Ду́хом Святы́м вразумле́нный.

Ра́дуйся, богодухнове́нныя кни́ги изъясни́вый; ра́дуйся, мно́гая писа́ния святы́х оте́ц ве́рным препода́вый.

Ра́дуйся, испове́дание ве́ры уясни́вый; ра́дуйся, гла́д духо́вный сло́вом Бо́жиим утоли́вый.

Ра́дуйся, свобожде́ние угнете́нным возвести́вый; ра́дуйся, дея́ньми свои́ми па́ству росси́йскую духо́вно обогати́вый.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 4.

Бу́рю вну́трь име́я помышле́ний сумни́тельных о житии́ свое́м, пии́т росси́йский в уны́ние прии́де. Богому́дрый же глаго́л тво́й услы́шав, святи́телю Филаре́те, я́ко не всу́е жи́знь от Бо́га на́м даде́ся, благода́рне вразуми́ся. Мы́ же, назида́ющеся си́м, со умиле́нием Бо́гу вопие́м: Аллилу́иа.

И́кос 4.

Слы́шавше па́стыри Христо́вы по все́й Росси́и сла́вное и́мя твое́, святи́телю Филаре́те, к тебе́, я́ко прему́дрому архипа́стырю, притека́ху, и́щуще сове́та, наставле́ния и защище́ния. Та́кожде и мы́, от тебе́ наставле́ние прие́млюще, ра́достно взыва́ем си́це:

Ра́дуйся, архиере́йством от Бо́га почте́нный; ра́дуйся, кре́ст сего́ служе́ния смире́нно понесы́й.

Ра́дуйся, та́ин Бо́жиих прему́дрый строи́телю; ра́дуйся, ве́чери Госпо́дни благогове́йный соверши́телю.

Ра́дуйся, апо́столов и святи́телей прее́мниче; ра́дуйся, благода́ти и́х досто́йный насле́дниче.

Ра́дуйся, ли́ка святы́х соприча́стниче; ра́дуйся, Ца́рствия Небе́снаго при́сный жи́телю.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 5.

Боготе́чная звезда́ на не́бе церко́внем возсия́л еси́, святи́телю Филаре́те, мра́к грехо́вный озаря́я и тьму́ неве́рия просвеща́я. Те́мже яви́лся еси́ все́м и́щущим спасе́ния я́ко свети́льник путево́дный, науча́я воспева́ти Христу́ Бо́гу: Аллилу́иа.

И́кос 5.

Ви́дяще лю́дие росси́йстии, святи́телю Филаре́те, усе́рдное твое́ служе́ние во дни́ бе́дствий наро́дных и сугу́бое попече́ние о су́щих во у́зах, возблагодари́ша Го́спода, дарова́вшаго тя́, столпа́ Це́ркве на́шея. Мы́ же, прославля́юще и та́йная блага́я дея́ния твоя́, ны́не Про́мыслом Бо́жиим явле́нная, воспева́ем си́це:

Ра́дуйся, Коло́мны благо́е прозябе́ние; ра́дуйся, Ла́вры Се́ргиевы благоуха́нный цве́те.

Ра́дуйся, гра́да Петро́ва преизя́щный сто́лпе; ра́дуйся, Твери́ преимени́тое украше́ние.

Ра́дуйся, Яросла́вля пресла́вное велича́ние; ра́дуйся, первопресто́льныя Москвы́ похвало́.

Ра́дуйся, Руси́ святы́я ликова́ние; ра́дуйся, все́м притека́ющим к тебе́ ра́дование.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 6.

Пропове́дника златоу́стаго ве́мы тя́, святи́телю Филаре́те, сло́вом И́стины нра́вы благи́я утвержда́яй, заблу́ждшия исправля́яй, гре́шныя облича́яй. Сего́ ра́ди, восхваля́юще тя́, пе́снь Бо́гу воздае́м: Аллилу́иа.

И́кос 6.

Возсия́л еси́ ева́нгельски на све́щнице церко́внем я́ко свети́льник, верху́ горы́ стоя́й, святи́телю Филаре́те, о́браз ве́рным показа́в сло́вом, житие́м, любо́вию, ве́рою и чистото́ю. Сего́ ра́ди вопие́м ти́:

Ра́дуйся, Христа́ ра́ди во уме́ты вся́ вмени́вый; ра́дуйся, по́двигом до́брым подвиза́выйся.

Ра́дуйся, от ю́ности себе́ во́ли Бо́жией преда́вый; ра́дуйся, моли́тву все́м се́рдцем возлюби́вый.

Ра́дуйся, сло́ву Бо́жию науче́нный; ра́дуйся, послуша́нию навы́кнувый.

Ра́дуйся, в терпе́нии ду́шу твою́ спасы́й; ра́дуйся, в смире́нии Бо́гом превознесе́нный.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 7.

Хотя́ в мона́шестве смире́нно житие́ проводи́ти, потща́лся еси́, свя́те, суеты́ ми́ра сего́ избе́гнути. Про́мысл же Бо́жий, вя́щшее о тебе́ промышля́я, поста́ви тя́ священноархимандри́та оби́тели Се́ргиевы и святи́теля Це́ркве Росси́йския. Мы́ же, дивя́щеся сему́, пое́м Бо́гу: Аллилу́иа.

И́кос 7.

Но́вый показа́ся рачи́тель и устрои́тель скито́в и оби́телей, святи́телю Филаре́те, да вси́ хотя́щии ше́ствовати у́зким путе́м, спаси́тельную жи́знь в ни́х обря́щут. Те́мже вопие́м ти́:

Ра́дуйся, собла́зны ми́ра не прельсти́выйся; ра́дуйся, обе́ты мона́шества испо́лнивый.

Ра́дуйся, преподо́бнаго Се́ргия от ю́ности возлюби́вый; ра́дуйся, посеще́нием его́ уте́шенный.

Ра́дуйся, преподо́бнаго Анто́ния, я́ко духо́внаго отца́ и собесе́дника име́вый; ра́дуйся, преподо́бнаго Серафи́ма усе́рдно почита́вый.

Ра́дуйся, пусты́нное житие́ в се́рдце носи́вый; ра́дуйся, сего́ ра́ди скиты́ в Ла́вре Тро́ицстей насади́вый.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 8.

Стра́нное и ди́вное чу́до явля́ет дне́сь Хра́м Христа́ Спаси́теля, тобо́ю, святи́телю Филаре́те, в воспомина́ние побе́ды христолюби́ваго росси́йскаго во́инства основа́нный, в годи́ну же безбо́жия до основа́ния разруше́нный и ны́не ми́лостию Бо́жиею возрожде́нный. Мы́ же, о се́м благодаря́ще Бо́га, вопие́м: Аллилу́иа.

И́кос 8.

Ве́сь бы́л еси́ все́м, святи́телю Филаре́те, я́ко архипа́стырь ми́лостивый и оте́ц до́брый и чадолюби́вый и вся́кое де́ло с разсужде́нием во бла́го Це́ркве Бо́жия творя́й. Те́мже зове́м ти́:

Ра́дуйся, Хра́ма Христа́ Спаси́теля основа́телю; ра́дуйся, благоле́пия церко́внаго ревни́телю.

Ра́дуйся, свяще́нства богому́дрый архипа́стырю; ра́дуйся, мона́шествующих наста́вниче.

Ра́дуйся, церко́вных уста́вов храни́телю; ра́дуйся, лжему́дрствований искорени́телю.

Ра́дуйся, во благи́х де́лех помо́щниче; ра́дуйся, в до́брых наме́рениих поспе́шниче.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 9.

Вся́к во́зраст и чи́н челове́ческий удиви́шася оби́лию благода́ти Бо́жия, в тебе́ де́йствующия, е́юже, не́мощь теле́сную ду́хом препобежда́я, мно́гия труды́ подъя́л еси́, Бо́гу взыва́я: Аллилу́иа.

И́кос 9.

Вети́и многовеща́ннии и мудрецы́ ве́ка сего́ умолка́ху при гла́се богому́дрых слове́с твои́х, святи́телю. Мы́ же, дивя́щеся Ду́ху благода́ти прему́дрости и ра́зума, оби́льно де́йствующу в тебе́, ве́рно вопие́м:

Ра́дуйся, филосо́фе велему́дрый; ра́дуйся, пропове́дниче преизя́щный.

Ра́дуйся, благове́стниче златоу́стый; ра́дуйся, наста́вниче предо́брый.

Ра́дуйся, заблу́ждших исправле́ние; ра́дуйся, безбо́жных вразумле́ние.

Ра́дуйся, суему́дрых посрами́телю; ра́дуйся, боголю́бцев покрови́телю.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 10.

Спасти́ хотя́ ду́шу твою́, святи́телю Филаре́те, кре́ст Христо́в я́ко благо́е и́го на ра́мо подъя́л еси́ и с любо́вию за Го́сподем после́довал еси́, поя́ Ему́: Аллилу́иа.

И́кос 10.

Стена́ кре́пкая бы́л еси́, святи́телю Филаре́те, Це́ркви и па́стве твое́й Росси́йстей, защища́я и огражда́я от напа́дающих и гоня́щих ю́. Те́мже мы́, прославля́юще тя́ я́ко побо́рника ве́ры и благоче́стия, зове́м:

Ра́дуйся, о па́стве твое́й при́сно се́рдцем боле́зновавый; ра́дуйся, о благостоя́нии Оте́чества твоего́ сле́зно моли́выйся.

Ра́дуйся, гряду́щая Росси́и, я́ко те́мный о́блак, предве́девый; ра́дуйся, во искуше́ниих к терпе́нию па́ству твою́ призыва́вый.

Ра́дуйся, ересе́й му́жественный посрами́телю; ра́дуйся, раско́ла ре́вностный врачева́телю.

Ра́дуйся, заблу́ждших кро́ткий вразуми́телю; ра́дуйся, оте́ческих обы́чаев тве́рдый блюсти́телю.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 11.

Пе́ние вся́кое подоба́ет возда́ти ти́, святи́телю Филаре́те, ты́ бо смире́нием приобре́л еси́ высо́кая, послуша́нием во́ли Бо́жией стяжа́л еси́ благода́ть Свята́го Ду́ха. Сего́ ра́ди просла́вльшему тя́ Бо́гу вопие́м: Аллилу́иа.

И́кос 11.

Я́ко светоприе́мное зерца́ло Христа́, Со́лнца у́мнаго, начерта́л еси́, святи́телю Филаре́те, в се́рдце твое́м зра́ки го́рних веще́й, к ра́зуму Боже́ственному наставля́я зову́щия ти́:

Ра́дуйся, свети́льниче, ми́ру Бо́гом да́нный; ра́дуйся, к святи́тельству Го́сподем призва́нный.

Ра́дуйся, под и́го Христо́во вы́ю преклони́вый; ра́дуйся, бре́мя Его́ кро́тко подъе́мый.

Ра́дуйся, искуше́ния му́жественне претерпе́вый; ра́дуйся, я́звы Го́спода Христа́ в се́рдце твое́м носи́вый.

Ра́дуйся, любо́вию Христо́вою осия́нный; ра́дуйся, све́том ея́ просвеще́нный.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 12.

Благода́ть святи́тельства дарова́ Госпо́дь ти́, богому́дре Филаре́те, да гре́шныя обличи́ши, немощны́я укрепи́ши, ка́ющияся возста́виши и все́м вся́ бу́деши, да вся́ко не́кия спасе́ши. Сего́ ра́ди благода́рственно Бо́гу пое́м: Аллилу́иа.

И́кос 12.

Пою́ще честно́е преставле́ние твое́, святи́телю Филаре́те, в не́мже Го́споду с ра́достию предста́л еси́, прославля́ем тя́, я́ко вои́стину умно́жившаго во сто́ кра́т да́нный ти́ тала́нт, и с любо́вию вопие́м:

Ра́дуйся, христиа́нския кончи́ны сподо́бивыйся; ра́дуйся, от роди́теля твоего́ усо́пшаго кончи́ну предузна́вый.

Ра́дуйся, я́ко в де́нь преставле́ния твоего́ Боже́ственную литурги́ю соверши́л еси́; ра́дуйся, я́ко на Небеси́ со святы́ми водвори́лся еси́.

Ра́дуйся, во оби́тели преподо́бнаго Се́ргия погребе́нный; ра́дуйся, от безбо́жных по сме́рти теле́сное поруга́ние претерпе́вый.

Ра́дуйся, я́ко мо́щи твоя́ во вре́мя благоприя́тно обрето́шася; ра́дуйся, я́ко в сто́льный гра́д мощьми́ святы́ми твои́ми возврати́лся еси́.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 13.

Обогому́дре святи́телю Христо́в Филаре́те, учи́телю прему́дрый и златоу́сте Росси́йский! Приими́ моле́бное сие́ пе́ние и умоли́ Го́спода на́шего Иису́са Христа́ сохрани́ти в чистоте́ и свя́тости Це́рковь Ру́сскую, Оте́честву на́шему благостоя́ние дарова́ти, на́м же, уче́ньми и писа́ньми твои́ми науче́нным, Ца́рствие Небе́сное улучи́ти, иде́же вку́пе с тобо́ю ра́достно бу́дем воспева́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел па́ствы Росси́йския яви́лся еси́ в житии́ твое́м, святи́телю Филаре́те, охраня́я и защища́я ю́ и боле́знуя се́рдцем о Оте́честве твое́м. Ны́не же, с ли́ки Небе́сными совокупле́н, наипа́че мо́лишися за ны́, усе́рдно прославля́ющих тя́ и зову́щих:

Ра́дуйся, святи́телей Моско́вских прее́мниче и в благода́ти и́м насле́дниче; ра́дуйся, я́ко Пе́тр гра́д Москву́ возлюби́вый.

Ра́дуйся, я́ко Алекси́й о не́м усе́рдно моли́выйся; ра́дуйся, я́ко Ио́на бо́дрственне гра́д стреги́й.

Ра́дуйся, я́ко Мака́рий, ру́сских святы́х ре́вностно почита́вый; ра́дуйся, Фили́пповым по́двигом утвержда́выйся.

Ра́дуйся, И́овлеву благоче́стию подража́вый; ра́дуйся, Ермоге́новою любо́вию ко Оте́честву распала́емый.

Ра́дуйся, святи́телю Филаре́те, ве́ры Правосла́вныя богому́дрый учи́телю.

Конда́к 1.

Избра́ннаго Бо́гом на служе́ние Це́ркви Росси́йстей и прее́мника святи́телей Моско́вских, я́ко архипа́стыря Христо́ва, побо́рника и́стины и ревни́теля благоче́стия, досто́йно чту́ще тя́, Филаре́те, благода́рственное пе́ние воспису́ем о тебе́ Го́споду. Ты́ же, хода́тайственно предстоя́й Престо́лу Бо́жию, о на́с при́сно моли́ся, да с любо́вию зове́м ти́:

Ра́дуйся, святи́телю Филаре́те, ве́ры Правосла́вныя богому́дрый учи́телю.

Моли́тва.

Опресла́вне и богому́дре святи́телю Христо́в Филаре́те, Росси́йския Це́ркве свети́льниче, земли́ на́шея похвало́ и гра́ду Москве́ украше́ние! Ты́ житие́м и служе́нием твои́м трие́м вселе́нским святи́телем бы́л еси́ подо́бник:

Васи́лию Вели́кому – я́ко бытие́ су́щих изъясни́л еси́, Це́ркве Бо́жия и Та́ин Христо́вых строи́тель до́брый яви́лся еси́, и́ноческих уста́вов бы́в ре́вностный исполни́тель и покрови́тель;

Григо́рию Богосло́ву – я́ко неботаи́нственных созерца́ний о Святе́й Тро́ице и о Бо́зе Сло́ве сподо́бился еси́ и си́х иску́сный провозве́стник яви́лся еси́;

Иоа́нну Златоу́стому – я́ко неуста́нный пропове́дник и учи́тель покая́ния наро́да Бо́жия бы́л еси́.

И ны́не, вку́пе с ни́ми предстоя́ во сла́ве Престо́лу Бо́жию и хода́тайствуя о на́с, моли́ Це́ркви Росси́йстей на ка́мени испове́дания Правосла́вныя ве́ры утвержде́нней бы́ти, стране́ на́шей ми́р и едине́ние дарова́ти, па́стырем сло́во Боже́ственныя И́стины пра́во пра́вити, гра́д Москву́ и па́ству твою́ от вся́ких напа́стей сохрани́ти.

При́зри с Небесе́, святи́телю, на ны́, ча́да твоя́, и да́руй на́м те́плым твои́м хода́тайством ко Го́споду в за́поведех Его́ преспева́ти, ве́ру тве́рду, любо́вь нелицеме́рну и благоче́стие до после́дняго часа́ сме́ртнаго сохрани́ти, да непосты́дно предста́нем Спаси́телю на́шему Го́споду Иису́су Христу́, Ему́же со Отце́м и Святы́м Ду́хом подоба́ет сла́ва, че́сть и поклоне́ние, ны́не и при́сно, и во ве́ки веко́в. Ами́нь.