Преподобным Зосиме и Саватию Соловецким чудотворцам

Тропарь, глас 4-й:
Постническое и равноангельское житие ваше, преподобнии Зосимо и Савватие, вселенней познаны сотвори вас: чудодеяния различными, богоноснии, просвещаете верою призывающия вы и чтущия честную память вашу.

Иной тропарь, глас 8-й:
Яко светильницы явистеся всесветлии, во отце окиана моря, преподобнии отцы Зосимо и Савватие: вы бо крест Христов на рамо всемше, усердно Тому последовасте, и чистотою Богови преближившеся, отонудуже притекаем к ракам честных мощей ваших, и умильно глаголем: о преподобнии, молите Христа Бога спастися душам нашим.

Величание:
Ублажаем вас, преподобнии отцы Зосиме и Саватие, и чтим святую память вашу, наставницы монахов и собеседницы ангелов.

Молитва:
О, преподобнии отцы, велиции заступницы и скории услышателие молитв, угодницы Божии и чудотворцы Зосимо и Савватие! Не забудите, якоже обещастеся, посещати чада ваша. Аще бо и отъидосте от нас телом, но духом присно с нами пребываете. Молим убо вас, о преподобнии, избавите ны от огня и меча, от нашествия иноплеменников и междоусобныя брани, от тлетворных ветров и от внезапныя смерти, и от всех прилог бесовских, находящих на ны. Услышите нас, грешных (имена), и приимите молитву сию и моление наше, яко кадило благовонное, яко жертву благоугодную, и души наша, злыми делы и советы и помыслы умерщвленныя, оживите, и якоже умершую отроковицу возстависте, и неисцельныя раны многих исцелисте, и от духов нечистых зле мучимыя избависте: тако и нас, содержимых во узах вражиих, изьмите, и от сетей диавола избавите, из глубины прегрешений изведите, и милостивым вашим посещением и ходатайством от враг видимых и невидимых оградите ны благодатию и силою Всесвятыя Троицы, всегда, ныне и присно и во веки веков. Аминь.

Пресвятой Богородице перед Ее иконой Леньковскою, или "Спасительница Утопающих"

Молитва:
Заступница усердная, Мати Господа Вышняго! Ты еси всем xристианом помощь и заступление, паче же в бедах сущим. Призри ныне с высоты святыя Твоея и на ны, с верою покланяющияся пречистому образу Твоему, и яви, молим Тя, скорую помощь Твою по морю плавающим и от ветров бурных тяжкия скорби терпящим. Подвигни и вся православныя христианы на спасение в водах утопающих, и воздаждь подвизающимся о сем богатыя милости и щедроты Твоя. Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и напаствуемых. Ты по Бозе наша Надежда и Заступница, и на Тя уповающе, сами себе, и друг друга, и весь живот наш Тебе предаем во веки веков. Аминь.

Святителю Николаю, архиепископу Мирликийскому

Тропарь, глас 4-й:
Правило веры и образ кротости, воздержания учителя яви тя стаду твоему, яже вещей истина; сего ради стяжал еси смирением высокая, нищетою богатая, отче священноначальниче Николае, моли Христа Бога спастися душам нашим.

Кондак, глас 3-й:
В Мирех, святе, священнодействователь показался еси: Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти; сего ради освятился еси, яко великий таинник Божия благодати.

Величание:
Величаем тя, святителю отче Николае, и чтим святую память твою, ты бо молиши за нас Христа Бога нашего.

Молитва:
О, всехвальный и всечестный архиерею, великий чудотворче, святителю Христов, отче Николае, человече Божий и верный рабе, муже желаний, сосуде избранный, крепкий столпе церковный, светильниче пресветлый, звездо, осиявающая и освещающая всю вселенную: ты еси праведник, яко финикс процветший, насажденный во дворех Господа своего, живый в Мирех, миром облагоухал еси и миро приснотекущее благодати Божия источаяй. Твоим шествием, пресвятый отче, море освятися, егда многочудесныя твоя мощи шествоваху во град Барский, от востока до запада хвалити имя Господне. О, преизрядный и предивный чудотворче, скорый помощниче, теплый заступниче, пастырю предобрый, спасающий словесное стадо от всяких бед! Тебе прославляем и тебе величаем, яко надежду всех христиан, источника чудес, защитителя верных, премудраго учителя, алчущих кормителя, плачущих веселие, нагих одеяние, болящих врача, по морю плавающих управителя, пленников свободителя, вдов и сирот питателя и заступника, целомудрия хранителя, младенцев кроткаго наказателя, старых укрепление, постников наставника, труждающихся упокоение, нищих и убогих изобильное богатство. Услыши нас, молящихся тебе и прибегающих под кров твой, яви предстательство твое о нас к Вышнему и исходатайствуй твоими богоприятными молитвами вся полезная ко спасению душ и телес наших: сохрани святую обитель сию (или храм сей), всякий град и весь, и всякую страну христианскую, и люди живущия от всякаго озлобления помощию твоею, вемы бо, вемы, яко много может молитва праведнаго, поспешествующая во благое: тебе же праведнаго, по Преблагословенней Деве Марии, предстателя ко Всемилостивому Богу имамы, и к твоему, преблагий отче, теплому ходатайству и заступлению смиренно притекаем. Ты нас соблюди, яко бодрый и теплый пастырь, от всяких врагов, губительства, труса, града, глада, потопа, огня, меча, нашествия иноплеменников, и во всяких бедах и скорбех наших подай нам руку помощи, и отверзи двери милосердия Божия: понеже недостойни есмы зрети высоту небесную, от множества неправд наших, связани узами греховными, и николиже воли Создателя нашего сотворихом, ни сохранихом повелений Его. Темже преклоняем колена сокрушенна и смиренна сердца нашего к Зиждителю своему, и твоего отеческаго заступления к Нему просим: помози нам, угодниче Божий, да не погибнем со беззаконии нашими, избави нас от всякаго зла и от всякия вещи сопротивныя, управи ум наш и укрепи сердце наше в правой вере, в нейже твоим предстательством и ходатайством, ни ранами, ни прещением, ни мором, ни коим гневом от Создателя своего умалени будем, но мирное зде поживем житие и да сподобимся видети благая на земли живых, славяще Отца и Сына и Святаго Духа, Единаго в Троице славимаго и покланяемаго Бога, ныне и присно и во веки веков. Аминь.