Молитва перед иконой Пресвятой Богородицы «Прибавление ума»

Прему́дросте Наста́внице и смы́сла Пода́тельнице, нему́дрых Вразуми́тельнице и ни́щих Заступи́тельнице, Ма́ти Христа́ Бо́га на́шего, утверди́, вразуми́ се́рдце мое́, Влады́чице, и ра́зума приба́ви, ко Христу́ моля́ще усе́рдно. Ты да́ждь ми сло́во, ро́ждшая О́тчее Сло́во, и́маши бо дерзнове́ние проси́ти Сы́на Твоего́ о нас. Ами́нь.

Молитва преподобному Сергию Радонежскому

О свяще́нная главо́, преподо́бне и Богоно́сне о́тче наш Се́ргие, моли́твою твое́ю, и ве́рою и любо́вию, я́же к Бо́гу, и чистото́ю се́рдца, еще́ на земли́ во оби́тель Пресвяты́я Тро́ицы ду́шу твою́ устро́ивый, и а́нгельскаго обще́ния и Пресвяты́я Богоро́дицы посеще́ния сподо́бивыйся, и дар чудоде́йственныя благода́ти прие́мый, по отше́ствии же твое́м от земны́х наипа́че к Бо́гу прибли́живыйся, и небе́сныя си́лы приобщи́выйся, но и от нас ду́хом любве́ своея́ не отступи́вый, и честны́я твоя́ мо́щи, я́ко сосу́д благода́ти по́лный и преизлива́ющийся, нам оста́вивый! Ве́лие име́я дерзнове́ние ко Всеми́лостивому Влады́це, моли́ спасти́ рабы́ Его́, су́щей в тебе́ благода́ти Его́ ве́рующия и к тебе́ с любо́вию притека́ющия. Испроси́ нам от Великодарови́таго Бо́га на́шего вся́кий дар, всем и коему́ждо благопотре́бен, ве́ры непоро́чны соблюде́ние, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нных сохране́ние, скорбя́щим утеше́ние, неду́гующим исцеле́ние, па́дшим возставле́ние, заблужда́ющим на путь и́стины и спасе́ния возвраще́ние, подвиза́ющимся укрепле́ние, благоде́лающим в дела́х благи́х преспе́яние и благослове́ние, младе́нцем воспита́ние, ю́ным наставле́ние, неве́дущим вразумле́ние, сирота́м и вдови́цам заступле́ние, отходя́щим от сего́ вре́меннаго жития́ к ве́чному благо́е уготовле́ние и напу́тствие, отше́дшим блаже́нное упокое́ние, и вся ны споспешеству́ющими твои́ми моли́твами сподо́би в день Стра́шнаго суда́ шу́ия ча́сти изба́витися, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам ца́рствие от сложе́ния ми́ра. Ами́нь.

Молитва святой мученице Татиане

О, свята́я му́ченице Татиа́но, неве́сто Сладча́йшаго Жениха́ твоего́ Христа́! Агнице А́гнца Боже́ственнаго, голуби́це целому́дрия, благоуха́нное те́ло страда́ньми я́ко оде́ждами ца́рскими оде́явшая, к лико́м Небе́сным сопричте́нная, лику́ющая ны́не во сла́ве ве́чной, от дней ю́ности служи́тельнице Це́ркве Бо́жия, целому́дрие соблю́дшая и па́че всех благ Го́спода возлюби́вшая! Тебе́ мы мо́лимся и тебе́ мы про́сим: внемли́ проше́ниям на́шим серде́чным и не отверга́й моле́ний на́ших, да́руй чистоту́ те́ла и души́, вдохни́ любо́вь к Боже́ственным и́стинам, на путь доброде́тельный введи́ нас, а́нгельское охране́ние испроси́ у Бо́га нам, на́ша ра́ны и я́звы уврачу́й, ю́ность огради́, ста́рость безболе́зненну и безбе́дну да́руй, в сме́ртном часе́ помози́, помина́й на́ши ско́рби и отра́ду да́руй, посети́ нас, су́щих в темни́це греха́, на покая́ние наста́ви ско́ро, возжжи́ пла́мень моли́твы, не оста́ви нас си́рых, да сла́вяще страда́ния твоя́, возсыла́ем хвалу́ Го́споду, ны́не и при́сно, и во ве́ки веко́в. Ами́нь.