Память: 4 августа (22 июля), 5 октября (22 сентября)

Глас 8.

Припев: Священному́чениче Фо́ко, моли́ Бо́га о на́с.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Пе́ти усе́рдствующу дне́сь боже́ственную па́мять твою́ свеща́тельными Ду́ха заря́ми ду́шу мою́ осия́й, па́стырь и свиде́тель, сла́вне, Вседержи́теля явля́емь.

Му́чеников све́тло обогати́л еси́, Бо́жие благосла́вие, па́стырскими укра́шся добро́тами и обагри́в кро́вию свяще́ннаго страда́ния твоего́ одея́ние, богоблаже́нне.

Утверди́в по́мысл у́ншими наде́ждами, всему́дре, в зло́бе су́щаго си́льна всеконе́чно разсла́бил еси́ и победоно́сец изя́щнейший к небе́сным, Фо́ко, восте́кл еси́.

Богоро́дичен: Разреши́ся пра́отцев, Чи́стая, запреще́ние, преве́чнаго бо ражда́еши Бо́га, мла́до Отроча́ явля́ющася и новотворя́щаго все́ челове́ческое и́стинно существо́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Исцеле́ния соверша́я призыва́нием Христо́вым, преподо́бне, от ле́сти вра́жия спа́сл еси́ гра́д и лю́ди Бо́жиею благода́тию.

Хра́м сы́й Бо́жий, и́дольская ка́пища, му́чениче, низве́ргл еси́, Вседе́тельную Си́лу име́я Помо́щника и Соде́йствителя.

Во́инство ви́дено бы́сть, Фо́ко, а́нгельское и све́т Бо́жий безме́рный, пред суди́тельными тя́ престо́лы Го́споду прославля́ющу.

Богоро́дичен: Из Тебе́ Бо́г воплоти́вся, за благоутро́бие челове́ком соедини́ся и кля́тву разруши́, еди́на Всеблагослове́нная Влады́чице.

Седа́лен, гла́с 1.

Я́ко му́ченик и па́стырь свяще́нно просла́вился еси́, кро́вию оде́жду свяще́нства обагри́в светле́йше, и Го́споду предстои́ши. Те́м дне́сь Бо́жия Це́рковь пра́зднует пресла́вную твою́ па́мять, Фо́ко всеблаже́нне.

Богоро́дичен: Наде́ждо христиа́н, Пресвята́я Де́во, Его́же родила́ еси́ Бо́га па́че ума́ и сло́ва, непреста́нно моли́ с вы́шними си́лами, да́ти оставле́ние грехо́в на́м все́м и исправле́ние жития́, ве́рою и любо́вию при́сно Тя́ прославля́ющим.

Крестобогоро́дичен: Ви́дящи Тя́, Христе́, Всенепоро́чная Ма́ти ме́ртва на Кресте́ распросте́рта, вопия́ше: Сы́не мо́й, Собезнача́льне Отцу́ и Ду́ху, что́ неизрече́нное строе́ние сие́, и́мже спа́сл еси́ пречи́стых Твои́х ру́к, Ще́дре, созда́ние?

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Светле́йшую тя́ звезду́ на высоте́ церко́вней положи́, Фо́ко, Влады́ка, страда́ний, свяще́ннейше, и чуде́с сия́ньми все́х сердца́ просвеща́юща.

Испове́дав воплоще́ние Влады́чне пред мучи́тельским суди́щем, му́чениче страстоте́рпче, и све́тло посрами́л еси́ е́ллинская чти́лища и многобо́жное безбо́жие.

Возвыша́ему мо́рю пре́лести многобо́жия бу́рею, Боже́ственным окормле́нием преше́л еси́, сла́вне, приста́нище тиша́йшее все́м бы́в пла́вающим.

Богоро́дичен: Неискусобра́чная Де́во Благослове́нная, иера́рхов похвало́ и страстоте́рпцев все́х вене́ц, бе́д и скорбе́й пою́щия Тя́ изба́ви.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ше́ствия вра́жия я́вственно запя́л еси́, напра́вив твоя́ ше́ствия к стезя́м Боже́ственнаго хоте́ния, свяще́ннейше.

Терза́емо ра́нами многострада́льное те́ло твое́ расто́рже безбо́жия у́зы Боже́ственною си́лою, Фо́ко богоблаже́нне.

Всеце́лое Бо́гу прине́слся еси́ заколе́ние, поже́ршемуся на́с ра́ди, всехва́льне, и крова́выя же́ртвы и́дольския разори́вшему.

Богоро́дичен: Му́дрость Бо́жия созда́ Себе́, о Влады́чице, от святы́х и чи́стых Твои́х крове́й хра́м, я́ко благоволи́.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Мо́ре безбо́жия изсуши́л еси́, всему́дре, исто́чник жи́зни источа́яй, уче́ния преподо́бная, ны́не же чуде́с ту́чами омыва́еши страсте́й вся́кое злосмра́дие.

Взя́тся на дре́ве, лю́те раздробля́емь и изчленя́емь, блаже́нне, и гла́с с высоты́, тя́ укрепля́ющий, внуши́л еси́, священнонача́льниче и му́чениче многострада́льне.

Стра́сти Безстра́стнаго, Фо́ко, уподо́бився, врачу́еши стра́сти разли́чныя и избавля́еши бу́ри и треволне́ния пла́вающих, к Бо́гу боже́ственными твои́ми моли́твами.

Богоро́дичен: Я́ко ту́ча, спаси́тельное Сло́во истощи́ся в нетле́нную Твою́ утро́бу, всесвята́я Отрокови́це, и зло́бныя пото́ки Боже́ственною си́лою изсуши́.

Конда́к, гла́с 6.

Я́ко архиере́й принося́, о́тче, же́ртвы, на коне́ц себе́ прине́сл еси́ же́ртву живу́ю, свиде́тельствовав зако́нно о Христе́ Бо́зе, от а́нгел укрепля́емь и сме́рть изволя́я, сы́й с вопию́щими тебе́: прииди́, Фо́ко, с на́ми, и никто́же на ны́.

И́кос:

Жи́зни на небесе́х жела́ющии, сла́дость на земли́ попира́юще, устне́ очи́стим и язы́ки уясни́м на пе́ния и благохвале́ния, я́ко да исплете́м досто́йно Фо́ке иера́рху. До небе́сных бо вра́т вше́д, невозбра́нно обре́те во вну́тренняя ше́ствие и зри́т Жела́емаго, от а́нгелов Сла́вимаго, отту́ду бо и мо́жет на́м уми́лостивити Еди́наго Благосе́рдаго душе́вным неду́гом, я́ко свиде́тельствовав о Не́м. Воспева́ем у́бо ему́ и вопие́м: призира́я на ны́, прииди́, Фо́ко, с на́ми, и никто́же на ны́.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Я́рости мучи́телей не устраши́лся еси́, сла́вне, па́стве же предста́тельствуя слове́сней, я́ко а́гнец, прине́слся еси́ Первопа́стырю Христу́, му́ченически, Фо́ко, прославля́емь.

Искуше́н бы́л еси́, я́ко зла́то в горни́ле, му́чениче, посреде́ вве́ржен ва́пна пламенови́днаго и ника́коже опаля́емь, — благослове́н еси́, Бо́же мо́й, — взыва́я, — в хра́ме сла́вы Твоея́, Го́споди.

Боже́ственная любо́вь, распаля́ющи се́рдце твое́, Боже́ственною росо́ю тя́, сла́вне, сохрани́ во огни́ неизнуря́ема, безбо́жия же, иера́рше, ти́ну сожига́юща.

Богоро́дичен: Согни́вший души́ моея́ до́м, Пречи́стая Отрокови́це, покая́ния о́бразы, я́ко Блага́я, обнови́, Я́же все́ челове́чество Рождество́м Твои́м обнови́вшая.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Благода́ть во уста́ твоя́, му́дре Фо́ко, излия́ся, те́м обрати́л еси́ блудя́щия лю́ди зми́я сове́том и приве́л еси́, я́коже па́стырь и́стинный, Христу́ зову́щия: благослови́те, вся́ дела́ Госпо́дня, Го́спода.

Неусы́пна и́мать тя́, му́дре, ве́рных собо́р моли́твенника, утоля́юща мо́ря во́лны свере́пыя, напа́сти же укроща́юща и лю́тых вся́ческих на́с избавля́юща, вопию́щия: благослови́те, вся́ дела́ Госпо́дня, Го́спода.

Струи́ целе́ний хра́м тво́й тре́бующим то́чит всегда́, приста́нище явля́яся нево́лненное и страсте́й отгони́тельное тебе́ почита́ющим и Христу́, му́чениче, зову́щим: благослови́те, вся́ дела́ Госпо́дня, Го́спода.

Да твою́ честву́ем честну́ю, Фо́ко, па́мять, торжеству́юще, преблага́го Го́спода умоли́ усе́рднейше, избавле́ние неудо́бных на́м дарова́ти, вопию́щим: благослови́те, вся́ дела́ Госпо́дня, Го́спода.

Богоро́дичен: Зако́нныя Тя́ прообража́ху ковче́г и ста́мна, иму́щая ма́нну, Пречи́стая, Боже́ственная трапе́за, па́ки же и све́щник златоза́рный, во открове́ние язы́ков Све́т поро́ждшую, просвеща́ющий богозна́нием земны́я концы́.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Священносло́вии боже́ственными, свяще́ннаго, прииди́те, па́стыря вси́ всесвяще́нную па́мять свяще́ннейше торжеству́им, благоде́телю Бо́гу за ны́ моля́щаго.

Яви́лся еси́ распаля́емь ре́вностию Влады́ки, егда́, му́чениче, в ба́ню разжже́нную вше́л еси́, в не́йже ду́х тво́й в Бо́жии ру́це веселя́ся, му́чениче, пре́дал еси́.

Тя́ иера́рхов ли́ки, и му́чеников собра́ния, и свяще́нных апо́столов соводворе́ние, все́х же пра́ведных, му́чениче Фо́ко, ду́си, иму́ще посреде́ себе́, веселя́тся.

Простре́ся в ми́ре па́мять твоя́, ду́ши просвеща́ющи благохва́лящих ве́рою по́двиги твоя́, и боре́ния, и до́блественное страда́ние, па́стырю и му́чениче досточу́дне.

Богоро́дичен: Просвети́, Чи́стая, ду́шу мою́, омраче́нную грехо́м, и ве́чнующаго мя́ пла́мене и тмы́ изба́ви хода́тайством Твои́м, да Твое́, ра́дуяся, восхваля́ю вели́чество.

Свети́лен

Архиере́ев сла́ва и ни́щих защи́тник ты́ показа́лся еси́, богому́дре о́тче, и сто́лп доброде́телей, те́м помина́й все́х пою́щих тя́, Фо́ко.

Богоро́дичен: Тя́ предста́тельницу вси́ и́мамы, гре́шнии, о Всесвята́я Де́во! Ты́ благопреме́нна на́м сотвори́ Сы́на Твоего́ Ма́терними Твои́ми моли́твами.

Канон святому священномученику Фоке Синопскому (на возвращение мощей)

Пе́снь 1.

Ирмо́с: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Све́ту непристу́пному предстоя́, Фо́ко, просвети́ мо́й по́мысл, молю́ся, му́дре, и се́рдце, восхвали́ти дне́сь свято́е твое́ страда́ние.

Украси́лся еси́ от де́тска, боже́ствен ра́зум, Фо́ко, име́я, и благода́ти сподо́бився твори́ти зна́мения и отгоня́ти лука́выя ду́хи, прему́дре.

Испо́лнен сы́й благода́ти, испо́лнен ра́зума Бо́жия, име́л еси́ живу́щую в тебе́ Ду́ха Боже́ственнаго си́лу, богому́дре, Ея́же ра́ди, я́ко со́лнце, просия́л еси́, просвеща́я ве́рныя.

Богоро́дичен: Неискусому́жно во утро́бе Твое́й Невмести́маго Бо́га име́ла еси́ вме́стна, Богороди́тельнице, нете́сно, Его́же о на́с, Богора́дованная, при́сно моли́.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Свяще́н из мла́да ра́зум име́л еси́ и да́же до ста́рости же и престаре́ния, богоно́се, Бо́гу угоди́л еси́, отту́ду сла́ву получи́л еси́.

Твоего́ вели́каго преще́ния, богоно́се, не терпе́, де́мон, и́же в корабли́, отбега́ет, и Христо́с велича́ется де́лы твои́ми, чу́дне.

И́же во граде́х до́блести твоя́, по́двиги же, и тече́ния, и благодея́ния, кто́ досто́йно восхва́лит, чу́дне, му́чеников украше́ние и похвало́?

Богоро́дичен: Я́ко вы́шши а́нгел, прия́ла еси́ в ложесна́, Пречи́стая, Влады́ку а́нгелов и всея́ тва́ри, те́мже Тя́ ве́рно почита́ем.

Седа́лен, гла́с 4.

Наста́, празднолю́бцы, све́тло торжество́, па́мять богому́драго и святи́теля Фо́ки, веселя́щи концы́, сия́ющи заря́ми чуде́с в ми́ре, нося́щи челове́ком неску́дную благода́ть: мо́лится бо Го́сподеви спасти́ ро́д на́ш.

Богоро́дичен: Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.

Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ние прегреше́ний на́м дарова́ти.

Пе́снь 4.

Ирмо́с: Услы́шах, Го́споди, слу́х Тво́й и убоя́хся, я́ко неизрече́нным сове́том, Бо́г сы́й Присносу́щный, от Де́вы прише́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й.

Свети́льника тя́ сия́юща пра́вды зна́ем, де́лы и муче́нием, при́сно светолу́чными сия́нии просвеща́юща сердца́ ве́рных и неду́гов мглу́, сла́вне, отгоня́ща.

Красе́н в добро́тах муче́ния, Фо́ко, яви́лся еси́: го́лубь бо Бо́жий на версе́ твое́м честне́м се́де, сказа́, му́дре, страсте́м прича́стнику бы́ти Ду́хом.

Окормле́ние иму́щии, и́же в мо́ри, богоно́се, твою́ моли́тву при́сно тя́жкия бу́ри избавля́ются, пою́ще тебе́ ра́ди Подаю́щаго и́м избавле́ние спаси́тельное.

Богоро́дичен: Нескве́рная, Небла́зная, оскверне́нное мое́ се́рдце вре́дными помышле́ньми и преступле́ньми окаля́ное очи́сти Твои́ми к Преблага́го Бо́га Боже́ственными утеше́нии.

Пе́снь 5.

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем.

Я́коже че́стен ка́мень, проходя́, преподо́бне, служа́щия ка́мению лю́ди к Бо́жией ве́ре приве́л еси́ словесы́ твои́ми и чуде́сными явле́ньми.

Преподо́бен в преподо́бных показа́лся еси́, сла́вне, и в му́ченицех све́тел, чу́дно пострада́в и борца́ победи́в, Фо́ко чу́дне.

Воспе́ша а́нгельская во́инства, ви́дяще пострада́вша тя́, му́чениче, тве́рдо и безпло́тныя побежда́юща де́моны в тле́ннем твое́м, блаже́нне, телеси́.

Богоро́дичен: Спаси́ мя, волну́ющася жития́ страстьми́, Пречи́стая, и окорми́ к ти́хим безстра́стия приста́нищем, все́х По́моще христиа́н, Богоблагода́тная.

Пе́снь 6.

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Возвеща́ет ти́ хотя́щая бы́ти челове́ческим гла́сом, пресла́вне, ча́шу глаго́ля пи́ти тебе́ спаси́тельную, по́сланный ти́ го́лубь свы́ше.

По премно́гих по́тех, по боле́знех неизме́рных те́ла, мечу́ святу́ю твою́ главу́ преклони́л еси́ и кровьми́ зе́млю освяти́л еси́.

Ме́ртвым ка́пищем не послужи́в, пребога́те, сме́рть претерпе́л еси́ и живе́ши по сме́рти, сего́ ра́ди тя́, Фо́ко, ублажа́ем.

Богоро́дичен: Живы́й в вы́шних во святу́ю Твою́ утро́бу всели́ся, пло́ти подо́бием ми́рови явля́яся, сего́ ра́ди Тя́, Чи́стая, сла́вим.

Конда́к, гла́с 6.

Я́ко святи́тель принося́, о́тче, же́ртвы, на коне́ц себе́ прине́сл еси́ же́ртву жи́ву, свиде́тельствовав зако́нно о Христе́ Бо́зе, от а́нгел укрепля́емый, и сме́рть изволя́я, сы́й с вопию́щими тебе́: прииди́, Фо́ко, с на́ми, и никто́же на ны́.

И́кос:

Жи́зни небе́сныя жела́юще, пи́щу же на земли́ попира́юще, устне́ очи́стим и язы́ки та́кожде, пе́ния и пе́сни я́ко плету́ще досто́йно Фо́ке свяще́ннику, и́бо, в небе́сную две́рь вше́д, невозбра́нно обре́те е́же вну́трь ше́ствие и взира́ет на Жела́емаго, от а́нгел сла́вима. Отту́ду бо и мо́жет о на́с моли́ти еди́наго Ми́лостиваго, душе́вных неду́гов Цели́теля, я́ко му́ки прия́т за Него́. Воспое́м у́бо Того́, и возопие́м Ему́: призира́я на ны́, прииди́, Фо́ко, с на́ми, и никто́же на ны́.

Пе́снь 7.

Ирмо́с: А́нгелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Проше́д сквозе́ пла́мень, я́коже три́ ю́ноши, неопале́н, му́чениче, пребы́л еси́ Христо́вою си́лою пожи́вшаго в тебе́ па́че ума́.

Ты́, огне́м Боже́ственныя любве́, му́чениче, вну́трь распаля́емь, Фо́ко, огню́ ве́щному примеша́яся, пребыва́еши, му́дре, неопали́мь.

Испещре́н Боже́ственными добро́тами я́звенными, к Бо́гу восте́кл еси́, твоему́ Подвигополо́жнику, побе́ды вене́ц от Него́ прие́мь.

Богоро́дичен: Избавля́еми вся́каго осужде́ния, Де́во, чу́дным Рождество́м Твои́м, гла́сы ра́достными песносло́вим Тя́, Присноблаже́нная.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

От пеле́н освяти́ тя все́х Соде́тель Бо́г, и, в ме́ру дости́г во́зраста страда́ний Христо́вых, пострада́л еси́, и победи́л еси́ нача́ла си́лы вра́жия, и венцено́сец дости́гл еси́ вы́шних оби́телей жили́ще.

Ко́рмчия тя́ изря́дна призыва́ют при́сно пла́вающии, му́чениче, и морски́х избавля́ются, му́дре, бе́д благоприя́тными твои́ми, сла́вне, моли́твами, воспева́юще все́х Царя́, и Соде́теля, и Бо́га во ве́ки.

Я́ко а́гнца тя́ незло́бива, Госпо́дни врази́ умерщвля́ют, Фо́ко, во глубо́цей и честне́й ста́рости, врага́, сла́вне, злу́ нача́льника, мече́м уморя́ющаго испове́дания и дерзнове́ния твоего́ во ве́ки.

Богоро́дичен: Очище́ние была́ еси́ па́дшему на́шему тле́нному естеству́, поро́ждши А́гнца Бо́жия, взе́млющаго согреше́ния челове́ков коне́чным милосе́рдием, те́мже Тя́ пое́м ра́достно, Де́во Богоро́дице.

Пе́снь 9.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Я́ко не́бо зве́здно, бие́ний добро́тами чуде́с, му́чениче, позна́лся еси́, Фо́ко, просвеща́я при́сно подсо́лнечную и реша́ тму́ страсте́й и вся́каго злоче́стия, сего́ ра́ди ве́рою тя́ воспева́ем.

Ты́ те́сный ше́ствовал еси́ на земли́, му́чениче, пу́ть, наде́ждами ве́чнующих красо́т, Фо́ко, благоче́стно разширя́яся, и вся́ утесни́л еси́ вра́жия лю́тая кова́рства.

Свяще́нное торжество́ и честны́й тво́й пра́здник ны́не наста́, нося́щь на́м ра́дость соверше́ну. В се́й сла́вятся твоя́ до́блести вои́стинну, и боре́ния, в не́йже помина́й на́с, страстоно́сче и му́чениче.

Богоро́дичен: Но́сиши Мое́ подо́бие, Оте́ческий име́я зра́к, о Сы́не Мо́й! Хо́щеши бо земны́х лю́тое я́ве безобра́зие исцели́ти, — вопия́ше Пречи́стая, рука́ми Христа́ нося́щи, Ю́же песносло́вим гла́сы немо́лчными.

Свети́лен.

Святи́телей украше́ние, и ни́щих засту́пник ты́ яви́лся еси́, богому́дре о́тче, и сто́лп доброде́телей, те́мже помина́й вся́, пою́щия тя́, Фо́ко.

Богоро́дичен: Дании́л преднапису́ет Тя́ несеко́мую го́ру, из нея́же честны́й Ка́мень отсече́ся и истни́ и́дольския хра́мы, Богороди́тельнице Мари́е.