Глас 1.

Припев: Святы́й му́чениче Севастиáне, моли́ Бо́га о на́с.

Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Боже́ственными уясня́емь заря́ми честны́я Тро́ицы, приснопа́мятне, ве́рою чту́щия твое́ светоза́рное и свяще́нное торжество́ твои́ми моли́твами све́та прича́стники покажи́.

Име́я по́мысл светови́ден и прия́тен честны́х осия́ний, Еди́наго возжеле́л еси́, вои́стинну Су́щаго, я́ко смы́слен и му́др, му́чениче страстоте́рпче, и Сего́ ве́рою получи́л еси́.

По́ты боже́ственными и́стинно плотска́я мудрова́ния очерни́л еси́, кровьми́ страда́ния му́тныя пото́ки изсуши́л еси́ многобо́жия, богому́дре му́чениче пребога́те.

По́лк приве́л еси́ страда́льцев уче́нии твои́ми боже́ственными Зижди́телю, вся́кое злоче́стие гони́телей низложи́в благода́тию Свята́го Ду́ха, с ни́миже мо́лишися спасти́ся на́м.

Богоро́дичен: Мла́да породила́ еси́ Сы́на, пре́жде ве́к со Отце́м Су́щаго, естества́ обно́вльшая зако́ны, Чи́стая Де́во, Ма́ти Пречи́стая, преесте́ственным честны́м и боже́ственным Рождество́м Твои́м.

Пе́снь 3.

Ирмо́с: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Во́инство веды́й честно́е, боже́ственными ору́жии ве́ры утвержде́нно, му́чениче непобеди́ме, ополче́ния борца́ и кова́рствия мучи́телей вся́ низложи́сте си́лою Ду́ха.

Утверди́в на ка́мени у́мнем восхожде́ния се́рдца твоего́ благочестному́дренно, му́чениче многострада́льне, не преврати́лся еси́ кова́рствы льсти́ваго зми́я, но все́м утвержде́ние благоче́стия в Ду́се бы́л еси́.

Члено́в боде́ния лю́тая претерпе́л еси́, свя́зан и на дре́ве, му́чениче, протяза́емь, Бо́га же Боже́ственною си́лою, сла́вне, неврежде́н, всеце́л а́бие показа́лся еси́, посрамля́я вра́жия кова́рствия.

Богоро́дичен: Свяще́ние яви́лася еси́ мы́сленное вся́ Освяща́ющаго и чи́сто, Всенепоро́чная, селе́ние: из Тебе́ бо яви́ся Бо́г воплоща́емь и сугу́б естество́м ми́ру познава́емь во еди́ной ипоста́си, Богоневе́сто.

Седа́лен, гла́с 4.

Крове́й твои́х обагре́нии омочи́л еси́ страда́ния оде́жду, оде́ялся еси́, я́коже багряни́цею честно́ю, Севастиа́не. Те́мже и всели́лся еси́ со Христо́м в Вы́шнее безконе́чное Ца́рство, с страда́вшими с тобо́ю и венцы́ прия́л еси́, му́дре, с ни́миже лику́я, на́с при́сно помина́й.

Богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Крестобогоро́дичен: Из Безнача́льнаго Отца́ Рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, увы́ Мне́, Любе́знейший Иису́се, вопия́ше, ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́ распина́ешися? пою́ Тя́, Долготерпели́ве.

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Мо́щь тебе́, Тиву́ртие, да́рует Госпо́дь не́мощию плотско́ю побори́ти врага́: огню́ бо распаля́ему, ю́ношески вше́л еси́, му́чениче крепча́йше, и небе́сную ро́су восприя́л еси́.

Совокупи́лся еси́ с го́рними служи́тели, о Тиву́ртие! я́ко послужи́в Христу́ и возне́сл еси́ чи́сты же́ртвы в Ду́се, священноде́телю, му́чеников сла́ва и хвала́; сего́ ра́ди ра́достно тя́ почита́ем.

Пра́ве пове́шен, и остны́ стру́жемь, и зе́льными ра́н окружа́емь стремле́ньми, и в ро́ве засыпа́емь, и в не́м боже́ственную кончи́ну прие́м, доблему́дренный ра́довашеся Касту́л.

Врачева́ния в Ду́се Святе́м, блаже́нне, соверша́я, ко просвеще́нию зря́щим благоче́стно лю́дем спасе́ние благоле́пно, Севастиа́не, возвести́л еси́, му́ченически же тече́ние соверши́л еси́.

Богоро́дичен: Еди́ну Тя́ от все́х родо́в избра́ пресу́щественный Бо́г и осуществова́ся ра́ди на́с, бы́в Челове́к, Зижди́тель челове́ческаго существа́, Богороди́тельнице Пренепоро́чная, Влады́чице.

Пе́снь 5.

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Стези́ твоя́ и ше́ствия, к еди́ному веду́щия Го́споду, безпу́тия враго́в уклони́ша и мно́гим бы́ша пу́ть пра́в и тве́рд, му́чениче Христо́в всече́стне.

Вити́йствует Маркелли́н и Ма́рко мудре́йшая пред суди́щем, Христо́во спаси́тельное прише́ствие; привя́зана же бы́ша вку́пе, остна́ми в но́зе пригвожда́ются, му́ченически украша́ема.

Страда́ние, стра́сти на́ша умертви́вшаго, Маркелли́н и Ма́рко кре́пко образу́юще, копие́м пробода́ются, и венцено́сцы с ли́ки страда́лец совокупля́ются.

Богоро́дичен: Пресве́тлый со́лнца о́блаче, Всенепоро́чная, отжени́ души́ моея́ о́блаки моли́твами Твои́ми и у́м мо́й просвети́, нераде́нием омрачи́вшийся, я́ко да пою́ Тя, Всепе́тая.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Тве́рдостию ума́, честне́йше, показа́лся еси́ неутомле́н, егда́ бия́ху тя́ па́лицами неща́дно и стреца́ху мно́гими стрела́ми. Те́мже к Све́ту преше́л еси́, ра́дуяся, му́чениче, невече́рнему.

Вжиля́ше тя́ Христо́с, подвиза́ющася, и де́моны ра́тующа, и ра́нам приобща́ющася лю́тым, Севастиа́не му́чениче непобеди́ме, и к Нему́ смотря́юща серде́чными очесы́.

Заво́рами тве́рдыми прему́дрых слове́с твои́х пре́лесть сокруши́л еси́, и чти́лища разори́л еси́ враго́в, и и́дольския хра́мы потреби́л еси́, и тебе́ сама́го хра́м Боже́ственнаго Ду́ха воздви́гл еси́.

Богоро́дичен: Истле́вшее на́ше от преступле́ния существо́ обнови́ла еси́, Обновля́ющаго вся́ Боже́ственною во́лею ро́ждши, еди́на в жена́х Благослове́нная, Богора́дованная.

Пе́снь 7.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Си́лою Твое́ю держа́вною укрепля́еми, страстоте́рпцы Твои́, Христе́, победи́ша врага́, ле́сть попра́ша, телеса́ преда́ша ра́нам, воспева́юще: хва́льный отце́в Бо́г и препросла́влен.

Богоза́рнии страстоно́сцы му́ченицы, подви́гшеся до́бре, Маркелли́н, и сла́вный Ма́рк, и Тиву́ртий, и Касту́л всему́дрый к небеси́ преста́вишася, хва́льнаго воспева́юще Бо́га и препросла́вленнаго.

Ю́ношески, страда́льче Тиву́ртие, я́коже о́троцы, на пла́мень наступи́л еси́ мы́сленно, ро́су Ду́ха свы́ше прие́м и песнопоя́ усе́рдно: хва́льный отце́в Бо́г и препросла́влен.

Я́коже а́гница пове́шена, сла́вная, удави́ла еси́ врага́ жи́лами терпели́вных боле́зней твои́х, всехва́льная, живе́ши же по сме́рти, му́ченице Зои́, воспева́ющи: хва́льный отце́в Бо́г и препросла́влен.

Богоро́дичен: Ста́мну злату́ю, всесвяту́ю трапе́зу Боже́ственнаго хле́ба жи́зни, имену́ем Тя́, Чи́стая, ме́сто свяще́ния, престо́л высоча́йший, на не́мже Бо́г почи́, хва́льный отце́в Бо́г и препросла́влен.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Умертви́тися ми́ру восхоте́в и су́щим в ми́ре все́м, су́щия сподо́бился еси́, всече́стне, жи́зни, вопия́ усе́рднейше: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Положи́ша тя́ беззако́ннии лю́те, в ро́ве преиспо́днейшем, посыпа́юще и умерщвля́юще, воспева́юща те́пле, приснопа́мятне Касту́ле: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Блаже́нныя улучи́ла еси́ жи́зни, я́ко тезоимени́та сея́, удавле́нием бо ну́жднейшим тле́нную жи́знь оста́вила еси́, пою́щи: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Богоро́дичен: Украси́лася еси́, ро́ждши Бо́га кра́снаго и Влады́ку, Боже́ственными уясня́ющаго ро́д челове́ческий, Чи́стая, красота́ми, Ему́же вопие́м: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Пе́снь 9.

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Да Боже́ственныя све́тлости, и ве́чныя сла́вы и красоты́, Севастиа́не, сподо́бишися, всеблаже́нне, муче́ния, боле́зни и сме́рть претерпе́л еси́ му́жественне; те́мже тя́ вси́ велича́ем.

Яви́лся еси́ среди́ зве́зд со́лнце, стра́ждущих с тобо́ю, му́чениче, и ны́не просвеща́ете страда́нии свяще́нными, чи́стыми светлостьми́, Це́ркве Боже́ственное утвержде́ние, и все́ диа́воле разоря́ете киче́ние.

Лю́бяще Христа́, Тиву́ртий, и Маркелли́н, и Ма́рк, Зои́ и Касту́л с Севастиа́ном наста́вником и богому́дрым стра́ждут и ра́вныя прие́млют побе́ды венцы́, о на́с при́сно моля́щеся.

Взя́тся ко оби́телем, вселя́емь, светови́дным му́чеников ли́к боже́ственный, и небеса́ обхо́дит, ра́дуяся, о все́х на́с Человеколю́бца при́сно умоля́юще, блажа́щих и́х всегда́.

Богоро́дичен: Ужаса́ются мы́сленная во́инства, О́тчее зря́ща Боже́ственное озаре́ние, на Твои́х рука́х несказа́нно держи́мо и Твое́ иму́щее подо́бие, да земны́я обожи́т, Де́во Ма́ти Всенепоро́чная.