Память: 24 (11) сентября

Глас 4.

Припев: Преподо́бная ма́ти Феодо́ро, моли́ Бо́га о на́с.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Уста́ моя́ испо́лни Твоего́ хвале́ния, Го́споди, пою́щу сла́ву Твою́ многопе́тую и честву́ющу боле́зни Феодо́ры, уго́ждшия Тебе́ жития́ све́тлостию.

Возсия́ дне́сь свяще́нное твое́ торжество́, со́лнца светле́йше, су́щия во тме́ ду́ши озаря́ющее, мра́к де́монский всегда́ отгоня́ющее, досточу́дная.

Не позна́, заходя́, тя́ погреша́ющу со́лнце, Незаходя́щее же позна́ Еди́н, я́ко Всеве́дый и озари́ луча́ми покая́ния души́ твоея́ о́чи, богоблаже́нная.

Напи́сан бы́сть гре́х тво́й, всечестна́я, я́ве, я́ко сказа́ша Ева́нгелия; но, потща́вшися, по́ты воздержа́ния, сле́зными же то́ки се́й изгла́дила еси́.

Богоро́дичен: Я́ко одушевле́н черто́г, я́ко нетле́нную ски́нию, я́ко две́рь небе́сную, я́ко Боже́ственную трапе́зу, я́ко пала́ту и престо́л Влады́чень, Мари́ю Чи́стую пе́сньми почти́м.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

В му́жескую оде́жду обле́кшися, и му́дре потекла́ еси́ со тща́нием, и мона́шескому собо́ру, честна́я, себе́ примеси́ла еси́, к нача́лом бо́рствующи лука́ваго мироде́ржца.

Сла́бость же́нскую му́жески измени́ла еси́ зва́нием и́стинно и но́вым о́бразом, де́лы да́р че́стен и Бо́гу возжеле́нен тебе́ саму́ю, преподо́бная, показу́ющи.

Безпло́тно житие́ показа́ла еси́ в телеси́, сла́вная, ме́ртвенне, несосу́дное воздержа́ние, и бде́ние непреста́нное, и моли́тву вы́ну, о Феодо́ро, держа́вши.

Богоро́дичен: Волну́ет мя́ бу́ря грехо́вная и возмуще́ние безме́стных помышле́ний, умилосе́рдися, Всенепоро́чная, и ру́ку ми́ по́мощи, я́ко ми́лостива, простри́, я́ко да спа́сся, велича́ю Тя́.

Седа́лен, гла́с 5.

Му́жески по́двиги воздержа́ния претерпе́вши, низложи́ла еси́ многоко́зненнаго, с му́жи жи́знь пожи́вши, Феодо́ро, благоче́стно. И ны́не прешла́ еси́ к Бо́гу, моля́щи о все́х свяще́нно свято́е соверша́ющих твое́ успе́ние.

Богоро́дичен: Иоаки́м и Анна торжеству́ют, по Бо́зе бо досто́йно благода́ть обрето́ша и роди́ша пло́д, богоприя́тен хра́м, Де́ву и Чи́стую Ма́терь Бо́жию, еди́ну Благослове́нную, моля́щуюся непреста́нно спасти́ся душа́м на́шим.

Пе́снь 4.

Ирмо́с: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Терпи́ши на мно́ги дни́ до́блественно, сла́вная, поще́ние, я́ко безпло́тна, не́мощь твою́ укрепля́ющу Христу́ всеси́льною во́лею и Боже́ственною пита́ющу тя́ благода́тию.

Ви́ждь смире́ние и пла́чь, ви́ждь мою́ ско́рбь и облегчи́ греха́ тяжча́йшее бре́мя, — Феодо́ра вопия́ше к Еди́ному спасти́ Могу́щему.

Ловле́нием запе́ншаго тя́ ле́стно, ту́чами твои́х сле́з потопи́вши, ловле́нием победи́ла еси́ ловя́щаго ду́ши, в приста́нищи благода́тию Боже́ственною покрыва́ема, сла́вная.

Богоро́дичен: Всепречу́дная Ма́ти Бо́жия, возсия́й ми́ покая́ния лучу́, разори́ мра́к безме́рных мои́х зо́л, лука́выя отжени́, Де́во, по́мыслы се́рдца моего́.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Удиви́шася чи́ни безтеле́сных, зря́ще тя́ в телеси́ бре́ннем подо́бящуюся те́х житию́ и честно́му пребыва́нию и пребори́вшую врага́, дре́вле подпе́ншаго тя́, Феодо́ро, ле́стию.

Звере́й стремле́ния Бо́г тебе́ покори́, благода́ть исцеле́ний да́в тебе́, сие́ пропове́дает руко́ю твое́ю изба́вивыйся снеде́ния ди́вияго зве́ря, его́же сокруше́нна исцели́ла еси́, сла́вная.

Пита́еши младе́нца соверше́нным смы́слом, терпя́щи лю́тое оклевета́ние, благодаря́щи Вседержи́телю, да́вшему тебе́ кре́пость и тя́ уди́вльшему, Феодо́ро всехва́льная.

Богоро́дичен: Кре́пость и утвержде́ние немощна́го моего́ се́рдца Ты́ еси́, Неискусобра́чная Де́во, необори́мая стена́ от лица́ вра́жия, спаса́ющи мя́ от все́х лю́тых, побежда́ющи полки́ лю́таго борца́.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Исто́чник сле́з принося́щи непреста́нно, друча́щися и стеня́щи, запреще́ние мона́хов и отлуче́ние, благодаря́щи, терпи́ши, богоблаже́нная.

Питие́ от мо́ря иму́щи, ди́виим же бы́лием пита́ющися, со зверьми́ же в пусты́ни водворя́ющися, я́ко на небеси́ обита́ла еси́, досточу́дная.

Опале́ние со́лнца понесла́ еси́, нощну́ю сту́день терпе́ла еси́, Ду́ха Боже́ственнаго согрева́ема благода́тию: те́м наслажда́ешися го́рняго блаже́нства.

Богоро́дичен: Боже́ственную ста́мну и трапе́зу, Хле́б Жи́зни поне́сшую, неде́ланную ни́ву, го́ру святу́ю, Богоро́дицу Де́ву пе́сньми сла́вим.

Конда́к, гла́с 2.

Те́ло твое́ поста́ми изнури́вши, бде́нными моли́твами Творца́ умоли́ла еси́ о гресе́ твое́м, я́ко да прии́меши соверше́нное проще́ние, и прия́ла еси́ оставле́ние, пу́ть покая́ния показа́вши.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Нестерпи́мыми тя́ ра́нами многоко́зненный вра́г удручи́, в привиде́ниих мечта́яся; но того́ низложи́ла еси́ су́етное свире́пство, воспева́ющи: отце́в на́ших Бо́же, благослове́н еси́.

Сухи́я ро́вы напо́лнила еси́ во́д моли́твами твои́ми, сла́вная, чудоде́йствующи я́ве, Бо́га велича́ющи, тя́ просла́вльшаго, Ему́же взыва́ем: отце́в на́ших Бо́же, благослове́н еси́.

Соверша́ющих твою́ па́мять, сла́вная, при́сно помина́й со дерзнове́нием мно́гим, Бо́га моля́щи Всеще́драго, Ему́же зове́м: отце́в на́ших Бо́же, благослове́н еси́.

Богоро́дичен: Цари́це Де́во, ро́ждшая Царя́ Христа́, уще́дривши, спаси́ мя, коле́блема страстьми́, ве́рою утверди́ и наста́ви мя́ ко спасе́нней стези́, ве́рных Спасе́ние.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Умо́м чи́стым просвеще́н, тво́й началово́ждь, восхище́н бы́в, ви́де, я́же угото́ва блага́я тебе́ Госпо́дь, светови́дный ра́й и неизрече́нный черто́г, Феодо́ро, в не́мже тя́ Подвигополо́жник всели́ Жени́х.

Ангелов, му́чеников и преподо́бных ли́цы, души́ твое́й предначина́юще, сию́ к небе́сным несо́ша оби́телем, к та́мошнему поко́ю веселя́щихся, в не́мже е́сть жили́ще вопию́щих и превознося́щих Христа́ во ве́ки.

Мно́жество мона́шествующих, собра́вшеся, блаже́нное погреба́ют ве́рою те́ло твое́, ви́девше бо пресла́вная, позна́ша изря́дная: я́ко жена́ те́лом посреде́ муже́й жи́ти благоволи́ла еси́, руко́ю покрыва́ема Всеси́льнаго, богому́драя Феодо́ро.

Моли́твами всено́щными терпя́щи, страсте́й успи́ла еси́ двиза́ния, усну́ла же еси́ пра́ведным сно́м подо́бным и к зари́ невече́рней прешла́ еси́, пою́щи: Го́спода воспева́йте, дела́, и превозноси́те Его́ во ве́ки.

Богоро́дичен: В сле́д Тебе́ теко́ша жены́, ми́ра сладково́нная чу́вствующе, Пречи́стая Богоневе́сто, Отрокови́це Неискусобра́чная; из утро́бы Твоея́ Возсия́вшаго Единоро́днаго Сы́на, и Тебе́ сца́рствуют и́стинно, воспева́юще Христа́ во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Зашла́ еси́, я́ко звезда́, от ми́ра, прехва́льная, и возсия́ла еси́ в преми́рней жи́зни, оста́вльши, я́ко зари́, на́м доброде́тели жития́ твоего́ и исправле́ния, сердца́ все́х озаря́ющи ве́рно соверша́ющих па́мять твою́.

Две́ри небе́сныя све́тло отверзо́шася, подъе́млюще тя́, и перворо́дных ны́не Це́рковь име́ет ликовству́ющу со избра́нными, приснопа́мятная, свяще́нную твою́ ду́шу, иде́же е́сть шу́м пра́зднующих, Феодо́ро, и све́т невече́рний.

Обрела́ еси́ возме́здие боле́зней, я́ко наде́ялася еси́, небе́сныя че́сти: уста́вила еси́ жела́ние, обре́тши исто́чник, благи́х наслажда́ешися, ясне́йши и чисте́йши Жениха́ зря́щи, Феодо́ро, я́коже а́нгели зре́ти сподо́бишася.

Разреше́ние неудо́бных, избавле́ние страсте́й и жития́ исправле́ние испроси́, приснопа́мятная, низпосла́ти хва́лящим тя́ и честну́ю па́мять соверша́ющим твою́, дерзнове́ние иму́щи ко Го́споду, Феодо́ро честна́я и достосла́вная.

Богоро́дичен: Спаси́ мя, Чи́стая, Спа́са ро́ждшая и Всеще́драго, уще́дри раба́ Твоего́, к покая́ния пути́ напра́ви, лука́ваго собла́зны от среды́ отжени́, того́ же изба́ви мя́ ловле́ния, Богоро́дице, ве́рных Помо́щнице.