Глас 8.

Пе́снь 1.

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припе́в: А́нгеле Христо́в, Храни́телю мо́й святы́й, моли́ Бо́га о мне́.

Припе́в: А́нгеле Христо́в, Храни́телю мо́й святы́й, моли́ Бо́га о мне́.

Неусыпа́емаго Храни́теля души́ моея́, и предста́теля живота́ моего́, и наста́вника от Бо́га, его́же получи́х, пою́ тя́ А́нгеле Бо́жий, Бо́га Вседержи́теля.

Припе́в: Го́споди Иису́се Христе́ Бо́же мо́й, поми́луй мя́.

Припе́в: Го́споди Иису́се Христе́ Бо́же мо́й, поми́луй мя́.

Хотя́й все́м челове́ком спасти́ся, святы́я А́нгелы наста́вники и световоди́тели приста́вил еси́, Сло́ве, челове́ком, руково́дствующыя на́с к стра́ху Твоему́.

Но́щию содержи́ма мра́чною, и те́мным мра́ком покрыва́емаго страсте́й, све́том покая́ния озари́ мя́ наста́вниче и предста́телю, и Храни́телю мо́й.

Сла́ва: Сту́дных помышле́ний во мне́ то́чит наводне́ние ти́нное и мра́чное, от Бо́га разлуча́ющее у́м мо́й: е́же изсуши́, о засту́пниче мо́й.

И ны́не: Тишина́ ты́, Влады́чице, и приста́нище обурева́емых в пучи́не грехо́вней: те́мже к Твоему́ притека́ю приста́нищу, волну́емь бу́рею разли́чных страсте́й.

Пе́снь 3.

Ирмо́с: Небе́снаго кру́га верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Землена́го и бре́ннаго и пе́рстнаго смеше́ния име́ю бытие́, те́мже земли́ пригвозди́хся: но о предста́телю мо́й, и наста́вниче мо́й, и изба́вителю, обрати́ жела́ние мое́ к небе́сным.

В нощи́ и во дни́ лука́выми де́лы мои́ми преогорчева́ю, и оскорбля́ю, и раздража́ю тя́, и не хотя́ща отдале́ча стоя́ти, побо́рника моего́ понужда́ю тя́.

Печа́ли и уны́ния пови́нный быва́ю, я́ко непокая́нен пребыва́яй и неиспра́влен: те́мже мне́ да́руй пока́ятися и́стинно, и радостотвори́ти тя́, Храни́теля моего́.

Сла́ва: Зря́ неви́димое лице́ Бо́га, на небесе́х седя́щаго, и призира́юща на зе́млю у́мно, и трясти́ся е́й творя́ща, моли́ спасти́ся мне́ святы́й А́нгеле.

И ны́не: У́м и смы́сл и сло́во, да́р Бо́жий прия́х, я́ко да позна́в Влады́ку, де́лы почту́ до́брыми: а́з же страстьми́ да́р обезче́стив, Спа́су досади́х, Влады́чице, спаси́ мя́.

Седа́лен, гла́с 4:

Души́ моея́ Храни́тель и телесе́, избра́нный ми́ от Бо́га Боже́ственный А́нгеле, Богоподража́тельно пре́зри всесвяты́й, вся́ прегреше́ния окая́нныя души́ моея́, изба́ви льсти́ваго мя́ разли́чных сете́й, и о́бщаго уми́лостиви Бо́га, да на суде́ пода́ст ми́ оставле́ние.

Пе́снь 4.

Ирмо́с: Ты́ моя́ кре́пость Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование: не оста́вль не́дра О́тча, и на́шу нищету́ посети́в: те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Не помышля́яй стра́шное суди́ще, в не́мже и́мам Спа́су предста́ти, и да́ти сло́во о вся́ком де́ле же и сло́ве, ниже́ сме́рти безве́стное во у́м отню́д прие́млю, неиспра́влен е́смь, наста́вниче мо́й, не оста́ви мене́.

Приле́жно вся́кую зло́бу соверши́х из мла́да, и не преста́х тя́, засту́пника моего́, преогорчева́ти беззако́нными словесы́ и дея́ньми: но не озло́бися, но пожди́ еще́, вразумля́я, и просвеща́я, и утвержда́я мя́.

Сло́ва Бо́жия долготерпе́ние подража́яй, прише́дша, я́ко да в покая́ние призове́т вся́ гре́шныя, и ожида́юща самово́льное исправле́ние, и не понужда́юща: и ты́ наста́вниче мо́й, на мне́ долготерпели́вно пребу́ди.

Сла́ва: Дале́че от Бо́га гре́х мя́ отри́ну, неключи́маго раба́ и недосто́йнаго: но Влады́ка мо́й Иису́с восприя́т мя́ благоутро́бно, и приусво́и: а́з же толи́кую отмета́яй Его́ благода́ть, еще́ оскорбля́ю и тя́, Бо́жий А́нгеле.

И ны́не: Я́ко вои́стинну Госпо́дь воцари́ся, ца́рствием неотпа́дающим, и облече́ся псало́мски из Тебе́ Богома́ти в красне́йшее благоле́пие, пло́ть святу́ю, е́юже сме́рть прия́т, и низложи́ ея́ ца́рство.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго, но обрати́ мя́, и к све́ту за́поведей Твои́х пути́ моя́ напра́ви, молю́ся.

Тя́ Храни́теля стяжа́в, спребы́теля, собесе́дника, святы́й А́нгеле, соблюда́юща, спу́тствующа, спребыва́юща, и спаси́тельная предлага́юща при́сно мне́: ко́е проще́ние прииму́ неразу́мен сы́й.

Мно́зем дерзнове́нием престо́лу предстоя́ Вседержи́теля, и сликовству́я у Царя́ тва́ри, мно́гих зо́л мои́х пода́ти ми́ проще́ние, защи́тителю мо́й, помоли́ся.

Му́ки прови́дя и муче́ния ожида́ющая мя́, и ожесточе́ние мое́ и безу́мие и ослепле́ние, ми́луя стене́ши, и се́туеши, и дря́хлуеши, посупле́ния испо́лнен, изба́вителю мо́й.

Сла́ва: Ниже́ ко еди́ному часу́, но ниже́ черте́, или́ и сея́ кра́тши, оста́вих тя́, благоде́теля моего́ и Храни́теля, о мне́ пора́доватися и возвесели́тися и взыгра́ти, грехми́ при́сно срастлева́емый.

И ны́не: Но́вый Младе́нец яви́ся недомы́сленный от Тебе́, Пренепоро́чная, ста́вилом дубра́вы, и го́ры ме́рилом ра́зума поста́вивый: ли́к звезда́м исчита́яй, и ка́пли росы́, и ве́тров дыха́ние преложи́вый.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Сохраня́яй и ополча́яйся о́крест мене́, и стремле́ния возбраня́яй де́монов, и те́х зверови́дная нахожде́ния я́же на мя́, отре́яй всегда́, не преста́й Храни́телю мо́й: тя́ бо и́мам те́пла засту́пника.

Пречестно́е и благоуха́нное сы́й ми́ро, не гнуша́йся моея́ смра́дности, не отступи́ от мене́ да́же до конца́: но неотсту́пен бу́ди мне́, Храни́тель, при́сно: и со́лнце бо, места́ скве́рная преходя́, не оскверня́ется.

Ка́пли слезото́чныя источи́ти, покрыва́ющаго вода́ми сло́вом своя́ высо́кая превы́спренняя, благода́ть мне́ да́ти умоли́ предста́телю мо́й, я́ко да те́ми очи́стится се́рдце мое́, и у́зрит Бо́га.

Невеще́ственне я́ко чи́ст и невеще́ствен предстоя́ чи́стому и невеще́ственному, и к Тому́ стяжа́в бога́тое дерзнове́ние и присвое́ние: Того́ моли́ приле́жно, ду́шу мою́ спасе́ну дарова́ти ми́.

Сла́ва: Да покры́ет сра́м и сту́д сту́дная и смра́дная и мра́чная ли́ца вра́жия, егда́ смире́нная моя́ душа́ от те́ла распряга́ется: ту́юже да покры́ют, наста́вниче мо́й, све́тлая твоя́ и пресвяще́нная кри́ла.

И ны́не: Святы́х святе́йшая А́нгел, Херуви́м и Серафи́м превы́шшая: землере́тный мо́й у́м, земна́го и ве́щнаго жела́ния превы́шши покажи́, от земли́ к небе́сней любви́ возвы́сивши.

Конда́к, гла́с 2.

Бо́жий служи́телю, и Храни́телю мо́й преизря́дне, гре́шному при́сно мне́ спребыва́й, злоде́йствия мя́ вся́каго де́монов избавля́яй, и к Боже́ственным стезя́м наставля́яй, жи́знь хода́тайствуяй нетле́нную.

Пе́снь 7.

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тмы́ о́крест напа́дающих на мя́ разбо́йник неви́димых, и́щущих ду́шу мою́ исто́ргнути и восхи́тити, о́гненным мече́м твои́м отгоня́я держа́вно, не оскудева́й, Помо́щниче мо́й.

Егда́ хо́щет ми́ суди́ти Судия́, и Бо́г мо́й, и осуди́ти мя́, осужде́ннаго от со́вести, пре́жде о́наго суда́ не забу́ди раба́ твоего́, руководи́телю мо́й.

Вещество́ име́я ма́терь, и бре́ние отца́, и пра́отца пе́рсть, и си́х сро́дством, в зе́млю весьма́ зрю́: но да́ждь ми́, предста́телю мо́й, и горе́ воззре́ти когда́, к небе́сной добро́те.

Я́ко красе́н сы́й добро́тою, и сла́дкий и весе́лый солнцезра́чный у́м, све́тло предста́ни ми́ оскла́бленным лице́м, и ра́достным воззре́нием, егда́ и́мам от земли́ взя́тися, наста́вниче мо́й.

Сла́ва: Благоутро́бия ра́ди ми́лости, и мно́жества ра́ди мно́гаго человеколю́бия, твои́х кри́л кро́вом Храни́телю мо́й, покры́й мя́ исходя́ща от те́ла: е́же не ви́дети ме́рзская ли́ца де́монская.

И ны́не: Небе́сная врата́, спаси́тельная две́рь, ле́ствице у́мная, е́юже Бо́г сни́де, и челове́к взы́де: небе́снаго ца́рствия щедро́тами твои́ми, Чи́стая, сподо́би мя́ раба́ твоего́.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, Си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

По Бо́зе тя́ прия́х от Бо́га засту́пника и руководи́теля, и помо́щника, и побо́рника, пресвяты́й А́нгеле: те́мже не преста́й, молю́ся, и пе́стунствуяй, и наказу́яй, и уча́й ле́пая мне́ де́яти, и просвети́ти у́м мо́й, до́ндеже мя́ предста́виши Христу́ спасе́на.

Егда́ поста́вятся престо́ли, и кни́ги разгну́тся, и Ве́тхий де́ньми ся́дет, и су́дятся челове́цы, и А́нгели предста́нут, и земля́ восколе́блется, и вся́ ужа́снутся и вострепе́щут: тогда́ твое́ человеколю́бие на мне́ покажи́, и изба́ви мя́ гее́нны, Христа́ умоля́яй.

Ны́не я́ко пче́лы со́т, неви́димо окружа́ют мя́ богоме́рзцыи губи́телие де́мони, я́ко хи́щницы пти́цы, я́ко лука́выя лиси́цы, и я́ко сыроя́дцы пти́ц плотоя́дных, о́крест мене́ лета́ют: покры́й мя́, Храни́телю мо́й, я́коже покрыва́ет оре́л птенцы́ своя́.

От о́чию сле́зы непреста́нно теку́щыя, неоску́дно то́ки да́ждь ми́, всего́ мя́ омыва́ющыя, от верху́ и до ногу́, я́ко па́че сне́га убеле́ну ри́зу обле́к покая́нием, в черто́г Бо́жий вни́ду, тя́ почита́яй Защи́тителя моего́.

Христо́в хра́м су́щее се́рдце мое́, страстьми́ свине́й у́мных житие́ соверши́х: но укрепи́ мя́, помо́щниче души́ моея́, очи́стити сие́, покади́ти, окропи́ти арома́ты и ми́ры моли́тв и чистоты́, да па́ки бу́дет хра́м Христо́в благоуха́нен.

Сла́ва: Наста́вниче и Храни́телю мо́й, и предста́телю и изба́вителю мо́й, отча́янныя моея́ души́ блюсти́телю: егда́ тру́бный стра́шный гла́с и́мать мя́ от земли́ воскреси́ти на су́д, бли́з мене́ ста́ни тогда́ ти́х и ра́достен, наде́ждею спасе́ния оте́мляй мо́й стра́х.

И ны́не: Премно́жеством бла́гости ту́не мя́ поми́луй, благоутро́бия Исто́чник ро́ждшая: ми́лости бо досто́йное не и́мам что́ принести́ Тебе́: благи́х бо мои́х ника́коже тре́буеши, я́ко Благода́теля и Спа́са ми́ру, неизрече́нно заче́нши Благода́тная.

Пе́снь 9.

Ирмо́с: Устраши́ся вся́к слу́х, неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва, бы́в Челове́к. Те́мже Пречи́стую Богоро́дицу, ве́рнии велича́ем.

Да узрю́ тя́ одесну́ю окая́нныя моея́ души́ предстоя́ща, све́тла и ти́ха, засту́пника и предста́теля моего́, внегда́ исчеза́ти от мене́ ну́ждно ду́ху моему́, и и́щущия мя́ поя́ти го́рькия враги́ отгоня́юща.

Я́ко святы́й Бо́жий служи́тель, и творя́й его́ Боже́ственная хоте́ния, мно́гим обогаща́ешися к нему́ дерзнове́нием, святы́й А́нгеле: те́мже те́пле о мне́ Того́ умоли́, я́ко да спасе́н тобо́ю, воспева́ю предста́тельство и покро́в тво́й.

Ве́сь живо́т мо́й во мно́зе прете́к суете́, к концу́ прибли́жихся: и молю́ тя́ Храни́теля моего́, бу́ди ми́ защи́титель, и побо́рник непобори́мь, егда́ прехожду́ мыта́рства лю́таго мироде́ржца.

Ума́ моего́ погреше́ния, заблужде́ния, плене́ния, лю́тости, и студомы́слия нечи́стых и скве́рных помышле́ний, обраща́яй в до́брыя мы́сли, не преста́й, предста́телю мо́й, во блага́я помышле́ния, умиле́ния разже́нныя роди́тели.

Припе́в: Го́споди Иису́се Христе́ Бо́же мо́й, поми́луй мя́.

Припе́в: Го́споди Иису́се Христе́ Бо́же мо́й, поми́луй мя́.

Победи́ мои́х злы́х, Иису́се Единоро́дный Преблаги́й, благоутро́бием Твои́м, безме́рие и премно́жество, Твоего́ невеще́ственнаго служи́теля Боже́ственными моли́твами: его́же ми́ приста́вил еси́ из младе́нства, я́ко Человеколю́бец, Храни́теля.

Сла́ва: Всю́ мою́ по Бо́зе спасе́ния наде́жду возложи́х на тя́, Храни́теля моего́, и попечи́теля, и засту́пника, о́бщую моли́тву к Бо́гу о мне́ сотвори́, смоле́бники прии́м А́нгелов ли́ки, и засту́пники.

И ны́не: Возвы́си ро́г благочести́вых, и низложи́ ва́рваров шата́ния, Богороди́тельнице, необори́мо спаса́ющи сие́ ста́до Твое́, в не́мже вели́кое Твое́ и́мя, и многосла́вное, ве́рно велича́ется и сла́вится.