Конда́к 1.

Избра́нный от Го́спода Бо́га на хране́ние души́ моея́ и телесе́, святы́й А́нгеле, похва́льная ти́ воспева́ти дерза́ю, недосто́йный ра́б тво́й; ты́ же, я́ко име́яй дерзнове́ние к Царю́ Небе́сному, от вся́ких мя́ бе́д и скорбе́й, от вра́г ви́димых же и неви́димых защити́, зову́ща:

Ра́дуйся, А́нгеле Госпо́день, неусыпа́емый храни́телю мо́й.

И́кос 1.

А́нгеле святы́й, по́сланный с Небесе́, во е́же храни́ти мя́ и руководи́ти во все́й жи́зни мое́й, припа́дая молю́ ти ся: са́м наста́ви и вразуми́ мя́, начина́юща от серде́чныя любве́ и усе́рдия возглаша́ти пе́сненныя ти́ хвалы́:

Ра́дуйся, А́нгеле Бо́жий, предста́телю мо́й у Пресвяты́я Тро́ицы; ра́дуйся, Царя́ ца́рствующих безпло́тный во́ине.

Ра́дуйся, Го́спода госпо́дствующих небе́сный слуго́; ра́дуйся, у́мных и невеще́ственных слу́г Его́ сожи́телю.

Ра́дуйся, творя́й при́сно во́лю Влады́ки своего́; ра́дуйся, прие́мый от Бо́га повеле́ние и вла́сть храни́ти ду́шу мою́.

Ра́дуйся, никогда́же отлуча́яйся мене́, гре́шнаго; ра́дуйся, вы́ну спребыва́яй ми́, недосто́йному.

Ра́дуйся, соблюда́яй мя́ на все́х путе́х мои́х; ра́дуйся, сохраня́яй мя́ от вся́каго зла́.

Ра́дуйся, от Бо́га да́нный ми́ руководи́телю на путе́х жития́ моего́; ра́дуйся, благи́й мо́й наста́вниче.

Ра́дуйся, А́нгеле Госпо́день, неусыпа́емый храни́телю мо́й.

Конда́к 2.

Ви́дев человеколюби́вый Госпо́дь, я́ко, по прегреше́нии пра́отца на́шего Ада́ма, вси́ челове́цы удо́бь прекло́нни су́ть ко греху́, по Свое́й неизрече́нной ми́лости посла́л е́сть во всю́ зе́млю святы́х А́нгелов и коему́ждо от челове́к приста́ви храни́теля. Исполня́юще у́бо повеле́ние Влады́ки своего́, святи́и А́нгели всегда́ гото́ви су́ть помога́ти на́м, богоуго́дно пою́щим: Аллилу́иа.

И́кос 2.

Ра́зуму моему́ просвеще́ние свы́ше исхода́тайствуй, святы́й А́нгеле, да возмогу́ позна́ти, что́ е́сть во́ля Бо́жия, блага́я и уго́дная и соверше́нная, и се́рдце мое́ напра́ви, е́же со усе́рдием твори́ти ю́; тебе́ же, храни́теля моего́, да не преста́ну восхваля́ти сицевы́ми гла́сы:

Ра́дуйся, воспламеня́яй се́рдце мое́ любо́вию к Бо́гу, Созда́телю моему́; ра́дуйся, возбужда́яй мя́ на вся́к де́нь же и ча́с приноси́ти Ему́ моли́твы, проше́ния и благодаре́ния.

Ра́дуйся, я́коже стра́жем ве́рным, стра́хом Госпо́дним душе́вный мо́й до́м огражда́яй; ра́дуйся, вся́ помышле́ния моя́ к распя́тому за грехи́ ми́ра Спаси́телю устремля́яй.

Ра́дуйся, страда́ния Его́ и кре́стную сме́рть в па́мять мою́ вперя́яй; ра́дуйся, воспомина́нием Страсте́й Госпо́дних блюсти́ся от грехо́в мя́ поуча́яй.

Ра́дуйся, благода́тнаго Свы́ше осене́ния Свята́го Ду́ха проси́ти мя́ наставля́яй; ра́дуйся, я́ко на кро́ткия то́чию и смире́нныя се́рдцем ми́лостивно призира́ти Ему́, Уте́шителю, уверя́яй мя́.

Ра́дуйся, мы́слею о вездесу́щии Бо́жии всю́ду окружа́яй мя́; ра́дуйся, всеве́дение Его́ у́мным очесе́м мои́м представля́яй.

Ра́дуйся, милосе́рдием Его́ к ка́ющимся гре́шником се́рдце мое́ утеша́яй; ра́дуйся, правосу́дием Его́ к ожесточе́нным и нераска́янным ду́шу мою́ устраша́яй.

Ра́дуйся, А́нгеле Госпо́день, неусыпа́емый храни́телю мо́й.

Конда́к 3.

Си́лу Боже́ственныя благода́ти испроси́ ми́, храни́телю мо́й А́нгеле, во е́же неукло́нно и непреткнове́нно ходи́ти ми́ спаси́тельным путе́м Христо́вых за́поведей, се́рдцем же и усты́ непреста́нно сла́вити всесвято́е и́мя Бо́га на́шего и пе́ти Ему́: Аллилу́иа.

И́кос 3.

И́мам тя́, Богоизбра́нный покрови́телю мо́й, я́коже све́тлую зарю́, просвеща́ющую души́ моея́ темноту́ и разгоня́ющую мра́к серде́чнаго неве́дения моего́; сего́ ра́ди, со умиле́нием припа́дая, молю́ ти́ ся́, да и вся́ моя́ чу́вствия, потемне́нная страстьми́, очи́стятся, во е́же не блужда́ти ми́ во тьме́ грехо́вней. Пречу́дную же све́тлость твою́ воспева́ю си́це:

Ра́дуйся, звездо́ Невече́рняго Све́та, от трисия́ннаго Божества́ возсия́вшая и мене́ вы́ну озаря́ющая; ра́дуйся, пресве́тлая луче́, помраче́нная грехми́ серде́чная ми́ очеса́ осиява́ющая.

Ра́дуйся, я́ко тщи́шися напра́вити мя́ на и́стинный пу́ть во тьме́ беззако́ний заблужда́ющаго; ра́дуйся, я́ко предлага́еши ми́ за́поведи Госпо́дни, а́ки зерца́ло для всея́ жи́зни моея́.

Ра́дуйся, я́ко поставля́еши ми́ зако́н Бо́жий, а́ки свети́льник нога́ма мои́ма и све́т стезя́м мои́м; ра́дуйся, я́ко слове́с Ева́нгелиа Христо́ва в сла́дость послу́шати поуча́еши мя́.

Ра́дуйся, я́ко уче́нию Боже́ственнаго Учи́теля моего́ и Го́спода несумне́нно ве́ровати побужда́еши мя́; ра́дуйся, я́ко в повинове́нии уста́вом святы́я Це́ркве укрепля́еши мя́.

Ра́дуйся, я́ко пра́вилом и преда́нием святы́х Апо́стол и оте́ц покаря́тися наставля́еши мя́; ра́дуйся, я́ко во испове́дании святы́я и правосла́вныя ве́ры утвержда́еши мя́.

Ра́дуйся, я́ко за сие́ испове́дание и на сме́рть гото́ва мя́ бы́ти убежда́еши; ра́дуйся, я́ко еретико́м и отсту́пником и́стинныя Це́ркве сообща́тися возбраня́еши ми́.

Ра́дуйся, А́нгеле Госпо́день, неусыпа́емый храни́телю мо́й.

Конда́к 4.

Бу́ря жите́йскаго мо́ря сокруша́ет духо́вный мо́й кора́бль волна́ми мирски́х попече́ний, и ми́р убо́гия души́ моея́ мяте́тся, и где́ обря́щу ти́хое приста́нище спасе́ния? То́кмо на тя́ по Бо́зе возлага́ю наде́жду, храни́телю мо́й А́нгеле, я́ко прему́драго тя́ ко́рмчаго в мы́сленных бу́рях, смуща́ющих мя́, стяжа́х: благода́рственне у́бо пою́ Бо́гу моему́: Аллилу́иа.

И́кос 4.

Слы́шаще и зря́ще тя́, Боже́ственный А́нгеле, кре́пкаго моего́ блюсти́теля, зло́бнии ду́си поднебе́снии не сме́ют прибли́житися ко твое́й пречи́стей све́тлости и душегуби́тельныя ми́ па́кости де́яти. Сего́ ра́ди смире́нно молю́ тя́, не отступи́ от мене́ за невоздержа́ние мое́, но при́сно от лука́ваго те́х лови́тельства и ко́зней соблюда́й мя́, со умиле́нием глаго́люща:

Ра́дуйся, кре́пким кро́вом кри́л твои́х осеня́яй мя́ и покрыва́яй; ра́дуйся, о́крест мене́ с пла́менным мече́м при́сно ополча́яйся.

Ра́дуйся, проти́ву кня́зя тьмы́ во бра́ни ми́ посо́бствуяй; ра́дуйся, лука́вых его́ служи́телей побежда́ти ми́ помога́яй.

Ра́дуйся, отгоня́яй от мене́ душепа́губныя де́моны, а́ки хи́щныя пти́цы; ра́дуйся, вразумля́яй мя́ бесо́вския ко́зни позна́ти, а́ки лука́выя лиси́цы.

Ра́дуйся, зверообра́зная те́х на у́м и се́рдце мое́ нападе́ния отрева́яй; ра́дуйся, порожде́ния и́х, го́рдость и не́нависть, из се́рдца моего́ исторга́яй.

Ра́дуйся, за́висть и злопомне́ние от мы́слей мои́х прогоня́яй; ра́дуйся, во отраже́ние злы́х по́мыслов кре́стным зна́мением себе́ огражда́ти побужда́яй мя́.

Ра́дуйся, на а́спида и васили́ска небоя́зненно наступа́ти укрепля́яй мя́; ра́дуйся, име́яй непобеди́мое ору́жие проти́ву все́х враго́в мои́х.

Ра́дуйся, А́нгеле Госпо́день, неусыпа́емый храни́телю мо́й.

Конда́к 5.

Боготе́чней и лучеза́рней звезде́, путеводи́вшей дре́вле волхвы́ на поклоне́ние ро́ждшемуся в Вифлее́ме Спаси́телю ми́ра, дерза́ю уподо́бити тя́, благи́й мо́й храни́телю: неотлу́чным бо и светоно́сным твои́м ми́ спребыва́нием указу́еши ми́ пра́вый пу́ть, веду́щий в Го́рний Вифлее́м, в Небе́сное Ца́рствие, да та́мо с ли́ки Арха́нгел и А́нгел сподо́блюся воспева́ти Преве́чному Царю́ сла́вы: Аллилу́иа.

И́кос 5

Ви́дя Мя́ но́щию содержи́ма мра́чною и те́мным о́блаком страсте́й покрыва́ема, святы́й храни́телю души́ моея́, не огорчи́ся, не оста́ви мене́, но подража́яй долготерпе́нию Спаси́теля моего́, пожди́ еще́, возбужда́я мя́ к покая́нию, до́ндеже очеса́ моя́ излию́т исто́чники сле́з на омы́тие душе́вныя нечистоты́ моея́. О се́м смире́нно молю́ тя́ и глаго́лю:

Ра́дуйся, я́ко вы́ну прино́сиши Бо́гу о мне́ гре́шнем моли́твы своя́, я́ко кади́ло пред Ни́м благово́нное; ра́дуйся, я́ко при́сно хода́тайствуеши пред Созда́телем мои́м о е́же спасти́ся ми́.

Ра́дуйся, я́ко пра́ведный гне́в Его́, дви́жимый на мя́, свои́м предста́тельством отвраща́еши; ра́дуйся, я́ко про́сиши всемилосе́рдаго Го́спода пода́ти проще́ние злы́х мои́х дея́ний.

Ра́дуйся, я́ко умилостивля́еши Его́ бла́гость, да не погуби́т мя́ со беззако́ньми мои́ми; ра́дуйся, я́ко непреста́нно мо́лишися Искупи́телю моему́, да да́рует ми́ вре́мя ко исправле́нию.

Ра́дуйся, я́ко возбужда́еши мя́ в покая́нии препроводи́ти вся́ дни́ живота́ моего́; ра́дуйся, я́ко внуша́еши ми́ жела́ние, да вы́ну ка́юся пред Го́сподем во все́х мои́х прегреше́ниях.

Ра́дуйся, я́ко вразумля́еши мя́ на вся́кое вре́мя мы́сленно себе́ испы́товати и во гресе́х мои́х испове́доватися; ра́дуйся, я́ко влага́еши в се́рдце мое́ сокруше́ние и ско́рбь, зане́ прогне́вах Преблага́го Бо́га моего́.

Ра́дуйся, я́ко побужда́еши мя́ опла́кивати окая́нное и скве́рное житие́ мое́; ра́дуйся, светоно́сный и неумолка́ющий хода́таю спасе́ния моего́.

Ра́дуйся, А́нгеле Госпо́день, неусыпа́емый храни́телю мо́й.

Конда́к 6.

Пропове́дую велегла́сно при́сное твое́, храни́телю мо́й А́нгеле, о мне́, гре́шнем, попече́ние: в ско́рбех бо и напа́стех, я́же в се́м многомяте́жнем ми́ре смуща́ет ми́р души́ моея́, явля́еши ми́ ся́ ско́рый уте́шитель, вразумля́я мя́, я́ко вся́ сия́ низпосыла́ются от прему́драго Созда́теля, а́ки врачевство́ проти́ву душе́вных неду́гов мои́х, и поуча́я благоде́ющему си́це Небе́сному Врачу́ воспева́ти: Аллилу́иа.

И́кос 6.

Возсиява́ет в души́ мое́й, омрача́емой ско́рбию и уны́нием, све́т благода́тнаго утеше́ния, и се́рдце мое́ исполня́ется весе́лия и ра́дости, егда́ непреста́нными твои́ми, святы́й А́нгеле, наставле́нии возбужда́ем дерза́ю, я́ко мыта́рь, вопи́ти к ще́дрому Бо́гу, да ми́лостив бу́дет и прости́т ми́ прегреше́ния моя́. Не премолчи́ у́бо, наста́вниче мо́й, вразумля́я и укрепля́я мя́, зову́ща ти́:

Ра́дуйся, помога́яй ми́ благи́й яре́м спаси́тельнаго терпе́ния с любо́вию носи́ти; ра́дуйся, в беда́х и злоключе́ниих упова́нием на Го́спода Бо́га укрепля́яй мя́.

Ра́дуйся, ско́рби и боле́зни му́жественне преодолева́ти мя́ поуча́яй; ра́дуйся, вся́кую печа́ль и уны́ние от се́рдца моего́ отгоня́яй.

Ра́дуйся, проти́ву врага́, в се́ть отча́яния улови́ти мя́ хотя́ща, бра́тися побужда́яй мя́; ра́дуйся, словесе́м Апо́стола, я́ко вси́ хотя́щии благоче́стно жи́ти гони́ми бу́дут, ве́ровати убежда́яй мя́.

Ра́дуйся, о́браз терпе́ния и злострада́ния прия́ти ми́ проро́ки и Апо́столы внуша́яй; ра́дуйся, на ли́к му́ченик и испове́дник, за Христа́ до излия́ния кро́ве своея́ подвиза́вшихся, во утеше́ние ми́ показу́яй.

Ра́дуйся, страда́ния Сама́го Спаси́теля и Го́спода вы́ну у́мным очесе́м мои́м представля́яй; ра́дуйся, наде́ждою бу́дущаго воздая́ния се́рдце мое́ услажда́яй.

Ра́дуйся, всера́достным ожида́нием ве́чных бла́г ду́шу мою́ оживля́яй; ра́дуйся, благи́й и при́сный мо́й уте́шителю.

Ра́дуйся, А́нгеле Госпо́день, неусыпа́емый храни́телю мо́й.

Конда́к 7.

Хотя́й все́м челове́ком спасти́ся, премилосе́рдый Созда́тель мо́й посла́ Тя́, А́нгела Своего́, я́ко ве́рна ми́ стра́жа и пе́стуна до́бра во все́м житии́ мое́м, да всю́ду вспомоществу́еши ми́ святы́ми твои́ми вдохнове́нии, защища́еши проти́ву ко́зней диа́вола и предуготовля́еши мя́ де́лы благи́ми вни́ти с му́дрыми де́вами в Небе́сный Черто́г, с Богокра́сною пе́снию: Аллилу́иа.

И́кос 7.

Но́вую показу́ет бла́гость Госпо́дь и Влады́ка мо́й на мне́, непотре́бнем и па́че все́х гре́шнейшем рабе́ Свое́м: презира́я бо лю́тая моя́ и тя́жкая, не погуби́л мя́ есть со беззако́ньми мои́ми да́же до настоя́щаго дне́ и часа́, но долготерпя́ на мне́, ми́лостивне ожида́ет моего́ обраще́ния и серде́чнаго покая́ния. Ве́рую, благи́й храни́телю мо́й, я́ко твои́м при́сным пред Бо́гом за мя́ хода́тайством досе́ле храни́м е́смь: те́мже, любо́вию к тебе́ подвиза́емый, взыва́ю:

Ра́дуйся, я́ко обурева́ющася мя́ в мо́ри жития́ сего́ от коне́чнаго потопле́ния соблюда́еши; ра́дуйся, я́ко из ро́ва беззако́ний мои́х руко́ю твоея́ по́мощи мя́ исхища́еши.

Ра́дуйся, я́ко грехо́вный со́н душевре́дныя моея́ ле́ности отряса́еши; ра́дуйся, я́ко у́м мо́й, омраче́нный небреже́нием, све́тлым твои́м прису́тствием озаря́еши.

Ра́дуйся, я́ко хла́дное и ма́ло не уга́сшее се́рдце мое́ моли́твами воспламеня́ти ми́ помога́еши; ра́дуйся, я́ко на славосло́вие Бо́жие при́сно мя́ возставля́еши.

Ра́дуйся, я́ко настроя́еши гла́с мо́й к песнопе́ниям, и́миже досто́йно и пра́ведно е́сть хвали́ти Творца́ вся́ческих; ра́дуйся, я́ко поуча́еши мя́ прославля́ти Го́спода моего́ не усты́ то́чию, но и се́рдцем.

Ра́дуйся, я́ко ко исполне́нию пресвяты́я во́ли Его́ возбужда́еши мя́; ра́дуйся, я́ко самоотверже́нию и отрече́нию моея́ злы́я во́ли приобучи́ти мя́ тщи́шися.

Ра́дуйся, я́ко голуби́ну простоту́ и а́гнчу кро́тость стяжа́ти ми́ преи́скренне жела́еши; ра́дуйся, я́ко о е́же младе́нческому незло́бию и ста́рческому доброразсужде́нию дарова́тися ми́ хода́тайствуеши.

Ра́дуйся, А́нгеле Госпо́день, неусыпа́емый храни́телю мо́й.

Конда́к 8.

Стра́нен и пришле́ц е́смь на земли́ се́й: житие́ мое́ су́етно и маловре́менно е́сть; а́з же, окая́нный, сме́рти безве́стное во у́м никогда́же прие́млю, ни помышля́ю о Стра́шнем Суди́щи, в не́м же и́мам Пра́ведному Судии́ предста́ти и да́ти отве́т о вся́ком де́ле же и сло́ве. Те́мже молю́ тя́, души́ моея́ храни́теля, возбуди́ мя́ ско́ро от сна́ грехо́внаго, да не пости́гнет мя́ ча́с сме́рти неиспра́вленна и да сподо́блюся испроси́ти от Всеми́лостиваго Бо́га беззако́нием мои́м проще́ние и во гла́се ра́дования воспева́ти Ему́: Аллилу́иа.

И́кос 8.

Все́х Госпо́дь и Созда́тель мо́й, егда́ назна́менует ми́ преста́витися от жития́ сего́, ты́, благи́й храни́телю мо́й, прови́дяй гро́зныя му́ки, духово́м зло́бы и нераска́янным гре́шником угото́ванныя и мене́ ожида́ющия, покры́й мя́ твоего́ милосе́рдия крила́ми, я́коже оре́л птенцы́ своя́, и внегда́ исчеза́ти от мене́ ду́ху моему́, да у́зрю тя́ бли́з мене́ предстоя́ща и лю́тыя враги́ отгоня́юща. О се́м со умиле́нием молю́ ти ся, веща́я си́це:

Ра́дуйся, у́мным очесе́м мои́м го́рький и стра́шный ча́с сме́ртный представля́яй; ра́дуйся, я́ко неизбе́жен, вку́пе же и безве́стен ча́с то́й при́сно ми́ напомина́яй.

Ра́дуйся, на ки́йждо де́нь, а́ки уже́ на после́дний жития́ моего́ взира́ти мя́ поуча́яй; ра́дуйся, на вся́кое вре́мя ко исхо́ду во и́н ми́р мя́ приуготовля́яй.

Ра́дуйся, душе́вное умиле́ние и серде́чное сокруше́ние во мне́ рожда́яй; ра́дуйся, вы́ну жела́яй ми́, да поне́ при кончи́не дне́й мои́х пока́юся.

Ра́дуйся, люби́ти ми́р и я́же в ми́ре ми́ воспреща́яй; ра́дуйся, пристра́стие к тле́нному бога́тству из се́рдца моего́ искореня́ти помога́яй.

Ра́дуйся, вся́ бла́га земна́я бы́ти привре́менна и скоропреходя́ща ми́ показу́яй; ра́дуйся, я́ко вся́ кра́сная ми́ра сего́ кри́ну се́льному подо́бна су́ть, вразумля́яй мя́.

Ра́дуйся, сла́вы челове́чи, а́ки те́ни преходя́щия, иска́ти возбраня́яй ми́; ра́дуйся, от еди́наго Бо́га сла́вы нетле́нныя в бу́дущем ве́це взыска́ти побужда́яй мя́.

Ра́дуйся, А́нгеле Госпо́день, неусыпа́емый храни́телю мо́й.

Конда́к 9.

Вся́к гре́х соде́ях в житии́ се́м и ве́сь живо́т мо́й во мно́зе прите́к суете́, к концу́ прибли́жихся: врази́ же мои́ устремля́ются на мя́, а́лчуще поя́ти мя́ и низри́нути во глубину́ а́дову. Те́мже молю́ ти ся, благи́й мо́й Храни́телю, бу́ди ми́ защи́титель, егда́ и́мам преходи́ти лю́тая мыта́рства, и безбе́дно доведи́ мя до вра́т Небе́снаго Ца́рствия, иде́же ли́цы а́нгельстии ра́достне срета́ют восклица́ющих: Аллилу́иа.

И́кос 9.

Вети́йствующий язы́к не мо́жет изрещи́, я́же сотвори́л ми́ еси́, святы́й храни́телю мо́й, во все́м житии́ мое́м: прия́в бо ду́шу мою́ от купе́ли Свята́го Креще́ния, храни́л мя́ еси́ во младе́нчестве, учи́л и вразумля́л еси́ во о́трочестве, соблюда́л мя́ еси́ от поползнове́ния ко грехо́м в во́зрасте ю́ношестем, наставля́л еси́, прише́дша мя́ в му́жество, охраня́л еси́ на все́х путе́х мои́х да́же до ста́рости, облича́я и утеша́я, всю́ду помога́я и направля́я на пу́ть спасе́ния. Сего́ ра́ди благода́рственно вопию́ ти́:

Ра́дуйся, я́ко никогда́же лиша́еши мя́ твоея́ по́мощи и заступле́ния; ра́дуйся, я́ко от сна́ востаю́ща мя́ подвиза́еши ко благодаре́нию Го́спода, укрепля́ющаго си́лы моя́.

Ра́дуйся, я́ко нача́ток коего́ждо дне́ моли́твою освяща́ти мя́ поуча́еши; ра́дуйся, я́ко воспреща́еши ми́ без моли́твы к всеблаго́му Промысли́телю, дерзнове́нно собо́ю что́ начина́ти.

Ра́дуйся, я́ко самонаде́яние из се́рдца моего́ истреби́ти тщи́шися; ра́дуйся, я́ко сладча́йшее и́мя Го́спода Иису́са Христа́ усты́ непреста́нно произноси́ти и во уме́ держа́ти мя́ побужда́еши.

Ра́дуйся, я́ко во вся́кое вре́мя ну́жная то́чию и поле́зная веща́ти язы́ком ми́ внуша́еши; ра́дуйся, я́ко от праздносло́вия, многоглаго́лания, па́че же и кощу́нства мя́ удержава́еши.

Ра́дуйся, я́ко яду́щу и пию́щу ми́ или́ и́но что́ творя́щу при́сно спребыва́еши; ра́дуйся, я́ко воздержа́нию в пи́щи и питии́ приобучи́ти мя́ пече́шися.

Ра́дуйся, я́ко спя́ща мя́ храни́ти и врага́, хотя́ща искуси́ти мя́ со́нными мечта́нии, отгоня́еши; ра́дуйся, я́ко воспяща́еши мя́ от любостра́стнаго стремле́ния и во о́чию мое́ю целому́дренный сты́д влага́еши.

Ра́дуйся, А́нгеле Госпо́день, неусыпа́емый храни́телю мо́й.

Конда́к 10.

Спасти́ все́х прише́дый Иису́се мо́й преблаги́й, со умиле́нием молю́ Ти ся, Твои́м милосе́рдием прости́ мои́х злы́х премно́жество и безме́рие, преклоня́емый на сие́ Боже́ственными мольба́ми Твоего́ невеще́ственнаго служи́теля, его́же ми́ приста́вил еси́ из младе́нства, я́ко Человеколю́бец, храни́теля: да досто́ин явлю́ся вни́ти в черто́г сла́вы Твоея́ и со ду́хи пра́ведных воспе́ти: Аллилу́иа.

И́кос 10.

Стена́ тве́рда при́сно явля́еши ми́ ся, святы́й А́нгеле, проти́ву ухищре́ний зло́бных враго́в мои́х, и́щущих ве́чныя поги́бели моея́ и разслабля́ющих ду́шу мою́ ле́ностию и самозабве́нием. Молю́ у́бо тя́, храни́телю мо́й, да твои́м хода́тайством сподо́блюся, при исхо́де души́ моея́ из телесе́ прича́стник бы́ти Пречи́стаго Те́ла и святе́йшия Кро́ве моего́ Спаси́теля, я́ко да укрепи́вся се́ю нетле́нною пи́щею и животворя́щим питие́м, безтре́петно прейду́ во и́н ми́р, воспева́я тя́, моего́ благоде́теля:

Ра́дуйся, я́ко дана́ ти́ е́сть вла́сть и си́ла отража́ти де́монская на мя́ нападе́ния; ра́дуйся, я́ко прия́л еси́ от Бо́га кре́пость на побежде́ние неви́димых враго́в мои́х.

Ра́дуйся, я́ко от вся́каго злоде́йства и ко́зней диа́вольских моги́й изба́вити мя́; ра́дуйся, я́ко го́рьких мыта́рств нача́льника, лю́таго мироде́ржца нападе́ния от мене́ отрева́еши.

Ра́дуйся, я́ко, огражда́емый твои́м прису́тствием, и́мам наде́жду в ча́с сме́рти не устраши́тися мра́чных ли́ц духо́в зло́бы; ра́дуйся, я́ко храни́мый тобо́ю, упова́ю безбе́дно прейти́ возду́шная мыта́рства.

Ра́дуйся, я́ко укрепля́емый твое́ю по́мощию, ча́ю не уде́ржан бы́ти мне́ вра́т рая́, ми́ вожделе́ннаго; ра́дуйся, я́ко твое́ за мя́ предста́тельство си́льно е́сть пред Бо́гом, е́же не вве́ржену ми́ бы́ти во тьму́ кроме́шную.

Ра́дуйся, я́ко при́сно внуша́еши ми́ умилостивля́ти Го́спода слеза́ми покая́ния, да изба́влюся гее́нны а́дския; ра́дуйся, я́ко побужда́еши мя́ де́нь и но́щь моли́тися, да не по́слан бу́ду со де́моны му́читися.

Ра́дуйся, неотсту́пный мо́й руководи́телю и пе́стуне; ра́дуйся, кре́пкий мо́й засту́пниче и ско́рый помо́щниче.

Ра́дуйся, А́нгеле Госпо́день, неусыпа́емый храни́телю мо́й.

Конда́к 11.

Пе́ние сие́, а́ще и от усе́рдия моего́ ти́ приноси́мое, святы́й храни́телю мо́й, ве́м, я́ко не дово́льно е́сть ко изъявле́нию моего́ серде́чнаго благодаре́ния за вся́ блага́я, я́же ми́ сотвори́л еси́ и не престае́ши твори́ти да́же до сего́ дне́ и часа́; но и о се́м молю́ ти ся, о́бщаго ми́ с тобо́ю Созда́теля уми́лостиви, да на Стра́шнем Суде́ Свое́м шу́ия ча́сти изба́вит мя́ и сподо́бит со все́ми святы́ми воспева́ти Ему́: Аллилу́иа.

И́кос 11.

Свети́льник мо́й угасе́, еле́а же благи́х де́л, во е́же возжещи́ и́, не́сть ми́; и где́ обря́щуся а́з, окая́нный, сно́м грехо́вным отягче́нный, егда́ пости́гнет мя́ внеза́пу полу́нощь, ча́с кончи́ны моея́? Но да не услы́шу и а́з, я́коже юро́дивыя де́вы, гро́знаго гла́са Жениха́: не ве́м тя́! Помози́ ми́, неусыпа́емый храни́телю мо́й, напо́лнити сосу́ды души́ моея́ еле́ем благи́х де́л, па́че же милосе́рдия и смире́ния. Ны́не же приими́ от мене́ сие́ пе́ние:

Ра́дуйся, Еди́наго Го́спода име́ти в ра́зуме при́сно ми́ внуша́яй; ра́дуйся, за́поведь о любви́ к Нему́, преблаго́му, в се́рдце мое́м обновля́яй.

Ра́дуйся, люби́ти Его́, Созда́теля, все́м умо́м и все́м помышле́нием мя́ побужда́яй; ра́дуйся, и к бли́жним и́скреннюю любо́вь мою́ Богоуго́дну бы́ти непреста́нно ми́ напомина́яй.

Ра́дуйся, люби́ти и́х не сло́вом или́ язы́ком, но де́лом и и́стиною мя́ поуча́яй; ра́дуйся, во все́х ну́ждах и́х помога́ти жела́ние ми́ влага́яй.

Ра́дуйся, утеша́ти скорбя́щих, заступа́ти оби́димых мя́ наставля́яй; ра́дуйся, от име́ний свои́х уделя́ти бе́дным и неиму́щим се́рдце мое́ преклоня́яй.

Ра́дуйся, и ду́шу мою́, по за́поведи Спаси́теля, положи́ти за дру́ги своя́ гото́ву ми́ бы́ти возбужда́яй; ра́дуйся, закрыва́яй очеса́ моя́, е́же не зре́ти ми́ прегреше́ния бра́та моего́.

Ра́дуйся, не попуща́яй ми́ осужда́ти поползну́вшагося на гре́х бли́жняго моего́; ра́дуйся, воспреща́яй ми́ я́ти ве́ру оглаго́льником клевре́та моего́.

Ра́дуйся, А́нгеле Госпо́день, неусыпа́емый храни́телю мо́й.

Конда́к 12.

Благода́ть дана́ ти́ е́сть от Всемогу́щаго Го́спода, святы́й покрови́телю мо́й, е́же храни́ти мя́ на все́х путе́х мои́х, да не о ка́мень ко́его собла́зна преткне́тся нога́ моя́, до́ндеже мя́ предста́виши Христу́ Бо́гу спасе́на, Ему́же немо́лчно вся́ Си́лы Небе́сныя взыва́ют: Аллилу́иа.

И́кос 12.

Пою́ Твое́ досточу́дное милосе́рдие и мно́гое снисхожде́ние, быстродви́жный у́ме, безпло́тный слуго́ Госпо́день: я́ко не гнуша́ешися грехо́вныя моея́ смра́дности и не престае́ши приноси́ти о мне́, непотре́бнем, святы́я моли́твы своя́ ко святе́йшему престо́лу Триипоста́снаго Бо́га, е́же не поги́бнути ми́ во ве́ки, но Ца́рствие Небе́сное насле́довати. Благоволи́ у́бо прия́ти от душе́вных сокро́вищ мои́х приноси́мое ти́ песнопе́ние:

Ра́дуйся, я́ко воспомина́нием гряду́щаго гро́знаго Суда́ Бо́жия от грехо́в мя́ отрева́еши; ра́дуйся, я́ко ду́шу мою́, а́ки неве́сту, ко сре́тению прекра́снаго Жениха́ Христа́ предуготовля́ти возбужда́еши мя́.

Ра́дуйся, я́ко при́сно жела́еши досто́йна мя́ сотвори́ти бра́чнаго черто́га Его́; ра́дуйся, я́ко вы́ну учи́ши мя́ возжига́ти свети́льник души́ моея́, да с му́дрыми де́вами, душа́ми пра́ведных, вни́ду в о́нь.

Ра́дуйся, я́ко грехо́вныя оде́жды моея́ совлачи́тися побужда́еши мя́; ра́дуйся, я́ко в ри́зу непоро́чности и чистоты́ облещи́ся ми́ спосо́бствуеши.

Ра́дуйся, я́ко хода́тайствуеши, да на Стра́шнем Суде́ Христо́вом одесну́ю Его́ ста́ти сподо́блюся; ра́дуйся, я́ко умоля́еши благоутро́бие Бо́жие, да ли́ку избра́нных Свои́х сопричте́т мя́.

Ра́дуйся, я́ко подвиза́еши на моли́тву ко Го́споду и сожи́телей твои́х небе́сных, да всели́т мя́ с ни́ми во Ца́рствии Свое́м; ра́дуйся, до́брый и бо́дрый блюсти́телю мо́й.

Ра́дуйся, те́плый о мне́, гре́шнем, моли́твенниче и благи́й предста́телю; ра́дуйся, по Го́споде Бо́зе и Пресвяте́й Богоро́дице кре́пкое мое́ упова́ние.

Ра́дуйся, А́нгеле Госпо́день, неусыпа́емый храни́телю мо́й.

Конда́к 13.

Опресла́вный и у́мный све́те, А́нгеле Бо́жий! Приими́ благода́рственное сие́ и моле́бное пе́ние, и, егда́ и́мам от земли́ воста́ти на Су́д, покажи́ тогда́ милосе́рдие твое́ на мне́, гре́шнем: предста́ни бли́з мене́ ти́х и ра́достен, наде́ждою спасе́ния отъе́мля стра́х мо́й, да в селе́ниих ра́йских сподо́блюся вку́пе с тобо́ю во ве́ки веко́в воспева́ти преве́чному Царю́ сла́вы: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгеле святы́й, по́сланный с Небесе́, во е́же храни́ти мя́ и руководи́ти во все́й жи́зни мое́й, припа́дая молю́ ти ся: са́м наста́ви и вразуми́ мя́, начина́юща от серде́чныя любве́ и усе́рдия возглаша́ти пе́сненныя ти́ хвалы́:

Ра́дуйся, А́нгеле Бо́жий, предста́телю мо́й у Пресвяты́я Тро́ицы; ра́дуйся, Царя́ ца́рствующих безпло́тный во́ине.

Ра́дуйся, Го́спода госпо́дствующих небе́сный слуго́; ра́дуйся, у́мных и невеще́ственных слу́г Его́ сожи́телю.

Ра́дуйся, творя́й при́сно во́лю Влады́ки своего́; ра́дуйся, прие́мый от Бо́га повеле́ние и вла́сть храни́ти ду́шу мою́.

Ра́дуйся, никогда́же отлуча́яйся мене́, гре́шнаго; ра́дуйся, вы́ну спребыва́яй ми́, недосто́йному.

Ра́дуйся, соблюда́яй мя́ на все́х путе́х мои́х; ра́дуйся, сохраня́яй мя́ от вся́каго зла́.

Ра́дуйся, от Бо́га да́нный ми́ руководи́телю на путе́х жития́ моего́; ра́дуйся, благи́й мо́й наста́вниче.

Ра́дуйся, А́нгеле Госпо́день, неусыпа́емый храни́телю мо́й.

Конда́к 1.

Избра́нный от Го́спода Бо́га на хране́ние души́ моея́ и телесе́, святы́й А́нгеле, похва́льная ти́ воспева́ти дерза́ю, недосто́йный ра́б тво́й; ты́ же, я́ко име́яй дерзнове́ние к Царю́ Небе́сному, от вся́ких мя́ бе́д и скорбе́й, от вра́г ви́димых же и неви́димых защити́, зову́ща:

Ра́дуйся, А́нгеле Госпо́день, неусыпа́емый храни́телю мо́й.

Моли́тва.

О,святы́й А́нгеле, храни́телю и покрови́телю мо́й благи́й! С сокруше́нным се́рдцем и боле́зненною душе́ю предстою́ ти́, моля́ся: услы́ши мя́, гре́шнаго раба́ своего́ (и́мя), с во́плем кре́пким и пла́чем го́рьким вопию́щаго. Не помяни́ мои́х беззако́ний и непра́вд, и́миже а́з окая́нный прогневля́ю тя́ по вся́ дни́ и часы́, и ме́рзостна себе́ творю́ пред Созда́телем на́шим Го́сподем. Яви́ся мне́ милосе́рд и не отлуча́йся мене́ скве́рнаго да́же до кончи́ны моея́. Возбуди́ мя́ от сна́ грехо́внаго и посо́бствуй твои́ми моли́твами про́чее вре́мя живота́ моего́ без поро́ка прейти́ и сотвори́ти плоды́ досто́йны покая́ния, па́че же от сме́ртных паде́ний грехо́вных соблюди́ мя, да не поги́бну во отча́янии и да не пора́дуется вра́г о поги́бели мое́й. Ве́м вои́стинну и усты́ испове́дую, я́ко никто́же тако́в дру́г и предста́тель, защи́титель и побо́рник, я́коже ты́, святы́й А́нгеле. Предстоя́ бо Престо́лу Госпо́дню, мо́лишися о мне́ непотре́бнем и па́че все́х гре́шнейшем, да не изы́мет Преблаги́й души́ моея́ в де́нь неча́яния моего́ и в де́нь творе́ния зло́бы. Не преста́й у́бо умилостивля́я Премилосе́рдаго Го́спода и Бо́га моего́, да отпу́стит согреше́ния моя́, я́же сотвори́х во все́м житии́ мое́м, де́лом, сло́вом и все́ми мои́ми чу́вствы, и и́миже ве́сть судьба́ми да спасе́т мя́, да нака́жет мя́ зде́ по Свое́й неизрече́нной ми́лости, но да не обличи́т и не истя́жет мя́ она́мо по Своему́ нелицеприя́тному правосу́дию, да сподо́бит мя́ покая́ние принести́, с покая́нием же Боже́ственное Причаще́ние досто́йне прия́ти, о се́м па́че молю́, и такова́го да́ра всеусе́рдно жела́ю. В стра́шный же ча́с сме́рти неотсту́пен бу́ди ми́, благи́й Храни́телю мо́й, прогоня́я мра́чныя де́моны, иму́щия устраши́ти притре́петную ду́шу мою́. Защити́ мя́ от те́х ловле́ния, егда́ и́мам преходи́ти возду́шная мыта́рства, да храни́м тобо́ю, безбе́дно дости́гну рая́ ми́ вожделе́ннаго, иде́же ли́цы святы́х и го́рних си́л непреста́нно восхваля́ют всечестно́е и великоле́пое и́мя в Тро́ице сла́вимаго Бо́га, Отца́ и Сы́на и Свята́го Ду́ха, Ему́же подоба́ет че́сть и поклоне́ние во ве́ки веко́в. Ами́нь.