Предисловие

В лепоту убо судихом в книгу Номоканона сего сотворити предисловие о преосвященнии, и боголюбезнии, преподобнии, и пречестнии священнаго духовнаго сословия, им же строение Церкве, и паства кровию Христовою снабденых овец вручена есть. Понеже бо преумножися всякии грех паче песка морскаго, и беззакония превзыдоша главу, привниде же и дерзновение безмерное, а студ и богобоязние далече отбеже, яко многим противу каноном и совести дерзнути на степень священьства воскочити, ради корысти и тщеславия, но по апостолу [на поле: филиписеом, 3], сицевых и слава в студ их. К сему же и злата и мамоны ради по своей воли и невеждьстве разрешати грехи не удоб решимыя. еже в погибель им яко же и Симону волхву. тем же годе есть не точию словесы от устен, но и писмены грехи и беззакония обличати и запрещати. да грешницы покаяние воспримут, а бес посрамится. не явленныи ибо грех множае растет, язву же и падежь наводит. добре Дух Божии царствующим пророком глаголет, яко же свыше есть зрети. обличю тя, и представлю пред лицем твоим грехи твоя. Той же пророком Исаием трубогласне, грехи и беззакония возвещати повелевает. отнюду же Исаия наг и бос хождаше по граду и обличаше грехи, и проповедаше за сия пленение. Той же Адонай Господь, и усты пророка Езекииля, жителей Иеросалимских, о всех студных и срамных обличаше, хотя привести в покаяние блудящих.

Сего ради Номоканон сей во святей Афонстей горе богодохновенными отцы от множайших правил кратко собранныи, молением прежде и убеждением от многих спасения рачителей. в научение иереом, и во исправление исповедающихся различными грехи обдержимых. Благословением же и советом православнаго великаго господина патриарха Иоасафа Московскаго и всея Руси. прилежнее исправися, и любомудраго художества печатным делом издася, зде в Велицыи Руси. Содержит же в себе Номоканон сей воспоминание и учение како приходити в священьство, како ко исповеди приходящих приимати и исправляти, како целение подобное коемуждо лицу и врачевание подати. Три же в нем суть обдержныя вины. первыи врачь иже есть духовныи отец. вторыи недугующии, иже суть грешныи кающиися. третии целебное былие, сиречь наказания и запрещения. есть убо Номоканон сей краткое собрание канонов и разсуждении святых отец наставников и учитель духовником. каяющимжеся есть врачебница.

Комуждо же сия книга есть удобь стяжательна, а яже совершеннее восхощут уразумети и уведати каноны, да стяжут книги правил всех. сиречь книгу преподобнаго Иоанна Зонара, иже соборныя и поместныя и святых отец истолкова каноны. и книгу блаженнейшаго Феодора Валсамона патриарха Антиохийскаго, иже совершеннее истолкова вся каноны. при сем и Номоканон православнаго и блаженнаго Фотия патриарха Константинопольскаго. такожде книгу преподобнаго во иеромонасех Матфея, иже по составех правила разумно собрав и состави. Сия зело книга потребна есть. обаче блюстися, яко в некия переводы вниде писание, аки от Константина Великагосотворенное. несть сия вещь известна. еще же книгу правил на грани архидияконом Алексеем составленных. и книгу севаста Константина Арменополя номофилак[т]а и судии Фесалоницкаго. к сему же и блаженнаго Никона послания. Прочее да весть всяк, яко несть леть не точию иереом, но и епископом противу каноном что дерзати и творити. о сем чти святаго Игнатия, и святаго Феодора Студита разсуждение; и да не поставляется епископ, или иерей, паче же духовныи отец, аще сих книг не стяжет, и от них вразумлен не обретается [зри иерею]. в лепоту бо речеся ему, врачу исцели себе сам. мню сицевым по Христову словеси. добрее есть паче аще облежит камень жерновыи о выи его. и ввержен будет в море, нежели соблазнит, и прочее. разумейте убо сия забывающии Бога, да некогда похитит и не будет избавляяи. молим же убо есть нами да будет Исус Христос, яко да яже от богодохновенных отец наших свято узаконенная. сия не в хартиях токмо, но паче во умех наших всегда пребывати. и яже от человек чернилом изъобразишася, сия перстом Божиим, архиереом и иереом во уме, и в памяти, и в сердьцах восписана да будут. приемлите же убо благодарне Номоканон сей, нам трудившимся прощение дарующее. и благословите и молите о нас. да в винограде Церкве Христовы делаем плоды творяще; подобает же духовным отцем и се ведати, еже от духовнаго и каноннаго разсуждения, яко да грехи тяжкия и недоуметельныя исправлению кающагося, к епископом и к совершеннейшим, и благоразумнейшим препосылати. в неких же со искуснейшими советовати несрамлятися, иереов же и протодияконов грехи, яже извержения томление наводят, епископом суду подлежат, да не дерзает духовник разрешати их. яко же бо невозможно ему хиротонисати, сице же ни на священьства степень изпадшаго паки возвращати. еже бо во гресех извержения сущему священнодействовати простити и попустити есть аки паки паче подобающаго возводити на священьство.