4/17 Святителя Андрея, архиепископа Критского (712–726). Преподобной Марфы, матери Симеона Дивногорца (551). Преподобного Андрея Рублева, иконописца (1430). Благоверного великого князя Андрея Боголюбского (1174). Благоверного Императора Российского, страстотерпца, Николая II и иже с ним убиенных (1918). Обретение мощей преподобного Евфимия, Суздальского чудотворца (1507). Галатской иконы Божией Матери.
Тропарь святителю Андрею, архиепископу Критскому, глас 1
Христо́ву Це́рковь цевни́цею языка́ твоего́,/ песносло́вя уми́льно, возвесели́л еси́,/ богосло́вием же Препе́тыя Тро́ицы/ сла́ву всем сказа́л еси́ я́сно,/ тем тя, я́ко тайноглаго́льника, пое́м,/ Андре́е, па́стырю Кри́тский,/ и велича́ем па́мять твою́,/ Христа́ сла́вяще ди́внаго во святы́х Свои́х.
Ин тропарь, глас 4
Пра́вило ве́ры и о́браз кро́тости,/ воздержа́ния учи́теля,/ яви́ тя ста́ду твоему́,/ я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Андре́е,/ моли́ Христа́ Бо́га/ спасти́ся душа́м на́шим.
Кондак, глас 2
Воструби́в я́сно Боже́ственная сладкопе́ния,/ яви́лся еси́ свети́льник ми́ра светле́йший,/ све́том сия́я Тро́ицы, Андре́е преподо́бне./ Те́мже вси вопие́м ти:/ не преста́й моля́ся о всех нас.
Величание
Велича́ем тя,/ святи́телю о́тче Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобной Марфе, Антиохийской, Едесской, матери Симеона Дивногорца, глас 4
Житие́м чи́стым и любо́вию, я́же ко Пречи́стей Бо́жией Ма́тери,/ стяжа́ла еси́ дар чадоро́дия пресла́вный,/ свети́льника ми́ру, ди́внаго Симео́на,/ тем тя, Ма́рфо, я́ко ма́терь, о ча́де веселя́щуюся, пе́сньми ублажа́ем.
Ин тропарь, глас 8
В тебе́, ма́ти, изве́стно спасе́ся... (общий преподобной жене).
Кондак, глас 2
В моли́твах Го́сподеви предстоя́щи,/ Пречи́стей Де́ве Богоро́дице пе́ние и хвалы́ принося́щи,/ Ма́рфо честна́я,/ породи́ла еси́ свяще́нное отроча́,/ Симео́на преди́внаго, свети́льника всеми́рнаго,/ с ни́мже моли́ при́сно о всех нас.
Величание
Ублажа́ем тя,/ преподо́бная ма́ти Ма́рфо,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Андрею Рублеву, иконописцу, глас 3
Боже́ственнаго све́та луча́ми облиста́емый,/ преподо́бне Андре́е,/ Христа́ позна́л еси́ – Бо́жию Прему́дрость и Си́лу/ и ико́ною Святы́я Тро́ицы всему́ ми́ру пропове́дал еси́/ еди́нство во Святе́й Тро́ице./ Мы же со удивле́нием и ра́достию вопие́м ти:/ име́яй дерзнове́ние ко Пресвяте́й Тро́ице, моли́ просвети́ти ду́ши на́ша.
Кондак, глас 8
От ю́ности к Боже́ственней красоте́ устремля́лся,/ чу́дный иконопи́сец в земли́ Росси́йстей был еси́,/ и, богоно́сным твои́м учи́телем поревнова́в,/ сия́нием доброде́телей укра́сился еси́, преподо́бне Андре́е,/ те́мже и яви́ся Це́ркве на́шея похвала́ и ра́дование.
Величание
Ублажа́ем тя,/ преподо́бне о́тче Андре́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь благоверному великому князю Андрею Боголюбскому, Владимирскому чудотворцу, глас 8
Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже Авеля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти/ и сыново́м росси́йским спасти́ся.
Ин тропарь, глас 3
Е́же во плоти́ житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми,/ сего́ ра́ди, о́тче, моли́ спасти́ся душа́м на́шим.
Кондак, глас 8
В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́./ Сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́/ и всех люде́й, благоче́стно тебе́ почитаю́щих.
Величание
Велича́ем тя,/ благове́рный вели́кий кня́же Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Евфимию, Суздальскому чудотворцу, глас 3
Я́ко светоза́рная звезда́, прише́л еси́ от восто́ка на за́пад,/ оста́вив оте́чество твое́, Ни́жний Но́вград,/ и, доше́д богоспаса́емаго гра́да Су́ждаля,/ в нем оби́тель сотвори́л еси́,/ и собра́л еси́ мона́хов мно́жества,/ и, прие́м дар чуде́с от Бо́га, о́тче Евфи́мие,/ был еси́ о Христе́ собесе́дник/ и спо́стник преподо́бному Се́ргию./ С ни́мже у Христа́ Бо́га испроси́ нам здра́вие, и спасе́ние,/ и душа́м на́шим ве́лию ми́лость.
Кондак, глас 2
Волне́ний мно́жество невла́жно проходя́,/ безпло́тныя враги́ струя́ми слез твои́х погрузи́л еси́,/ Богому́дре Евфи́мие преподо́бне,/ тем и чуде́с дар прия́л еси́,/ моли́ непреста́нно о всех нас.
Ин кондак, глас тойже
Восприи́м Авраа́млю до́блесть,/ о́тче преподо́бне Евфи́мие,/ оста́вль оте́чество свое́, Ни́жний Но́вград,/ и доше́д Богоспаса́емаго гра́да Су́ждаля,/ обре́л еси́ ме́сто благоуго́дно,/ на не́мже оби́тель ве́лию соста́вил еси́/ и в ней пожи́л еси́ в моли́твах, в поста́х и во бде́ниих./ Тем прии́м чуде́с дар от Бо́га,/ собра́л еси́ и́ноков мно́жества,/ с ни́миже Христа́ Бо́га моли́ непреста́нно о всех нас.
Величание
Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь благоверному императору Российскому, страстотерпцу, Николаю II и иже с ним убиенным, глас 5
Ца́рства земна́го лише́ние,/ у́зы и страда́ния многоразли́чныя,/ кро́тко претерпе́л еси,/ свиде́тельствовав о Христе́, да́же до сме́рти от богобо́рцев,/ страстоте́рпче вели́кий Боговенча́нный царю́ Нико́лае,/ сего́ ра́ди му́ченическим венце́м на Небесе́х/ венча́ тя с цари́цею, и ча́ды, и слу́ги твои́ми Христо́с Бог,/ Его́же моли́ поми́ловати страну́ Росси́йскую/ и спасти́ ду́ши на́ша.
Кондак, глас 3
Мирлики́йскому предста́телю, благове́рный царю́,/ подража́тель показа́лся еси́,/ Христо́во бо Ева́нгелие испо́лнив./ Положи́л еси́ ду́шу твою́ за лю́ди твоя́/ и спасл еси́ пови́нныя,/ па́че же непови́нныя от сме́рти,/ сих ра́ди му́ченническою кро́вию освяти́лся еси́,/ я́ко великому́ченик Це́ркве Христо́вы.
Ин кондак, глас 6
Наде́жда царя́ му́ченика с цари́цею, и ча́ды, и слу́ги укрепи́,/ и к Твое́й любви́ окрыли́,/ бу́дущий им поко́й предвозвести́вши,/ тех моли́твами, Го́споди, поми́луй нас.
Величание
Велича́ем тя,/ страстоте́рпче святы́й царю́ Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.