4/17 Преподобного Герасима, иже на Иордане (475). Благоверного князя Даниила Московского, чудотворца (1303). Перенесение мощей благоверного князя Вячеслава Чешского (938). Преподобного Герасима Вологодского (1178). Благоверного великого князя Георгия (Юрия) Владимирского (1238).
Тропарь преподобному Герасиму, иже на Иордане, глас 8
В тебе́, о́тче, изве́стно... (общий преподобному).
Кондак, глас 4
Возгоре́вся раче́нием го́рним,/ же́стость пусты́ни Иорда́новы па́че всех ми́ра сла́дких предпоче́л еси́./ Отону́дуже повину́ся тебе́ зверь да́же до сме́рти, о́тче,/ послу́шне и жа́лостне на гро́бе твое́м сконча́ся,/ просла́вльшу тя та́ко Богу,/ к Нему́же моля́ся, и о нас,/ о́тче Гера́симе, помина́й.
Величание
Ублажа́ем тя,/ преподо́бне о́тче Гера́симе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь благоверному князю Даниилу Московскому, глас 4
Княже́ния твоего́ сла́ву отложи́в,/ озаря́емый Боже́ственною благода́тию,/ Богому́дре кня́же Дании́ле,/ весь ра́зум в се́рдце от су́етнаго ми́ра сего́/ к Зижди́телю неукло́нно возложи́л еси́,/ и я́ко звезда́ на восто́це Росси́йскаго госуда́рства просия́л еси́,/ целому́дрием же и равноа́нгельным твои́м житие́м/ тече́ние до́бре соверша́я,/ ве́ру соблю́л еси́ непоро́чну./ Тем и по сме́рти просла́ви тя Бог в чудесе́х,/ я́ко источа́еши исцеле́ния ве́рно притека́ющим к честне́й ра́це твое́й;/ сего́ ра́ди днесь пра́зднуем успе́ние твое́ лю́дие твои́./ Ты же, я́ко и́маши дерзнове́ние ко Христу́/ моли́ спасти́ оте́чество твое́,/ и ми́рней бы́ти держа́ве насле́дия твоего́.
Ин тропарь, глас 5
Благодатноро́дный сын Твой,/ Всетвори́телю Го́споди Бо́же наш,/ щедрототво́рством христоподража́тельный оте́ц Дании́л,/ в ева́нгельском запове́дании и благоразу́мном свое́м житии́/ чудесодарова́ния и Небе́сная со святы́ми пребыва́ния восприя́т/ от Тебе́, Спаси́теля на́шего Христа́ Иису́са./ Возыме́в бо Твое́ Боже́ственное посо́бие,/ суетномирски́я и плотоо́гненныя стра́сти упразни́/ и враги́ де́моны, неви́димыя и ви́димыя злотво́рцы/ и разори́тели своего́ великокня́жескаго насле́дия, победи́./ Того́ моли́твами спаси́ вся,/ зову́щия Тебе́: Аллилу́иа.
Ин тропарь, глас тойже
Благосла́вная похвало́ и благосве́тлый ве́нче/ ца́рствующаго гра́да Москвы́,/ всеблаже́нне Дании́ле, о́тче наш./ По́двигом бо до́брым подвиза́вся,/ богоуго́дное тече́ние соверши́л еси́,/ всера́достныя несконча́емыя жи́зни сподо́блься,/ зри́ши Го́спода Бо́га,/ Ему́же моли́ся,/ благочеству́ющим тя и лобыза́ющим богохрани́мыя твоя́ и чудесото́чныя мо́щи,/ спасе́ние и насле́дие Ца́рства Небе́снаго дарова́ти.
Ин тропарь, на обретение мощей, глас 3
Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель,/ моли́ Христа́ Бо́га/ держа́ве Росси́йстей дарова́ти мир/ и спасти́ ду́ши на́ша.
Кондак, глас 4
Избра́нный Бо́гом от чресл роди́тельских/ и воспи́танный от младе́нчества в зако́не Госпо́дни в му́жа соверше́нна/ и про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведем Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,/ иде́же со а́нгельскими водворя́лся ли́ки, пое́ши Бо́гу: Аллилу́иа.
Ин кондак, глас 8
Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши серца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,/ да пое́м при́сно: Аллилу́иа.
Ин кондак, на обретение мощей, глас 6
Е́же по о́бразу соблю́л непрело́жно,/ и я́же в ми́ре тле́нная оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́я чад твои́х,/ но ми́лостивно посеща́я и глаго́ля им:/ а́з е́смь с ва́ми и никто́же на вы.
Величание
Ублажа́ем тя,/ преподо́бне о́тче наш кня́же Дании́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь благоверному князю Вячеславу Чешскому, глас 4
Днесь а́нгели и челове́цы ра́дуются,/ Не́бо и земля́ сла́вят па́мять твою́, уго́дниче Бо́жий Вячесла́ве,/ и мы, гре́шнии, усе́рдно тебе́ вопие́м:/ моли́ о нас Ми́лостиваго Бо́га/ изба́витися от вся́кия беды́, неду́гов и скорбе́й,/ и от всех ви́димых и неви́димых враго́в,/ чту́щим всесвяту́ю па́мять твою́.
Ин тропарь, глас 1
Благочести́ваго ко́рене отра́сль пречестна́я,/ святы́й благове́рный вели́кий кня́же Вячесла́ве,/ побо́рник быв Восто́чныя в Че́хах Це́ркве/ и прибе́жище те́плое убо́гим и си́рым,/ я́ко вторы́й А́вель, незло́биве претерпе́л еси́ смерть,/ во главу́ усече́н руко́ю бра́та пред враты́ церко́вными./ Те́мже и всели́ тя Христо́с,/ я́ко испове́дника пра́выя ве́ры во оби́тели Небе́сныя,/ просла́ви всечестну́ю па́мять твою́ в слове́нских язы́цех/ и дарова́ тя ско́раго помо́щника всем, почита́ющим тя./ Моли́ся о лю́дех твои́х ко Го́споду,/ да обрати́т их в ло́но Правосла́вныя Це́ркве и спасе́т ду́ши на́ша.
Ин тропарь, глас 4
Днесь а́нгели с челове́ки ра́дуются вку́пе о́бщим весе́лием,/ Не́бо и земля́ све́тло лику́ют в па́мять твою́, свя́те./ И мы, гре́шнии, приле́жно ти́ вопие́м:/ помоли́ся к Влады́це о нас,/ изба́вити ны от напа́сти/ ви́димых и неви́димых враг,/ чту́щих пресве́тлую па́мять твою́.
Кондак, глас 1
С ли́ки а́нгельскими предстоя́,/ блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты/ и, отту́ду благоде́тельныя да́ры поче́рп чуде́с,/ всем притека́ющим ве́рою под твою́ святы́ню,/ источа́еши цельба́м дарова́ние.
Величание
Ублажа́ем тя,/ благове́рный кня́же Вячесла́ве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Герасиму Вологодскому, глас 4
Яко безпло́тным единонра́вен,/ и преподо́бным соо́бщник, преподо́бне Гера́симе,/ еди́н на Во́логду прише́л еси́,/ прорица́я ту бы́ти гра́ду вели́кому/ и в нем святе́й це́ркви воздви́гнутися/ и святи́телем водвори́тися./ Те́мже и сподо́бился еси́/ близ того́ погребе́н бы́ти/ и по преставле́нии свое́м мно́гими чудесы́ исцеле́ний просия́л еси́./ Моли́ся всегда́ о нас,/ я́ко да обря́щем от Бо́га ми́лость.
Кондак, глас 8
От ю́ности, прему́дре, мирски́й мяте́ж оста́вил еси́,/ и многоце́нныя ри́зы тле́нныя возненави́дел еси́,/ и святу́ю оде́жду а́нгельскую любе́зно восприя́л еси́,/ и ту соблю́л еси́ в чи́стой со́вести/ и во благи́х де́лех, и до преставле́ния своего́/ бысть Боже́ственнаго ра́ди жития́ Тро́ицы селе́ние/ и просвети́л еси́ ве́рою приходя́щия к тебе́;/ те́мже вси зове́м ти:/ ра́дуйся, о́тче Гера́симе всечестны́й.
Величание
Ублажа́ем тя,/ преподо́бне о́тче Гера́симе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь благоверному великому князю Георгию (Юрию) Владимирскому, глас 8
На высоте́ вели́каго княже́ния седя́,/ яви́лся еси́ благоче́стием и ве́рою сия́я оте́честву своему́, я́ко со́лнце;/ по Святе́й Тро́ице ре́вностнию разже́гся,/ и за ве́ру кре́пко пострада́в, кровь твою́ пролия́л еси́./ Тем и отсече́нная твоя́ за Христа́ глава́ свиде́тельствует я́ве о тебе́,/ приле́пшая по сме́рти к телеси́ твоему́:/ с не́юже и до днесь нетле́нны пребыва́ют мо́щи твоя́,/ от ни́хже источа́еши исцеле́ния душа́м и телесе́м на́шим./ Но я́ко дерзнове́ние име́я ко Христу́, страстоте́рпче Гео́ргие,/ непреста́нно моли́ держа́ву твою́ и сро́дник твои́х/ безвре́дну сохрани́ти моли́твами твои́ми.
Кондак, глас тойже
Христо́ве сме́рти подо́бяся,/ и Того́ испи́та ча́шу возжеле́в, я́ко Живота́,/ за Него́же му́жески подвиза́лся еси́, презре́в земно́е ца́рство,/ от безбо́жных ва́рвар пострада́в до сме́рти,/ Гео́ргие Богому́дре,/ тем моли́ спасти́ся ве́рным лю́дем моли́твами твои́ми.
Величание
Велича́ем тя,/ святы́й благове́рный кня́же Гео́ргие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.