4/17 Великомученицы Варвары (ок. 306). Преподобного Иоанна Дамаскина (ок. 780). Святителя Геннадия, архиепископа Новгородского (1504). Дамаскинской иконы Божией Матери (VIII).

 

Тропарь великомученице Варваре, глас 8

Варва́ру святу́ю почти́м:/ вра́жия бо се́ти сокруши́/ и я́ко пти́ца изба́вися от них,/ по́мощию и ору́жием Креста́, всечестна́я.

Ин тропарь, глас 4

Агнице всеблаже́нная Варва́ро,/ Боже́ственне озари́вшися Све́том Святы́я Тро́ицы Трисо́лнечным/ и в купе́ли Креще́ния утверди́вшися,/ в побежде́ние ле́сти оте́ческия,/ ве́ру испове́дала еси́ Христо́ву./ Те́мже, всечестна́я, свы́ше благода́ть тебе́ дарова́ Бог,/ исцеля́ти неду́ги и боле́зни вся./ Его́же моли́, великому́ченице, да спасе́т ду́ши на́ша.

Кондак, глас тойже

В Тро́ице благоче́стно пева́емому/ после́довавши Бо́гу, страстоте́рпице,/ и́дольская притупи́ла еси́ чти́лища,/ посреде́ же по́двига страда́льчествующи, Варва́ро,/ мучи́телей преще́ния не устраши́лася еси́, мужему́дренная,/ велегла́сно пою́щи при́сно:/ Тро́ицу чту, еди́но Божество́.

Величание

Велича́ем тя,/ страстоте́рпице Христо́ва Варва́ро,/ и чтим честно́е страда́ние твое́,/ е́же за Христа́/ претерпе́ла еси́.

 

Тропарь преподобному Иоанну Дамаскину, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодохнове́нное удобре́ние, Иоа́нне прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 4

Песнопи́сца и честна́го Богоглаго́льника,/ Це́ркве наказа́теля* и учи́теля,/ и враго́в сопротивобо́рца, Иоа́нна воспои́м:/ ору́жие бо взем, Крест Госпо́день,/ всю отрази́ ересе́й пре́лесть,/ и я́ко те́плый предста́тель к Бо́гу,/ всем подае́т прегреше́ний проще́ние.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

 

Тропарь святителю Геннадию, архиепископу Новгородскому, глас 5

Уподо́бился еси́ дре́вним отце́м,/ святи́телю о́тче Генна́дие,/ Свяще́нныя кни́ги собра́в и еретики́ посрами́в,/ ре́вность по Бо́зе показу́я, па́ству огради́л еси́,/ моли́ и ны́не Христа́ Бо́га/ мир Це́ркви дарова́ти/ и спасти́ся душа́м на́шим.

Кондак, глас 2

Ве́лия исправле́ния о церко́вном благоле́пии явля́я,/ Правосла́вную ве́ру утверди́л еси́,/ святи́телю о́тче Генна́дие,/ не преста́й моли́тися о нас,/ во Ца́рствии Небе́снем безсме́ртныя тра́пезы наслажда́лся.

Величание

Велича́ем тя,/ святи́телю о́тче Генна́дие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.