28/10 Преподобного Моисея Мурина (ок. 400). Обретение мощей преподобного Иова Почаевского (1659). Собор преподобных отцев Киево-Печерских, в Дальних пещерах (преподобного Феодосия) почивающих. Преподобного Саввы Крыпецкого, Псковского (1495). Служба общая преподобному Печерскому единому. Служба общая преподобным Печерским, двум или многим.
Тропарь преподобному Моисею Мурину, глас 1
Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Моисе́е,/ посто́м, бде́нием, моли́твою небе́сная дарова́ния прии́м,/ исцеля́вши неду́жныя и ду́ши ве́рою притекаю́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.
Кондак, глас 4
Му́рины зауши́в и лица́ де́монов поплева́в,/ мы́сленно просия́л еси́,/ я́коже со́лнце све́тлое,/ све́том жития́ твоего́/ и уче́нием наставля́я ду́ши на́ша.
Величание
Ублажа́ем тя,/ преподо́бне о́тче Моисе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь преподобному Иову Почаевскому, глас 4
Возло́жь на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели Уго́рницстей/ и на о́строве Ду́бенстем:/ и, прише́д к горе́ Поча́евстей,/ зна́менанней цельбоно́сною стопо́ю Пресвяты́я Богоро́дицы,/ и в те́сней пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́яся,/ му́жественно потруди́лся еси́/ на по́льзу Це́ркве Христо́вы и оби́тели твоея́,/ ку́пно же и проти́ву враго́в Правосла́вия/ и благоче́стия христиа́нскаго,/ и, наста́вив сицево́му* ополче́нию и́ночествующих,/ победи́тели тех предста́вил еси́ Влады́це своему́ и Бо́гу:/ Того́ моли́ спасти́ся душа́м на́шим.
Кондак, глас 8
Возсия́ от спу́да земна́го сокро́вище нетле́нное моще́й твои́х,/ уго́дниче Бо́жий,/ я́ко, благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́ниих, моли́твах и труде́х свя́то подвиза́лся еси́/ и те́ми те́ло твое́ увяди́л еси́./ Ны́не же, прише́д к Бо́гу в безмяте́жный и ве́чный поко́й,/ мо́лишися о всех с ве́рою к тебе́ прибега́ющих./ Те́мже благода́рно вопие́м ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Величание
Ублажа́ем тя,/ преподо́бне о́тче И́ове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь Собору преподобных отцев Киево-Печерских, в Дальних пещерах (преподобного Феодосия) почивающих, глас 4
Мы́сленное со́лнце и све́тлую луну́/ первонача́льных Пече́рских,/ со всем собо́ром преподо́бных днесь почти́м:/ ти́и бо це́рковную твердь озаря́юще,/ просвеща́ют во тьме страсте́й бе́дствующих,/ и подаю́т от Христа́ Бо́га моли́твами свои́ми по́мощь во всех ско́рбех/ и душа́м на́шим про́сят избавле́ния.
Кондак, глас 8
Избра́ннии от ро́дов уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшии,/ и вас земля́ не потаи́ла есть,/ но не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу просла́вльшему вас/ в па́мяти ва́шей прино́сим:/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи.
Величание
Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.
Тропарь преподобному Савве Крыпецкому, Псковскому, глас 8
Пусты́ни яви́лся еси́ до́брое насажде́ние, преподо́бне,/ от ю́ности бо в ми́ре изво́лил еси́ чи́стое житие́;/ ревну́я же бо́льшему, и дом оте́ческий оста́вил еси́,/ и вся кра́сная ми́ра сего́ презре́в,/ от чу́ждых стран прише́л еси́/ во оби́тели Богоспаса́емаго гра́да Пско́ва/ и послуша́нию преподо́бнаго Евфроси́на преда́лся еси́;/ та́же простира́лся умо́м еще́ к вя́щшему*,/ всели́лся еси́ в пусты́ню,/ в не́йже оби́тель прече́стну воздви́гл еси́/ и мно́жество и́нок собра́л еси́,/ и их настави́л еси́ на путь и́стинный./ Те́мже и Христо́с, Ему́же в же́ртву себе́ прине́сл еси́,/ ви́дев твоя́ благи́я труды́,/ я́ко пресве́тла тя свети́льника/ и по преставле́нии чудесы́ обогати́, Са́вво, о́тче наш,/ моли́ся у́бо при́сно Ему́ о стране́ на́шей,/ е́же дарова́тися ей на враги́ побе́дам,/ ста́ду же твоему́ от враг ненаве́тну* пребы́ти/ и всем нам спасти́ся.
Ин тропарь, глас 7
От мирска́го жития́ изше́д,/ отверже́нием же ми́ра Христу́ после́довал еси́/ и, в пусты́ню все́лься,/ равноа́нгельное житие́ пожи́л еси́,/ отону́дуже, веселя́ся, преше́л еси́ к Небе́сным черто́гом,/ и ны́не, со а́нгелы, Влады́чню престо́лу предстоя́,/ помина́й, нас, чад свои́х,/ я́же собра́л еси́, Богому́дре,/ да ра́достию от души́ вопие́м:/ ра́дуйся, Са́вво,/ о́тче преблаже́ннейший.
Кондак, глас 1
Возсия́ от пусты́ни сла́вному гра́ду Пско́ву/ но́вое све́тлое со́лнце,/ чуде́с луча́ми всех озаря́ющее/ и благода́тне согрева́ющее,/ тьму же вся́ких искуше́ний и наве́тов/ и хлад грехо́вных отженя́ющее./ Прииди́те у́бо, пра́зднующе блаже́нную па́мять/ сего́ свети́льника на́шего воспои́м:/ сла́ва Бо́гу, та́ко промышля́ющему о нас,/ сла́ва уго́днику Его́, сохраня́ющу нас!/ Ты же, преподо́бне о́тче Са́вво,/ о и́же твою́ при́сно па́мять почита́ющих/ моли́ Христа́ Бо́га,/ я́ко да ми́лостив будет нам и в день су́дный.
Величание
Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче ангелов.
Тропарь общий преподобному Печерскому единому, глас 8
Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш (имя рек),/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный, воздая́ния получи́л еси́ от Христа́ Бо́га./ Тому́ помоли́ся о душа́х на́ших.
Тропарь общий затворнику Печерскому единому, глас 2
Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче (имя рек), ра́довался еси,/ огне́м бо любве́ Боже́ственныя распаля́емь,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́./ Того́ моли́твами, Христе́ Бо́же, спаси́ ду́ши на́ша.
Кондак, глас 8
Христо́вою любо́вию уязви́в ду́шу,/ преподо́бне о́тче наш (имя рек),/ в пеще́рнем мра́це свет спасе́ния обре́л еси́/ и, я́ко ча́до избра́нное вели́ких отце́в Пече́рских Анто́ния и Феодо́сия,/ вку́пе с ни́ми оби́тель ра́йскую унасле́довал еси́,/ отону́дуже призира́й ны́не на оби́тель земну́ю, в не́йже подвиза́лся еси́,/ и моли́ся о чту́щих па́мять твою́, да зове́м ти:/ ра́дуйся (имя рек), моли́твенниче о душа́х на́ших.
Величание
Ублажа́ем тя,/ преподо́бне о́тче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь общий преподобным Печерским, двум или многим, глас 3
Преблаже́ннии и Богоно́снии отцы́ на́ши (имя рек),/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.
Кондак, глас 4
Бога́тство благода́ти и сыноположе́ния стяжа́вше мно́гими по́двиги и доброде́тельми,/ и́хже ра́ди Христо́с всели́ ду́ши ва́ша/ в Небе́сная селе́ния Своя́,/ дарова́в благода́ть нетле́ния и чуде́с моще́м ва́шим./ К ни́мже притека́юще, вопие́м:/ ра́дуйтеся (имя рек), отцы́ на́ши,/ ли́ков и́ночествующих похвале́ и удобре́ние.
Величание
Ублажа́ем вас,/ преподо́бнии отцы́ (имя рек),/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.