27/10 Мученика Каллистрата и дружины его (304). Преподобного Савватия Соловецкого (1435). Священномученика Петра, митрополита Крутицкого (1937). Преподобных Сергия (1392) и Никона (1426) Радонежских.
Тропарь мученику Каллистрату и дружине его, глас 4
Му́ченицы Твои́, Го́споди... (общий мученикам).
Кондак, глас тойже
Всяк труд днесь Це́рковь ны́не соверша́ющи, святи́и,/ восхваля́ет та́инственно,/ я́ко за ню страда́льчествовавшия, му́ченицы Боже́ственнии,/ добропобе́днии, всему́дрии.
Ин кондак, глас тойже
Многообра́зныя ра́ны претерпе́вше, и венцы́ от Бо́га я́ве прии́мше,/ о нас моли́теся, блаже́ннии, Христу́,/ па́мять всепра́зднственную ва́шу соверша́ющих,/ велича́йший Каллистра́те со страда́вшими с тобо́ю,/ е́же умири́ти па́ству и лю́ди, Той бо есть ве́рных утвержде́ние.
Величание
Велича́ем вас,/ страстоте́рпцы святи́и, Каллистра́те со страда́вшими с тобо́ю,/ и чтим честна́я страда́ния ва́ша,/ я́же за Христа́/ претерпе́ли есте́.
Тропарь преподобному Савватию Соловецкому, глас 3
Удали́вся ми́ра и водвори́вся в пусты́ни,/ до́брым по́двигом подвиза́лся еси́, злострада́нием, и внима́нием, и моли́твами:/ отону́дуже и по сме́рти источа́еши исцеле́ния, Савва́тие о́тче наш,/ моли́ Христа́ Бо́га спасти́ся душа́м на́шим.
Ин тропарь, глас 4
От ю́ности своея́, преподо́бне, весь себе́ Го́сподеви предложи́в,/ и земна́я вся оста́вль,/ Христо́вым стопа́м те́пле после́довал еси́,/ и безпло́тным сожи́тель яви́лся и всем преподо́бным соо́бщник, преблаже́нне Савва́тие./ Тем, мо́лимтися, о́тче, моли́ся о нас непреста́нно Христу́ Бо́гу,/ я́ко да ми́лостив бу́дет нам в день су́дный.
Кондак, глас 2
Жите́йския молвы́ отбе́г, всели́лся еси́ в морски́й о́стров, му́дре,/ и крест твой взем, Христу́ после́довал еси́ в моли́твах, и во бде́ниих и в поще́ниих, злострада́ньми плоть твою́ изнуря́я./ Тем был еси́ преподо́бных удобре́ние;/ сего́ ра́ди любо́вию па́мять твою́ пра́зднуем, преподо́бне Савва́тие,/ моли́ Христа́ Бо́га непреста́нно о всех нас.
Ин кондак, глас 3
Я́ко звезда́ всесве́тлая доброде́тельми сия́ющи,/ чуде́с лучи́ испуща́ющи обою́ду,/ богатя́ приходя́щих ду́ши, целя́ и телеса́,/ благода́ть име́я, Савва́тие./ Прославля́ет бо Своя́ Себе́ Вели́кий Дарова́тель.
Величание
Ублажа́ем тя,/ преподо́бне о́тче Савва́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь священномученику Петру, митрополиту Крутицкому, глас 2
Бо́жиим смотре́нием/ к святи́тельскому служе́нию святы́м Патриа́рхом Ти́хоном призва́нный,/ ста́ду Христо́ву яви́лся еси́ страж неусы́пный/ и защи́тник небоя́зненный,/ священному́чениче Пе́тре./ Жесто́кая заточе́ния и да́льняя изгна́ния,/ страда́ния и смерть от богобо́рцев претерпе́л еси́./ Вене́ц му́ченический прия́в,/ на Небеси́ ны́не ра́дуешися./ Моли́ Ми́лостиваго Бо́га,/ да сохрани́т Це́рковь на́шу от нестрое́ний,/ единомы́слие и мир лю́дем Свои́м да́рует/ и спасе́т ду́ши на́ша.
Кондак, глас 4
Дух ми́рен и кро́ток стяжа́в,/ тве́рдое упова́ние на милосе́рдие Бо́жие име́я,/ блюсти́тель ве́рный Це́ркве на́шея и испове́дник Христо́в яви́лся еси́,/ священному́чениче Пе́тре,/ при́сный о нас пред Бо́гом предста́телю и моли́твенниче о душа́х на́ших.
Величание
Велича́ем тя,/ священному́чениче Пе́тре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь общий преподобным Сергию и Никону, Радонежским, глас 8
Я́ко трисве́тлаго со́лнца светоза́рныя зве́зды,/ Тро́йческим све́том озаря́ете сердца́ ве́рных,/ сосу́ди Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щий дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.
Тропарь преподобному Сергию Радонежскому, глас тойже
От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклонится,/ му́жески в пусты́ню всели́лся еси́/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просвети́л еси́, приходя́щих тебе́ ве́рою,/ и исцеле́ния всем подая́ оби́льно, /о́тче наш Се́ргие, моли́ Христа́ Бо́га, да спасе́т ду́ши на́ша.
Тропарь преподобному Никону Радонежскому, глас 1
Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
Кондак общий преподобным Сергию и Никону Радонежским, глас 8
В по́стницех приобщи́вшеся Вели́кому Анто́нию/ и Евфимию Иерусали́мскому поревнова́вше в по́двизех,/ я́ко а́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.
Величание
Ублажа́ем вас,/ преподо́бнии отцы́ Се́ргие и Ни́коне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.