26/8 Апостола от 70-ти Карпа (I). Мученика Георгия Нового, Болгарского (1515). Обретение мощей преподобного Макария Калязинского (1521). Иконы Божией Матери Селигерская-Владимирская (XVI).
Тропарь апостолу Карпу, глас 3
Апо́столе святы́й Ка́рпе,/ моли́ Ми́лостиваго Бо́га,/да прегреше́ний оставле́ние/ пода́ст душа́м на́шим.
Кондак, глас 4
Я́ко звезду́ пресве́тлую Це́рковь всегда́ стяжа́ тя, апо́столе Ка́рпе,/ чуде́с твои́х многоподава́нием просвеща́ема:/ спаси́ ве́рою чту́щих па́мять твою́.
Величание
Велича́ем тя,/ апо́столе Христо́в Ка́рпе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.
Тропарь мученику Георгию Новому, Болгарскому, Софийскому, глас 4
Боже́ственным жела́нием от ю́наго во́зраста/ весь сам себе́ Го́сподеви возложи́в,/ в моли́твах и посте́х о́браз быв доброде́тели,/ бога́тство же и сла́ву, и доброро́дство теле́сное, я́ко не су́щее, презре́в,/ и Христа́ еди́наго от ду́ши возлюби́л еси́,/ и Того́ и́стиннаго су́ща Бо́га в Тро́ице покланя́ема,/ пред нечести́выми пропове́дал еси́,/ и срацы́нскую18 ве́ру, и зако́ны Моаме́фовы19 под нога́ми попра́в,/ и мучи́теля ужаси́в*,/ муче́ния венце́м украси́вся, сла́вне,/ к небе́сным восте́кл еси́ ликостоя́нием,/ прему́дре Гео́ргие./ Моли́ Христа́ Бо́га/ сохрани́ти оте́чество твое́, и спасти́ лю́ди и град,/ и́же твоя́ по́двиги при́сно почита́ющия.
Ин тропарь, глас тойже
Боже́ственною уя́звлен любо́вию,/ прему́дре Гео́ргие сла́вне,/ Христа́ Бо́га нечести́вым пропове́дал еси́/ и злоче́стие ту́рское нога́ми попра́л еси́;/ муче́ния же венце́м украси́вся,/ к Небе́сным восте́кл еси́ ликостоя́нием./ Моли́ Христа́ Бо́га/ сохрани́ти оте́чество твое́, град и лю́ди,/ по́двиги твоя́ при́сно почита́ющия.
Ин тропарь, глас тойже
В терпе́нии многоиску́снем, блаже́нне му́чениче Гео́ргие,/ огнеиску́сную смерть претерпе́л еси́/ и по кончи́не твое́й вене́ц от Христа́ нетле́нный/ с му́ченическими ли́ки прия́л еси́./ И ны́не, на земли́ кро́тких достойно водворя́лся,/ Христа́ Бо́га о нас непреста́нно моли́,/ и́же ве́рою покланя́ющихся ра́це моще́й твои́х.
Кондак, глас тойже
Я́ко звезда́ пресве́тлая яви́лся еси́ непреле́стная ми́рови,/ пра́веднаго Со́лнца Христа́ возвеща́ющи страда́нии твои́ми, страстоте́рпче/ вели́кий, му́чениче Христо́в Гео́ргие,/ и пре́лесть погаси́л еси́ срацы́нскую,/ и Моаме́фова преда́ния и зако́ны под нога́ми твои́ми попра́л еси́,/ и беззако́ннаго царя́ и мучи́телей ужаси́л еси́ кре́пким твои́м терпе́нием,/ и ве́рным подае́ши свет,/ моля́ся к Бо́гу непреста́нно о всех нас.
Ин кондак, глас 2
Вы́шния сла́вы жела́я, многострада́льне Гео́ргие,/ ага́рянскую пре́лесть поплева́в, попра́л еси́/ и побе́ды вене́ц прия́л еси́,/ а́нгелом же ны́не свеселя́ся и му́чеником соводворя́яся,/ с ни́миже Христу́ Бо́гу моли́ся непреста́нно о всех нас.
Величание
Велича́ем тя,/ страстоте́рпче святы́й Гео́ргие,/ и чтим честна́я страда́ния твоя́,/ я́же за Христа́/ претерпе́л еси́.
Тропарь преподобному Макарию Калязинскому, глас 8
Плотска́я мудрова́ния, о́тче Мака́рие,/ воздержа́нием и бде́нием умертви́л еси́,/ ме́сто бо, на не́мже по́ты твоя́ излия́л еси́,/ я́ко труба́, вопие́т к Бо́гу,/ пове́дающи твоя́ исправле́ния,/ и по сме́рти честны́я твоя́ мо́щи источа́ют исцеле́ния./ Те́мже вопие́м ти:/ моли́ Христа́ Бо́га, да спасе́т ду́ши на́ша.
Ин тропарь, глас 2
Я́ко дре́во насажде́нное при вода́х воздержа́ния,/ струя́ми слез твоих напоя́ем,/ преподо́бне о́тче Мака́рие,/ се́яв бо слеза́ми, в ра́дости жне́ши доброде́тельныя рукоя́ти;/ тем Вели́кий Мздода́вец плоды́ трудо́в твои́х прия́т/ и в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́/ и моли́ Святу́ю Тро́ицу, преподо́бне Мака́рие,/ спасти́ся душа́м на́шим.
Ин тропарь, глас 8
Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́, /и был еси́ свети́льник вселе́нней, сия́я чудесы́,/ Мака́рие о́тче наш, моли́ Христа́ Бо́га/ спасти́ся душа́м на́шим.
Кондак, глас 2
Вы́шних жела́я, воздержа́нием и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш.
Ин кондак, глас 8
Я́ко фи́никс псало́мский во удо́лиих* по́стнических процве́л еси́,/ трудо́в свои́х по́ты, я́ко плоды́ духо́вными, возвели́чил еси́ над все́ми Бо́га,/ но я́ко име́я дерзнове́ние ко Свя́тей Тро́ице,/ помина́й нас, чту́щих любо́вию святу́ю па́мять твою́, да зове́м ти:/ ра́дуйся, преподо́бне Мака́рие, о́тче наш.
Величание
Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.