22/4 Апостола Тимофея (ок. 96). Преподобномученика Анастасия Персянина (628). Преподобномученика Анастасия, диакона Печерского, в Ближних пещерах почивающего (XII). Преподобного Макария Жабынского, Белевского чудотворца (1623).
Тропарь апостолу Тимофею, глас 4
Бла́гости научи́вся и трезвя́ся во всех,/ благо́ю со́вестию священноле́пно обо́лкся*,/ поче́рпл еси́ от сосу́да избра́ннаго неизрече́нная,/ и ве́ру соблю́л, ра́вное тече́ние соверши́л еси́,/ апо́столе Тимофе́е./ Моли́ Христа́ Бо́га/ спасти́ся душа́м на́шим.
Тропарь преподобномученику Анастасию Персянину, глас 8
Му́ченик Твой, Го́споди, Анаста́сий... (общий мученику).
Кондак, общий апостолу Тимофею и преподобномученику Анастасию Персянину, глас 1
Боже́ственнаго ученика́ и спутеше́ственника Па́влова Тимофе́я,/ ве́рнии, воспои́м вси,/ с сим почита́юще му́драго Анаста́сия,/ возсия́вшаго от Перси́ды, я́ко звезду́,/ и отгоня́ющаго душе́вныя на́ша стра́сти/ и неду́ги теле́сныя.
Величание апостолу
Велича́ем тя,/ апо́столе Христо́в Тимофе́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.
Величание преподобномученику
Велича́ем тя,/ страстоте́рпче святы́й Анаста́сие,/ и чтим честна́я страда́ния твоя́,/ я́же за Христа́/ претерпе́л еси́.
Тропарь преподобномученику Анастасию, диакону Печерскому, в Ближних пещерах почивающему, глас 4
Плотско́е, я́ко безпло́тный а́нгел, возненави́девши препита́ние*,/ духо́вную во и́ноческом чи́ну возлюби́л еси́ пи́щу,/ и в нем Богови́дцу на Сина́и Моисе́ю/ до́брым жития́ твоего́ по́двигом уподобля́яйся,/ мно́гими на горе́ Бо́жией Пече́рской возвы́сился еси́ доброде́тельми,/ иде́же в моле́нии к Вы́шнему непреста́нно пребыва́л еси́,/ ны́не же со отцы́ преподо́бными Пече́рскими,/ а́ки би́сер пресве́тло сия́еши,/ а душе́ю со а́нгелы пред престо́лом Бо́жиим,/ святы́й преподобному́чениче Анаста́сие, предстои́ши,/ о нас всегда́ моля́ся ко Го́споду/ спасти́ся душа́м на́шим.
Кондак, глас 8
По́стническим пло́ти твоея́ умерщвле́нием/ ду́шу оживи́л еси́,/ у́бо твоего́ ра́ди презе́льнаго* воздержа́ния/ и превре́меннаго терпе́ния/ жизнь непрее́мная и диади́ма* неувяда́емая/ от пострада́вшаго за ны пло́тию/ и из ме́ртвых воскре́сшаго Христа́ Бо́га на́шего,/ тебе́, свя́те, преподобному́чениче Анаста́сие,/ я́ко злочести́вых победи́телю/ несумне́нно* вои́стину угото́вася,/ зане́же Бо́жие тридне́вное Воскресе́ние/ всем, живу́щим на земли́,/ тобо́ю, я́коже иногда́ от отроко́в Ефе́сских правосла́вно воспропове́дася,/ и сего́ ра́ди, о́тче, днесь к тебе́ вси вопие́м немо́лчно:/ святы́й преподобному́чениче Анаста́сие Пече́рский,/ моли́ приле́жно воста́вшаго Христа́ тридне́вно из ме́ртвых,/ да изба́вит от сме́рти ве́чныя ду́ши на́ша.
Величание
Ублажа́ем тя,/ преподобному́чениче Анаста́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь преподобному Макарию Жабынскому, Белевскому чудотворцу, глас 4
Пусты́нный жи́тель и во пло́ти а́нгел, и чудотво́рец яви́лся еси́, Богоно́се о́тче наш Мака́рие,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя, и ду́ши ве́рою приходя́щих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
Ин тропарь, глас тойже
От мирска́го жития́ изше́д/ в ти́хое приста́нище жи́зни и́ноческия,/ преподо́бне Мака́рие, вшел еси́,/ в не́йже до́бре подвиза́вся,/ ду́шу твою́ доброде́тельми превысо́кими обогати́л еси́/ и яви́лся еси́ добр па́стырь и учи́тель и́ноческому собо́ру,/ ему́же и оби́тель возгради́л еси́,/ та́же в безмо́лвие вшед и Богови́дения сподо́бився,/ ко Го́споду преста́вился еси́,/ и́же да́ром чуде́с тя обогати́./ Его́же ны́не моли́,/ да спасе́т ве́рою и любо́вию/ почита́ющих святу́ю па́мять твою́.
Кондак, глас тойже
В дому́ Госпо́дь воздержа́ния вои́стину тя положи́,/ я́коже звезду́ непреле́стную, световодя́щу концы́,/ о́тче отце́в, Мака́рие преподо́бне .
Ин кондак, глас 8
Житие́ чи́стое, терпе́ние, кро́тость и любо́вь нелицеме́рну,/ воздержа́ние соверше́нное,/ умиле́ние Боже́ственное,/ ве́ру же и наде́жду и́стинну и милосе́рдие стяжа́в,/ равноа́нгельно, Мака́рие, на земли́ пожи́л еси́/ и на Небеси́ Бо́гови с ли́ки Безпло́тных предстои́ши./ С ни́ми же, свя́те, моли́ся/ мир Росси́йстей Це́ркви дарова́ти/ и душа́м на́шим ве́лию ми́лость.
Величание
Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.