21/3 Владимирской иконы Божией Матери (празднество установлено в память спасения Москвы от нашествия крымского хана Махмет- Гирея в 1521 г.). Равноапостольных царя Константина (337) и матери его царицы Елены (327). Благоверного князя Константина (Ярослава) (1129) и чад его Михаила и Феодора (XII), Муромских чудотворцев. Преподобного Кассиана грека, Угличского чудотворца (1504). Чтимые списки с Владимирской иконы Божией Матери: Псково-Печерская «Умиление» (1524), Заоникиевская (1588), Красногорская, или Черногорская (1603), Оранская (1634), Владимирская-Ростовская (XII), Сырковская (1548), Флорищевская (XVII), Тупичевская-Ростовская.
Тропарь Божией Матери ради иконы Ее Владимирская, глас 4
Днесь све́тло красу́ется сла́внейший град Москва́,/ я́ко зарю́ со́лнечную восприи́мши, Влады́чице, чудотво́рную Твою́ ико́ну,/ к не́йже ны́не мы притека́юще и моля́щеся Тебе́, взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.
Кондак, глас 8
Взбра́нной Воево́де победи́тельная,/ я́ко изба́вльшеся от злых прише́ствием Твоего́ честна́го о́браза,/ Влады́чице Богоро́дице,/ све́тло сотворя́ем пра́зднество сре́тения Твоего́/ и обы́чно зове́м Ти:/ ра́дуйся, Неве́сто Неневе́стная.
Ин кондак, глас тойже
К Взбра́нней Воево́де и Засту́пнице, Де́ве и Богоро́дице,/ в чи́стей со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея́ и пречи́стому о́бразу, и возопие́м Ей:/ ра́дуйся, Неве́сто Неневе́стная.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
По полиелеи припев:
Досто́йно есть велича́ти Тя,/ Богоро́дице, честне́йшую Херуви́м и сла́внейшую без сравне́ния Серафи́м.
Тропарь равноапостольным царям Константину и Елене, глас 8
Креста́ Твоего́ о́браз на Небеси́ ви́дев/ и, я́коже Па́вел, зва́ние не от челове́к прие́м,/ в царе́х апо́стол Твой, Го́споди,/ ца́рствующий град в ру́це Твое́й положи́;/ его́же спаса́й всегда́ в ми́ре моли́твами Богоро́дицы,/ еди́не Человеколю́бче.
Кондак, глас 3
Константи́н днесь с ма́терию Еле́ною/ Крест явля́ют, всечестно́е дре́во,/ всех у́бо иуде́ев посрамле́ние су́ще,/ ору́жие же на проти́вныя ве́рных люде́й:/ нас бо ра́ди яви́ся зна́мение ве́лие,/ и во бране́х гро́зное.
Величание
Велича́ем вас,/ святи́и благове́рнии и равноапо́стольнии ца́рие Константи́не и Еле́но,/ и чтим святу́ю па́мять ва́шу,/ вы бо святы́м Кресто́м/ всю вселе́нную просвети́ли есте́.
Ино величание
Велича́ем вас,/ святи́и равноапо́стольнии Константи́не и Еле́но,/ и чтим боле́зни и труды́ ва́ша,/ и́миже труди́лися есте́/ во благове́стии Христо́ве.
В Часослове, изданном Киево-Печерской лаврой в 1642 году, находится такое Величание:
Величаем вас,/ святии благовернии и равноапостольнии царие, Константине и Елене,/ и чтим святую память вашу,/ святым крещением/ всю вселенную просветивших.
Тропарь благоверному князю Константину и чадам его Михаилу и Феодору, Муромским чудотворцам, глас 4
Константи́н днесь ве́село ликовству́ет*,/ предстоя́ престо́лу Святы́я Тро́ицы,/ ви́дя оте́чествие свое́ ма́стию духо́вною сия́ющее,/ ему́же после́доваша Михаи́л и Фео́дор, сы́нове его́,/ и мо́лятся вси трие́ вку́пе о душа́х на́ших.
Кондак, глас 8
Изря́дному воево́де и правове́рному кня́зю Константи́ну, с сыно́ма его́ вку́пе,/ оте́чество его́ хва́лящися вопие́т,/ име́юще его́ нача́льника и засту́пника,/ я́ко изба́вльшеся им от пре́лести и скве́рны и́дольския./ Сего́ ра́ди вопие́м ему́ си́це:/ ра́дуйся, кня́же Константи́не преблаже́нне.
Величание
Велича́ем вас,/ святи́и благове́рнии кня́зие Константи́не, Михаи́ле и Фео́доре,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.
Тропарь преподобному Кассиану греку, Угличскому чудотворцу, глас 4
Днесь град У́глеч тобо́ю хва́лится/ в конца́х бо его́ пресве́тло, я́ко ве́лие со́лнце, возсия́л еси́/ и чудесы́ твои́ми вся озари́л еси́,/ и ны́не моли́ся Го́сподеви,/ Кассиа́не преподо́бне,/ за град У́глеч и оби́тель сию́,/ и всяк град, и страну́, и лю́ди,/ и́же ве́рою тебе́ почита́ющия,/ и о спасе́нии душ на́ших.
Ин тропарь, глас тойже
Днесь пресве́тло красу́ется сла́внейший У́глеч град,/ це́рковь же Бо́жия Ма́тере вельми́ ра́дуется,/ име́ющи многоцеле́бныя в себе́ мо́щи вели́каго чудотво́рца,/ преподо́бнаго Кассиа́на, возсия́вшаго от Ри́ма,/ я́коже со́лнце, всему́ ми́ру, издале́че просвеща́ющаго ве́рных сердца́,/ и́мже украси́ Бог це́рковь Ма́тере Своея́./ Те́мже ны́не мо́лим тя:/ бу́ди покрови́тель и засту́пник непобеди́мый/ от вся́ких бед гра́ду на́шему/ и всем ве́рным храни́лище,/ притека́ющим в дом Бо́жия Ма́тере и кла́няющимся тебе́,/ преподо́бне уго́дииче Христо́в Кассиа́не,/ моли́ Христа́ Бо́га спасти́ся душа́м на́шим.
Ин тропарь, глас тойже
Ве́тхаго Ри́ма имея́ воспита́ние,/ держа́ву оте́чества своего́, град Мангу́пский, оста́вль,/ и нивочто́же вмени́л еси́ княже́ние/ и сла́ву маловре́менную су́етнаго ве́ка Христа́ ра́ди,/ и па́че земна́го бога́тства избра́ бога́тство себе́ Небе́сное и сла́ву ве́чную,/ возвы́сив ум свой к Бо́гу/ и житие́ свое́ со а́нгелы вожделе́л* еси́ восприя́ти,/ промышле́нием Боже́ственнаго Ра́зума направля́ем,/ и Богоспаса́емаго У́глеча гра́да дости́гл еси́,/ и близ в преде́лах о́бласти его́, над Во́лгою реко́ю, в пусты́ню всели́вся,/ и оби́тель пресла́вну в честь Бо́жия Ма́тере воздви́гл еси́,/ и в ней те́ло свое́ предложи́в, я́ко дар освяще́н./ Тем мо́лим тя, о́тче Кассиа́не,/ моли́ Христа́ Бо́га,/ да спасе́т ду́ши на́ши.
Кондак, глас 8
Я́ко светоза́рная звезда́ прише́л еси́ от восто́ка на за́пад,/ оста́вль оте́чество и княже́ние твое́ Христа́ ра́ди,/ и в ца́рствующий град Москву́ прише́л еси́,/ и, промышле́нием Боже́ственнаго Ра́зума направля́ем,/ У́глеча гра́да дости́гл еси́,/ и, близ его́, над Во́лгою реко́ю, в пусты́ни У́чме всели́вся,/ оби́тель сотвори́л еси́, и це́рковь созда́,/ и созва́ мона́хов во спасе́ние;/ с ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Кассиа́не.
Ин кондак, глас 4
Я́коже пресве́тлое со́лнце,/ возсия́ нам от Ри́ма и к ца́рскому гра́ду дости́гл еси́,/ преблаже́нне о́тче Кассиа́не,/ и а́нгельски в Ру́сстей земли́ пожи́л еси́,/ и дре́вних по́стник на высоту́ воздержа́ния востече́,/ и в пусты́не У́чме, близ Богоспаса́емаго гра́да У́глеча,/ оби́тель пресла́вну и́ноком во спасе́ние сооружи́,/ и храм благоле́пен Пречи́стей Богома́тери Ду́хом Бо́жиим уясни́,/ и в ней тобо́ю Бог прославля́ется,/ и ны́не моли́тися Го́сподеви не преста́й о ста́де свое́м,/ и́же мно́гими по́ты и труды́ стяжа́л еси́/ изба́вити его́ от всех обстоя́ний лука́ваго,/ и от вся́ких скорбе́й и бед невреди́му сохрани́тися,/ и нам, рабо́м твои́м, грехо́в проще́ние моли́твами твои́ми получи́ти,/ и гра́ду твоему́ У́глечу от напа́стей вся́ческих/ и находя́щих паде́ний, гне́вом Бо́жиим пра́ведным, свободи́тися умоли́,/ преподо́бне и Богому́дре о́тче Кассиа́не.
Ин кондак, глас 5
Я́ко многосве́тлая звезда́,/ возсия́л еси́ в Ру́сстей земли́, о́тче Кассиане,/ и я́ко бога́тство драгоце́ннаго би́сера/ прии́де к нам от ве́тхаго Ри́ма/ и доше́д Богоспаса́емаго гра́да У́глеча,/ и близ его́ Боже́ственным смотре́нием/ оби́тель всече́стну возгради́л, и це́рковь Ма́тере Бо́жия чуднови́дну созда́,/ и созва́ инок мно́жества,/ с ни́миже моли́ся Христу́ Бо́гу/ изба́вити град сей от ва́рварскаго плене́ния,/ и междоусо́бныя бра́ни, и о́гненнаго запале́ния невреди́ма соблюди́,/ преподо́бне и Богому́дре отче Кассиа́не.
Величание
Ублажа́ем тя,/ преподо́бне о́тче Кассиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь Божией Матери ради иконы Ее, именуемой Красногорская, глас 2
Ра́дуйся, свята́я горо́ Кра́сная,/ небеси́ подо́бная,/ сла́ва бо Бо́жия на тебе́ возсия́./ Взыгра́йте, го́ры и хо́лми, весе́лием,/ я́ко на сей горе́ ико́на Бо́жия Ма́тере,/ честна́го Ея́ умиле́ния, просла́вися./ Лику́йте, челове́цы, и весели́теся,/ я́ко нам дарова́ся бога́тство неотъе́млемое, исцеле́ний сокро́вище,/ гла́сы, я́коже тру́бы, возшуми́те,/ прославля́юще Ея́ чудеса́ пресла́вная./ И Ты, Чи́стая, ра́дуйся, я́ко с Тобо́ю Госпо́дь.
Кондак, глас 3
На горе́ святе́й видя́ще Твою́ святу́ю ико́ну,/ Богоро́дице, Ма́ти Де́во,/ пое́м Твоего́ светообра́знаго ли́ка изображе́ние,/ поклоня́емся Твое́й святе́й ико́не,/ почита́ем о́ную,/ и сла́вим тоя́ пресла́вная чудеса́,/ и си́це зове́м Тебе́:/ ра́дуйся, Неве́сто Неневе́стная.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
Тропарь Божией Матери, ради иконы Ее «Умиление» Псково-Печерской, глас 4
Днесь све́тло красу́ется оби́тель сия́,/ я́ко зарю́ со́лнечную восприи́мши, Влады́чице,/ чудотво́рную Твою́ ико́ну,/ к не́йже мы ны́не притека́юще и моля́щеся Тебе́, взыва́ем сице:/ о Пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит оби́тель сию́/ и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.
Величание
Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим чудотво́рный о́браз Твой,/ и́мже спасла́ еси́/ нас от руки́ вра́жия.