20/2 Пророка Самуила (XI в. до Р. X.). Преложение мощей святителя Феодора, епископа Ростовского, и Иоанна, епископа Суждальского (1879).
Тропарь пророку Самуилу, глас 2
Дар мноче́стен дан бысть непло́дней утро́бе/ и принесе́н в же́ртву, я́ко всесожже́ние благоприя́тно, Го́сподеви своему́,/ послужи́в Тому́ в преподо́бии и пра́вде,/ тем тя почита́ем, проро́че Бо́жий Саму́иле,/ я́ко моли́твенника о душа́х на́ших.
Ин тропарь, глас 5
От ма́тере умоле́нный, тезоимени́те да́ния Бо́жия,/ от Бо́га зва́ния во младе́нчестве сподо́бися,/ честны́й проро́че Саму́иле,/ до́бре пасы́й непокори́выя лю́ди/ и царе́м яви́выйся устрои́тель,/ и о нас, ве́рно чту́щих тя, моли́ и́стиннаго Бо́га,/да спасе́т ду́ши на́ша.
Ин тропарь, общий, глас 2
Проро́ка Твоего́ Саму́ила па́мять, Го́споди, пра́зднующе,/ тем Тя мо́лим:/ спаси́ ду́ши на́ша.
Кондак, глас 8
Я́ко многоче́стный дар, пре́жде зача́тия вдан Бо́гу,/ и измла́да Тому́ я́ко а́нгел послужи́л еси́, всеблаже́нне,/ и сподо́бился еси́ предбу́дущая веща́ти;/ те́мже вопие́м ти:/ ра́дуйся, проро́че Бо́жий Самуи́ле, архиере́ю вели́кий.
Ин кондак, глас 5
Пома́зателю ца́рский,/ па́че же свята́го богови́дца Дави́да,/ вели́кий Саму́иле,/ потщи́ся умоли́ти о нас,/ да пома́жемся Свята́го Ду́ха ма́стию/ и бу́дем стра́нни неприя́зни,/ я́коже Дави́д нечи́стому ду́ху Сау́лову.
Величание
Велича́ем тя,/ проро́че Бо́жий Саму́иле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь святителям Феодору, епископу Ростовскому, и Иоанну, епископу Суздальскому, глас 8
Я́ко апо́столом единонра́вных учи́телей Су́ждальския страны́,/ и цели́телей душ и теле́с прему́дрых,/ и служи́телей Бо́гу благоприя́тных,/ к ра́кам честны́х моще́й ва́ших притека́юще,/ ублажа́ем вас, святи́телие Богоблаже́ннии, Фео́доре и Иоа́нне,/ в пе́снех же и в пе́ниих, ра́дующеся, сла́вим Христа́,/ дарова́вшаго вам благода́ть исцеле́ний/ и гра́ду на́шему Су́ждалю вели́кое в вас утвержде́ние.
Ин тропарь, древний, глас тойже
Я́ко апо́столом единонра́внии,/ и учи́телие Су́ждальстей стране́,/ и цели́телие душа́м и телесе́м предо́брии,/ и служи́телие Бо́жии благоприя́тнии,/ к ра́кам честны́х моще́й ва́ших притека́юще,/ святи́телю вели́кий Иоа́нне и Фео́доре Богоблаже́ннии,/ соше́дшеся днесь, любо́вию па́мять ва́шу све́тло пра́зднуем в пе́снех и пе́ниих,/ ра́дующеся и Христа́ сла́вяще,/ И́же такову́ю благода́ть дарова́вшаго исцеле́ний/ и гра́ду Су́ждалю вели́кое утвержде́ние.
Кондак, глас 8
Боже́ственных и пречестны́х святи́телей Христо́вых и чудотво́рцев Иоа́нна и Фео́дора,/ ве́рнии, пою́ще, да ублажи́м,/ я́ко днесь, в па́мять их притека́юще к ра́кам моще́й их,/ мо́лим многообра́зных нас обстоя́ний изба́вити,/да вопие́м вам:/ ра́дуйтеся, гра́ду на́шему и Це́ркви Христо́вей вели́кое утвержде́ние.
Ин кондак, глас тойже
Я́ко доброде́телей учи́тели,/ моли́твами ва́шими подае́те чту́щим вас любо́вию/ доброде́телей исправле́ние/ и собла́знов избавле́ние.
Величание
Велича́ем вас,/ святи́телие вели́ции Фео́доре и Иоа́нне,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.