20/2 Пророка Илии (IX в. до Р. X.). Преставление преподобного Аврамия Галичского, Чухломского (1375). Обретение мощей преподобномученика Афанасия Брестского (1649). Праведного Аарона первосвященника (XVI в. до Р. X.). Чухломской, или Галичской (1350) и Абалацкой («Знамение») (1637) икон Божией Матери.
Тропарь пророку Илии, глас 4
Во пло́ти а́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елисе́еви благода́ть/ неду́ги отгоня́ти/ и прокаже́нныя очища́ти./ Те́мже и почита́ющим его́ то́чит исцеле́ния.
Кондак, глас 2
Проро́че и прови́дче вели́ких дел Бо́га на́шего,/ Илие́ великоимени́те,/ веща́нием твои́м устави́вый водото́чныя о́блаки,/ моли́ о нас Еди́наго Человеколю́бца.
Величание
Велича́ем тя,/ святы́й проро́че Бо́жий Илие́,/ и почита́ем е́же на колесни́це о́гненней/ пресла́вное восхожде́ние твое.
Или:
Велича́ем тя,/ святы́й сла́вный проро́че Бо́жий Илие́,/ и чтим, е́же на Небе́са/ на колесни́це о́гненней,/ пресла́вное восхожде́ние твое́.
В Анфологионе, изданном во Львове в 1686 году, есть особое величание пророку Илии:
Велича́ем тя,/ Проро́че и Предте́че прише́ствия Госпо́дня, Илие́ сла́вный,/ и чтим, я́ко на не́бо с пло́тиею/ о́гненное восхожде́ние твое́.
В изданной в 1763 году в Почаевской лавре книге, содержащей в себе величания, певаемые на полиелеях праздников, находится на этот день такое величание:
Велича́ем тя,/ Проро́че Бо́жий Илие́ сла́вне,/ и почита́ем, е́же на небеса́ с пло́тию/ о́гненное восхожде́ние твое́.
В Круге церковных песнопений указано общее величание пророку Илии:
Велича́ем тя,/ проро́че Бо́жий Илие́,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Аврамию, игумену Городецкому, Галичскому, Чухломскому, глас 4
От мирска́го мяте́жа изше́д,/ в ти́хое приста́нище, преподо́бнаго Се́ргия оби́тель, прите́кл еси́,/ и та́мо равноа́нгельное житие́ пожи́в,/ во страну́ Га́личскую прише́л еси́,/ иде́же ве́ру Христо́ву насажда́я/ и новокреще́нныя лю́ди от суеве́рий пога́нских очища́я,/ мно́ги и вели́ки по́двиги подъял еси́,/ и оби́тели четы́ри созда́в,/ и́ноков ли́ки до́бре упа́сл еси́/ и ко Христу́ Спа́су приве́л еси́,/ Его́же моли́, преподо́бне о́тче Авраа́мие, спасти́ ду́ши на́ша.
Кондак, глас 8
В оби́тели Се́ргия преподо́бнаго житию́ и́ноческому до́бре навы́к,/ вя́щшаго* ра́ди безмо́лвия и по́двига/ в пусты́ню удали́тися возжеле́л еси́,/ и, Ду́хом Бо́жиим води́м,/ в преде́лы земли́ Га́личския прише́л еси́,/ и та́мо в пусты́ни ико́ну Ма́тере Госпо́дни чуде́сно обре́л еси́,/ с Не́юже вели́кая и сла́вная соверши́в,/ да́же до преде́л Чухло́мских дости́гл еси́/ и отсю́ду в ра́йския оби́тели всели́лся еси́,/ Авраа́мие Богоно́се, о́тче наш.
Величание
Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь преподобномученику Афанасию Брестскому, глас 2
Блаже́н еси́, о́тче наш Афана́сие,/ я́ко ве́рно пожи́л еси́, стоя́ бо́дренно за Святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти: о́тче наш, преподобному́чениче Афана́сие, похвало́ и украше́ние на́ше.
Кондак, глас 4
Мона́шескаго жития́ украше́ние и му́чеников красоту́ яви́л себе́ житие́м твои́м, Афана́сие,/ и я́ко со́лнце пресве́тлое лю́дям правосла́вным возсия́л еси́./ Те́мже и Христо́с да́ром чуде́с обогати́ тя;/ да чту́ще пресве́тлую па́мять твою́, зове́м ти:/ помина́й ста́до твое́ моли́твами твои́ми, преподо́бне.
Ин кондак, глас 2
Я́ко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго,/ той бо зми́я попра́л есть.
Величание
Ублажа́ем тя,/ преподобному́чениче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь праведному Аарону первосвященнику, глас 3
Сте́блю Леви́ина ко́рене,/ приимы́й чин дре́вняго Мафусаи́ла,/ он бо о́тча ра́ди к Бо́гу вознесе́ния,/ ты же бра́тня ра́ди с Бо́гом бесе́дования,/ первосвяще́нный во Изра́или моле́бниче о всех,/ умоли́ Бо́га ку́пно с бра́том свои́м богови́дцем,/ да изба́вимся от вся́кия ско́рби.
Кондак, глас тойже
Преиспещре́но имы́й одея́ние от честны́х ка́мений,/ процвете́нный свяще́нством, Ааро́не,/ твой сухи́й жезл процвету́щий/ прообразова́ше от Нескве́рныя Пречи́стыя Де́вы Сы́на Бо́жия рождество́,/ и́стиннаго Священнопа́стыря старе́йшаго,/ Его́же моли́ со всеми́ освяще́нными ли́ки,/ да спасе́т ны по вели́цей Его́ ми́лости.
Величание
Велича́ем тя,/ святы́й пра́ведный первосвяще́нниче Ааро́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь Божией Матери ради иконы Ее Абалацкой («Знамение»), глас 4
Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.
Кондак, глас тойже
Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
Ино величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.