Тропари и кондаки на разные случаи

Царю Небесный,/ Утешителю, Душе истины,/ иже везде сый/ и вся исполняяй,/ Сокровище благих/ и жизни Подателю,/ прииди и вселися в ны,/ и очисти ны от всякия скверны/ и спаси, Блаже, души наша.

Творче и Создателю всяческих, Боже,/ дела рук наших, к славе Твоей начинаемая,/ Твоим благословением спешно исправи/ и нас от всякаго зла избави,/ яко Един всесилен и Человеколюбец.

Скорый в заступлении и крепкий в помощь,/ предстани благодатию силы Твоея ныне/ и, благословив, укрепи,/ и в совершение намерения благаго дела рабов Твоих произведи:/ вся бо, елика хощеши,/ яко Сильный Бог, творити можеши.

Союзом любве апостолы Твоя связавый, Христе,/ и нас, Твоих верных рабов, к Себе тем крепко связав,/ творити заповеди Твоя/ и друг друга любити нелицемерно сотвори/ молитвами Богородицы, едине Человеколюбче.

Пламенем любве распали к Тебе сердца наша, Христе Боже,/ да тою разжизаеми,/ сердцем, мыслию же и душею и всею крепостию нашею возлюбим Тя,/ и искренняго своего, яко себе,/ и повеления Твоя храняще,/ славим Тя, всех благ Дателя.

О распенших Тя моливыйся, любодушне Господи,/ и рабом Твоим о вразах молитися повелевый,/ ненавидящих и обидящих нас прости/ и от всякаго зла и лукавства к братолюбному и добродетельному настави жительству,/ смиренно мольбу Тебе приносим,/ да в согласном единомыслии славим Тя,/ единаго Человеколюбца.

Якоже первомученик твой Стефан/ о убивающих его моляще Тя, Господи,/ и мы припадающе молим:/ ненавидящих всех и обидящих нас прости,/ во еже ни единому от них нас ради погибнути,/ но всем спастися благодатию Твоею,/ Боже Всещедрый.

Скоро предвари, прежде даже не поработимся врагом,/ хулящим Тя и претящим нам, Христе Боже наш:/ погуби Крестом Твоим борющия нас,/ да уразумеют, како может православных вера,/ молитвами Богородицы, едине Человеколюбче.

Взбранный Воеводо и Господи, ада Победителю!/ Яко избавлься от вечныя смерти,/ похвальная восписую Ти, создание и раб Твой,/ но яко имеяй милосердие неизреченное,/ от всяких мя бед свободи, зовуща:/ Иисусе, Сыне Божий, помилуй мя.

Призираяй на землю и творяй ю трястися,/ избави ны страшнаго труса прещения, Христе Боже наш,/ и низпосли нам богатыя милости Твоя,/ молитвами Богородицы, и спаси ны.

Избави труса тяжкаго всех нас, Господи,/ и язвы нестерпимыя, грех ради наших./ Пощади, Господи, люди Твоя,/ яже стяжал еси Твоею Кровию, Владыко,/ и град не предаждь в погибель трусом страшным,/ инаго бо разве Тебе Бога не вемы,/ и воззови поющим:/ Аз есмь с вами, и никтоже на вы.

Яко посреде учеников Твоих,/ пришел еси, Спасе, мир дая им,/ прииди к нам, и спаси нас.

Безкнижныя ученики Дух Твой Святый наказатели яви, Христе Боже,/ и многовещанным сличием прелесть упраздни,/ яко Всесилен.

Благословен еси, Христе Боже наш,/ Иже премудры ловцы явлей,/ низпослав им Духа Святаго,/ и теми уловлей вселенную,/ Человеколюбче, слава Тебе.

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас,/ верно зовущих Ти:/ ускори на молитву и потщися на умоление,/ предстательствующи присно, Богородице, чтущих Тя.

Скорый в заступлении Един сый, Христе,/ скорое свыше покажи посещение страждущему рабу Твоему/ и избави от недуг и горьких болезней,/ и воздвигни во еже пети Тя и славити непрестанно,/ молитвами Богородицы, едине Человеколюбче.

На одре болезни лежащаго и смертною раною уязвленнаго,/ якоже иногда воздвигл еси, Спасе, Петрову тещу,/ и расслабленнаго, на одре носимаго,/ сице и ныне, Милосерде, страждущаго посети и исцели:/ Ты бо един еси недуги и болезни рода нашего понесый,/ и вся могий, яко Многомилостив.

Помяни, Господи, яко благ, рабы Твоя,/ и елика в житии согрешиша, прости,/ никтоже бо безгрешен, токмо Ты,/ могий и преставленным дати покой.

Глубиною мудрости человеколюбно вся строяй,/ и полезное всем подаваяй,/ едине Содетелю, упокой, Господи, души раб Твоих:/ на Тя бо упование возложиша,/ Творца и Зиждителя и Бога нашего.

Со святыми упокой,/ Христе, души раб Твоих,/ идеже несть болезнь, ни печаль, ни воздыхание,/ но жизнь безконечная.

Тебе и стену и пристанище имамы,/ и молитвенницу благоприятну к Богу,/ Егоже родила еси, Богородице безневестная, верных спасение.

Путь и Истина сый, Христе,/ спутника ангела Твоего рабом Твоим ныне,/ якоже Товии иногда,/ поели, сохраняюща,/ и невредимых к славе Твоей, от всякаго зла/ во всяком благополучии соблюдающа,/ молитвами Богородицы, едине Человеколюбче.

Луце и Клеопе в Еммаус спутешествовавый, Спасе,/ сшествуй и ныне рабом Твоим,/ путешествовати хотящим,/ от всякаго избавляя их злаго обстояния;/ вся бо Ты, яко Человеколюбец, можеши, хотяй.

К Тебе, Спасе, прибегающих/ и от Твоея всесильныя десницы помощи и благословения,/ яко от Творца и Владыки ищущих не презри;/ но якоже иногда на мори/ словом тишину апостолом своим подал еси,/ и ныне тихое и безмятежное плавание, со здравием им даруй,/ молитвами Богородицы,/ едине Человеколюбче.

К Тебе, Спасе, прибегающих,/ и от Твоея всесильныя десницы помощи и благословения,/ яко от Творца и Владыки, ищущих не презри,/ но якоже апостолы Твоя древле/ на погребение Пречистыя Матере Твоея от конец облаки принесый,/ сице и ныне рабом Твоим сим/ скорое и безмятежное по воздуху превождение со здравием даруй,/ молитвами Преблагословенныя Богородицы,/ едине Человеколюбче.

Воздуха благорастворение повелением Твоим содеваяй, Господи,/ вольный дождь даруй земли,/ еже приносити людем Твоим плоды изобильныя/ и насыщати всякое животное Твоим благоволением,/ молитвами Богородицы и всех святых Твоих.

Всех Творца и Зиждителя/ и благих Дателя Тя сведуще, Господи,/ к Тебе припадаем и прилежно молим:/ пощади, Милосерде, и прости, яко Благ, беззакония наша/ и настоящаго праведнаго гнева избави рабы Твоя,/ подавая, яко Благ, жаждущей земли благоплодныя дожди,/ яко един Многомилостив.

Призри милостивно, Боже, на люди согрешившия/ и не презри в покаянии к Тебе припадающих,/ но, яко Благ, помилуй/ и вскоре праведнаго Твоего избави прещения,/ молитвами Богородицы, едине Человеколюбче.

Не отрини до конца согрешившия люди Твоя, Владыко,/ ниже остави милости и щедроты Твоя от нас,/ но, яко бездна сый щедрот и милосердия пучина,/ приими мольбы наша/ и избави нас от належащия беды и нужды,/ един бо еси Благоуветлив.

Благодарни суще недостойнии раби Твои, Господи,/ о Твоих великих благодеяниих, на нас бывших,/ славяще Тя, хвалим, благословим, благодарим, поем и величаем Твое благоутробие,/ и рабски любовию вопием Ти:/ Благодетелю Спасе наш, слава Тебе.

Твоих благодеяний и даров туне,/ яко раби непотребнии, сподобльшеся, Владыко,/ к Тебе усердно притекающе, благодарение по силе приносим,/ и Тебе, яко Благодетеля и Творца славяще, вопием:/ слава Тебе, Боже Всещедрый.

Манассию от уз и горькаго заточения/ молитв ради свободивый, всещедрый Боже,/ и раба Твоего, нами ныне молящагося от уз и заточения свободи,/ и от всякаго злаго обстояния избави,/ яко един Человеколюбец.

Яко милосердия источник/ и благости пучина, Христе Боже,/ не презри в скорбех и бедах Тебе верно призывающих,/ но яко Щедр, помилуй/ и от уз скоро свободи, да поем Ти: Аллилуиа.

Якоже Закхееву дому, Твоим, Христе, входом спасение бысть,/ сице и ныне входом священных служителей Твоих и с ними святых Твоих ангел/ мир Твой подаждь дому сему и милостивно благослови его,/ спасая и просвещая всех жити хотящих в нем.