Тропари и кондаки триоди постной

Фарисеева убежим высокоглаголания,/ и мытареве научимся высоте глагол смиренных,/ покаянием взывающе:/ Спасе мира,/ очисти рабы Твоя.

Воздыхания принесем мытарская Господеви,/ и к Нему приступим грешнии, яко Владыце:/ хощет бо спасения всех человеков,/ оставление подает всем кающимся,/ нас бо ради воплотися, Бог сый,/ Отцу Собезначальный.

Отеческия славы Твоея удалихся безумно,/ в злых расточив, еже ми предал еси богатство./ Темже Ти блуднаго глас приношу: согреших пред Тобою, Отче щедрый,/ приими мя кающася,/ и сотвори мя яко единаго от наемник Твоих.

Егда приидеши, Боже, на землю со славою,/ и трепещут всяческая:/ река же огненная пред судищем влечет,/ книги разгибаются, и тайная являются;/ тогда избави мя от огня неугасимаго,/ и сподоби мя одесную Тебе стати, Судие Праведнейший.

Премудрости Наставниче, смысла Подателю,/ немудрых Наказателю, и нищих Защитителю,/ утверди, вразуми сердце мое, Владыко!/ Ты даждь ми слово, Отчее Слово,/ се бо устне мои не возбраню, во еже звати Тебе:/ Милостиве, помилуй мя падшаго.

Богородице Дево, радуйся, Благодатная Марие, Господь с Тобою:/ благословенна Ты в женах, и благословен Плод чрева Твоего,/ яко Спаса родила еси душ наших.

Крестителю Христов, всех нас помяни,/ да избавимся от беззаконий наших:/ тебе бо дадеся благодать молитися за ны.

Молите за ны святии апостоли, святии вси,/ да избавимся от бед и скорбей:/ вас бо теплыя предстатели ко Спасу стяжахом.

Под Твое благоутробие прибегаем, Богородице,/ моления наша не презри во обстоянии;/ но от бед избави ны, Едина Чистая, Едина Благословенная.

Заутра услыши глас мой, Царю мой и Боже мой.

Господи, Иже Пресвятаго Твоего Духа/ в третий час апостолом Твоим низпославый,/ Того, Благий, не отыми от нас,/ но обнови нас, молящих Ти ся.

Иже в шестый день же и час,/ на кресте пригвоздей/ в рай дерзновенный Адамов грех,/ и согрешений наших рукописание раздери,/ Христе Боже, и спаси нас.

Иже в девятый час/ нас ради плотию смерть вкусивый,/ умертви плоти нашея мудрование,/ Христе Боже, и спаси нас.

Душе моя, душе моя,/ востани что спиши?/ Конец приближается,/ и имаши смутитися;/ воспряни убо,/ да пощадит тя Христос Бог,/ везде сый и вся исполняяй.

Велия веры исправления,/ во источнице пламене, яко на воде упокоения,/ святый мученик Феодор радовашеся;/ огнем бо всесожжегся,/ яко хлеб сладкий Троице принесеся./ Того молитвами, Христе Боже,/ спаси души наша.

Веру Христову, яко щит внутрь приим в сердце твоем,/ противныя силы попрал еси многострадальче,/ и венцем небесным венчался еси вечно,/ Феодоре, яко непобедимый.

Пречистому образу Твоему покланяемся, Благий,/ просяще прощения прегрешений наших, Христе Боже;/ волею бо благоволил еси плотию взыти на крест,/ да избавиши яже создал еси от работы вражия./ Тем благодарственно вопием Ти:/ радости исполнил еси вся, Спасе наш,/ пришедый спасти мир.

Неописанное Слово Отчее,/ из Тебе, Богородице, описася воплощаемь:/ и осквернившийся образ в древнее вообразив,/ Божественною добротою смеси./ Но исповедающе спасение,/ делом и словом, сие воображаем.

Православия светильниче,/ Церкве утверждение и учителю,/ монахов доброто, богословов поборниче непреоборимый,/ Григорие чудотворче, Фессалонитская похвало,/ проповедниче благодати,/ молися выну спастися душам нашим.

Премудрости священный и Божественный орган,/ Богословия светлую согласно трубу/ воспеваем тя, Григорие богоглагольниче,/ но яко ум, Уму Первому предстояй,/ к Нему ум наш, отче, настави, да зовем: радуйся, проповедниче благодати.

Ныне время делательное явися,/ при дверех суд, востанем убо постящеся,/ принесем слезы умиления,/ милостынями, зовуще:/ согрешихом паче песка морскаго,/ но ослаби, Содетелю всех,/ яко да приимем нетленныя венцы.

Спаси, Господи, люди Твоя/ и благослови достояние Твое,/ победы на сопротивныя даруя,/ и Твое сохраняя Крестом Твоим жительство.

Не ктому пламенное оружие/ хранит врат Едемских;/ на тыя бо найде преславный соуз древо крестное,/ смертное жало, и адова победа прогнася./ Предстал бо еси, Спасе мой,/ вопия сущим во аде,/ внидите паки в рай.

Кресту Твоему покланяемся, Владыко,/ и святое воскресение Твое славим.

Пустынный житель и в телеси ангел,/ и чудотворец явился еси, богоносе отче наш Иоанне;/ постом, бдением, молитвою небесная дарования приим,/ исцеляеши недужныя, и души верою притекающих ти./ Слава Давшему ти крепость,/ слава Венчавшему тя,/ слава Действующему тобою всем исцеления.

На высоте Господь воздержания/ истинна тя положи,/ якоже звезду нелестную,/ световодящую концы,/ наставниче Иоанне, отче наш.

В тебе, мати, известно спасеся еже по образу;/ приимши бо крест, последовала еси Христу,/ и деющи учила еси презирати убо плоть, преходит бо,/ прилежати же о души вещи безсмертней./ Темже и со ангелы срадуется, преподобная Марие, дух твой.

Блудами первее преисполнена всяческими,/ Христова невеста днесь покаянием явися,/ ангельское жительство подражающи,/ демоны Креста оружием погубляет./ Сего ради Царствия невеста явилася еси, Марие преславная.

Общее воскресение прежде Твоея Страсти уверяя,/ из мертвых воздвигл еси Лазаря, Христе Боже./ Темже и мы, яко отроцы, победы знамения носяще,/ Тебе, Победителю смерти, вопием:/ осанна в вышних,/ благословен Грядый во имя Господне.

Всех Радость Христос,/ Истина, Свет, Живот/ и мира Воскресение,/ сущим на земли явися Своею благостию/ и бысть образ Воскресения,/ всем подавая Божественное оставление.

Общее воскресение прежде Твоея Страсти уверяя,/ из мертвых воздвигл еси Лазаря, Христе Боже./ Темже и мы, яко отроцы,/ победы знамения носяще,/ Тебе, Победителю смерти, вопием:/ осанна в вышних,/ благословен Грядый во имя Господне.

Спогребшеся Тебе Крещением, Христе Боже наш,/ безсмертныя жизни сподобихомся воскресением Твоим,/ и воспевающе зовем:/ осанна в вышних,/ благословен Грядый во имя Господне.

На престоле на небеси, на жребяти на земли носимый, Христе Боже,/ ангелов хваление и детей воспевание/ приял еси, зовущих Ти:/ благословен еси,/ Грядый Адама воззвати.

Величаем Тя,/ Живодавче Христе,/ осанна в вышних, и мы Тебе вопием:/ благословен Грядый во имя Господне.