Тропари и кондаки триоди цветной

Воскресение Твое, Христе Спасе,/ ангели поют на Небесех,/ и нас на земли сподоби чистым сердцем/ Тебе славити.

Христос воскресе из мертвых,/ смертию смерть поправ/ и сущим во гробех живот даровав.

Аще и во гроб снизшел еси, Безсмертне,/ но аду разрушил еси силу,/ и воскресл еси, яко Победитель, Христе Боже,/ женам мироносицам вещавый: Радуйтеся! и Твоим апостолом мир даруяй,/ падшим подаяй Воскресение.

Запечатану гробу,/ Живот от гроба возсиял еси, Христе Боже,/ и дверем заключенным,/ учеником предстал еси,/ всех Воскресение,/ дух правый теми обновляя нам/ по велицей Твоей милости.

Любопытною десницею/ жизноподательная Твоя ребра Фома испыта, Христе Боже:/ созаключенным бо дверем яко вшел еси,/ с прочими апостолы вопияше Тебе:/ Господь еси и Бог мой.

Величаем Тя,/ Живодавче Христе,/ нас ради во ад сшедшаго,/ и с Собою вся воскресившаго.

Егда снизшел еси к смерти, Животе Безсмертный,/ тогда ад умертвил еси блистанием Божества./ Егда же и умершия от преисподних воскресил еси,/ вся силы небесныя взываху:/ Жизнодавче Христе Боже наш слава Тебе.

Благообразный Иосиф, с древа, снем Пречистое Твое Тело,/ плащаницею чистою обвив,/ и благоуханьми во гробе нове, закрыв, положи;/ но тридневен воскресл еси, Господи,/ подаваяй мирови велию милость.

Мироносицам женам при гробе представ, ангел вопияше: мира мертвым суть прилична/ Христос же истления явися чуждь./ Но возопийте: воскресе Господь,/ подаваяй мирови велию милость.

Радоватися мироносицам повелел еси,/ плач праматере Евы утолил еси/ воскресением Твоим, Христе Боже,/ апостолом же Твоим проповедати повелел еси:/ Спас воскресе от гроба.

Душу мою, Господи, во гресех всяческих,/ и безместными деяньми люте разслаблену,/ воздвигни Божественным Твоим предстательством,/ якоже и разслабленнаго воздвигл еси древле,/ да зову Ти спасаемы/ Щедрый, слава, Христе, державе Твоей.

Преполовившуся празднику,/ жаждущую душу мою благочестия напой водами,/ яко всем, Спасе, возопил еси:/ жаждай да грядет ко Мне и да пиет./ Источниче жизни нашея, Христе Боже, слава Тебе.

Празднику законному преполовляющуся,/ всех Творче и Владыко,/ к предстоящим глаголал еси, Христе Боже:/ приидите и почерпите воду безсмертия./ Темже Тебе припадаем, и верно вопием:/ щедроты Твоя даруй нам,/ Ты бо еси Источник жизни нашея.

Верою пришедшая на кладезь самаряныня,/ видя Тя, премудрости воду,/ еюже напоившися обильно,/ Царствие вышнее наследова вечно, яко приснославная.

Душевныма очима ослеплен,/ к Тебе, Христе, прихожду,/ якоже слепый от рождения,/ покаянием зову Ти:/ Ты сущих во тьме Свет пресветлый.

Препрославлен еси, Христе Боже наш,/ светила на земли отцы наша основавый,/ и теми ко истинней вере, вся ны наставивый,/ Многоблагоутробне, слава Тебе.

Апостол проповедание, и отец догматы,/ Церкви едину веру запечатлеша,/ яже и ризу носящи истины,/ исткану от еже свыше богословия,/ исправляет и славит благочестия великое таинство.

Иже во всем мире мученик Твоих,/ яко багряницею и виссоном,/ кровьми Церковь Твоя украсившися, теми вопиет Ти, Христе Боже:/ людем Твоим щедроты Твоя низпосли,/ мир жительству Твоему даруй,/ и душам нашим велию милость.

Яко начатки естества, Насадителю твари/ вселенная приносит Ти, Господи, богоносныя мученики:/ тех молитвами в мире глубоце,/ Церковь Твою, жительство Твое Богородицею соблюди, Многомилостиве.

Благословен еси, Христе Боже наш,/ Иже премудры ловцы явлей,/ низпослав им Духа Святаго/ и теми уловлей вселенную:/ Человеколюбче, слава Тебе.

Егда снизшед языки слия,/ разделяше языки Вышний,/ егда же огненныя языки раздаяше,/ в соединение вся призва,/ и согласно славим Всесвятаго Духа.

Величаем Тя,/ Живодавче Христе,/ и чтим Всесвятаго Духа Твоего,/ Егоже от Отца послал еси Божественным учеником Твоим.