Песнь 1
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Припев:
Распростертыма дланьма на Кресте, Отеческаго исполнил еси благоволения, Благий Иисусе, всяческая. Темже победную песнь Тебе вси поим.
Слава Отцу и Сыну и Святому Духу.
Страхом к Тебе яко рабыня, смерть повелена приступи Владыце живота, тою подающему нам безконечный живот и воскресение.
И ныне и присно и во веки веков. Аминь.
Богородичен: Своего приемши Содетеля, яко Сам восхоте, от безсеменнаго Твоего чрева, паче ума воплощаема, Чистая, тварей воистинну явилася еси Владычица.
Песнь 3
Ирмос: Несть свят, якоже Ты, Господи, Боже мой, вознесый рог верных Твоих, Блаже, и утвердивый нас на камени исповедания Твоего.
Припев:
Бога распинаема плотию зрящи тварь растаявашеся страхом: но содержительною дланию нас ради Распятаго, крепко держима бе.
Слава Отцу и Сыну и Святому Духу.
Смертию смерть разорена лежит окаянная без дыхания: Живота бо не терпящи Божественнаго приражения, умерщвляется крепкий, и даруется всем воскресение.
И ныне и присно и во веки веков. Аминь.
Богородичен: Божественнаго рождества Твоего, Чистая, всякий естества чин превосходит чудо: Бога бо преестественне зачала еси во чреве, и рождши пребываеши присно Дева.
Седален, глас 6
Гробу отверсту, аду плачущуся, Мариа вопияше ко скрывшымся апостолом: изыдите винограда делателие, проповедите Воскресения слово: воскресе Господь, подая мирови велию милость.Стих: Воскресни, Господи Боже мой, да вознесется рука Твоя, не забуди убогих Твоих до конца.Господи, предстояше гробу Твоему Мариа Магдалина, и плакаше вопиющи, вертоградаря Тя мнящи, глаголаше: где сокрыл еси вечный Живот? где положил еси, иже на престоле Херувимстем? стрегущии бо сего, от страха омертвеша. Или Господа моего дадите ми, или со мною возопийте: иже в мертвых быв, и мертвыя воскресив, слава Тебе.
Слава Отцу и Сыну и Святому Духу, и ныне и присно и во веки веков. Аминь.
Богородичен: Преднаписует Гедеон зачатие, и сказует Давид рождество твое, Богородице: сниде бо яко дождь на руно, слово во чрево твое, и прозябла еси без семене, земле святая, мирови спасение, Христа Бога нашего, Благодатная.
Песнь 4
Ирмос: Христос моя сила, Бог и Господь, честная Церковь Боголепно поет взывающи, от смысла чиста о Господе празднующи.
Припев:
Древо процвело есть, Христе, истинныя жизни: крест бо водрузися, и напоен быв кровию и водою от нетленнаго Твоего ребра, живот нам прозябе.
Слава Отцу и Сыну и Святому Духу.
Не ктому змий мне ложне обожение подлагает: Христос бо богоделатель человеческаго естества, ныне невозбранно стезю живота мне отверзе.
И ныне и присно и во веки веков. Аминь.
Богородичен: Яко воистинну неизвещанна и непостижима, яже Твоего боголепнаго, Богородице, суть рождества, сущым на земли и на небеси, Приснодево, таинства.
Песнь 5
Ирмос: Божиим светом Твоим, Блаже, утренюющих Ти душы любовию озари, молюся, Тя ведети, Слове Божий, истиннаго Бога, от мрака греховнаго взывающа.
Припев:
Уступают мне Херувими ныне, и пламенное оружие, Владыко, плещы мне дает, Тя видевше, Слове Божий, истиннаго Бога, разбойнику путь сотворшаго в рай.
Слава Отцу и Сыну и Святому Духу.
Не ктому боюся, еже в землю, Владыко Христе, возвращения: Ты бо от земли мя возвел еси забвенна, благоутробия ради многаго, к высоте нетления воскресением Твоим.
И ныне и присно и во веки веков. Аминь.
Богородичен: Иже Богородицу тя от души, Владычице мира Благая, исповедающих спаси: Тебе бо предстательство непоборимое имамы, истинную Богородительницу.
Песнь 6
Ирмос: Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, Многомилостиве.
Припев:
Распинаемь, Владыко, гвоздьми убо клятву юже на нас потребил еси: копием же прободаемь в ребро, Адамово рукописание растерзав, мир свободил еси.
Слава Отцу и Сыну и Святому Духу.
Адам низведеся, лестию запят быв, ко адове пропасти: но иже естеством, Бог же и милостив, сшел еси на взыскание, и на раму понес, совоскресил еси.
И ныне и присно и во веки веков. Аминь.
Богородичен: Пречистая Владычице, рождшая человеком кормчию Господа, страстей моих непостоянное и лютое утоли смущение, и тишину подаждь сердцу моему.
Кондак, глас 6
Живоначальною дланию, умершыя от мрачных удолий, Жизнодавец воскресив всех Христос Бог, воскресение подаде человеческому роду: есть бо всех Спаситель, Воскресение и Живот, и Бог всех.
Икос
Крест и погребение Твое, Жизнодавче, воспеваем вернии, и покланяемся, яко ад связал еси, Безсмертне, яко Бог Всесильный: и мертвыя совоскресил еси, и врата смертная сокрушил еси, и державу адову низложил еси, яко Бог. Темже земнороднии славословим Тя любовию, воскресшаго, и низложившаго вражию державу всепагубную, и всех воскресившаго в Тя веровавших, и мир избавльшаго от стрел змииных, и от прелести вражия, яко Бог всех.
Песнь 7
Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Припев:
Рыдающее во страсти Твоей солнце, во мрак облечеся, и во дни по всей, Владыко, земли свет померче, вопия: благословен еси, Боже отец наших.
Слава Отцу и Сыну и Святому Духу.
Облекошася, Христе, схождением Твоим во свет преисподняя, праотец же веселия исполнь явися ликовствуя, взыграся вопия: благословен еси, Боже отец наших.
И ныне и присно и во веки веков. Аминь.
Богородичен: Тобою, Мати Дево, свет возсия всей вселенней светлый: Зиждителя бо Ты всех родила еси Бога. Егоже проси, Всечистая, нам низпослати верным велию милость.
Песнь 8
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Припев:
Иудейския древле пророкоубийцы люди, богоубийцы зависть ныне содела, Тебе на крест вознесшыя, Слове Божий: Егоже превозносим во вся веки.
Слава Отцу и Сыну и Святому Духу.
Небеснаго круга не оставил еси, и во ад сошед, всего совоздвигл еси лежащаго во гноищи, Христе, человека, Тя превозносяща во вся веки.
И ныне и присно и во веки веков. Аминь.
Богородичен: От Света Светодавца Слова зачала еси, и рождши неизреченно Сего, прославилася еси: Дух бо в Тя, Отроковице, Божий вселися. Темже Тя поем во вся веки.
Песнь 9
Ирмос: Бога человеком не возможно видети, на Негоже не смеют чини Ангельстии взирати: Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.
Припев:
Страстей непричастен Ты пребыл еси, Слове Божий, плотию приобщився страстем: но решиши от страстей человека, страстем быв страсть, Спасе наш: един бо еси безстрастен, и всесилен.
Слава Отцу и Сыну и Святому Духу.
Тлю смертную прием, тления соблюл еси тело Твое невкусно, Твоя же животворящая и Божественная, Владыко, душа, во аде не оставлена бысть: но якоже от сна воскрес, нас совоздвигл еси.
И ныне и присно и во веки веков. Аминь.
Троичен: Бога Отца, Сына собезначальна, вси человецы устнами убо чистыми славим, неизреченную же и преславную Духа Всесвятаго силу чтим: едина бо еси всесильная Троица неразлучная.