Память: 3 июня (21 мая)
Глас 6.
Припев: Преподобне отче Моисее, моли Бога о нас.
Память: 3 июня (21 мая)
Глас 6.
Припев: Преподобне отче Моисее, моли Бога о нас.
Песнь 1.
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Приими моление, Христе мой, мене недостойнаго и отверзи ми недоуменный ум и язык, да возмогу Твоего угодника Моисея воспети прославление.
Ты издетска ум свой укрепляя изучением Богодухновенных Писаний и святых жития, к молитве прилежание имел еси. Подвигни и наш ум к славословию Творца всяческих, да обрящем велию Его милость.
Еще юн быв суету земную отметая, храм Господеви в себе создати хотя, яко елень источника воднаго, всеусердно искал еси храм Божий, блаженне. Сего ради оставив дом отеческий, во град Уфу ко храму преподобнаго Сергия притекл, возжелав приметатися в дому Господни, неже жити в селениих грешничих.
Утверждением имея Пострадавшаго нас ради Господа, странен, незнаем, бездомен, безотечен был еси, преподобне Моисее, храм Божий яко дом имея, и друга по душе себе тамо обрел еси, во еже прославляти купно с ним Творца всяческих.
Богородичен: Богородительнице Дево, Невместимаго всеми во утробе Твоей вместившая, молитвами Твоими помози нам от грехов очиститися, да сподобимся соделатися храмом благодати Божия.
Песнь 3.
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Пищею духовною всегда имел еси Слово Божие и крепкою верою в Господа побеждал вся видимыя и невидимыя враги. Егда отъяша у тебе Святое Евангелие начальницы безбожнии, ты гладом телесным и лишении себе подвизая, побуди их возвратити тебе драгое сие сокровище, показав сим твердое исповедание веры твоея.
Буии века сего за таковое исповедание твое Господа безумным тя, блаженне, наименоваша, но ты вся сия в терпении неся, за обидящих тя молитвы возносил еси. Научи и нас в любви пребывати со всеми и терпением смиряти души наша.
Вся терпел еси, преподобне: глад, лишения, поругания. Нищету и юродство нас ради обнищавшаго и Сего ярем на рамена взем, Тому последовал еси. Сего ради Господь даром прозорливости тя обогати. Поминай нас, отче Моисее, любовию чтущих память твою, да избавимся вражия обстояния.
Богородичен: Дево Мати Божия, рождшая Слово паче слова, явльшееся нас ради, моли прилежно безсловесия всякаго нас избавити.
Седален, глас 2:
От юности твоея, возлюбив подвиг и добродетель, отеческий дом оставив, Небеснаго Отца взыскал еси и обрет храм Божий, все житие твое служению в нем посвятив, пощение и воздержание известно показуя, трудился еси на пажити Христовой, наставляя чада своя духовныя на путь спасения, утешение им подавая, душевныя и телесныя язвы исцелевая. Темже и по смерти твоей Христос даром чудес обогати тя. Моли и о нас Христа Бога, прегрешений оставление нам подати, празднующим любовию святую память твою.
Богородичен: Облагодати нас, Мати Божия, еже к Богоугождению житие наше управи, да Твоею помощию и молитвами преподобнаго отца Моисея живот вечный наследуем.
Песнь 4.
Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Видя смирение и послушание твое, и ревностное усердие ко храму Господню, архипастырь Уфимский Иоанн в день Преображения Господня удостои тя монашества и диаконства и вскоре к служению священства призва. Ты же радости о сем исполнився и восприятою тобою силою благодати священства оболкся, всесветлым храмом тоя показался еси, сего ради тя все прославляем.
Пречестным от Бога саном священства украшен, священнодейственник Того достоин явился еси, вознося своя молитвы о людех, не остави и нас молитвеннаго предстательства твоего, преподобне Моисее, да обрящем милость Божию в День Судный.
Не от мира сего для всех был еси, отче Моисее: незлобив, кроток, смирен, преподобен и праведен явился еси, темже и ублажился еси от Творца и Владыки всяческих.
Богородичен: Красну добротою паче всех жен обрет Тя Господь, Дево Чистая, во Твою утробу вселися и злообразия страстей нас избави.
Песнь 5.
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Божественным светом просветитися хотя, правила святых отец добре соблюдая и преподобному Серафиму подражая, стяжал еси дух мирен, отче Моисее, да сим подвигнеши ко спасению чад своих.
Завидев тя искуситель добре проходяща житие свое, разжжеся и напастей множество ти воздвиже чрез сослужителей и власть имущих, но твоим смирением и любовию поруган бысть и изобличен. Утверди и нас молитвами твоими, отче Моисее, в любви Христове, да избегнем пленения вражия.
Не поколебался еси, отче Моисее, врага премногими прилоги, не ужасался еси и возвышения его, стал же, яко столп тверд, во смирение, яко во броня одеяся.
Богородичен: Людие, пойте, Юже воистину рождшую Божие Слово несказанно и пребывшую паки по рождестве Деву нетленну, яко всем предстательство являющую и спасение наше.
Песнь 6.
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Жития сего волнения молитвенными бдении и многими подвиги препобеждая, блаженне, восприял еси со смирением избрание на духовническое послушание, непрестанно со дерзновением вознося молитвы твоя за всех, приносивших чрез тя покаяние, да помилует их Судия Праведный.
Трудов твоих многих воздаяние от Господа прием, отче Моисее, благодатных дарований прозорливости и источник чудес явился еси, недуги душевныя и телесныя отгоняти. Не остави и нас твоея молитвенныя помощи любовию тя почитающих.
Целомудренно совершил еси житие твое, весь в молитве к Богу пламенея, яко земный ангел явился еси, сослужения Ангельскаго в совершении литургии сподобився. Молися преподобне Моисее, да оградит нас Господь святых Ангел ополчением на борющия нас враги.
Богородичен: Видеша Ангели, Богородительнице странно Рождеством Твоим естество тленное рода перстнаго, к нетленному паки притекшее житию и славе Небесней.
Кондак, глас 8:
От юности, преподобне, крест твой взем, Христу последовал еси, в молитвах, пощении, во бдении и злострадании житие твое проходя; темже Всевидящее Око, воззрев на твоя труды, чудесы тя прославляет и воспевати тебе научает: радуйся, отче Моисее, земли Уфимския похвало и молитвенниче о нас предивный.
Песнь 7.
Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Течение жития твоего добре совершил еси, веру соблюд и во всех добродетелех явися непреложен, отче Моисее. Темже откры Господь тебе время преставления твоего и дарова ти трудов твоих воздаяние Царствие Божие.
Знамении величайшими, отче, обогати тя Господь, Егоже ты прославил еси труды твоими, болезньми и воздержанием. Благословен, взывая Бог Отец наших.
Рака мощей твоих, преподобне Моисее, источник показася многих исцелений, к нейже всяк притекая, избавляется всяческих страстей и приемлет утешение и исцеление, тя блажа и взывая: Благословен Бог Отец наших.
Богородичен: Град Твой и люди спасай, Богоневесто, предстательство наше, верою несомненною вопиющие Ти: Благословен, Всечистая, Плод чрева Твоего.
Песнь 8.
Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Житие твое преподобно бысть и кончина блаженна и честна, отче наш Моисее, святых Ангелов собеседниче. Темже и мы вси чтим память твою и прославляем Прославльшаго тя Господа во веки.
Доброты мысленныя наслаждаешися неизреченно, оставль тленное тело твое и видети сподобился еси, яже видят славне Ангельская воинства, поющия и превозносящия Господа во веки.
Яко утро, яко солнце память твоя возсия, отче Моисее, просвещая сердца верных, ты бо Света неизреченнаго явился еси наследник. Темже поминаем твою память блажащих и воспевающих хвалу Господу во веки.
Богородичен: Пречистая Госпоже, Дево Богородице, Покрове и Прибежище наше со преподобным Моисеем вознеси молитвы Твоя ко Господу о всех нас, прославляющих Его и поющих во веки.
Песнь 9.
Ирмос: Бога человеком невозможно видети, на Него же не смеют чини Ангельстии взирати: Тобою же, Всечистая, явися человеком Слово Воплощенно, Егоже величающе, с небесными вои Тя ублажаем.
Яко избраннику Владыки Христа, к тебе, отче Моисее, прибегаем, отягченнии прегрешениями и обуреваемыми страстьми многими: твоими молитвами, преподобне, воздвигни нас от душетленных страстей.
Престолу Владычню предстоя, преподобне, призри на ны, воспевающия тя по достоянию, и приемше наша моления, мир от Христа испроси душам нашим и велию милость.
Сокрушенным сердцем вопием ти, отче Моисее, утешение нам буди в скорбех, присно отгоняя печали от душ наших, да в радости сподобимся с тобою прославляти Владыку всяческих.
Богородичен: Единаго от Троицы Едина Мати бывши, со дерзновением Сыну Твоему молися, спастися от навета вражия, тихость же и спасение получити нам, Тя величающим.
Светилен:
Светоносное Имя Иисусово, возлюбленное и вожделенное тобою от юности, чрез труды и подвиги твоя и удаление мирскаго пристрастия, пресветлым тя светильником содела, поставленном на свещнице церковном. Темже, преподобне Моисее, и наша души мраком греховным покровенныя, озари светом Божественныя любве и на высоту смирения возведи.
Слава, и ныне: Светозарная Божия Палато и Недоуменный Светодавца Престоле, Мати Безневестная, просвети ны светом добродетели, да Образ Божий, помраченный страстьми, паки славою древлею просияет в нас, с верою и любовию Тя воспевающих.