Тропари и кондаки на Страстной седмице

Се Жених грядет в полунощи,/ и блажен раб, егоже обрящет бдяща;/ недостоин же паки, егоже обрящет унывающа./ Блюди убо, душе моя,/ не сном отяготися,/ да не смерти предана будеши,/ и Царствия вне затворишися,/ но воспряни, зовущи:/ Свят, Свят, Свят еси, Боже,/ Богородицею помилуй нас.

Иаков рыдаше Иосифова лишения,/ той же доблий седяше на колеснице, яко царь почитаемы/ египтяныни бо тогда сластем не поработав,/ воспрославляшеся от Ведущаго человеческия сердца,/ и Посылающаго венец нетленный.

Се Жених грядет в полунощи,/ и блажен раб, егоже обрящет бдяща;/ недостоин же паки, егоже обрящет унывающа./ Блюди убо душе моя,/ не сном отяготися,/ да не смерти предана будеши,/ и Царствия вне затворишися,/ но воспряни, зовущи: Свят, Свят, Свят еси, Боже,/ Богородицею помилуй нас.

Час, душе, конца помысливши,/ и посечения смоковницы убоявшися,/ данный тебе талант трудолюбно делай, окаянная,/ бодрствующи и зовущи:/ да не пребудем вне чертога Христова.

Се Жених грядет в полунощи,/ и блажен раб, егоже обрящет бдяща;/ недостоин же паки, егоже обрящет унывающа./ Блюди убо, душе моя,/ не сном отяготися,/ да не смерти предана будеши,/ и Царствия вне затворишися,/ но воспряни, зовущи:/ Свят, Свят, Свят еси, Боже,/ Богородицею помилуй нас.

Паче блудницы, Блаже, беззаконновав,/ слез тучи никакоже Тебе принесох;/ но молчанием моляся, припадаю Ти,/ любовию облобызал пречистей Твои нозе,/ яко оставление мне, яко Владыка, подаши долгов,/ зовущу Ти, Спасе:/ от скверных дел моих избави мя.

Егда славнии ученицы/ на умовении вечери просвещахуся,/ тогда Иуда злочестивый,/ сребролюбием недуговав, омрачашеся,/ и беззаконным судиям Тебе, Праведнаго Судию, предает./ Виждь, имений рачителю,/ сих ради удавление употребивша!/ Бежи, несытыя души,/ Учителю таковая дерзнувшия;/ Иже о всех Благий, Господи, слава Тебе.

Хлеб прием в руце предатель,/ сокровенно тыя простирает,/ и приемлет цену Создавшаго Своима рукама человека,/ и неисправлен пребысть Иуда раб и льстец.

Егда славнии ученицы/ на умовении вечери просвещахуся,/ тогда Иуда злочестивый,/ сребролюбием недуговав, омрачашеся,/ и беззаконным судиям Тебе, Праведнаго Судию, предает./ Виждь, имений рачителю,/ сих ради удавление употребивша!/ Бежи, несытыя души,/ Учителю таковая дерзнувшия;/ Иже о всех Благий, Господи, слава Тебе.

Искупил еси от клятвы законный Честною Твоею Кровию,/ на Кресте пригвоздився и копием прободся;/ безсмертие источил еси человеком,/ Спасе наш, слава Тебе.

Нас ради Распятаго, приидите, вси воспоим,/ Того бо виде Мария на древе, и глаголаше:/ аще и распятие терпиши, Ты еси Сын и Бог Мой.

Благообразный Иосиф,/ с древа снем пречистое Тело Твое,/ плащаницею чистою обвив,/ и вонями, во гробе нове, покрыв, положи.

Егда снизшел еси к смерти, Животе Безсмертный,/ тогда ад умертвил еси блистанием Божества./ Егда же и умершия от преисподних воскресил еси,/ вся силы небесныя взываху:/ Жизнодавче Христе Боже наш, слава Тебе.

Мироносицам женам, при гробе представ, ангел вопияше:/ мира мертвым суть прилична,/ Христос же истления явися чуждь.

Нас ради Распятаго приидите, вси воспоим,/ Того бо виде Мария на древе, и глаголаше:/ аще и распятие терпиши, Ты еси Сын и Бог Мой.

Бездну заключивый, мертв зрится,/ и смирною и плащаницею обвився,/ во гробе полагается, яко смертный, Безсмертный;/ жены же приидоша помазати Его миром,/ плачущия горько и вопиющия:/ сия суббота есть преблагословенная,/ в нейже Христос, уснув, воскреснет тридневен.