Тропари и кондаки воскресные восьми гласов

Камени запечатану от иудеи/ и воином стрегущим Пречистое Тело Твое,/ воскресл еси тридневный, Спасе,/ даруяй мирови жизнь./ Сего ради Силы Небесныя вопияху Ти, Жизнодавче:/ слава воскрешению Твоему, Христе,/ слава Царствию Твоему,/ слава смотрению Твоему, Едине Человеколюбче.

Воскресл еси, яко Бог, из гроба во славе/ и мир совоскресил еси,/ и естество человеческое, яко Бога, воспевает Тя,/ и смерть исчеze;/ Адам же ликует, Владыко;/ Ева ныне от уз избавляема, радуется, зовущи:/ Ты еси иже всем подая, Христе, воскрешение.

Егда снизшел еси к смерти, Животе Безсмертный,/ тогда ад умертвил еси блистанием Божества;/ егда же и умершия от преисподних воскресил еси,/ вся Силы Небесныя взываху:/ Жизнодавче Христе Боже наш, слава Тебе.

Воскресл еси от гроба, Всесильне Спасе;/ и ад видев чудо, ужасеся,/ и мертвии восташа;/ тварь же, видящи, срадуется Тебе,/ и Адам свеселится,/ и мир, Спасе мой, воспевает Тя присно.

Да веселятся небесная,/ да радуются земная,/ яко сотвори державу/ мышцею Своею Господь,/ попра смертию смерть,/ первенец мертвых бысть;/ из чрева адова избави нас/ и подаде мирови велию милость.

Воскресл еси днесь из гроба, Щедре,/ и нас возвел еси от врат смертных;/ днесь Адам ликует, и радуется Ева,/ вкупе же и пророки с патриархи воспевают непрестанно/ Божественную Державу власти Твоея.

Светлую воскрешения проповедь/ от ангела уведевша Господни ученицы/ и прадеднее осуждение отвергша,/ апостолом хвалящася глаголаху:/ испровержеся смерть,/ воскресе Христос Бог,/ даруяй мирови велию милость.

Спас и Избавитель мой/ из гроба, яко Бог, воскреси от уз земнородныя,/ и врата адова сокруши,/ и, яко Владыка, воскресе тридневен.

Собезначальное Слово Отцу и Духови, от Девы рождшееся на спасение наше,/ воспоим, вернии, и поклонимся,/ яко благоволи плотию взыти на крест,/ и смерть претерпети,/ и воскресити умершия/ славным Воскрешением Своим.

Ко аду, Спасе мой, сошел еси,/ и врата сокрушивый яко Всесилен,/ умерших, яко Создатель, совоскресил еси,/ и смерти жало сокрушил еси,/ и Адам от клятвы избавлен бысть, Человеколюбче;/ темже вси зовем:/ спаси нас, Господи.

Ангельския силы на гробе Твоем/ и стрегущия омертвеша,/ и стояше Мария во гробе,/ ищуще Пречистаго Тела Твоего./ Пленил еси ад, не искусився от него;/ сретил еси деву, даруяй живот./ Воскресый из мертвых, Господи, слава Тебе.

Живоначальною дланию/ умершия от мрачных удолий/ Жизнодавец воскресив всех Христос Бог,/ воскрешение подаде человеческому роду:/ есть бо всех Спаситель,/ Воскрешение и Живот, и Бог всех.

Разрушил еси Крестом Твоим смерть,/ отверзл еси разбойнику рай,/ мироносицам плач преложил еси/ и апостолом проповедати повелел еси,/ яко воскресл еси, Христе Боже,/ даруяй мирови велию милость.

Не к тому держава смертная возмогет держати человеки:/ Христос бо сниде, сокрушая и разоряя силы ея;/ связуем бывает ад, пророки согласно радуются,/ предста, глаголюще, Спас сущим в вере:/ изыдите, вернии, в воскрешение.

С высоты снизшел еси, Благоутробне,/ погребение приял еси тридневное,/ да нас свободиши страстеи,/ Животе и Воскрешение наше, Господи, слава Тебе.

Воскрес из гроба, умершия воздвигл еси,/ и Адама воскресил еси, и Ева ликует во Твоем воскрешении,/ и мирстии концы торжествуют/ еже из мертвых востанием Твоим, Многомилостиве.