Тропарь Креста, глас 1:
Спаси, Господи, люди Твоя, / и благослови достояние Твое, / победы на сопротивныя даруя, / и Твое сохраняя Крестом Твоим жительство.
Канон, творение Григория Синаита, глас 4.
Песнь 1.
Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя, / и воспою, радуяся, Тоя чудеса.
Припев: Слава, Господи, Кресту Твоему Честному.
Кресте всесильне, апостолов похвала, / преподобных утверждение, и верных знамение, / и иерархов и мучеников слава, / победа и утверждение всех хвалящих тя.
Кресте всечестный, четвероконечная сила, / апостолов благолепие, и мучеников крепость, / немощных здравие показался еси, / мертвым воскресение, падающим воздвижение.
Слава Отцу, и Сыну, и Святому Духу. Кресте, ты ми сила буди, крепость и держава, / избавитель и предратник на борющия мя, / щит и хранитель, победа и утверждение мое, / присно соблюдая мя и покрывая.
И ныне, и присно, и во веки веков, аминь. На Кресте, Всенепорочная, Твоего Сына яко узрела еси, / оружие скорбное утробу Твою растерза, / и восклицала еси рыдающи в болезни, / но абие прославила еси Креста силу.
Песнь 3.
Ирмос: Твоя песнословцы, Богородице, / живый и независтный источниче, / лик Себе совокупльшия духовно, утверди, / в Божественней Твоей славе / венцев славы сподоби.
Припев: Слава, Господи, Кресту Твоему Честному.
Кресте, преподобных оружие, обоюдный меч Христов, / верных удобрение, болящих исцеление и заступление, / и воздвижение умерших, Всечестне.
Кресте, основание благочестия, / бесом показался еси губитель, Церквам благолепие, / нечестивым погибель, врагом посрамление на день судный.
Слава Отцу, и Сыну, и Святому Духу. Кресте живоносный, / ты ми буди крепость и победа, и щит, / и стена нератуема, бесом отгнание, / и помыслом погашение, и ума моего сохранение.
И ныне, и присно, и во веки веков, аминь. Распятие поносное, Дево Владычице, Твой Сын претерпел есть, и смерть неподобную. / Но вознесся, низверже противныя вражия силы, яко безсмертен.
Господи, помилуй, трижды.
Седален, глас 8.
Проображаше тайне древле Иисус Навин Креста образ, / егда руце простре крестовидне, Спасе мой, / и ста солнце, дондеже враги низложи, противостоящия Ти, Богу; / ныне же зайде, на Кресте Тя зря, / и, державу смертную разрушив, / весь мир совоздвигл еси.
Песнь 4.
Ирмос: Седяй в славе на Престоле Божества, / во облаце легце, / прииде Иисус Пребожественный, / нетленною дланию, и спасе зовущия: / слава, Христе, силе Твоей.
Припев: Слава, Господи, Кресту Твоему Честному.
Четвероконечный сый мир, / и яко триобоюдный меч, начала тьмы сечеши, / нами воображаемь, Кресте, оружие великое Христово, / и непобедимое победительство всесильное.
Твоя высота, Живоносне Кресте, воздушнаго князя биет, / и глубина всея бездны закалает змия, / широту паки воображает, / низлагая мирскаго князя крепостию Твоею.
Слава Отцу, и Сыну, и Святому Духу. Вознесся сопривлекл еси падшия, / воздвигл еси естество земное, / Престолу Божию спрославился еси, Кресте, / высото великая, мирский мосте, / душу мою от страстей глубины вознеси вскоре.
И ныне, и присно, и во веки веков, аминь. Крестообразно, Пречистая Отроковице Богородице, / длани Твои распростерши ко иже на Кресте Воздвиженному, / и молитвы, Дево, ныне принеси, / за всех верно молящихся Тебе.
Песнь 5.
Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем воспевающим Тя / мир подавающая.
Припев: Слава, Господи, Кресту Твоему Честному.
Кресте, небесная лествице святыни, степенем наставниче, / Христова высота и слава еси, / Божий образ назнаменателен миру, / невидимому же и видимому, единочестне.
Кресте, образе неисписанный силою, / освящение водам, очищение воздуху, / освящение и просвещение всякому, мужества знамение, / и Христов скиптр непреложный, противныя в землю попирая.
Слава Отцу, и Сыну, и Святому Духу. Кресте всесильне, / злочестивыя низложи враги, ненавидящия и хулящия тя безумно, / языки попали и угаси шатания их. / О Кресте всесвятый и Христоносный, / сохрани нас державою Твоею.
И ныне, и присно, и во веки веков, аминь. Всех Царице Владычице, скиптром Рождества Твоего / разруши, Девице, востание хулящих крестную силу. / Даждь крепость и очищение, / победу и помощь верным людем Твоим.
Песнь 6
Ирмос: Божественное сие и всечестное / совершающе празднество, / Богомудрии, Богоматере, / приидите, руками восплещим, / от Нея рождшагося Бога славим.
Припев: Слава, Господи, Кресту Твоему Честному.
Кресте всех воскресение, / Крест падших исправление, / страстей умерщвление и плоти пригвождение, / Крест душам слава и свет вечный.
Крест врагов губитель, / Крест злочестивых язва и пленение, и верных держава, / благочестивых хранитель и бесов отгонитель.
Слава Отцу, и Сыну, и Святому Духу. Крест страстей пагуба, / Крест помыслов отгнание, / Крест сокрушение языческо искусительно / и духовом показася ловительство.
И ныне, и присно, и во веки веков, аминь. Крест воздвижется и падают духов воздушных чинове, / Крест снизходит, и нечестивии вси ужасаются, / яко молнию видяще крестную силу.
Господи, помилуй, трижды. Слава Отцу, и Сыну, и Святому Духу, и ныне, и присно, и во веки веков. Аминь.
Кондак, глас 4.
Вознесыйся на Крест волею, / тезоименитому Твоему новому жительству / щедроты Твоя даруй, Христе Боже, / возвесели нас силою Твоею, / победы дая нам на сопостаты, / пособие имущим Твое oружие мира, / непобедимую победу.
Икос:
Иже до третияго Небесе восхищен бысть в рай / и глаголы слышав неизреченныя и Божественныя, / ихже не леть языки [человеческими] глаголати, / что Галатом пишет, яко рачителие Писаний прочтосте и познасте: / мне, глаголет, хвалитися да не будет, токмо во едином Кресте Господни, / на немже, страдав, уби страсти. / Того убо и мы известно держим, Крест Господень, хвалу вси: / есть бо нам спасительное сие Древо / oружие мира, непобедимая победа.
Песнь 7.
Ирмос: Не послужиша твари Богомудрии, / паче Создавшаго, / но огненное прещение мужески поправше, / радовахуся, поюще: / препетый отцев Господь и Бог благословен еси.
Припев: Слава, Господи, Кресту Твоему Честному.
Нераздельную Троицу и неслиянну, / естество единством благословим, / Отца нерожденна, и рожденна Сына, / и Святаго исходительнаго Божественнаго Духа, песньми поюще: / благословен Бог отец наших.
Незаходительными молниями Твоими, Триипостасне, / наша озари умныя очи, / доброту Твою, Трисветне, пресущественную зрети, / яже человеком недоведомая и неприступная Ангелом.
Слава Отцу, и Сыну, и Святому Духу. Лучами света Твоего / падшую мою душу возведи от глубины, / благий Боже, препетый и всесильный, / поползшуюся от света благодатнаго и во тьму воглубльшуюся.
И ныне, и присно, и во веки веков, аминь. Крестообразно простерши руце, Чистая, / к распростершему свои руце на Древе Крестнем, / и вознесшему естество наше, и умертвившему враждебныя полки, / молящи не престай.
Песнь 8.
Ирмос: Отроки благочестивыя в пещи / Рождество Богородично спасло есть, / тогда убо образуемое, / ныне же действуемое, / вселенную всю воздвизает пети Тебе: / Господа пойте дела / и превозносите Его во вся веки.
Припев: Слава, Господи, Кресту Твоему Честному.
Высота Христовых страстей и лук, и оружие, и меч, / оружие непостыдное, и сила непобедимая, / Христово подножие и победительство на враги, / знамения Царствия, скиптре верных, / показался еси, Кресте победоносне.
Воздвигл еси наше падшее естество, Христом распеншимся, совозставив; / высото Божественная, глубино неизглаголанная, / Христово ты еси знамение, Кресте пребогате, и широта безмерная, / и знамение непостижимыя Троицы, жизноносче.
Слава Отцу, и Сыну, и Святому Духу. Устнами, душею же и сердцем Крест Господень лобызающе, / приидите ныне вознесем вси и возвеличим, / покланяющеся рцем вкупе, песнь пречистую, вопиюще: / pадуйся, великое богатство, Кресте, церковное украшение.
И ныне, и присно, и во веки веков, аминь. Древо жизни и спасения, / Древо безсмертия, Древо разума, / Древо трилюбезно, нетленно и неизнуряемо, / Крест трисоставный, честное Древо, / Троицы бо носит Триипостасныя образ.
Песнь 9.
Ирмос: Всяк земнородный / да взыграется, Духом просвещаемь, / да торжествует же Безплотных умов естество, / почитающее священное торжество Богоматере, / и да вопиет: / радуйся, Всеблаженная, / Богородице Чистая Приснодево.
Припев: Слава, Господи, Кресту Твоему Честному.
Кто слышана сотворит, якоже пишется, действия твоя, миролюбезный Кресте, / силы и чудеса, умершим востание; / и мир весь совознесл еси, вознесыйся к Богу многожелаемый.
Утверждение верным Крест треблаженный, / знамение и похвала, Древо всесильное, / Крест Христов великий и совершенный, / апостолом похвала, преподобным утверждение / и мучеником крепость и держава, / верным победа и похвала.
Слава Отцу, и Сыну, и Святому Духу. Радуйся, Кресте, образе неописанный и многоименитый, / Древо требогатное, страшно же и всеблаженно; / радуйся, Кресте всесвятый и всесильный; / радуйся, хранителю жизни нашея, / Господень Кресте многопетый.
И ныне, и присно, и во веки веков, аминь. Кресте Честный, хранитель души и тела буди ми, / образом своим бесы низлагая, враги отгоняя, страсти упраждняя, / и благословение даруя ми, и жизнь и силу, / содействием Святаго Духа, и честными Пречистыя мольбами.
Светилен, глас 2.
Крест хранитель всея вселенныя, / Крест красота Церкве, / Крест царей держава, / Крест верных утверждение, / Крест Ангелов слава и демонов язва.
Слава Отцу, и Сыну, и Святому Духу, и ныне, и присно, и во веки веков. Аминь. Крестобогородичен
У Креста предстоящи, Тя безсеменно Рождшая, / и рыдающи вопияше: / увы, сладчайшее Чадо, / како зашел еси от очию Моею; / како в мертвых вменился еси.
Молитва Честному и Животворящему Кресту:
Господи Иисусе Христе, Сыне Бога живаго, Творче неба и земли, Спасителю мира, се аз, недостойный и паче всех грешнейший, смиренно колена сердца моего пред славою величества Твоего преклоняя, воспеваю и величаю безмерное страдание Твое, и благодарение Тебе, Царю всех и Богу приношу, яко благоизволил еси снити с небеснаго Престола Твоего и воплотитися от Пречистыя Девы Марии, ради спасения человеческаго; безплотен сый, плотское естество Божеству совокупляя; богат сый, волею обнищал еси, да человека во Царствии Твоем обогатиши; труды и всякия человеческия беды, яко человек, на Себе понесл еси, да всем во всяких печалех и нуждах пособствуеши; четыредесять дней постивыйся, всем к воздержанию путь показал еси; множицею от лукавых искушен был еси, всех от искушений всяких избавляя. Вем, всесильный Владыко, яко вся сия Тебе непотребна быша, но человеческаго ради спасения вся претерпел еси: предан был еси за тридесять сребреник, да человека искупиши от лютыя работы вражия; от немилостивых Иудей, яко незлобивый агнец, похищен был еси, род человеческий от поглощения волка мысленнаго исторгая; на судищи пред Анною и Каиафою предстал еси, всех от осуждения огня вечнаго отводя; связан, поруган, оплеван, от ложных свидетелей оклеветан и на поносную смерть осужден, человека от всякия напасти, мучения и от вечныя смерти свобождая; Пилату, никоего зла содеявый, предан был еси и ко Ироду послан, и паки поруган, человека от злаго обстояния и от поруганий вражиих избавляя. Что убо воздам Тебе, Владыко Человеколюбче, о всех, яже претерпел еси мене ради грешнаго? Не вем. Душа бо и тело, и вся благая от Тебе суть, и вся моя Твоя суть, и аз Твой есмь; точию на безчисленное Твое милосердие, благоутробне Господи, надеяся, пою Твое неизреченное долготерпение, величаю неисповедимое смотрение Твое, славлю Твою безмерную милость, имиже преклонился еси мене ради осужденнаго, да аз оправдан буду. К столпу, Спасе, привязан и без милости биен, милостив сый, разреши мя, молюся, от грехов моих; тернием венчан, души моея греховное терние искорени; тростию биен по главе, сокруши главу змия, уязвляющаго мя жалом греха; в багряну ризу оболчен и мучителем предан, просвети ми, Царю Пресвятый, одеяние душевное, да вниду в чертог Твой всекрасный; с разбойники вменен и Крест на раму Своею понесый, разбойника врага, ищущаго душу мою убити, Твоим Крестом прожени. Вем Тя, Иисусе долготерпеливе, люте уязвленнаго; от верху главы Твоея святыя, даже до стопы ножныя, не бе в Тебе места цела. Что же возглаголю о неизреченном человеколюбии Твоем, Христе Спасителю? Точию в сокрушении сердца моего, покланяяся Твоим Пречистым страстем и вселюбезно тыя лобызая, вопию: помилуй мя, грешнаго. На Кресте пригвоздитися изволивый, пригвозди заповедем Твоим сердце мое; воздвижен со Крестом на горе Голгофе, воздвигни мысли моя к небеси, да всегда горняя мудрствую; желчию со оцтом напоен, огорченное ми грехом сердце услади любовию Твоею, и жаждуща напой потоком сладости Твоея; руце Свои пречистеи распрострый на приятие всех, приими мя, грешнаго; нозе пригвождены имевый, хотя всегда со грешники быти, буди со мною, грешным, возбраняя ногам моим от всякаго пути лукаваго; сердце отверсто имевый, яви мне благодать Свою, грешному; главу пресвятую на Кресте преклонивый, услыши недостойныя молитвы моя. О, пречудная и неизмеримая глубино милосердия, Христе Боже, за враги распинатели Своя Богу Отцу моливыйся, даждь и мне, грешному, сию благодать, любити враги моя и молитися за них; разбойнику кающемуся рай отверзый, воззри, Свете мой, на мя, грешнаго, подаждь покаяние и отверзи ми двери милости Твоея, и помяни мя, недостойнаго, во Царствии Твоем. Наконец, духа Своего пресвятаго предавый в руце Богу Отцу, приими, Создателю, дух мой во время кончины моея; со Креста снят и во гробе яко мертв положен, Спасе, живый во свете неприступнем, возьми от мене тяжкое бремя греховное, и не возгнушайся, Человеколюбче, вселитися во гроб сердца моего недостойнаго, на умерщвление моего плотскаго мудрования; яко да не ктому себе, бренное создание Твое, но Тебе, Господеви и Богу моему живый, Твоим, о Всемилостиве, благоутробием, сподоблюся видети Тебе, Создателя и Спасителя моего, за приятие смерти крестныя, славою и честию венчаннаго, во свете неприкосновенныя Твоея славы; идеже со Безначальным Твоим Отцем, и со Пресвятым, и Благим, и Животворящим и Единосущным Твоим Духом царствуеши прежде век, ныне и присно и во веки веков, аминь.
