Кондак 1.
Избраннаго мученика Христова, от востока, яко звезду, возсиявшаго и в Вуненах священно подвизавшагося, венчаем песненными похвалы; во Христа бо облекийся, силою преподобных и мучеников украсился еси, емуже глаголем:
Радуйся, Николае блаженне, мучениче Христов непобедимый и целебниче пречудный.
Икос 1.
Ангельское житие во плоти человечестей пожил еси, Николае, Христов страстотерпче, и яко человек разума Небеснаго показался еси. Сего ради подвигом твоим дивящеся, зовем сице:
Радуйся, яко тобою Бог прославися; радуйся, яко тобою растлитель потребися.
Радуйся, любви Христовой стяжание; радуйся, лести и заблуждений посрамление.
Радуйся, высото постничества, благочестивыя возносящая; радуйся, глубино страдания, враги поражающая.
Радуйся, яко светло от Востока сияеши; радуйся, яко страны Фессалии озаряеши.
Радуйся, преподобных отец единонравный; радуйся, мученик святых единоревностный.
Радуйся, тобою бо умягчаются сердца; радуйся, тобою бо упраздняется злоба.
Радуйся, Николае блаженне, мучениче Христов непобедимый и целебниче пречудный.
Кондак 2.
Страх Господень основанием в души твоей от юности твоея положил еси, треблаженне, имже созидаяся премудро, от начала грядущее предначертал еси, непорочно шествуя заповедями Бога Слова, поя Ему: Аллилуиа.
Икос 2.
Разума твоего богатством царь восхищаяся, на степень воеводы тя возводит, святе Николае; темже многими добродетели ум предводителем противу страстей поставил еси, делы явив истинное звание. Сего ради слышиши ныне:
Радуйся, нравов благочестивых скрижале; радуйся, добродетелей честных вместилище.
Радуйся, глаголов Христовых исполнение; радуйся, ран Его запечатление.
Радуйся, цвете благовонный благолепия душевнаго; радуйся, крине краснейший благодати духовныя.
Радуйся, яко явился еси непобедим во страданиях; радуйся, яко ликовствуеши ныне во славе мучеников.
Радуйся, мудрым светлое уподобление; радуйся, всем верным наслаждение.
Радуйся, сило царей благочестивых; радуйся, копие на врагов неукротимых.
Радуйся, Николае блаженне, мучениче Христов непобедимый и целебниче пречудный.
Кондак 3.
Силу во бранех дивную показуя, мучениче славне, в подвизех священных яко воин Христов несокрушим показался еси, победивый полки невидимаго врага, поя: Аллилуиа.
Икос 3.
Имея жажду к житию благочестивому, аки елень ко источнику водному, на гору Вуненскую возшел еси с любовию, на нейже воды животворныя струи приявый, Николае, божественне оросил еси вопиющих ти таковая:
Радуйся, вся яже в мире красная презревый; радуйся, стопам Спасителевым последовавый.
Радуйся, воинство земное оставивый; радуйся, мужеством непобедимым обогативыйся.
Радуйся, служителю изряднейший Христа, тя призвавшаго; радуйся, благоговейный Его подражателю.
Радуйся, яко на рамена Крест Христов подъял еси; радуйся, яко бремя земное отвергл еси.
Радуйся, преподобных преславное удобрение; радуйся, верных многосветлый светильниче.
Радуйся, цвете безсмертныя благодати; радуйся, богатство присносветлаго сияния.
Радуйся, Николае блаженне, мучениче Христов непобедимый и целебниче пречудный.
Кондак 4.
Бурю страстей разрушивый, благодатию в подвизех безстрастия обогатился еси, заповеди Христовы прилежно исполняя и Ему Единому неленостно работая. Зрящия же усердие твое, Николае, вопияху Богу, тя укрепляющему: Аллилуиа.
Икос 4.
Слышим о тебе, страстотерпче, посреде сподвижников твоих, ихже яви Господь яко звезды светозарныя, на небе церковнем сияющия, с нимиже и ныне моли о нас, почитающих память твою и зовущих сице:
Радуйся, преподобных сияние; радуйся, страстотерпцев славо.
Радуйся, воздержания Божественное обоняние; радуйся, истины непоколебимый столпе.
Радуйся, юн сый телом, мудр же душею; радуйся, обретый измлада добродетели.
Радуйся, яко озаряеши гору Вуненскую; радуйся, яко разгоняеши мглу демонскую.
Радуйся, добрый образе постников; радуйся, подвизающимся светлое зерцало.
Радуйся, Эллады светозарное светило; радуйся, Фессалии священный светильниче.
Радуйся, Николае блаженне, мучениче Христов непобедимый и целебниче пречудный.
Кондак 5.
Видением и деланием душу твою, мучениче, украсивый и струями кровей твоих, яко порфирою, сию облекий, яко невесту непорочну ко Христу привел еси, взывая с верою: Аллилуиа.
Икос 5.
Крепок и неуязвим, яко воин Христов, на нечестивыя явился еси, страстотерпче, всеоружие бо света восприим, варварскую лютость мужески победил еси. Сего ради с любовию зовем ти:
Радуйся, благочестия победо; радуйся, нечестия низложение.
Радуйся, мужества светлое начертание; радуйся, безумия врагов сокрушение.
Радуйся, добродетелей постнических финикс цветущий; радуйся, подвигов мученических кедре несокрушимый.
Радуйся, яко явился еси украшение подвижников; радуйся, яко показался еси омрачение варваров.
Радуйся, Христову силу уяснивый; радуйся, вражию крепость посрамивый.
Радуйся, яко тобою подвижники укрепляются; радуйся, яко тобою вернии помощи Божия сподобляются.
Радуйся, Николае блаженне, мучениче Христов непобедимый и целебниче пречудный.
Кондак 6.
Проповедует Ангел светоносен, с Небесе сошедый, тебе, Ангелу во плоти, и иже с тобою о венцех нетленных, уготованных любящим Господа, на подвиг мученический укрепляя вас, вопиющих Богу единомысленно: Аллилуиа.
Икос 6.
Копием священное твое и многострадальное тело уязвляя, врази лютыя причастна Христовых страстей соделаша тя, святе, имиже обретый безстрастие, страстей избави взывающих:
Радуйся, преподобных споборниче; радуйся, мучеников сподвижниче.
Радуйся, благочестивых пристанище; радуйся, нечестивых поражение.
Радуйся, идолы поправый; радуйся, мучители твоя посрамивый.
Радуйся, яко тело твое за Христа кровию обагрися; радуйся, яко душа твоя ко Господу устремися.
Радуйся, узы и бичевания претерпевый; радуйся, наслаждения нескончаемаго приобщивыйся.
Радуйся, призывающим тя скорый помощниче; радуйся, душевных и телесных недугов врачевателю.
Радуйся, Николае блаженне, мучениче Христов непобедимый и целебниче пречудный.
Кондак 7.
Хотяще бичеванием честное тело твое, богоносе, нечестивии умерщвлению предати, посекаху тя зело; ты же одежды тленныя совлеклся еси, Николае, и в нетления ризу облеклся еси, Богу вопия: Аллилуиа.
Икос 7.
Новый преславный мучениче, токами кровей твоих орошаеши Церковь Христову, яже правды плоды зрелыя плодоносящи, благодать чудес твоих почитает, зовущи ти сице:
Радуйся, Церкви торжествующия украшение; радуйся, Церкви воинствующия укрепление.
Радуйся, Востока отрасле благоцветная; радуйся, Вунен насельниче равноангельный.
Радуйся, яко от юности последовал еси Христу; радуйся, яко уязвил еси врага супостата.
Радуйся, иночествующих световодителю; радуйся, благочестивых руководителю.
Радуйся, жития лучшаго причастниче; радуйся, врага злейшаго посрамление.
Радуйся, тобою бо демони умаляются; радуйся, тобою бо людие светом Христовым озаряются.
Радуйся, Николае блаженне, мучениче Христов непобедимый и целебниче пречудный.
Кондак 8.
Странно бысть неверующим зрети, како ты, святый страдальче, ко древу привязан быв, нещадныя мучения терпеливо переносил еси; темже возвратился еси ко древу жизни вечныя, Господеви поя: Аллилуиа.
Икос 8.
Вся мучения мужественно претерпев, страстотерпче, усечением главы твоея со Христом навеки соединился еси. Сего ради молися о нас, благочестно ти вопиющих:
Радуйся, истины насадителю; радуйся, лести упразднителю.
Радуйся, воине Христов преизрядный; радуйся, благодати Духа Святаго сосуде избранный.
Радуйся, богоносным подвижником славо; радуйся, победоносным мучеником похвало.
Радуйся, яко Фессалию славою чудес твоих озаряеши; радуйся, яко призывающих тя прошения исполняеши.
Радуйся, постничества образе; радуйся, терпения учителю.
Радуйся, врагов безумие низложивый; радуйся, верных чудесы озаривый.
Радуйся, Николае блаженне, мучениче Христов непобедимый и целебниче пречудный.
Кондак 9.
Вся Фессалия, Эллада и иныя страны проповедуют благодать чудес, юже ты от Бога улучил еси: всем бо верою к тебе притекающим подаеши просимое и исцеляеши поющия: Аллилуиа.
Икос 9
Глаголом твоим милостивым Фессалийский правитель доверися, поспеши в Вунену благоговейне, обретше же святыя мощи твоя, мучениче преславне, исцелися от недуга и в веселии возгласи тебе:
Радуйся, крепосте немощных; радуйся, утешение скорбящих.
Радуйся, чудес благодать приемый; радуйся, демонов державу сокрушивый.
Радуйся, яко тяжко болящаго уврачевал еси; радуйся, яко сему здравие чудесне даровал еси.
Радуйся, яко тело твое смотрением Божиим нетленно соблюдеся; радуйся, яко честная глава твоя на исцеление верным дадеся.
Радуйся, унывающих присное ободрение; радуйся, болящих скорое врачевание.
Радуйся, яко тобою от страстей душевных свобождаемся; радуйся, яко тобою от ран телесных исцеляемся.
Радуйся, Николае блаженне, мучениче Христов непобедимый и целебниче пречудный.
Кондак 10.
Тело твое святое, мучениче преславне, нетленно пребывавшее в дубраве Вуненстей, Божественным действом дивно обретеся; ныне же изволением Божиим, яко многоценное сокровище, благодать подает взывающим: Аллилуиа.
Икос 10.
Стена необоримая и заступление Божественное тобою нам дадеся, страстотерпче Николае. Сего ради укрепи нас молитвами твоими, от всякаго обстояния избавляя, вопиющих ти:
Радуйся, радосте Ангелов; радуйся, славо страстотерпцев.
Радуйся, Церкве хранителю крепчайший; радуйся, Фессалии сияние светозарное.
Радуйся, яко мощи твоя нам открыл еси; радуйся, яко исцелений источник нам явил еси.
Радуйся, верою к тебе притекающих помощниче; радуйся, болящих утешителю и целителю.
Радуйся, яко недужным состраждеши; радуйся, яко слезы плачущим изсушаеши.
Радуйся, яко тобою благословение даруется; радуйся, яко тобою злоба умерщвляется.
Радуйся, Николае блаженне, мучениче Христов непобедимый и целебниче пречудный.
Кондак 11.
Воспе твою благодать исцеленный твоим заступлением Евфимиан, и вси вернии, твоя милости улучившии, восхваляют прославльшаго тя Господа, зовуще Ему: Аллилуиа.
Икос 11.
Светозарная память твоя, яко весна радостная мирови показася, и якоже цветами даров твоих облагоухала есть верных собрание, и ныне фимиам нетления источает всем глаголющим ти таковая:
Радуйся, жертва Христова благовонная; радуйся, верных теплое предстательство.
Радуйся, нетления ниво многоцветная; радуйся, христиан пристанище необуреваемое.
Радуйся, благовоние веры и кадило животворное; радуйся, мироварнице духовная благодати Богоначальныя.
Радуйся, яко подаеши всем исцеления; радуйся, яко явился еси всем скорбящим увеселение.
Радуйся, о верных усердный ходатаю; радуйся, пред Богом наш заступниче.
Радуйся, яко радости непрестанныя причащаешися; радуйся, яко жизни вечныя наслаждаешися.
Радуйся, Николае блаженне, мучениче Христов непобедимый и целебниче пречудный.
Кондак 12.
Благодати богатство Небесное стяжавый – честную главу твою – радуется остров Андрос и веселится обитель Николая, святителя Мир Ликийских, яко сокровище многоценное сию хранящая и Спасителю всех Богу вопиющая: Аллилуиа.
Икос 12.
Поющи в вышних со Ангельскими чинми Трисвятую песнь, умоли, Николае, всякия нужды избавити и скорби верою к тебе притекающия и единомысленно ти поющия:
Радуйся, Ангелов сожителю; радуйся, бисере Господень.
Радуйся, богоносных отец равночестный; радуйся, святых подвижников равновенчанный.
Радуйся, преподобный в мученицех и Горних причастниче; радуйся, благодати богоносный подателю.
Радуйся, неизреченных созерцателю; радуйся, в скорбех избавителю.
Радуйся, яко тобою от страстей избавляемся; радуйся, яко тобою света исполняемся.
Радуйся, пред Богом наш верный предстателю; радуйся, всех благочестивых радосте.
Радуйся, Николае блаженне, мучениче Христов непобедимый и целебниче пречудный.
Кондак 13.
ОНиколае мучениче, воине Господень и преподобных славо, от всякаго скорбнаго обстояния и искушений многообразных избави нас, любовию чтущих тя и Троице Живоначальней вопиющих: Аллилуиа.
Этот кондак читается трижды, затем икос 1-й и кондак 1-й.
Икос 1.
Ангельское житие во плоти человечестей пожил еси, Николае, Христов страстотерпче, и яко человек разума Небеснаго показался еси. Сего ради подвигом твоим дивящеся, зовем сице:
Радуйся, яко тобою Бог прославися; радуйся, яко тобою растлитель потребися.
Радуйся, любви Христовой стяжание; радуйся, лести и заблуждений посрамление.
Радуйся, высото постничества, благочестивыя возносящая; радуйся, глубино страдания, враги поражающая.
Радуйся, яко светло от Востока сияеши; радуйся, яко страны Фессалии озаряеши.
Радуйся, преподобных отец единонравный; радуйся, мученик святых единоревностный.
Радуйся, тобою бо умягчаются сердца; радуйся, тобою бо упраздняется злоба.
Радуйся, Николае блаженне, мучениче Христов непобедимый и целебниче пречудный.
Кондак 1.
Избраннаго мученика Христова, от востока, яко звезду, возсиявшаго и в Вуненах священно подвизавшагося, венчаем песненными похвалы; во Христа бо облекийся, силою преподобных и мучеников украсился еси, емуже глаголем:
Радуйся, Николае блаженне, мучениче Христов непобедимый и целебниче пречудный.
Молитва.
Овсеславне мучениче Христов, святе Николае, глаголам Христа Бога всею душею и всем сердцем последовавый и страдальчески равноангельным житием Ему благоугодивый. Всесвятое имя Спасителя паче всякаго имени исповедавый, Его ради кровь свою излиявый и от Него достойно чудес дарованием и силою исцелений прославляемый. Тебе молимся: призри с высоты Небесныя на нас и исполни прошения наша. Не презри, святе, моления нашего, но избави нас от всякия душевныя и телесныя болезни, а наипаче от раковыя язвы, поражающия люди, яко многое дерзновение ко Христу стяжал еси. Благослови твоим молением и благодатию домы наша и дела рук наших, умоли нам улучити от Господа укрепление и здравие, земли плодоносие и всякое изобилие, отжени от нас всякое искушение и всякое действо началозлобника врага, хотящаго погибели нашея, и молися ко Господу Иисусу Христу подати нам прегрешений оставление, даруемое всем в безконечней Его милости, яко Той Благ есть и Человеколюбец. Аминь.
