Память: 5 мая (22 апреля), 28 (15) июня

Глас 4.

Припев: Преподо́бне о́тче на́ш Фео́доре, моли́ Бо́га о на́с.

Пе́снь 1.

Ирмо́с: Наста́вльшему дре́вле Изра́иля, бежа́щаго от рабо́ты фарао́новы, и в пусты́ни пита́вшему, пои́м Изба́вителю, Бо́гу на́шему, я́ко просла́вися.

Богосия́нную тя́ звезду́ мы́сленное Со́лнце тве́рди, прему́дре, церко́вней показа́, лучи́ чуде́с испуща́юща всегда́ и страсте́й мглу́ потребля́юща.

От ма́терних тя́ ложе́сн Творе́ц, преподо́бне, я́коже Иереми́ю пе́рвее, освя́щ, соде́ла сосу́д Ду́ха благопотре́бен, ду́хи отгоня́ща лука́выя, о́тче Фео́доре.

По́том воздержа́ния пла́мень страсте́й погаси́л еси́ и одожде́нием моли́тв струи́ чуде́с источи́л еси́, боле́зней разжже́ние, преподо́бне, погаша́юща я́ве, Фео́доре.

Богоро́дичен: Невозде́ланный Гро́зд от Твоея́ утро́бы процвете́, Де́во Ма́ти, сла́дость источа́я оставле́ния и весе́лие безсме́ртно, Чи́стая, от пия́нства лю́тых объюроде́вшим.

Пе́снь 3.

Ирмо́с: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.

Я́ко чу́дно житие́ твое́, богому́дре, я́ко стра́шна чудеса́, я́ко высо́ко твое́, е́же к Бо́гу, и присвое́ние, и манове́ние, и неукло́нно восхожде́ние, всесла́вне Фео́доре.

Стремле́ние страсте́й возрази́л еси́, преблаже́нне, боле́зненными отда́нии и де́монов лука́вая потреби́л еси́ ловле́ния Пресвята́го Ду́ха кре́постию, Фео́доре.

И́же к честне́й притека́юще ра́це твое́й, от сея́ почерпа́ем исцеле́ний сокро́вища, и чуде́с пучи́ны, и да́р незави́стный, пою́ще тя́, Фео́доре.

Богоро́дичен: Зако́ны естества́ в Тебе́, Де́во, обновля́ются, ражда́еши бо па́че естества́ Соде́теля, па́че сло́ва Влады́ку. Его́же приле́жно моли́ спасти́ ду́ши на́ша.

Седа́лен:

От Бо́га тезоимени́т да́р да́н бы́в челове́ком, на избавле́ние боле́зней мно́гих, вели́ка и ужа́сна сотвори́л еси́ чудеса́, я́зю вся́ку и неду́г исцеля́я и де́монов полки́ отгоня́я сло́вом. Те́мже и досто́йно Христо́ву Це́рковь упа́сл, единожи́тель апо́столов бы́л еси́, святи́телю Фео́доре, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному без се́мене, моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: А́гнца и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.

Пото́к сы́й я́ве, испо́лнен во́д боже́ственных, дарова́ний Ду́ха напоя́еши всю́ Це́рковь, о́тче Фео́доре.

Удави́л еси́ врага́ жи́лами боле́зней твои́х, преблаже́нне, и того́ потреби́л еси́ лука́вая во́инства моли́тв твои́х мече́м, Фео́доре.

Поуча́яся в зако́не Бо́жии, при исхо́дищих воздержа́ния боже́ственное дре́во возрасти́л еси́, благопло́дие дея́ний доброде́тельных принося́, Фео́доре.

Богоро́дичен: Блаже́нна от родо́в все́х показа́лася еси́, Христа́ ро́ждши, блаже́нны содева́ющаго тому́ рабо́тающия, Де́во Ма́ти Чи́стая Влады́чице.

Пе́снь 5.

Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Неусыпа́ющую свещу́ тя́ и све́щник неугаса́ющь Све́т Безле́тный показа́ мра́ком держи́мым страсте́й, Фео́доре, очерне́нием мно́гих грехо́в.

До́бре на стезю́ тя́ наставля́юща му́ченика Гео́ргия от млады́х ногте́й име́л еси́ и сему́ уподо́бился еси́ вся́ким усе́рдием и ко Го́споду, о́тче преподо́бне, любо́вию.

Непоро́чно воздержа́ние, терпе́ние несосу́дно, ве́ру, и наде́жду, и смире́ние, любо́вь же и стоя́ние име́л еси́ па́че челове́ка. Те́мже премно́гую благода́ть обре́л еси́ от Бо́га.

Богоро́дичен: Кропле́нием ми́лости Твоея́ напо́й, Пречи́стая, иста́явшую мою́ мы́сль пла́менем греха́ и уга́сший се́рдца моего́ возжзи́ свети́льник, две́ре Све́та.

Пе́снь 6.

Ирмо́с: Бу́ря мя́ помышле́ний пости́гши, во глубину́ низвлачи́т мя́ безме́рных грехо́в, но Ты́, Упра́вителю Благи́й, предвари́в, упра́ви, я́ко проро́ка, и спаси́ мя.

Печа́ль земны́х оттря́сл еси́ и все́ истощи́л еси́ жела́ние ко Влады́це, наслажда́яся Сего́ добро́тами и истека́ющими отту́ду, о́тче, светлостьми́.

Растопи́л еси́ мра́з грехо́вный, сту́дению напоя́емь, стоя́ посреде́ ве́тренника, я́ко безпло́тен, о́тче, прило́ги претерпе́л еси́ возду́шныя, Боже́ственною согрева́емь благода́тию.

Ра́це твое́й свяще́нней приступа́юще, благово́ния боже́ственнаго ра́зума исполня́емся, святи́телю, смра́да избавля́ющеся страсте́й, любо́вию тя́ чту́щии, чудотво́рче о́тче преподо́бне.

Богоро́дичен: Страсте́й мя́ треволне́ние смуща́ет, глубина́ отча́яния, обурева́ет мое́ се́рдце. Ко́рмчию ро́ждши Христа́, Де́во, и Спа́са, изба́ви мя́ и спаси́ моли́твами Твои́ми.

Конда́к:

Я́ко на о́гненную колесни́цу доброде́тельми, богоно́се, возше́д, восте́кл еси́ на небе́сная жили́ща, я́ко а́нгел, с челове́ки пожи́л еси́ и, я́ко челове́к, со а́нгелы о́крест ликовству́еши. Сего́ ра́ди показа́лся еси́ чуде́с боже́ственное прия́телище, Фео́доре преподо́бне.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Я́ко нело́жен святи́тель, же́ртву безкро́вную прине́сл еси́ ду́хом и страсте́й умерщвле́нием, же́ртву благово́нну, преблаже́нне, тебе́ Влады́це прине́сл еси́ ве́рою.

О́гнь сласте́й воздержа́ния по́том погаси́л еси́ и бездо́ждие земли́ уста́вил еси́ туч пролия́нием, чудотво́рче, я́коже Илия́, небеса́ затворе́на моли́твами твои́ми отверза́я.

Освя́щся от младе́нства, моли́твенною до́блестию непло́дныя сотвори́л еси́ утро́бы многоча́дны, слепы́м по́дал еси́ прозре́ние и хромы́м благотече́ние, Фео́доре треблаже́нне.

Богоро́дичен: Добро́ту Иа́ковлю Тя́ Бо́г избра́, и в Тя́ всели́ся, и Тя́ соблюде́ по рождестве́ Де́ву, я́коже бе́ пре́жде рождества́, Де́во Богороди́тельнице.

Пе́снь 8.

Ирмо́с: Земля́ и вся́, я́же на не́й, мо́ре и вси́ исто́чницы, небеса́ небе́с, све́т и тма́, мра́з и зно́й, сы́нове челове́честии, свяще́нницы, благослови́те Го́спода и превозноси́те Его́ во ве́ки.

На ка́мени терпе́ния утверди́в твоя́ восхожде́ния душе́вная, не победи́лся еси́ прило́ги сопроти́вными, не поколеба́лся еси́ наве́ты вра́жиими, но к высоте́ Боже́ственней восте́кл еси́, о и́же в ве́ре чту́щих тя́ моля́.

Струя́ происхо́дит от ра́ки твоея́ исцеле́ний вся́ких, и омыва́ет скве́рны страсте́й, и гное́ние лю́тых очища́ет, и ве́рных напая́ет, Фео́доре, все́х сердца́, любо́вию чту́щих тя́.

Даро́в Боже́ственных тезоимени́т и таи́нник Христо́в, по́стников добро́та, свяще́нников красота́, чуде́с исто́чник, честна́я мирополо́жница Ду́ха, ны́не да восхва́лится Фео́дор вели́кий.

Богоро́дичен: Свяще́ннии Тя́ проро́ков пропове́дуют гла́си обра́зно: две́рь, и го́ру, и се́нь, зе́млю святу́ю, све́та о́блак, из него́же су́щим во тме́ и се́ни седя́щим возсия́ Со́лнце, Де́во, Христо́с светода́вец.

Пе́снь 9.

Ирмо́с: Я́ко сотвори́ Мне́ вели́чие Си́льный, и свя́то и́мя Его́, и ми́лость Его́ в ро́д и ро́д боя́щимся Его́.

Я́ко у́тро, я́ко де́нь све́тел, тво́й пра́здник яви́ся, просвеща́ющ на́ша сердца́, ве́рно восхваля́ющих честны́я боле́зни твоя́, о́тче Фео́доре.

Собесе́дник а́нгелов, апо́столов, страда́льцев, преподо́бных и пра́ведников бы́в, о́тче, и святи́телей, на небесе́х о на́с Христа́ мо́лиши при́сно.

Де́нь спасе́ния, пра́здник весе́лия яви́ся, стеце́мся, ве́рнии, очи́стивше ду́ши, святи́тель созыва́ет на́с Фео́дор.

Богоро́дичен: Стра́шно Твое́ рождество́, Богоро́дице, Ма́ти Христо́ва, те́мже Тя́ ублажа́ем, Чи́стая, и прославля́ем че́стно, ро́дове родо́в во ве́ки, ами́нь.