Глас 4.

Припев: Слáва Тебé, Гóсподи, Слáва Тебé.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Да облиста́ет до́ле све́т не́бо па́че со́лнца, и земля́ да слы́шит глаго́лы Жива́го Бо́га, сыновство́ преобразу́емаго: Оте́ц бо свиде́тельствует на горе́ Фаво́рстей.

Челове́к зри́мый, но Бо́г кры́емый, на Фаво́р Христо́с восхо́дит, Божества́ зарю́ обнажа́я, е́же па́че со́лнца, сла́вы светлостьми́.

Разу́мно ны́не предгряде́т яви́тися Моисе́ю Христо́с, сла́вы виде́ние показу́я на горе́ Фаво́рстей лице́м к лицу́ нехода́тайственною бесе́дою, ра́дующеся, дне́сь предпра́зднуем.

И́н, трипе́снец, гла́с то́йже.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Се́й предпра́зднственный де́нь соверша́юще, ве́рнии, преображе́ния Христа́, Изба́вителя на́шего, воспле́щим пе́сньми.

Вхо́д пости́гши свята́го преображе́ния Христо́ва, и мы́ облиста́емся Боже́ственными измене́нии, сие́ облобыза́юще.

По ны́нешнем Христо́с дни́, пое́мь ученики́, на го́ру восхо́дит и, та́мо преобра́жся, облиста́ет Божество́м.

Го́ру Фаво́рскую, прииди́те вси́, дости́гше у́мно, Христа́ у́зрим, пред ученики́ Свои́ми стра́шно преобразу́ющася.

Я́ко Дави́д проро́к, вопие́м Ти́: Фаво́рская гора́ и Ермо́н о Твое́м И́мени, Христе́, возра́дуются, в преображе́нии Твое́м.

Го́ру превысо́кую — се́рдце, очище́но от страсте́й, иму́щии, у́зрим Христо́во преображе́ние, просвеща́ющее у́м на́ш.

Тро́ичен: Тро́ицу просла́вим правосла́вно, со Отце́м Сы́на и Ду́ха Свята́го, Еди́но Божество́, Еди́ницу Триипоста́сную.

Богоро́дичен: Ма́терь и Де́ву Тя́ правосла́вно испове́дуем, ве́рнии, неизрече́нно ро́ждшую Христа́ Бо́га на́шего, еди́наго Многоми́лостиваго.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве, венце́в сла́вы сподо́би.

Влады́чествуяй тва́рию все́ю, ви́ден бы́сть, зра́к раба́ прие́м, и́мже Божества́ непристу́пное сия́ние ученико́м показа́л е́сть, я́коже вмеща́ху зре́ти.

На го́ру и́дет облиста́ти сла́вы Со́лнце, Христо́с, и свы́ше сия́ющую денни́цу омрачи́ти све́том, Его́же заря́ми сия́юще, предпра́зднуим дне́сь.

Живота́ ве́чнаго исполня́я глаго́лы, предста́ Христо́с, показу́я в Себе́ ве́щи друго́м разуме́ти, я́коже благоволи́, Оте́ческую сла́ву блиста́ющую.

Богоро́дичен: Все́ мое́ жела́ние к Тебе́ дви́жу, Чи́стая Влады́чице, плотски́х похоте́й мя́ вско́ре премени́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Небе́сный ли́к с земны́ми ра́дуется и предпра́зднует Светода́вца сия́ние, И́же несказа́нно облиста́ет, изменя́я челове́ческий зра́к на Фаво́ре, я́коже благоволи́.

Богочелове́чным прише́ствием челове́ком прибли́жився, чуде́с заре́ю ми́р та́йно просвети́л еси́, блиста́ющеюся же сла́вою Божества́ просия́л еси́ на Фаво́ре непристу́пным Све́том.

Иису́с, Нави́н сы́н, пе́рвее со́лнце уста́ви, прообразу́я де́нь Боже́ственныя стра́сти, Са́м же, Спа́се, пре́жде Честна́го Креста́ Твоего́, сия́ния скры́л еси́ со́лнца заря́ми Боже́ственными лица́ Твоего́.

Богоро́дичен: Равноси́льна, сопресто́льна родила́ еси́ Сло́ва Отцу́ и Ду́ху, Его́же моли́ спасти́ мя́, Пресвята́я Отрокови́це, Присноде́во.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Христу́, ра́дующеся, ве́рно после́дуем: се́ бо и́дет к горе́, ученики́ лу́чшия с Собо́ю веды́й, пред ни́миже непристу́пною добро́тою возсия́в па́че со́лнца, показа́ сла́ву Свою́.

Да просвети́тся дне́сь не́бо светле́йше восхо́дом, е́же к горе́, отону́дуже облиста́ет Христо́с непристу́пным Све́том, со́лнечныя лучи́ сла́вою Божества́ омрача́я, я́ко све́та Пода́тель.

Та́инство показа́ Христо́с ученико́м на Фаво́ре, просия́в па́че зари́ лице́м, оде́ждою же ри́з Свои́х убели́вся све́тло, я́ко сне́г, одева́яйся, я́ко ри́зою, све́том псало́мски.

Богоро́дичен: Сло́во во утро́бе Твое́й, Чи́стая, воплоща́ется, безслове́сных плотски́х страсте́й ми́р избавля́я.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Черто́г сла́вы бу́дущия ра́дости друго́м гото́вя, восхо́дит на го́ру Христо́с, к житию́ Небе́сному от жи́зни, до́лу влеку́щия, возводя́ и́х.

Удивля́я ра́зум Христо́с ученико́в, небе́сное на земли́ сия́ние облиста́, зако́н и проро́ков раболе́пно представля́я нача́льники, и́миже ме́ртвым и живы́м свиде́тельствуется Бо́г.

Свети́льник яви́тися ны́не гряде́т, Христо́с, в те́мнем ме́сте сия́нием Боже́ственнаго блиста́ния, Его́же к сия́нию и́дем, пря́мо лицу́ Его́ ра́дующеся.

Богоро́дичен: Изсуши́вши сады́ зло́бы в Тебе́ прозябе́нием Сло́ва, Ма́ти Чи́стая, из ко́рене души́ моея́ лука́выя мы́сли отсецы́ и насади́ доброде́телей кра́сная, Де́во, прозябе́ния.

Конда́к, гла́с 4.

Боже́ственным дне́сь преображе́нием челове́ческое все́ естество́ просиява́ет боже́ственно, в весе́лии зову́щее: преобразу́ется Христо́с, спаса́яй вся́.

И́кос:

Преображе́нием Боже́ственным зра́к на́ш, и́же дре́вле тле́нием растле́нный во а́довых сокро́вищах пра́отца Ада́ма, дне́сь Зижди́тель из тли́ возведе́, обожа́ет на́ш ра́зум, пребыва́ет же Бо́г вку́пе и Челове́к, естества́ ка́яждо соедине́на нося́ непрело́жна же и неразде́льна. Те́мже ны́не на Фаво́ре несказа́нно сия́ет и из всея́ пло́ти дае́т лучи́ Божества́ Своего́, просвеща́я вопию́щия: преобразу́ется Христо́с, спаса́яй все́х.

Пе́снь 7.

Ирмо́с: Не послужи́ша тва́ри Богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

К преложе́нию от земли́, на высоту́ восходя́щему, учени́к избра́нию после́дуем, Христо́во смотря́юще стра́нное виде́ние. Уди́вльшеся же с ни́ми, возопие́м: Бо́же, благослове́н еси́.

Оскве́рншееся очи́стил еси́ естество́ челове́ческое водо́ю же и огне́м, Твое́ю пло́тию сего́ све́тлость показу́еши, Спа́се, лице́м Твои́м просия́в па́че со́лнца во о́браз бу́дущия сла́вы.

Взы́дем со Христо́м на го́ру святу́ю, возводя́щим Зеведе́евы сы́ны и Петра́ лу́чшаго, и́хже избра́ сла́ве Свое́й свиде́тели, зову́щия: Бо́же, благослове́н еси́.

Богоро́дичен: Но́во родила́ еси́ Отроча́, Его́же роди́ Оте́ц пре́жде ве́к, Богоро́дице Чи́стая. Ему́же вси́ воспева́ем: Бо́же, благослове́н еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Кто́ не удиви́тся, Всецарю́ сла́вы, великоле́пию сла́вы Твоея́, в не́же преобра́жся, показа́л еси́ друго́м Твои́м, Боже́ственными светлостьми́ облиста́в и́х? С ни́миже предпра́зднующих ве́рою уясни́ све́том Твои́м на́с, Тя́ пою́щих.

Высоту́ Небе́снаго жития́ и сла́вы присносу́щныя Боже́ственное сия́ние да́руй рабо́м Твои́м, ны́не предпра́зднующим Твоего́ преображе́ния све́тлое торжество́, в не́же Све́т облиста́я, уясня́еши Тя́ воспева́ющия, Христе́ Светода́вче.

Све́та Пода́тель и Све́т сы́й непристу́пен, Присносу́щне, Пребезнача́льне, одея́йся Све́том, я́коже ри́зою, све́т в ми́ре просия́л еси́, с пло́тию прише́д, и Све́т на горе́ облиста́еши, сла́вы О́тчия показа́в о́браз.

И́н.

Ирмо́с: Царя́ Христа́, Его́же испове́даша плене́ннии о́троцы, в пещи́ глаго́люще ве́лиим гла́сом: вся́ дела́, по́йте Го́спода.

Госпо́дня све́тлаго преображе́ния настоя́щий де́нь облиста́в, ми́рови повелева́ет вопи́ти: вся́ дела́, по́йте и превозноси́те Его́ во ве́ки.

Мы́слию, ве́рнии, прииди́те, по́йдем к горе́ святе́й ви́дети преображе́ние Христо́во всесве́тлое: вся́ бо просвеща́ет, славосло́вящия сие́ во ве́ки.

Дне́сь Христо́ву преображе́нию чи́стым се́рдцем предусре́тение сотвори́м и возопии́м све́тло: вся́ дела́, Го́спода по́йте и превозноси́те Его́ во ве́ки.

Тро́ичен: В Ли́цех Тре́х Еди́ное Божество́ богосло́вим, Отца́ и Сы́на и Ду́ха Пресвята́го, ку́пно, вся́ дела́, по́йте и превозноси́те Его́ во ве́ки.

Богоро́дичен: Царя́ Христа́, Его́же на́м роди́ Де́ва Мари́я и по рождестве́ пребы́вши Де́ва Чиста́, вся́ дела́, по́йте и превозноси́те Его́ во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, не́бо, от земли́ возсия́ющаго ны́не прове́дый, Со́лнца Незаходи́маго, и сла́вою Боже́ственною покры́ти хотя́щаго со́лнечныя све́тлости; земля́ же да лику́ет све́тло, Небе́сною заре́ю и све́тлостию сия́ющи и све́т быва́ющи.

Поя́ Дави́д Твое́ преображе́ние, предвозгласи́: кто́ уподо́бится Тебе́, Го́сподеви, глаго́ля, в сыне́х Бо́жиих? Ты́ бо, прославля́яся в сове́тех святы́х, вели́к яви́лся еси́ су́щим о́крест Тебе́, стра́шен в сла́ве Боже́ственнаго зра́ка.

О, Сло́во Бо́жие, му́дрость, и си́ла, и о́браз Оте́ч! О, Бо́же, разумева́емый ве́рными, и Челове́че познава́емый! Твоего́ преображе́ния на́с сподо́би, соверши́ти све́тлое торжество́, во све́те до́брых де́л сия́ющих.

И́н.

Ирмо́с: Тя́, Неискусобра́чную Богоро́дицу, Небе́сный черто́г, ро́ждшую Нача́льника спасе́ния на́шего, пе́сньми велича́ем.

Се́й первовхо́дный де́нь Твоего́, Христе́, творя́ще пресла́внаго и всесве́тлаго преображе́ния, пе́сньми Тя́ велича́ем.

Усе́рдно, ве́дяще сла́вное преображе́ние Госпо́дне, озари́м духо́вно помышле́ния на́ша, сие́ велича́юще.

До́брым измене́нием изме́ньшеся, Христо́вым преображе́нием, обря́щемся светоявле́нни добродея́нии на́шими, сие́ велича́юще.

Тро́ичен: Тя́, Триипоста́сную Тро́ицу и Неразде́льное Существо́, Отца́ и Сы́на и Ду́ха Свята́го, пе́сньми велича́ем.

Богоро́дичен: Тя́, купину́, ю́же Моисе́й ви́де горя́щую и неопаля́емую, о́гнь прие́мшую Божества́, пе́сньми велича́ем.

Свети́лен.

Не́бо созда́вый и звезда́м све́т вложи́вый, дне́сь на го́ру Фаво́рскую возше́д, освеща́ет ученики́ заре́ю Божества́ Своего́.

Сла́ва, и ны́не: Дне́сь на Фаво́ре Христо́с Све́т облиста́, дне́сь свы́ше шу́м, гла́с Оте́ч, услы́шан бы́сть: Се́й е́сть, вопия́, Сы́н возлю́бленный Мо́й.