Конда́к 1.

Изря́дный Чудотво́рче и благове́стниче Христо́в, все́м раздава́яй от ю́ности своея́ хле́б Жи́зни ве́чныя, о изоби́лии бла́г от тебя́ христиа́не ра́дуются; врази́ же и и́доли язы́ческия сокруша́ются, не мо́гут бо терпе́ти тя́ чудотво́рче Ти́хоне, мы́ же велегла́сно сла́вим тя́:

Ра́дуйся святи́телю о́тче Ти́хоне, сла́вный Амафу́нтский чудотво́рче.

И́кос 1.

А́нгелом ди́вным на земле́ просия́л еси́ от ю́ности пресла́вне Ти́хоне, растя́ умо́м и чте́нием свяще́нных кни́г; са́м же разуме́в о вре́меннем, ве́чное восхоте́в, просла́вил еси́ Бо́га Вы́шняго. Мы́ же, храня́ще па́мять о тебе́, чудотво́рче Ти́хоне, вопие́м ти́:

Ра́дуйся, Ду́хом Бо́жиим просвети́выйся; ра́дуйся, от ю́ности доброде́тельми насади́выйся.

Ра́дуйся, о́трочества просвеще́ние; ра́дуйся, я́ко превозше́л еси́ земно́е тле́ние.

Ра́дуйся, ве́рных досто́йное основа́ние; ра́дуйся, свети́льник воздержа́ния;

Ра́дуйся, ко́рмчие незри́маго вожде́ния; ра́дуйся, Зако́нов Христо́вых в ми́ре утвержде́ние.

Ра́дуйся, я́ко тру́д подъя́л еси́ милосе́рдием; ра́дуйся, поревнова́л еси́ доброде́телем;

Ра́дуйся, покая́нием люботру́дным возвели́чивыйся; ра́дуйся, высото́ю моли́твы возноси́выйся.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 2.

От ю́ности, почти́в смире́нием роди́телей свои́х, у́м сво́й устреми́л еси́ Христу́ Бо́гу, и в це́ркви чте́нием боже́ственных обяза́лся еси́; узре́в же зла́то кни́г духо́вных серде́чными уста́ми взыва́л еси́: Аллилу́иа.

И́кос 2.

Ра́зумом све́тлым обле́клся еси́, преблаже́нне, от ра́нняго роди́телем свои́м угоди́в, иска́л еси́ досто́йная; призре́в на си́рых и убо́гих да́ром накормля́л еси́, милосе́рдие от Го́спода стяжа́в. Мы́ же такова́я удивля́яся ликовству́ем:

Ра́дуйся, ко́рене цвету́щий Све́ту невече́рнему; ра́дуйся, раздава́я хле́бы, уподобля́яся Всеще́дрому.

Ра́дуйся, церко́вных чте́ц умиле́ние; ра́дуйся, пе́нием во хра́ме Бо́жиим украше́ние.

Ра́дуйся, целому́дрия храни́телю; ра́дуйся, умо́м свои́м соде́лавшись небожи́телем.

Ра́дуйся, се́ятелю пра́вды Ева́нгельския; ра́дуйся, неколеби́мый сто́лпе христиа́нския.

Ра́дуйся, о́строва Ки́пра тве́рдое основа́ние; ра́дуйся, торжеству́ет в тебе́ правосла́вие;

Ра́дуйся, лицеме́рия вся́каго гони́телю; ра́дуйся, и́стиннаго уче́ния ве́ры спаси́тельной храни́телю.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 3.

Из ма́лу ле́т свои́х поревнова́в Христу́, сокро́вище духо́вное откры́л еси́ и раздава́я хле́бы бе́дным навле́кл еси́ печа́ль роди́теля своего́. Из у́ст твои́х, блаже́ннее Ти́хоне, диви́лся слу́х отца́: взаймы́ а́з Бо́гу хле́бы да́л еси́, те́м ра́достно взыва́л еси́ ты́ Бо́гу: Аллилу́иа.

И́кос 3.

Вели́кое пшени́цы в жи́тнице наполне́ние предста́ло еси́ роди́телю, глаго́лы твои́ ра́достно помина́л еси́, о чудотво́рче Ти́хоне: даю́щий Бо́гу, стори́цею прии́мет! Те́м оте́ц, прославля́я Бо́га тебе́ воспева́л еси́:

Ра́дуйся, доброде́лания жи́тницу наполня́ющий; ра́дуйся, грехи́ любо́вию облича́ющий.

Ра́дуйся, отце́в печа́льных умире́ние; ра́дуйся, За́поведей Христо́вых исполне́ние.

Ра́дуйся, показа́вый вели́чество Вы́шняго; ра́дуйся, огра́дие преде́лов ни́жняго.

Ра́дуйся, хлебо́в небе́сных накормле́ние; ра́дуйся, к милосе́рдию устремле́ние.

Ра́дуйся, жи́тнице оби́льных чуде́с; ра́дуйся, благоволе́ние Бо́га с небе́с.

Ра́дуйся, глаго́лу му́дрости нело́жному; ра́дуйся, зре́ти сподо́бивыйся сла́ву Бо́жию.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 4.

Ве́рно, соедини́в земна́я небе́сным, от ю́ных ле́т взира́я на духо́вный гла́с и от нача́ла жи́знь свою́ определи́в, дости́гл еси́ сия́ния благочести́вых де́л и доброде́тельнаго жи́тельства. Моли́твами свои́ми благода́ть стяжа́л еси́, и чистото́ю се́рдца угоди́в Бо́гу, си́це взыва́л еси́: Аллилу́иа.

И́кос 4.

Прови́дев Госпо́дь ангелоподо́бное житие́ твое́ во гра́де Амафу́нте, сердца́ люде́й приме́ру благоче́стия твоего́, блаже́нне Ти́хоне, призыва́л еси́. Ве́рнии же, прославля́ющи непостижи́маго Бо́га, умудри́вшаго тя́ и лю́бяще ти́ взыва́ют:

Ра́дуйся, прораста́ющее дре́во во спасе́ние; ра́дуйся, спаси́тельных и́стин уче́ние.

Ра́дуйся, я́ко пти́ца небе́сная земны́м; ра́дуйся, я́ко земна́я сочетава́ется небе́сным.

Ра́дуйся, подая́ приме́ры Вы́шняго; ра́дуйся, поче́т забо́той бли́жняго;

Ра́дуйся, заблу́ждших ко Христу́ приве́дший; ра́дуйся, сло́во спаси́тельное ка́ждому наше́дший.

Ра́дуйся, поро́ки челове́ческия облича́ющий; ра́дуйся, грехи́ лю́таго искореня́ющий.

Ра́дуйся, заре́ христиа́нства, пу́ть к и́стине показу́ющий; ра́дуйся, я́звы духо́вныя врачу́ющий.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 5.

Ра́зум уче́нием Христо́вым умудри́вый, Ти́хоне, благоволи́л еси́ тебе́ Госпо́дь во Амафу́нте, и от свята́го Ме́мнона во диа́кона поста́вил еси́. Ты́ же, поревнова́в служе́нию у престо́ла и до́брых де́л не оставля́л еси́ на лю́дях свои́х, Бо́гу па́ки взыва́я: Аллилу́иа.

И́кос 5.

Равноа́нгельна зри́м тебе́, чудотво́рцем и помо́щником в проше́ниях на́ших, Ти́хоне. Ко всео́бщему жела́нию христиа́н, святы́м Епифа́нием, по блаже́ннейшей кончи́не свята́го Ме́мнона, рукоположе́н еси́ во гра́де Амафу́нте. Служе́нием и духо́вным соверше́нством украси́л еси́ це́рковь свою́, мы́ же ликовству́я взыва́ем:

Ра́дуйся, Пресвяты́я Тро́ицы благове́стниче; ра́дуйся, Воскресе́ния Христа́ пропове́дниче.

Ра́дуйся, Христо́вым Та́йнам служи́телю; ра́дуйся, ересе́й и суеве́рий искорени́телю.

Ра́дуйся, И́стину уста́ми свои́ми прославля́ющий; ра́дуйся, у́м сво́й ве́рою просвеща́ющий.

Ра́дуйся, я́ко прия́л еси́ уста́ духо́вныя; ра́дуйся, кре́пкое основа́ние церко́вное.

Ра́дуйся, Ду́ха Свята́го непоро́чное жили́ще; ра́дуйся, под покро́вом Бо́жией Ма́тери богоуго́дно пожи́вый;

Ра́дуйся, отроко́в назида́ние и до́брое весе́лие; ра́дуйся, ста́рых и немощны́х утеше́ние.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 6.

Истинному́дрие стяжа́л еси́, ева́нгельских слове́с наполня́я жи́тницу, е́же не скрыва́ти себе́ сокро́вища на земли́, окормля́л еси́ ве́си гра́да Амафу́нта. И́дольския ле́сти язы́ческих мудрова́ний облича́л еси́, и де́монов всегуби́тельное сме́рти жа́ло сокруша́л еси́. Мы́ же, дивя́щеся то́ку бла́г от тебе́ исходя́щих, ве́рно возно́сим: Аллилу́иа.

И́кос 6.

Почита́я соверше́нным Бо́га, блаже́нне Ти́хоне, уче́нию Христо́ву лжеу́мныя к христиа́нской ве́ре приводи́л еси́. Твоя́ ступле́ния в преде́лы ка́пищ врази́ терпе́ти не возмого́ша, о́земь и́доли падо́ша, ничи́мже отону́ду же ве́рным не вредо́хом. Благода́рным и победоно́сным же гла́сом такова́я тебе́ возопие́м:

Ра́дуйся, духо́вное води́тельство Ду́хом Святы́м; ра́дуйся, наде́ждо, вспоможе́ние и врачева́ние больны́м.

Ра́дуйся, непристу́пная стено́ любви́ вся́ побежда́яй зла́я; ра́дуйся, неотврати́мая поги́бель супоста́та.

Ра́дуйся, одержи́мых духо́м нечи́стым спасе́ние; ра́дуйся, и́долов ме́рзких пораже́ние;

Ра́дуйся, святи́телю ду́ш помраче́нных; ра́дуйся, хода́таю бла́г от Бо́га неизрече́нных.

Ра́дуйся, Амафу́нтския ве́си сбереже́ние; ра́дуйся, вся́ немощству́ющая от бесо́в охране́ние.

Ра́дуйся, кре́посте целому́дрия и благонра́вия; ра́дуйся, похвало́ ду́ш и́щущих здра́вия.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 7.

Хотя́ язы́ческое поклоне́ние отгна́ти, и́стинному Бо́гу приводя́й хвале́ние, блаже́нне Ти́хоне: лю́ди Ки́прския упа́сл еси́ бесо́вския лжи́ напое́ния. На́с же ве́рныя, изба́ви от сете́й диа́вола: и́дольския ле́сти отжени́, е́реси искорени́, вра́жия наве́ты разори́, да благода́рственно возопии́м Бо́гу: Аллилу́иа.

И́кос 7.

Но́вую показа́ му́дрость, просия́вшую из ю́ных ле́т; непрело́жными стремле́ньми, я́ко дре́во све́ту, Бо́гу угоди́л еси́. Богоблагода́тная восприня́в, духо́вная взыску́я, Ти́хоне, не могу́ще на тя́ зре́ти, и́доли падо́ша. Мы́ же, внима́я ди́вная, вопие́м:

Ра́дуйся, пра́вды Бо́жия кре́пкое огражде́ние; ра́дуйся, ве́рных щи́т от лука́ваго ловле́ния.

Ра́дуйся, ги́бнущих хотя́й спасти́ся; ра́дуйся, све́том пра́ведным лице́ твое́ просвети́ся.

Ра́дуйся, обраще́ние заблужде́ний язы́ческия; ра́дуйся, уче́нием Христо́вым побежда́яй ерети́ческия.

Ра́дуйся, суеве́рий сумни́тельное слы́шание; ра́дуйся, словеса́ми чи́стыми обличи́ся ни́зшая.

Ра́дуйся, о́гнь страсте́й потребля́ющий; ра́дуйся, преле́стника хитрослове́снаго облича́ющий.

Ра́дуйся, две́ре приводя́щая во спасе́ние; ра́дуйся, до́жде моли́твенному ороше́ние.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 8.

Стра́нное жи́тельство твое́ ви́деша язы́ки но́вы, во слу́х ева́нгельское внима́ли еси́, грехо́вное стрясе́ и отпаде́ от си́лы вра́жия, благода́тная восприня́ли еси́. Растя́ сокро́вища Христо́ва ста́да, от ко́злищ отвраща́я, и ны́не не оставля́еши свои́х, да исто́ргнув велиа́ра дре́вняго, свобо́дно воспое́м: Аллилу́иа.

И́кос 8.

Дре́вом пита́тельным, лозо́й и́стины израсти́л еси́ плоды́ духо́вныя, виногра́дарем стра́нным показа́лся еси́; малове́рныя собра́л еси́ и напои́л еси́ Сло́вом жи́зни. Я́ко ве́тви изсо́хшия во́днаго напое́ния одожди́в, ожи́ли еси́, сего́ ра́ди и на́ша моле́ния оживи́, си́це и мы́ велегла́сно возопие́м:

Ра́дуйся, лозо́ неувяда́емаго дре́ва; ра́дуйся, лучу́ неме́ркнущего све́та.

Ра́дуйся, наде́ждо до кра́йняго отпа́вших не оставля́ющая; ра́дуйся, ве́ро ше́ствующих в Го́рняя не теря́ющая.

Ра́дуйся, па́стырю слове́сных ове́ц; ра́дуйся, пропове́дниче душеспаси́тельных слове́с.

Ра́дуйся, прораста́ние благогове́ния серде́чнаго; ра́дуйся, прия́телище ве́чнаго.

Ра́дуйся, насади́телю прозябе́ния жи́зни; ра́дуйся, одожди́телю процвете́ния ми́лости.

Ра́дуйся, плодо́в спаси́тельных удобре́ние; ра́дуйся, о́браз воздержа́ние и ве́рным окормле́ние.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 9.

Вся́кому ро́ду на удивле́ние: отрожде́нным лоза́м виногра́да яви́л еси́ жи́зненное, чудотво́рче Ти́хоне, вдохну́в изсо́хшим и процвете́. Те́м у́бо дыха́ние Зижди́теля кольми́ па́че и отторже́ние Его́, мы́ же, богоподо́бие прия́т, со стра́хом Бо́жиим пое́м, я́ко Бо́г слы́шит: Аллилу́иа.

И́кос 9.

Вети́я многовеща́нныя и суему́дрыя, не мо́гут провещава́ти мно́гое чуде́с источе́ния, я́ко не таковы́ми уста́ми излива́ются, но я́ко име́яй Ти́хоне, о́браз Христа́ Бо́га на́шего, наполня́ющаго вся́; вся́ же благода́рственно вопию́т:

Ра́дуйся, ско́рое у престо́ла Бо́жия хода́тайство; ра́дуйся, пред Свято́ю Тро́ицею предста́тельство.

Ра́дуйся, взыска́телю поро́чнаго жи́тельства; ра́дуйся, корыстолю́бия стро́гий укори́телю.

Ра́дуйся, свято́й Трапе́зы моли́твенный предстоя́телю; ра́дуйся, и́щущих Жива́го Хле́ба пита́телю.

Ра́дуйся, утае́нных грехо́в изобличе́ние; ра́дуйся, си́рых и убо́гих не оставля́я окормле́ние.

Ра́дуйся, му́дрый и ве́рный жи́зни строи́телю; ра́дуйся, Бо́гом поста́вленный святи́телю;

Ра́дуйся, дая́телю во́время житоме́рие; ра́дуйся, блаже́нне, Бо́жие испо́лнив наставле́ние.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 10.

Спасти́ хотя́й ве́рныя живу́щия о́крест, от пра́вд челове́ческих ко И́стине Боже́ственней улуча́яй, к Еди́ному приводя́й Влады́ке и Бо́гу на́шему, я́ко мно́гие плоды́ виногра́да твоего́ ожи́вшие, Ти́хоне, во еди́ный сосу́д влива́ются и до́брым вино́ быва́ет. Свяще́нницы на се́м служа́ше и лю́дие в весе́лии превозно́сят ти́: Аллилу́иа.

И́кос 10.

Стена́ еси́ доброде́телей ча́дом, преблаже́нне Ти́хоне, и все́м к тебе́ прибега́ющим: и́бо му́дрый распоряди́тель Бо́жиего показа́лся еси́. Сего́ ра́ди, чудоде́йственному о на́с Бо́гу хода́тайству ве́рно вопие́м:

Ра́дуйся, пала́то Бо́гу благодаре́ний; ра́дуйся, покро́ве хра́мовых строе́ний.

Ра́дуйся, немы́слимых чудотворе́ний осмысле́ние; ра́дуйся, рассла́бленным и прокаже́нным исцеле́ние.

Ра́дуйся, реко́ чуде́с неисчерпа́емых; ра́дуйся, успокое́ние обурева́емых.

Ра́дуйся, подви́жниче Бо́гу ре́вностное рве́ние; ра́дуйся, любве́ неумолка́емое пе́ние.

Ра́дуйся, го́рдым ка́мением дре́во смире́ния; ра́дуйся, гне́вному льду́ о́гнь всепроще́ния.

Ра́дуйся, огню́ коры́сти ре́ки ми́лости; ра́дуйся, спу́тниче доброде́тельной бли́зости.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 11.

Пе́ние умиле́нное, приноси́мое ны́не, из у́ст хвале́бная источа́ет тебе́, Ти́хоне: па́че мно́гих угоди́л еси́ Живонача́льней Тро́ице и к Не́й ве́рою уясни́л еси́ равночи́сленная бо песка́ лю́дие; ны́не же на́с, наставля́я Бо́гу пе́ти в Тро́ице Еди́ней: Аллилу́иа.

И́кос 11.

Светоза́рную лампа́ду возже́гл еси́ Бо́г на о́строве Ки́пре, тебе́, святи́телю Ти́хоне, своего́ свети́льника не убра́в под спу́д, но я́ко Све́т Христо́в просвеща́ет все́х, возне́сл еси́, озаря́ясь же блиста́ньми зове́м ти́ такова́я:

Ра́дуйся, освеще́ние во тьме́ блужда́ющих; ра́дуйся, просвеще́ние грехи́ искореня́ющих.

Ра́дуйся, сете́й бесо́вских свободи́телю; ра́дуйся, пле́на велиа́рова разруши́телю.

Ра́дуйся, чистоты́ и целому́дрия селе́ние; ра́дуйся, и́стины Бо́жией победоно́сное весе́лие;

Ра́дуйся, па́дших во грехи́ умы́тно возставля́ющий; ра́дуйся, любо́вию ко Христу́ все́х направля́ющий.

Ра́дуйся, правосла́внаго Симво́ла ве́ры пою́щий; ра́дуйся, во Христа́ о́браза живу́щий;

Ра́дуйся, суеве́рных толкова́ний отсече́ние; ра́дуйся, и́щущих Бо́га нахожде́ние.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 12.

Благода́ть да́ти хотя́й все́м, и е́млющий ея́ пред престо́лом Бо́жиим дерзнове́нно, Ти́хоне: моля́щимся и помазу́ющимся во и́мя твое́, пода́вый прося́й. Све́та бо, я́ко служи́теля, на́с утвержда́еши вопию́щия: Аллилу́иа.

И́кос 12.

Пою́ще твое́ к Бо́гу успе́ние, я́ко предузна́л еси́ отше́ствие свое́, святи́телю Ти́хоне, почита́ем блаже́нную па́мять твою́. И ны́не явля́еши по́мощь свою́ лю́дям отча́янным: тече́нием во́д открыва́еши исто́чницы, исцеля́ху бо ся́ вся́кая пло́ть, тебе́ слу́шает Госпо́дь, тебе́ трепе́щут де́мони; мы́ же, торжеству́юще ти́ с любо́вию пое́м:

Ра́дуйся, ме́ртвыя и сухи́я воскреша́ющий; ра́дуйся, исто́чницы вода́ми жи́зни наполня́ющий.

Ра́дуйся, отча́янных спасе́ние; ра́дуйся, на гно́ищих и стру́пех исцеле́ние.

Ра́дуйся, блиста́ние Триеди́наго Све́та; ра́дуйся, наде́ждо благочести́ваго сове́та.

Ра́дуйся, конца́ жи́зни хотя́щих претыка́ние; ра́дуйся, у́мыслов злы́х изгна́ние.

Ра́дуйся, ве́ро на тя́ упова́ющих; ра́дуйся, наде́ждо тя́ призыва́ющих.

Ра́дуйся, любо́вь на все́х явля́ющий; ра́дуйся, во о́браз твоея́ ико́ны тя́ лобыза́ющих.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 13.

О,святи́телю Христо́в, блаже́нне о́тче на́ш Ти́хоне! Приими́ хвале́бныя пе́ния на́ши с любо́вию тебе́ возноси́мыя, при́зри с высоты́ небе́сныя на ны́, до́лу пове́рженныя немощны́я проше́ния на́ши и умоли́ Го́спода Бо́га на́шего, дабы́ оскудева́ющая восполня́я и мы́ име́ли ве́ру тве́рду, изба́витися на́м го́рькаго запале́ния рабо́ты вра́жия, и сподо́битися с тобо́ю, и со все́ми святы́ми пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом ди́вным на земле́ просия́л еси́ от ю́ности пресла́вне Ти́хоне, растя́ умо́м и чте́нием свяще́нных кни́г; са́м же разуме́в о вре́меннем, ве́чное восхоте́в, просла́вил еси́ Бо́га Вы́шняго. Мы́ же, храня́ще па́мять о тебе́, чудотво́рче Ти́хоне, вопие́м ти́:

Ра́дуйся, Ду́хом Бо́жиим просвети́выйся; ра́дуйся, от ю́ности доброде́тельми насади́выйся.

Ра́дуйся, о́трочества просвеще́ние; ра́дуйся, я́ко превозше́л еси́ земно́е тле́ние.

Ра́дуйся, ве́рных досто́йное основа́ние; ра́дуйся, свети́льник воздержа́ния;

Ра́дуйся, ко́рмчие незри́маго вожде́ния; ра́дуйся, Зако́нов Христо́вых в ми́ре утвержде́ние.

Ра́дуйся, я́ко тру́д подъя́л еси́ милосе́рдием; ра́дуйся, поревнова́л еси́ доброде́телем;

Ра́дуйся, покая́нием люботру́дным возвели́чивыйся; ра́дуйся, высото́ю моли́твы возноси́выйся.

Ра́дуйся святи́телю о́тче Ти́хоне, сла́вный Амафу́нтский чудотво́рче.

Конда́к 1.

Изря́дный Чудотво́рче и благове́стниче Христо́в, все́м раздава́яй от ю́ности своея́ хле́б Жи́зни ве́чныя, о изоби́лии бла́г от тебя́ христиа́не ра́дуются; врази́ же и и́доли язы́ческия сокруша́ются, не мо́гут бо терпе́ти тя́ чудотво́рче Ти́хоне, мы́ же велегла́сно сла́вим тя́:

Ра́дуйся святи́телю о́тче Ти́хоне, сла́вный Амафу́нтский чудотво́рче.

Моли́тва.

Освяти́телю Христо́в, блаже́нне о́тче на́ш Ти́хоне, скоропредста́тельный помо́щниче и ве́рных засту́пниче, немощны́м предста́телю, больны́х целе́бниче и спаси́тельный моли́твенниче!

Потщи́ся на моле́ние на́ше немощно́е, умоли́ Христа́ Го́спода Бо́га на́шего обрати́ти вся́кий гне́в на ны́, и на страну́ на́шу, по науще́нию диа́вольскому, дви́жимый; свои́ми моли́твами ко Благо́му напра́ви, вражду́ющия умири́, огради́ христиа́н от мирска́го мяте́жа, наше́ствия иноплеме́нников и междоусо́бныя бра́ни, от гла́да, тру́са, пото́па, огня́, меча́ и внеза́пныя сме́рти.

Изба́ви на́с ги́бнути бла́та недре́млящаго и губи́тельнаго зми́я, ти́ной грехо́вней опу́танных; изба́ви на́с страстьми́ увя́знувших в тряси́не диа́вольскаго обольще́ния и ме́рзостней не́чисти греха́, во тьму́ бесо́вскую сполза́ющих. Го́рьких де́л яви́ наде́жду исправле́ния, еле́ем ве́ры возпыла́й ду́ши на́ша, огне́м благода́ти угаса́ющих, свое́й любо́вию любо́вь на́шу напра́ви неколеби́мо к Триеди́ному Бо́гу, Живонача́льней Тро́ице пева́емей: Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.