Кондак 1.

Избра́нный святи́телю Госпо́день, испове́дниче и му́чениче Христо́в, / ве́рою и любо́вию до конца́ Влады́це своему́ послужи́вый, / по́двиги мно́ги соверши́в, страда́ния ве́лия за Христа́ му́жественне претерпе́вый, / ли́ку небе́сному страстоте́рпцев росси́йских благоче́стно совокупи́выйся, / заступа́й нас моли́твами твои́ми, досточу́дне, да велегла́сно вопие́м ти:

Ра́дуйся, священному́чениче Пе́тре, архипа́стырю Солове́цкий.

Икос 1.

А́нгельски над ми́ром мяте́жным к высоте́ небе́сней возлете́л еси́ крила́ми богода́нными, святи́телю о́тче Пе́тре, херуви́мски созерца́я бе́здну милосе́рдия Бо́жия, серафи́мскою любо́вию пыла́я ко своему́ Созда́телю, прославля́л еси́ Того́ глаго́лом вдохнове́нным. Те́мже и от нас приими́ благода́рныя любве́ воздая́ния, да ра́дующимся се́рдцем и умиле́нною душе́ю воспева́ем ти:

Ра́дуйся, пла́менем Боже́ственныя любве́ от ю́ности возжже́нный:

Ра́дуйся, мно́гими доброде́тельми от мла́дости украше́нный.

Ра́дуйся, о́трасле до́брая ко́рене благочести́ваго:

Ра́дуйся, сы́не сла́вный Оте́чества многотерпели́ваго.

Ра́дуйся, любо́вию Христо́вою неотсту́пно назира́емый:

Ра́дуйся, во благонра́вии то́ю му́дре соблюда́емый.

Ра́дуйся, вла́стию Госпо́днею на путь свяще́ннаго служе́ния наста́вленный:

Ра́дуйся, десни́цею Вы́шняго в Ца́рство Небе́сное упра́вленный.

Ра́дуйся, священному́чениче Пе́тре, архипа́стырю Солове́цкий.

Кондак 2.

Ви́дя Госпо́дь ве́лию ве́ру и усе́рдие твое́ к Нему́, я́ко измла́да прилежа́л еси́ божественней службе и вся́кому благоче́стию, о́бразом а́нгельским почти́ тя, и на служе́ние Свое́ поста́ви. Ты же по́двиг сей до́блественне соверша́л еси́, вы́ну воспева́я благода́телю Бо́гу: Аллилу́иа.

Икос 2.

Ра́зумом богопросвеще́нным в позна́нии и́стины преуспева́л еси́, достоблаже́нне, му́дростию духо́вною обогаща́яся, исполня́яся кре́пости боже́ственныя, доброде́тели ева́нгельския невозвра́тно души́ свое́й присвоя́я. Те́мже мы, покланя́ющеся милосе́рдному Бо́гу, таковы́ ди́вны сокро́вища тебе́ дарова́вшему, во умиле́нии глаго́лем ти:

Ра́дуйся, благода́тию Бо́жиею освяще́нный:

Ра́дуйся, прему́дрости Того́ всеще́дро науче́нный.

Ра́дуйся, ра́зум свят смире́нием твои́м стяжа́вый:

Ра́дуйся, да́нная ти Го́сподем стори́цею Тому́ возда́вый.

Ра́дуйся, ко а́нгельскому чи́ну от ю́ности причте́нный:

Ра́дуйся, во и́мя апо́стола Петра́ во и́ночестве нарече́нный.

Ра́дуйся, по́двигом о́наго о Го́споде поревнова́вый:

Ра́дуйся, путь ско́рбный и сла́достный страда́ний о Христе́ избра́вый.

Ра́дуйся, священному́чениче Пе́тре, архипа́стырю Солове́цкий.

Кондак 3.

Си́ле духо́вней, от тебе́ исходя́щей, диви́шася лю́дие, па́стыря до́браго и милосе́рдаго уте́шителя тя обре́тше: лю́бовию твое́ю согрева́еми, к тебе́ благодаре́нием простира́хуся, ра́достию воспева́юще Бо́гу: Аллилу́иа.

Икос 3.

Име́я се́рдце, ве́лия ве́ры ко Го́споду испо́лнено, трепе́щуще слове́с Боже́ственных, досто́ин показа́лся еси́, о́тче Пе́тре, са́на архиере́йскаго: во́ньже и возведе́ тя сердцеве́дец Бог, вла́стию и благода́тию святи́тельскою облека́я тя. Те́мже покланя́ющеся досто́инству и дарова́нием твои́м, от Бо́га су́щим, пое́м ти такова́я:

Ра́дуйся, зо́ву Боже́ственнаго Учи́теля ра́достию повинова́выйся:

Ра́дуйся, о сла́ве Его́ Небе́сней ду́хом разгора́выйся.

Ра́дуйся, ко служе́нию святи́тельскому ду́шу свою́ угото́вивый:

Ра́дуйся, себе́ апо́столу первоверхо́вному ре́вностию по Бо́зе уподо́бивый.

Ра́дуйся, сла́дость слове́с Госпо́дних в се́рдце всегда́ храни́вый:

Ра́дуйся, и́гу благо́му Христо́ву вы́ю свою́ подклони́вый.

Ра́дуйся, благода́ть архипа́стырскую от десни́цы Ти́хона Первосвяти́теля росси́йскаго прие́мый:

Ра́дуйся, я́коже и той, по́двиг испове́дничества и му́ченичества на рамена́ свои́ подъе́мый.

Ра́дуйся, священному́чениче Пе́тре, архипа́стырю Солове́цкий.

Кондак 4.

Бу́ря беззако́ний поколеба́ Держа́ву Росси́йскую в годи́ну испыта́ний лю́тых, за грехи́ на́ша нам от Бо́га попуща́емых: зло́ба и уны́ние, скорбь и рыда́ния испо́лниша многострада́льное оте́чество на́ше. Тобо́ю же, святи́телю, и тебе́ единонра́вными, Це́рковь Ру́сская от поги́бели изба́вися, и враты́ а́довыми не одоле́на сохрани́ся. Лю́дие же, ви́дяще непоколеби́му ве́ру твою́, и свети́льник твой при́сно горя́щь, воспева́ху Бо́гу: Аллилу́иа.

Икос 4.

Слы́шав непреста́нно глас Бо́жий в се́рдце твое́м, ко испове́данию и́стины и пасе́нию ове́ц Христо́вых призыва́ющий, слуга́ Госпо́день ве́рен и безстра́шен яви́лся еси́: гоне́ний и преще́ний вра́жиих не убоя́вся, до конца́ святи́тельское и па́стырское служе́ние исполня́л еси́, достоблаже́нне Пе́тре. Тем покланя́ющеся ве́личию души́ твоея́, во умиле́нии глаго́лем ти:

Ра́дуйся, о́гненный сто́лпе, во мра́це безбо́жия све́тло сия́яй:

Ра́дуйся, ка́меню ве́ры Христо́вы, в не́йже па́ству росси́йскую утвержда́яй.

Ра́дуйся, от раздира́ния и разоре́ния Ру́сскую Це́рковь храни́вый:

Ра́дуйся, мно́гия во́лны мяте́жа церко́внаго си́лою ду́ха твоего́ укроти́вый.

Ра́дуйся, к слу́жбе боже́ственней любо́вь ве́лию и ре́вность име́вый:

Ра́дуйся, ио́ты еди́ныя в ней николи́же презре́вый.

Ра́дуйся, уста́ва церко́внаго стро́гий блюсти́телю:

Ра́дуйся, Бо́жиих дел соверши́телю.

Ра́дуйся, священному́чениче Пе́тре, архипа́стырю Солове́цкий.

Кондак 5.

Богоизбра́нный во́ине Христо́в, ору́жием ве́ры и о́гненным мече́м слове́с Боже́ственных посека́л еси́ вся́кое нече́стие, разруша́л еси́ ко́зни вра́жия, защища́я достоя́ние церко́вное, сохраня́я от паде́ния правосла́вную святы́ню: Бо́гу же, вспомощству́ющу тебе́ и на брань святу́ю вдохновля́ющу, воспева́л еси́ вы́ну: Аллилу́иа.

Икос 5.

Ви́девше враги́ ро́да Христиа́нскаго тя и́стинна побо́рника ве́ры оте́ц на́ших, и Це́ркве Правосла́вныя защи́тителя, боле́зньми и скорбьми́ лю́те уязвля́ху тя, погуби́ти тща́щеся. Ты же я́ко святы́й Па́вел, не моги́й не пропове́дати Христа́, и во у́зах сый, воздвиза́л еси́ благовеству́ющий глас твой, уловля́я ду́ши во спасе́ние. Сего́ ра́ди песносло́вим твоя́ по́двиги, любо́вию Христо́вою содева́емыя, и прино́сим ти хвале́ния сицева́я:

Ра́дуйся, мно́ги ско́рби, изгна́ние и заточе́ние претерпе́вый:

Ра́дуйся, вре́менныя жи́зни поко́й пра́вды Бо́жия ра́ди презре́вый.

Ра́дуйся, и́стинную ра́дость во страда́ниих о Го́споде обрета́вый:

Ра́дуйся, си́ми страда́нии в по́двизе Христо́вы любве́ возраста́вый.

Ра́дуйся, у́зником и стра́жем темни́чным отра́да и утеше́ние бы́вый:

Ра́дуйся, о́браз терпе́ния и себе́ отрече́ния до́блественне яви́вый.

Ра́дуйся, сокро́вища се́рдца своего́ лю́дем откры́ти гото́вый:

Ра́дуйся, си́лою любве́ твоея́ мно́гих обрати́вый ко и́стинней ве́ре Христо́вой.

Ра́дуйся, священному́чениче Пе́тре, архипа́стырю Солове́цкий.

Кондак 6.

Пропове́дует Це́рковь Росси́йская благода́рною па́мятию христиа́н правосла́вных вели́чие доброде́телей и по́двигов твои́х, святи́телю Пе́тре, да́ры любве́ своея́ тебе́ принося́щи: Бо́гу же, дарова́вшему нам тебе́, па́стыря ди́внаго, пою́щи: Аллилу́иа.

Икос 6.

Возсия́ тобо́ю сла́ва по́двига святи́тельскаго, и́стинный служи́телю Христо́в, свяще́нне Пе́тре: иде́же бо тружда́лся еси́ на ни́ве духо́вней, всю́ду чу́дная дела́ соверша́л еси́, до́брую па́мять о себе́ оставля́я. Тем воспева́юще благода́теля твоего́ Бо́га, во умиле́нии глаго́лем ти:

Ра́дуйся, пра́вило ве́ры, и благоче́стия о́бразе всесоверше́нный:

Ра́дуйся, пла́меню, благода́тию Боже́ственнаго Ду́ха возжже́нный.

Ра́дуйся, земли́ Нижегоро́дския и Тферски́я похвало́, и Воро́нежския це́ркве отра́до:

Ра́дуйся, всея́ Росси́йския страны́ неугаси́мая лампа́до.

Ра́дуйся, гла́се, в пусты́ни безбо́жия о Бо́зе вопия́й:

Ра́дуйся, путеводи́телю, сквозе́ те́рние и волчцы́ к земли́ обетова́ния преводя́й.

Ра́дуйся, ти́хий свет любве́ на всех оби́льно излива́яй:

Ра́дуйся, мно́жество люде́й о́крест себе́ спаса́яй.

Ра́дуйся, священному́чениче Пе́тре, архипа́стырю Солове́цкий.

Кондак 7.

Хотя́ спасти́ Це́рковь Ру́сскую от раско́ла и ере́сей, и изба́вити от отча́яния лю́ди, в пучи́не зло́бы сатани́нския пребыва́ющия, вся си́лы своя́ прило́жил еси́ к тому́, прему́дре Пе́тре, непреста́нно Го́споду служа́ и Того́ пропове́дуя. Тем мно́зи воспря́нуша тобо́ю к Бо́гу, воспева́юще Ему́ ра́достию: Аллилу́иа.

Икос 7.

Но́ваго тя испове́дника и му́ченика Христо́ва позна́ вели́кая многострада́льная Росси́а, ра́нами безчи́сленными изъя́звленная, кро́вию му́ченическою оби́льно напое́нная, увенча́нная сла́вою мно́жества святы́х свои́х. Почита́юще тя я́ко еди́наго от сих досто́йнейших и сла́внейших сыно́в росси́йских, пе́ние хвале́бное прино́сим ти:

Ра́дуйся, святи́телю, Христа́ безстра́шно испове́давый:

Ра́дуйся, боя́зни и стра́ха челове́ческа не ве́давый.

Ра́дуйся, па́стырю, ду́шу за о́вцы твоя́ полага́вый:

Ра́дуйся, нае́мником лука́вым па́ствы твоея́ расхи́тити не да́вый.

Ра́дуйся, святы́ню Це́ркве Правосла́вныя ре́вностно храни́вый:

Ра́дуйся, враго́в ея́ тем в тре́пет приводи́вый.

Ра́дуйся, к кончи́не жития́ твоего́ му́ченичестей всеце́ло угото́вивыйся:

Ра́дуйся, прия́ти ту всера́достне сподо́бивыйся.

Ра́дуйся, священному́чениче Пе́тре, архипа́стырю Солове́цкий.

Кондак 8.

Стра́нник земны́й был еси́, святи́телю, я́коже мно́зи от единоплеме́нник твои́х, не имы́й приста́нища во Оте́чествии твое́м, гони́м и поноша́ем от враг Христо́вых, не терпя́щих твоея́ святы́ни. Ты же сла́вил еси́ о всем Еди́наго И́стиннаго Бо́га, се́рдцем и усты́ поя́ небе́сную Ему́ песнь: Аллилу́иа.

Икос 8.

Всего́ себе́ во́ли Госпо́дни преда́в, страда́ния Его́ ра́ди за честь почита́л еси́, досточу́дне: тем преселе́ние во ото́к солове́цкий и в темни́це заточе́ние, я́ко от десни́цы Бо́жия восприя́л еси́. Мы же, покланя́ющеся му́жеству и долготерпе́нию твоему́, хвале́ния прино́сим ти такова́я:

Ра́дуйся, во святы́я ото́ки солове́цкия, обраще́нныя безбо́жники в ме́сто муче́ния, изгна́нный:

Ра́дуйся, ото́ком сим на утеше́ние и утвержде́ние в Бо́зе дарова́нный.

Ра́дуйся, ко мно́жеству архиере́ев и свяще́нник, та́мо томя́щихся, причте́нный:

Ра́дуйся, священному́чениче чу́дный, и страстоте́рпче соверше́нный.

Ра́дуйся, и во изгна́нии сый, досто́инство архиере́йское храни́вый:

Ра́дуйся, си́лою духо́вною и власти́телей безбо́жных покори́вый.

Ра́дуйся, Боже́ственную тишину́ и мир невозмути́м в души́ всегда́ име́вый:

Ра́дуйся, от Го́спода ти да́нный крест любо́вию и ра́достию претерпе́вый.

Ра́дуйся, священному́чениче Пе́тре, архипа́стырю Солове́цкий.

Кондак 9.

Вся́кое а́нгельское естество́ удиви́ся чу́дным подвиго́м твои́м, богоблаже́нне, ты бо я́ко еди́н от ору́жник небе́сных, до́блественне вои́нствовал еси́ на ду́хи зло́бы за Влады́ку твоего́ Христа́, воспева́я тому́ с ли́ки безпло́тных: Аллилу́иа.

Икос 9.

Вети́и суему́дреннии не мо́гут разуме́ти высоту́ доброде́телей твои́х, ниже́ глубину́ Боже́ственныя твоея́ любве́: тоя́ ра́ди мно́гая страда́ния благоду́шно претерпе́л еси́, во е́же от Го́спода ти неразлуче́ну бы́ти. Мы же, чту́щии свя́тость души́ твоея́ и си́лу духо́вною, Бо́гом ти дарова́нную, во умиле́нии глаго́лем:

Ра́дуйся, томле́ния и труды́ тя́жки в заточе́нии терпе́вый:

Ра́дуйся, о оскверне́нии всея́ Руси́ святы́я и солове́цкия оби́тели скорбе́вый.

Ра́дуйся, утеше́ние души́ твое́й в моли́тве обрета́вый:

Ра́дуйся, боже́ственную слу́жбу со свяще́нными соу́зники твои́ми неотсту́пно соверша́вый.

Ра́дуйся, за всю страну́ Росси́йскую благоприя́тну же́ртву Бо́гу приноси́вый:

Ра́дуйся, о пока́янии ея́ в серде́чнем сокруше́нии Го́спода моли́вый.

Ра́дуйся, служи́телю Христо́вы Це́ркве и моли́твенниче самоотрече́нный:

Ра́дуйся, Архиепи́скоп солове́цкий соу́зники твои́ми нарече́нный.

Ра́дуйся, священному́чениче Пе́тре, архипа́стырю Солове́цкий.

Кондак 10.

Спасти́ хотя́ ду́шу свою́, богому́дре, смире́ние кре́стное вку́пе со ины́ми доброде́тельми в дар Го́споду прине́сл еси́, уничижа́ющим и гоня́щим тя николи́же противля́яся: приста́нище после́днее земна́го жития́ твоего́ во ото́це а́нзерстем обре́л еси́, а́може приведе́ тя Человеколю́бец Бог, же́ртвы но́выя всеще́дрыя твоея́ жела́я. Ты же благопоко́рне прине́сл еси́ о́ную, любо́вию воспева́я Го́сподеви: Аллилу́иа.

Икос 10.

Сте́ну необори́му име́л еси́ благода́ть Госпо́дню, благи́й о́тче, защища́юшу тя от враг неви́димых, не мо́гущих души́ твоея́ погуби́ти: досто́ин бо тоя́ благода́ти яви́лся еси́ богоуго́дными труды́ твои́ми и умиле́нными моли́твами, и́миже умно́жил еси́ сла́ву сего́ ди́внаго ото́ка. Сего́ ра́ди покланя́ющеся всеми́лостивому Бо́гу, воспева́ем тя, еди́наго от избра́нных его́, хвале́нии таковы́ми:

Ра́дуйся, в безмо́лвии ото́ка а́нзерскаго я́ко пусты́нник пожи́вый:

Ра́дуйся, святы́ню му́ченичества твоего́ к сокро́вищем богоизбра́ннаго ото́ка приложи́вый.

Ра́дуйся, в ме́сте по́двигов пустыннолю́бнаго Елеаза́ра и любобезмо́лвнаго И́ова пребыва́вый:

Ра́дуйся, к та́йнам сокрове́нным их а́нгельскаго жи́тельства ду́хом приника́вый.

Ра́дуйся, преподо́бному Ге́рману, первонача́льнику солове́цкому, незри́мо бесе́довати сподо́бивыйся:

Ра́дуйся, вы́шним изволе́нием стихосло́вие ака́фистное сотвори́ти тому́ удосто́ивыйся.

Ра́дуйся, к по́мощи святы́х сея́ сла́вныя земли́ во страда́ниих твои́х прибега́вый:

Ра́дуйся, святу́ю па́мять твою́ со ото́ки солове́цкими наве́ки связа́вый.

Ра́дуйся, священному́чениче Пе́тре, архипа́стырю Солове́цкий.

Кондак 11.

Пение всеумиленное благодарною душею возносим ти, Всесвятый Владыко, Архиерею Небесный, яко даровал еси нам сего дивнаго пастыря, святаго Петра, на утешение и спасение душам нашим и избавление от погибели православныя России. Того подвиги песнословяще, тебе Богу нашему славу возсылаем пением хвалебным: Аллилуиа.

Икос 11.

Светоно́сен свети́льник во тьме безу́мия и мра́це беззако́ния горя́й, вся озаря́л еси́ сия́нием боже́ственныя благода́ти, просвеща́я ду́ши све́том и́стиннаго ра́зума: и до ото́ков се́верных дости́же свет боголю́бивыя души́ твоея́, да́же до безмо́лвныя а́нзерския пусты́ни, иде́же ты во святе́й горе́ Голго́фе, по́двиги и́ноческими просла́вленней, му́ченически сконча́л еси́ многотру́дное житие́ твое́. Сего́ ра́ди воспева́ем долготерпе́ние твое́, о́тче пра́ведне, и любо́вию простира́ющеся к тебе́, умиле́нно взыва́ем:

Ра́дуйся, в после́дния дни жития́ твоего́, лю́те неду́гуя, сла́дость вы́шняго ми́ра па́че позна́вый:

Ра́дуйся, в подража́ние Го́споду на горе́ Голго́фе в ру́це Бо́жии ду́шу преда́вый.

Ра́дуйся, же́ртвою честно́ю твое́ю свяще́нное селе́ние сие́ па́ки освяти́вый:

Ра́дуйся, ди́вная зна́мения и чудеса́ по кончи́не твое́й ми́лостивно яви́вый.

Ра́дуйся, всем се́рдцем твои́м возлюби́вый Христа́, и вся до конца́ за Того́ претерпе́вый:

Ра́дуйся, безпреткнове́нно во оби́тели го́рния душе́ю возлете́вый.

Ра́дуйся, чу́дным житие́м твои́м и кончи́ною пра́ведною Бо́га просла́вивый:

Ра́дуйся, мо́щи честны́я твоя́ и свяще́нную па́мять твою́ на земли́ нам оста́вивый.

Ра́дуйся, священному́чениче Пе́тре, архипа́стырю Солове́цкий.

Кондак 12.

Благода́ти обита́ющей в тебе́ дивя́щеся, велича́ем тя, святи́телю наш незабве́нный Пе́тре: ве́руем, я́ко дела́ Бо́жия на земли́ соверши́в, и страда́ния ве́лия претерпе́в, ны́не с Го́сподем во оби́телех Его́ почива́еши, призира́я на нас с высоты́ небе́сныя, и приклоня́я к нам вы́шнее милосе́рдие. На твое́ заступле́ние наде́ющеся, и на благода́тную по́мощь твою́ упова́юще, пое́м ди́вному во святы́х Свои́х Бо́гу: Аллилу́иа.

Икос 12.

Пою́ще богоуго́дное житие́ твое́, благодея́ний испо́лнено, достохва́льне Пе́тре, и кончи́ну твою́ му́ченическую прославля́юще, благода́рным се́рдцем, лю́бовию боже́ственною дви́жимым, ублажа́ем твою́ святы́ню, и па́мять твою́ све́тло пра́зднующе, ра́достию зове́м ти:

Ра́дуйся, свя́тче, в та́йны боже́ственныя посвяще́нный:

Ра́дуйся, сы́не Ца́рствия Небе́снаго благослове́нный.

Ра́дуйся, свети́льниче, в после́дняя времена́ нам Бо́гом дарова́нный:

Ра́дуйся, предста́телю о многострада́льней стране́ Росси́йстей, Го́сподем избра́нный.

Ра́дуйся, Це́ркве Правосла́вныя благоукраше́нный ве́нче:

Ра́дуйся, Христо́в преди́вный испове́дниче и страстоте́рпче.

Ра́дуйся, о́браз страда́ния и любве́ ко Го́споду нам явля́яй:

Ра́дуйся, на у́зкий путь спасе́ния нас наставля́яй.

Ра́дуйся, священному́чениче Пе́тре, архипа́стырю Солове́цкий.

Кондак 13.

О, пресла́вный и пречу́дный уго́дниче Бо́жий, / святы́й му́чениче за ве́ру Христо́ву, / страстоте́рпче Росси́йский, святи́телю Пе́тре! / Приими́ от нас недосто́йных и гре́шных, / сие́ ма́лое моле́ние на́ше, благогове́йно и тре́петно тебе́ приноси́мое. / Испроси́ у Всеми́лостиваго Влады́ки твоего́ Христа́, / Ему́же ны́не со дерзнове́нием предстои́ши, / проще́ния и оставле́ния мно́зем грехо́м на́шим, / напра́ви нас ко стези́ покая́ния, / да тем изба́вльшеся лю́тых страсте́й, изба́вимся и мук ве́чных, / и в ра́дости неизглаго́ланней Ца́рства Небе́снаго / воспои́м с тобо́ю Христу́ Бо́гу: // Аллилу́иа, аллилу́иа, аллилу́иа.

Икос 1.

А́нгельски над ми́ром мяте́жным к высоте́ небе́сней возлете́л еси́ крила́ми богода́нными, святи́телю о́тче Пе́тре, херуви́мски созерца́я бе́здну милосе́рдия Бо́жия, серафи́мскою любо́вию пыла́я ко своему́ Созда́телю, прославля́л еси́ Того́ глаго́лом вдохнове́нным. Те́мже и от нас приими́ благода́рныя любве́ воздая́ния, да ра́дующимся се́рдцем и умиле́нною душе́ю воспева́ем ти:

Ра́дуйся, пла́менем Боже́ственныя любве́ от ю́ности возжже́нный:

Ра́дуйся, мно́гими доброде́тельми от мла́дости украше́нный.

Ра́дуйся, о́трасле до́брая ко́рене благочести́ваго:

Ра́дуйся, сы́не сла́вный Оте́чества многотерпели́ваго.

Ра́дуйся, любо́вию Христо́вою неотсту́пно назира́емый:

Ра́дуйся, во благонра́вии то́ю му́дре соблюда́емый.

Ра́дуйся, вла́стию Госпо́днею на путь свяще́ннаго служе́ния наста́вленный:

Ра́дуйся, десни́цею Вы́шняго в Ца́рство Небе́сное упра́вленный.

Ра́дуйся, священному́чениче Пе́тре, архипа́стырю Солове́цкий.

Кондак 1.

Избра́нный святи́телю Госпо́день, испове́дниче и му́чениче Христо́в, / ве́рою и любо́вию до конца́ Влады́це своему́ послужи́вый, / по́двиги мно́ги соверши́в, страда́ния ве́лия за Христа́ му́жественне претерпе́вый, / ли́ку небе́сному страстоте́рпцев росси́йских благоче́стно совокупи́выйся, / заступа́й нас моли́твами твои́ми, досточу́дне, да велегла́сно вопие́м ти:

Ра́дуйся, священному́чениче Пе́тре,архипа́стырю Солове́цкий.

Молитва священномученику Петру, архиепископу Воронежскому, новомученику Соловецкому

О, досточу́дне Пе́тре, священному́чениче и страстоте́рпче сла́вный, еди́н от со́нма новому́чеников солове́цких и всея́ земли́ Росси́йския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя! Все житие́ твое́ любве́ ко Го́споду и страда́ний о Христе́ испо́лнено: мно́ги муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́, и венце́м нетле́нныя твоея́ сла́вы украси́л еси́ Це́рковь Ру́сскую. Вся преда́в в ру́це Бо́жии, до́блественне слу́жбу твою́ на земли́ соверши́в, в Голго́фе а́нзерстей кончи́ну му́ченическую прия́ти сподо́бился еси́, богоблаже́нне. Ны́не к небе́сному ли́ку причте́нный, в Ца́рстве Боже́ственныя любве́ пребыва́еши, со мно́гими жи́тели го́рняго Иерусали́ма исполне́ния же́ртвы му́ченическия за Христа́ ожида́я: егда́ вся и́мже належи́т бы́ти, соверша́тся в преде́лех земны́х. О, пресвяты́й о́тче наш Пе́тре, помози́ нам хра́мину се́рдца своего́ незапусте́вшу храни́ти, научи́ нас ра́дость во страда́ниих о Христе́ обрета́ти, озари́ путь наш кре́стный сия́нием твоея́ святы́ни. Бу́ди и ны́не нам утвержде́ние в ве́ре, да прише́д обрете́т ю́ Госпо́дь не уга́снувшу. Умоли́ Творца́ вся́ческих дарова́ти нам си́лу и кре́пость: да не устраши́вшеся стра́ха лука́ваго, испове́даем тве́рдо Христа́, и Его́ милосе́рдием ча́сти злых изба́вимся в день стра́шный воздая́ния, и в ра́дость ве́чную всели́мся, сла́вяще о всем Вседержи́теля Бо́га, и твое́ благода́тное предста́тельство во ве́ки веко́в. Ами́нь.

Тропарь, глас 4:

Ве́рою пла́менною апо́столу Петру́ подо́бяся, / та́же и трикра́тным слы́шанием воззва́ния Христо́ва, / ду́шу твою́ за Того́ положи́л еси́, святи́телю о́тче Пе́тре, / ка́меню тве́рдый Це́ркве Правосла́вныя: / свети́льниче во мра́це беззако́ний доброде́тельми сия́яй, / ра́достию страда́ния за Христа́ претерпе́ти изво́лил еси́, / со испове́дники и страстоте́рпцы Росси́йскими. / Моли́ся с ни́ми о нас, архиере́ю Бо́жий, // священному́чениче Солове́цкий.

Ин тропарь, глас тойже:

До́брый па́стырю и стро́гий исполни́телю за́поведей Бо́жиих, / ревни́телю благоче́стия и сто́лпе утвержде́ния, / священному́чениче Пе́тре, / пребыва́я во ото́це а́нзерстем, / в годи́ну лю́тых гоне́ний не убоя́лся еси́ испове́дати ве́ру Христо́ву, / и претерпе́л еси́ да́же до сме́рти. / Ны́не же, я́ко име́я дерзнове́ние и предстоя́ Престо́лу Госпо́дню, / моли́ Христа́ Бо́га // спасти́ся душа́м на́шим.

Кондак, глас 8:

Во святи́тельстве твое́м до́бре подвиза́лся еси́, богому́дре, / и му́ченичества венце́м све́тло украси́лся еси́, / преще́ния враго́в Христо́вых не устраши́вся, / кровьми́ твои́ми зе́млю во ото́це а́нзерстем освяти́л еси́: / сего́ ра́ди си́лы небе́сныя удиви́шася терпе́нию твоему́, / мы же с ве́рою и любо́вию притека́ем ко святы́м моще́м твои́м, досточу́дне. / Ны́не со все́ми новому́ченики Росси́йскими моли́ о нас Христа́ Бо́га, всеблаже́нне Пе́тре, да зове́м ти: // Ра́дуйся, о́тче приснопа́мятне.

Ин кондак, глас 6:

Подобен: А́нгельския си́лы:

На любо́вь Боже́ственную всем се́рдцем отозва́выйся, / вся я́же возмо́гл еси́ блага́я, воздаде́ Тому́, / златоу́стый пра́вды Бо́жия пропове́дниче, / златосе́рдый храни́телю та́ин Госпо́дних, / фаво́ра сла́внаго святи́тельское отраже́ние, / Голго́фы а́нзерския же́ртво всесоверше́нная: / испове́дниче Христо́в, священному́чениче Пе́тре, // помина́й нас, любо́вию чту́щих святу́ю па́мять твою́.